Telangana

– చాలా రోజుల తర్వాత అసెంబ్లీకి కేసీఆర్
– బెంజ్ కారులో ఎంట్రీ
– ఎమ్మెల్యేగా ప్రమాణ స్వీకారం
– ప్రతిపక్ష నేత కార్యాలయంలో పూజలు
– ఉత్సాహంలో గులాబీ శ్రేణులు

కొత్తగా రాష్ట్రం ఏర్పడిన తర్వాత తెలంగాణ సీఎంగా రెండుసార్లు పదవి చేపట్టిన కేసీఆర్.. అసెంబ్లీ ఎన్నికల ఓటమి తర్వాత ప్రత్యక్షంగా, పరోక్షంగా రాజకీయాలకు ఇన్నాళ్లూ దూరంగా ఉన్నారు. అనారోగ్య కారణాల వల్ల ఇంటికే పరిమితమయ్యారు. అయితే.. చాలా రోజుల తర్వాత గులాబీ బాస్ అసెంబ్లీలో అడుగు పెట్టారు. వైట్ కలర్ కొత్త బెంజ్ కారులో ఎంట్రీ ఇచ్చిన ఆయనకు గులాబీ శ్రేణులు స్వాగతం పలికారు.

చేతి కర్ర పట్టుకొని వచ్చిన కేసీఆర్ వెంట.. మాజీ మంత్రులు, మాజీ ఎమ్మెల్యేలు, ప్రస్తుత ఎమ్మెల్యేలు, ఎంపీలు, ఎమ్మెల్సీలు, తదితరులు ఉన్నారు. అసెంబ్లీలో గజ్వేల్‌ ఎమ్మెల్యేగా.. కేసీఆర్ చేత స్పీకర్‌ ప్రసాద్‌ కుమార్‌ ప్రమాణం చేయించారు. ప్రమాణం అనంతరం అసెంబ్లీలోని ప్రతిపక్ష నేత కార్యాలయంలో పూజలు చేశారు.

మొన్నటి ఎన్నికల్లో కేసీఆర్‌ గజ్వేల్‌ ఎమ్మెల్యేగా ఎన్నికయ్యారు. డిసెంబర్‌ లో కొత్తగా ఎన్నికైన ఎమ్మెల్యేలతో ప్రొటెం స్పీకర్‌ అక్బరుద్దీన్‌ ఒవైసీ ప్రమాణం చేయించారు. మరికొందరు స్పీకర్ ప్రసాద్ సమక్షంలో అసెంబ్లీలో చేశారు. కానీ, తుంటి ఎముక ఆపరేషన్ కారణంగా ఇంటికే పరిమితమైన కేసీఆర్.. ఇప్పటిదాకా చేయలేదు.

ఈ నేపథ్యంలో గురువారం ఆయన అసెంబ్లీకి వచ్చి ఎమ్మెల్యేగా ప్రమాణం చేశారు. సీఆర్ ఎంట్రీ కోసం ఇన్ని రోజులుగా ఆశతో ఎదురుచూసిన గులాబీ నేతలకు ఆయన రాకతో జోష్ వచ్చినట్లు కనిపిస్తోంది. త్వరలో పార్లమెంట్ ఎన్నికలు ఉన్న నేపథ్యంలో గులాబీ బాస్ ఎలాంటి వ్యూహాలు రచిస్తారో ఆనేది ఆసక్తికరంగా మారింది.

– ముఖ్యమంత్రిని కలిస్తే తప్పేంటి..?
– త్వరలో నేను కూడా కలుస్తా
– కాంగ్రెస్ గెలుస్తుందని కలలో కూడా అనుకోలేదు
– పార్టీ ఓటమి నుంచి ఇంకా తేరుకోలేదు
– అధిష్టానం ఎంపీగా పోటీ చేయమంటోంది
– నేను నా కుమారుడికి ఇవ్వాలని అడుగుతున్నా
– మల్లారెడ్డి కీలక వ్యాఖ్యలు

సోషల్ మీడియాలో కానీ, రాజకీయాల్లో కానీ ప్రత్యేకంగా కనిపించే మాజీ మంత్రి మల్లారెడ్డి సంచలన వ్యాఖ్యలు చేశారు. త్వరలో సీఎం రేవంత్ రెడ్డిని కలుస్తానని ప్రకటించారు. గురువారం తెలంగాణ భవన్‌ లో మీడియాతో చిట్‌ చాట్ నిర్వహించిన ఆయన.. గతంలో తామిద్దరం టీడీపీలో కలిసి పనిచేశామని తెలిపారు.

ప్రస్తుతం నియోజకవర్గ అభివృద్ధి కోసం ముఖ్యమంత్రిని కలుద్దామని నిర్ణయించుకొన్నానని తెలిపారు. అధికారంలో ఉన్న వారితో ఎన్నో పనులుంటాయని.. వాటి కోసం కలిస్తే తప్పేముందని వ్యాఖ్యానించారు. సీఎంను కలిసే ముందు చర్చకు తావులేకుండా మీడియాకు సమాచారం ఇస్తానని వెల్లడించారు.

మరోవైపు, అసెంబ్లీ ఎన్నికల్లో తాము ఓడిపోతామని.. కాంగ్రెస్ గెలుస్తుందని కలలో సైతం ఊహించలేదన్నారు. ఈ విషయంలో తాము ఇంకా షాక్‌ లో ఉన్నామని.. ఆ షాక్‌ నుంచి ఒక్కొక్కరం మెల్లగా తేరుకొంటున్నామని అన్నారు. మరోవైపు తాను ఎంపీగా పోటీ చేసే అంశంపై స్పందించారు. ఆ టికెట్‌ ను తన కుమారుడు భద్రారెడ్డికి అడుగుతున్నానని తెలిపారు.

పార్టీ టికెట్ ఎవరికిచ్చినా బీఆర్ఎస్ గెలుపు కోసం ప్రచారం చేస్తానని తెలిపారు. రాజ్యసభ, లోక్ సభ ఎన్నికలు సమీపిస్తోన్న సందర్భంగా బీఆర్ఎస్ ఎమ్మెల్యేలు రేవంత్ రెడ్డిని మీట్ అవుతుండడం చర్చనీయాంశంగా మారింది. అభివృద్ధి కోసం కలిశామని నేతలు ప్రకటిస్తున్నా..తెర వెనుక ఏదో జరుగుతోందని అనుమానాలు వ్యక్తం అవుతున్నాయి.

హైదరాబాద్ (Hyderabad) విశ్వనగరంగా మారుతోన్న నేపథ్యంలో ఎన్నో మార్పులు చోటుచేసుకొంటున్న విషయం తెలిసిందే.. ఐటీ కంపెనీలకు, ముఖ్యంగా టెక్ కంపెనీలకు కేరాఫ్ అడ్రస్ గా మారిన నగరంలో నివసించే వారిలో ఎక్కువ మంది ఇతర రాష్ట్రాలకు చెందిన వారే ఉన్నారు. అదీగాక దేశం నలుమూలల నుంచి ఉపాధికోసం ఎందరో నిత్యం వలస రావడం వల్ల రోజు రోజుకు హైదరాబాద్ జనాభా పెరుగుతోంది తప్ప తగ్గడం లేదు.

అయితే ప్రస్తుతం ఉన్న జనాభాతో ట్రాఫిక్ సమస్యలు మరియు కాలుష్యం ఎక్కువగా ఏర్పడటం కనిపిస్తోంది. రానున్న రోజుల్లో ఈ కష్టాలు మరింత పెరిగే అవకాశం ఉన్నదనే వాదనలు వినిపిస్తున్నాయి.. కాబట్టి వీటన్నింటిని దృష్టిలో ఉంచుకొనినగరం పై ఒత్తిడి తగ్గించేందుకు హెచ్ ఎండీఏ (HMDA) ప్రణాళికలు రచిస్తోంది.. ఇందులో భాగంగా హైదరాబాద్ నగర శివార్లలో మినీ సిటీల నిర్మాణానికి సిద్ధమైంది.

ఇప్పటికే ఈ అంశంపై గత ప్రభుత్వానికి అధికారులు తమ ప్రతిపాదనను వెల్లడించారు. కానీ, అక్కడి నుంచి ఎలాంటి స్పందన రాకపోవడం వల్ల పనులు ముందుకు సాగలేదని తెలుస్తోంది. అయితే ప్రస్తుతం ప్రభుత్వం మారడంతో ఈ ప్రాజెక్ట్ మళ్లీ తెరపైకి వస్తోంది. శివార్లలో కొత్త నగరాల (New Cities)ను నిర్మించడం వల్ల రద్దీ, కాలుష్యం, ట్రాఫిక్ సమస్యలు తొలగిపోతాయని, ప్రజా రవాణా వ్యవస్థలు కూడా మెరుగుపడతాయని భావిస్తున్నారు..

ఈ క్రమంలో నగర శివార్లలోని 11 ప్రాంతాల్లో మినీ సిటీలను అభివృద్ధి చేయాలని భావిస్తున్నట్లు ఓ ఉన్నతాధికారి వెల్లడించారు. ఈ క్రమంలో ఇబ్రహీం పట్నం, తుర్కపల్లి ప్రాంతాలను మినీ సిటీలుగా అభివృద్ధి చేస్తే బాగుంటుందని అధికారులు భావిస్తున్నట్లుగా వార్తలు వినిపిస్తున్నాయి.. ఇందులో బ్యాంకులు, హోటళ్లు, షాపింగ్ మాల్స్ నిర్మిస్తే ఆయా ప్రాంతాల నుంచి వచ్చే ప్రజలు హైదరాబాద్ కు రావాల్సిన అవసరం తగ్గుతుందని భావిస్తున్నారు.. ఈ ప్రణాళిక అమలైతే నగర శివారుల రూపురేఖలు పూర్తిగా మారనున్నట్లు తెలుస్తోంది..

కాంగ్రెస్ సర్కార్(Congress Government) ప్రజాపాలన పేరుతో ఆరు గ్యారంటీల అమలుకు ‘అభయ హస్తం’ దరఖాస్తులను స్వీకరించిన సంగతి తెలిసిందే. ఆ దరఖాస్తులను డిజిటలైజ్ చేసేందుకు డేటా ఎంట్రీ ఆపరేటర్ల(Data Entry Operaters)ను నియమించింది. ఈ క్రమంలో వివిధ కాలేజీల్లో విద్యార్థుల సేవలను ప్రభుత్వం వినియోగించుకుంది.

అయితే, తాము చేసిన పనికి ఇంత వరకు డబ్బులు ఇవ్వలేదంటూ విద్యార్థులు ఆరోపిస్తున్నారు. హైదరాబాద్‌లోని ఉప్పల్ జీహెచ్ఎంసీ పరిధిలో అభయహస్తం దరఖాస్తులను డిజిటలైజేషజ్ చేసేందుకు వివిధ కళాశాలలకు చెందిన 130 మంది విద్యార్థుల సేవలను అధికారులు వినియోగించుకుంటున్నారు.

అయితే, వారందరికీ అందుకు తగిన డబ్బులను ఇంతవరకు చెల్లించలేదు. చేసిన పనికి డబ్బులివ్వాలని కోరితే.. అధికారులు నిర్లక్ష్యగా సమాధానం ఇస్తున్నారని వారు తెలిపారు. ఈ మేరకు ఇవాళ ఉప్పల్ జీహెచ్ఎంసీ కార్యాలయం ఎదుట ధర్నా దిగారు. తాము చేసిన పనికి వెంటనే డబ్బులివ్వాలని డిమాండ్ చేశారు. ఈ నేపథ్యంలో డేటా ఎంట్రీ ఆపరేటర్లపై ప్రభుత్వ నిర్లక్ష్యంపై విమర్శలు వ్యక్తమవుతున్నాయి.

కాగా, ప్రజాపాలన కార్యక్రమం ద్వారా ప్రభుత్వం గ్యారంటీల కోసం 1,05,91,636 దరఖాస్తులు రాగా, ఇతర పథకాల కోసం మరో 19,92,747 దరఖాస్తులు ప్రభుత్వానికి అందాయి. ఆరు గ్యారంటీల్లో ప్రభుత్వం ఇప్పటి వరకు మహిళలకు ఉచిత బస్సు ప్రయాణం, ఆరోగ్య శ్రీ బీమా కింద వైద్య పరిమితి రూ.10 లక్షలకు పెంచింది. ప్రస్తుతం మిగతా హామీలపై దృష్టి పెట్టింది.