Telangana

బీఆర్ఎస్ (BRS)ఎమ్మెల్యేలు వరుసగా సీఎం రేవంత్ రెడ్డి (CM Revanth Reddy)ని కలవడం గులాబీ పార్టీలో గుబులు రేపుతోంది. ఇప్పటికే నలుగురు బీఆర్ఎస్ ఎమ్మెల్యేలు రేవంత్ రెడ్డిని కలవడంతో ఆ పార్టీలో కలవరం మొదలైంది. తాజాగా మరో బీఆర్ఎస్ నేత, మాజీ ఎమ్మెల్యే తీగల కృష్ణా రెడ్డి (Teegala Krishna Reddy) సీఎం రేవంత్ రెడ్డిని కలవడం ఇప్పుడు హాట్ టాపిక్ గా మారింది.

గతంలో హైదరాబాద్ మేయర్‌గా, మహేశ్వరం ఎమ్మెల్యేగా పని చేశారు. తెలంగాణ రాష్ట్రం ఏర్పాటయ్యాక మారిన పరిస్థితుల నేపథ్యంలో ఆయన బీఆర్ఎస్‌లో చేరారు. 2018 ఎన్నికల్లో అప్పటి కాంగ్రెస్ అభ్యర్థి సబితా ఇంద్రారెడ్డి చేతిలో పరాజయం పాలయ్యారు. ఆ తర్వాత సబితా ఇంద్రారెడ్డి కూడా బీఆర్ఎస్ కండువా కప్పుకున్నారు.

ఆ తర్వాత పార్టీలో ఆయనకు ప్రాధాన్యత తగ్గింది. గత అసెంబ్లీ ఎన్నికల్లో ఆయన మహేశ్వరం టికెట్ ఆశించారు. కానీ ఆయనకు కేసీఆర్ టికెట్ కేటాయించలేదు. దీంతో ఆయన అసంతృప్తికి గురయ్యారు. మొదట్లో ఎమ్మెల్సీ ఇస్తానని, ఆ తర్వాత ఎమ్మెల్యే టికెట్ ఇస్తానని కేసీఆర్ హామీ ఇచ్చారని కానీ ఆ మాట నిలబెట్టుకోలేకపోయారని తన సన్నిహితుల దగ్గర తీగల వాపోయినట్టు తెలుస్తోంది.

మరోవైపు మాజీ మంత్రి, సీనియర్ నేత మోత్కుపల్లి నరసింహులు కూడా సీఎం రేవంత్ రెడ్డిని కలిశారు. తాజాగా మోత్కుపల్లి కూడా ఈ రోజు సచివాలయంలో రేవంత్ రెడ్డిని కలిసి శుభాకాంక్షలు తెలిపారు. రేవంత్ సర్కార్ నెల రోజుల పాలన చూస్తుంటే చాలా సంతోషంగా ఉందని చెప్పారు. కాంగ్రెస్ ప్రభుత్వం ప్రజా పాలన ఒరవడితో ముందుకు సాగుతోందన్నారు.

అసెంబ్లీ ఎన్నికలకు ముందు ఇచ్చిన ఆరు గ్యారెంటీ (six guarantees )లను ఒక్కొక్కటిగా రేవంత్ రెడ్డి ప్రభుత్వం అమలు చేస్తూ వస్తోంది. తాజాగా మరో గ్యారెంటీని అమలు చేసేందుకు రేవంత్ సర్కార్ రెడీ అవుతోంది. తాజాగా సీఎం రేవంత్ రెడ్డి (CM Revanth Reddy) కీలక ఆదేశాలు జారీ చేశారు.

కళ్యాణ లక్ష్మీ, షాదీ ముబారక్ పథకాల కింద లబ్ధిదారులకు నగదు రూ.లక్షతో పాటు తులం బంగారం ఇచ్చేందుకు అంచనాలు రూపొందించాలని అధికారులను రేవంత్ రెడ్డి ఆదేశించారు. సచివాలయంలో బీసీ, మైనారిటీ, గిరిజన సంక్షేమ మంత్రులతో సీఎం రేవంత్‌ సమీక్ష సమావేశాన్ని నిర్వహించారు.

మంత్రులు పొన్నం ప్రభాకర్, సీతక్క, ప్రభుత్వ సలహాదారు షబ్బీర్ అలీ ఇతర అధికారులు ఈ సమావేశానికి హాజరయ్యారు. ప్రతి లోక్ సభ నియోజకవర్గానికి ఒక బీసీ స్టడీ సర్కిల్ ఏర్పాటు చేసేందుకు గాను అధ్యయనం చేయాలని అధికారులను ఆదేశించారు. అద్దె భవనాల్లో ఉన్న గురుకులాలకు సొంత భవనాల నిర్మాణానికి కోసం భూమిని గుర్తించాలని అధికారులకు సూచించారు.

ఈ మేరకు గురుకులాలకు సొంత భవనాల నిర్మాణానికి అంచనా వ్యయాన్ని రూపొందించాలని ఆదేశాలు జారీ చేశారు. సంక్షేమ హాస్టళ్లకు గ్రీన్ ఛానెల్ ద్వారా నిధులు విడుదల చేసే ప్రణాళికలు చేయాలని అధికారులకు సూచించారు. అంతకు ముందు సచివాలయంలో మేడారం మహాజారత పోస్టర్ ను ఆవిష్కరించారు.

ఉస్మానియా యూనిర్శిటీ (Osmania University)లోని పీజీ కళాశాల (PG College) విద్యార్థినులు ఆందోళన చేపట్టారు. గుర్తు తెలియని వ్యక్తులు తమ హాస్టల్ ప్రాంగణంలోకి ప్రవేశించారని చెబుతూ కళాశాల ఎదుట బైఠాయించారు. హాస్టల్‌లో తమకు భద్రత కల్పించాలని విద్యార్థినులు డిమాండ్ చేశారు.

నిందితులను గుర్తించి కఠినంగా శిక్షించాలని ఆందోళన చేపట్టారు. ముగ్గురు ఆగంతకులు శనివారం ఉదయం గోడ దూకి హాస్టల్ ప్రాంగణంలోకి ప్రవేశించారు. ఓ విద్యార్థిని వాష్ రూంలోకి వెళ్లగానే ఆగంతకులు వెంటిలెటర్ పై నుంచి చేతులు లోపలికి పెట్టి సైగలు చేశారని విద్యార్థినులు చెప్పారు.

ఈ క్రమంలో భయంతో సదరు విద్యార్థిని కేకలు పెట్టడంతో హాస్టల్ లోని విద్యార్థుల మంతా బయటకు వచ్చామన్నారు. ముగ్గురు వ్యక్తులు పారిపోతుండగా పట్టుకునే ప్రయత్నం చేశామని చెప్పారు. ఆ సమయంలో ఓ విద్యార్థిని దుండగులు గాయపరిచారని పేర్కొన్నారు. అందులో ఇద్దరు వ్యక్తులు పారిపోగా మరో వ్యక్తిని పట్టుకున్నామని వెల్లడించారు.

అనంతరం నిందితునికి దేహశుద్ది చేసి విద్యార్థినులు పోలీసులకు అప్పగించారు. హాస్టల్‌లో తమకు భద్రత కరువైందని విద్యార్థినులు ఆందోళన వ్యక్తం చేస్తున్నారు. ఇలాంటి ఘటనలు జరగకుండా చర్యలు తీసుకోవాలని డిమాండ్ చేశారు. వీసీ వచ్చి తమకు హామీ ఇవ్వాలని ఆందోళన చేశారు. దీనిపై డీసీపీ రోహిణి ప్రియదర్శిని స్పందించారు. కళాశాల ప్రిన్సిపల్ తో మాట్లాడి చర్యలు తీసుకుంటామన్నారు.

కాంగ్రెస్ (Congress), బీఆర్ఎస్ (BRS) రెండూ కుటుంబ పార్టీలేనని కేంద్ర మంత్రి కిషన్ రెడ్డి (Kishan Reddy) అన్నారు. ఆ రెండు పార్టీల డీఎన్ఏ ఒకటేనని విమర్శలు గుప్పించారు. బీఆర్ఎస్ అవినీతిపై చర్యలు తీసుకునేందుకు కాంగ్రెస్​ ప్రభుత్వం వెనకడుగు వేస్తోందని చెప్పారు. కేంద్రంలో వచ్చేది మళ్లీ మోడీ ప్రభుత్వమేనని వెల్లడించారు.

గచ్చిబౌలిలో మాజీ ఎంపీ కొండా విశ్వేశ్వర్ రెడ్డి అధ్యక్షతన చేవెళ్ల ఎంపీ సెగ్మెంట్​ పరిధిలోని బీజేపీ ముఖ్య నాయకులు, కార్యకర్తల సమావేశాన్ని నిర్వహించారు. ఈ సమావేశంలో కిషన్ రెడ్డి పాల్గొని మాట్లాడుతూ…. తమ తమ బూత్‌ పరిధిలో తామే గెలవాలన్న కసితో నాయకులు, కార్యకర్తలంతా పనిచేయాలని సూచించారు. కేంద్రం అమలు చేస్తున్న పథకాలను ప్రజలకు అర్థమయ్యేలా వివరించాలన్నారు.

పార్లమెంట్ ఎన్నికల కోసం బూత్ స్థాయి నుంచే పక్కా ప్రణాళికతో పనిచేయాలని కోరారు. ఈ ఎన్నికల్లో మెజార్టీ సీట్లు సాధించేందుకు కృషి చేయాలని పిలుపునిచ్చారు. ఎంపీ ఎన్నికల్లో తెలంగాణ బీజేపీదేనని ధీమా వ్యక్తం చేశారు. కాంగ్రెస్, బీఆర్ఎస్‌తో ప్రజలకు ఒరిగేదేమీ లేదన్నారు. బీఆర్ఎస్ అవినీతిని కప్పిపుచ్చాలని కాంగ్రెస్ చూస్తోందని పేర్కొన్నారు.

కాళేశ్వరంపై దర్యాప్తునకు తాము సిద్ధమని సీబీఐ చెబుతోందని తెలిపారు. కానీ సీబీఐ విచారణకు కాంగ్రెస్ ఎందుకు ఆదేశించడం లేదని ప్రశ్నించారు. ఈ రెండు పార్టీలు ఒకటేనని దీని ద్వారా అర్థమవుతోందన్నారు. బీఆర్ఎస్‌కు ఓటు వేస్తే మూసీలో వేసినట్టేనని స్పష్టం చేశారు. బీజేపీతోనే తెలంగాణ అభివృద్ధి సాధ్యమైందని వివరించారు.

తొమ్మిదిన్నరేండ్లలో లక్షల కోట్ల రూపాయల నిధులను రాష్ట్రానికి మోడీ ప్రభుత్వం ఇచ్చిందన్నారు. జాతీయ రహదారులు, రైల్వేలు, ఇతర ప్రాజెక్టులు సహా ట్రైబల్​ వర్సిటీ, పసుపుబోర్డు, వందే భారత్​ రైళ్లు, రైల్వే స్టేషన్ల ఆధునికీకరణ వంటి ఇతర అంశాలను ప్రజల్లోకి తీసుకెళ్లాలలి కార్యకర్తలకు దిశా నిర్దేశం చేశారు.

తెలంగాణ కుంభ మేళాగ ప్రసిద్ధి చెందిన మేడారం (Medaram) జాతర ఫిబ్రవరి 21 నుంచి 24 వరకు జరగనుంది. ఈ జాతరకు దేశంలోని పలు ప్రాంతాల నుంచి భక్తుల వస్తుంటారు. ఈ ఏడాది కూడా భారీ సంఖ్యలో భక్తులు జాతరకు హాజరవుతారని అధికారులు అంచనా వేస్తున్నారు. ఈ మేరకు భక్తుల కోసం ప్రత్యేక బస్సుల (Buses)ను ప్రభుత్వం ఏర్పాటు చేస్తోంది.

ఇది ఇలా వుంటే తెలంగాణ ప్రభుత్వం మహిళలకు కల్పిస్తున్న ఉచిత బస్సు ప్రయాణ సౌకర్యం మేడారం జాతరకు వర్తించదని ఇటీవల టీఎస్ ఆర్టీసీ ఎండీ సజ్జనార్ వెల్లడించారు. కానీ తాజాగా మహిళలకు కాంగ్రెస్ ప్రభుత్వం గుడ్ న్యూస్ చెప్పింది. మహాలక్ష్మీ పథకం కింద ప్రభుత్వం కల్పిస్తున్న ఉచిత ప్రయాణం సౌకర్యం మేడారం జాతరకు కూడా వర్తిస్తుందని డిప్యూటీ సీఎం భట్టి విక్రమార్క వెల్లడించారు.

అంతకు ముందు మేడారం జాతర బస్సుల్లో మహిళలకు ఉచిత ప్రయాణం వర్తింప చేయకుండా ఛార్జీలు వసూలు చేస్తామని టీఎస్ఆర్టీసీ ప్రతిపాదించింది. ఇటీవల రాష్ట్ర బడ్జెట్‌కు సంబంధించి డిప్యూటీ సీఎం భట్టి విక్రమార్కతో రవాణాశాఖ మంత్రి పొన్నం ప్రభాకర్‌, ఆర్టీసీ ఉన్నతాధికారులు సమావేశం అయ్యారు. ఈ సమావేశంలో ఆర్టీసీ ప్రతిపాదనల గురించి చర్జ జరిగింది.

మేడారం జాతరకు నడిపే ప్రత్యేక బస్సుల్లో టికెట్లకు డబ్బులు వసూలు చేస్తే టీఎస్ఆర్టీసీ ఆదాయం భారీగా పెరుగుతుందన్న సజ్జనార్ ప్రతిపాదనలను ప్రభుత్వం తిరస్కరించినట్టు తెలుస్తోంది. మహిళలకు ఉచిత ప్రయాణ పథకాన్ని అమలు చేయాల్సిందేనని ఆదేశించినట్టు తెలుస్తోంది. వన దేవతలను దర్శించుకునేందుకు మహిళా భక్తులు బస్సుల్లో ఉచితంగా ప్రయాణం చేయవచ్చని చెప్పారు.

ఇక ఈ ఏడాది మేడారం జాతరకు కోటి మందికి పైగా భక్తులు వస్తారని అధికారులు అంచనా వేస్తున్నారు. భక్తుల రద్దీని దృష్టిలో పెట్టుకుని ప్రత్యేక ఏర్పాట్లు చేస్తున్నారు. జాతర కోసం ప్రత్యేకంగా 6,000 ప్రత్యేక బస్సులను నడపాలని ఇటీవల ఆర్టీసీ నిర్ణయించింది. హైదరాబాద్ నుంచి మరో రెండు వేల బస్సులను నడిపించేందుకు ఏర్పాట్లు చేస్తోంది.

బీఆర్ఎస్ (BRS) వర్కింగ్ ప్రెసిడెంట్, మాజీ మంత్రి కేటీఆర్ (KTR) ఎప్పుడు బయటకు వెళ్లినా భారీ కాన్వాయ్, ఫుల్ సెక్యూరిటీతో వెళతారు. ఆయన చుట్టూ పార్టీ నేతలు, మీడియా హడావుడి ఉంటుంది. కానీ తాజాగా దీనికి భిన్నంగా కేటీఆర్ ప్రయాణించారు. ఎలాంటి ఆర్బాటం లేకుండా ఆటోలో ప్రయాణించారు.

తాజాగా దీనికి సంబంధించిన ఫోటోలు ఇప్పుడు సోషల్ మీడియాలో వైరల్ అవుతున్నాయి. ఇటీవల అసెంబ్లీ నియోజకవర్గాల వారీగా సమీక్ష సమావేశాలను బీఆర్ఎస్ నిర్వహిస్తోంది. అందులో భాగంగా ఈ రోజు జూబ్లిహిల్స్ నియోజక వర్గానికి సంబంధించి సమీక్షను నిర్వహించారు. అందులో భాగంగా నియోజక వర్గానికి సంబంధించిన విషయాల గురించి చర్చించారు.

సమావేశం ముగిసిన తర్వాత ఓ సాధారణ వ్యక్తిలాగా ఆటోలో కేటీఆర్ యూసఫ్ గూడ నుంచి జూబ్లిహిల్స్ వెళ్లారు. ఇటీవల కాంగ్రెస్ సర్కార్ మహిళలకు బస్సుల్లో ఉచిత ప్రయాణ సౌకర్యం కల్పించింది. దీంతో ఆటో ఎక్కే వారి సంఖ్య గణనీయంగా తగ్గింది. దీంతో తమ పరిస్థితి దయనీయంగా మారింది ఆటో వాలాలు వాపోతున్నారు.

ఈ నేపథ్యంలో వారి పరిస్థితి గురించి తెలుసుకునేందుకు కేటీఆర్ ఆటోలో వెళ్లినట్టు తెలుస్తోంది. ఆటోలో ప్రయాణిస్తున్న సమయంలో ఆటోవాలాల సమస్యల గురించి కేటీఆర్ అడిగి తెలుసుకున్నారు. ఆటో వాలాల సమస్యల పరిష్కారానికి తమ పార్టీ కృషి చేస్తుందని కేటీఆర్ హామీ ఇచ్చారు. ఆటో వాలాల సమస్యను ప్రభుత్వం దృష్టికి తీసుకు వెళ్తామన్నారు.

కేంద్ర హోం మంత్రి అమిత్ షా (Amit Shah) తెలంగాణ పర్యటన రద్దు అయింది. ఈ నెల 28న ఆయన రాష్ట్రానికి రావాల్సి ఉంది. షెడ్యూల్ ప్రకారం మూడు జిల్లాల నేతలతో కీలక సమావేశాలు నిర్వహించాల్సి ఉంది. కానీ తాజాగా అమిత్ షా టూర్ క్యాన్సిల్ అయినట్టు కేంద్ర మంత్రి కిషన్ రెడ్డి (Kishan Reddy) వెల్లడించారు.

అత్యవసర పనుల నేపథ్యంలో అమిత్ షా పర్యటనకు రాలేకపోతున్నారని కిషన్ రెడ్డి తెలిపారు. ఈ నేపథ్యంలో ఆయన పర్యటన వాయిదా పడినట్టు చెప్పారు. దీంతో కరీంనగర్, మహబూబ్ నగర్, హైదరాబాద్ సమావేశాలను వాయిదా వేశామని వివరించారు. బిహార్‌లో రాజకీయ పరిణామాల నేపథ్యంలో ఆయన పర్యటన వాయిదా పడినట్టు తెలుస్తోంది.

బిహార్‌లో రాజకీయ సంక్షోభం తలెత్తుతోంది. సీఎం నితీశ్ కుమార్ ఈ రోజు రాజీనామా చేస్తారని తెలుస్తోంది. రేపు జేడీయూ నేతలు గవర్నర్ ను కలిసే అవకాశం ఉన్నట్టు విశ్వసనీయ వర్గాలు తెలిపాయి. రేపు జేడీయూ నేతలతో సీఎం నితీశ్ కుమార్ కీలక సమావేశాన్ని నిర్వహిస్తారని తెలుస్తోంది.

మరోవైపు బిహార్‌లో నితీశ్ కుమార్ ప్రభుత్వానికి మద్దతు ఉపసంహరించుకోవాలని ఆర్జేడీ నిర్ణయించినట్టు తెలుస్తోంది. ఈ మేరకు తమ గవర్నర్ కు లేఖ అందిచేందుకు రెడీ అవుతున్నట్టు సమాచారం. ఈ పరిణామాల నేపథ్యంలో అమిత్ షా తన పర్యటనను రద్దు చేసుకున్నారని వార్తలు వస్తున్నాయి.