Telangana

ఎన్నికల (Elections) నేపథ్యంలో మద్యం (Liqour) ఏరులై పారే అవకాశం ఉంది. ఈ క్రమంలో అంతర్రాష్ట్ర (Inter State) సరిహద్దు (Border)ల్లో తెలంగాణ ఎక్సైజ్ అధికారులు నిఘా పెట్టారు. తాజాగా ఆదివారం దాడులను ముమ్మరం చేశారు. ఈ తనిఖీల్లో భారీగా మద్యం స్వాధీనం చేసుకున్నట్టు అధికారులు వెల్లడించారు.

మొత్తం 14 వేల లీటర్ల మద్యాన్ని స్వాధీనం చేసుకున్నట్టు చెప్పారు. ఇటీవల రాష్ట్రంలో ఎన్నికల సన్నద్దతపై అధికారులతో కేంద్ర ఎన్నికల సంఘానికి చెందిన అధికారుల బృందం భేటీ అయింది. రాష్ట్రంలో ధన ప్రవాహం, మద్యం పంపిణీకి అడ్డుకట్టే విషయంలో తీసుకోవాల్సిన చర్యల గురించి అధికారులతో చర్చింది.

ఎన్నికల నేపథ్యంలో భారీగా డబ్బు, మద్యాన్ని సరిహద్దులు దాటిస్తారని ఎన్నికల సంఘం పేర్కొంది. మద్యం అక్రమ నిల్వలు, అక్రమ విక్రయాలు, అక్రమ రవాణాకు చెక్ పెట్టేందుకు ఎక్సైజ్ శాఖతో పాటు ఎన్ ఫోర్స్ మెంట్ విభాగం ప్రత్యేక చర్యలు చేపట్టాలని ఎన్నికల సంఘం ఆదేశించింది.

ఈ సందర్బంగా ఎక్సైజ్ శాఖ అధికారులకు ఎన్నికల సంఘం పలు సూచనలు చేసింది. ఎన్నికల సంఘం ఆదేశాల నేపథ్యంలో తాజాగా నిజామాబాద్ జిల్లా సరిహద్దుల్లో ఎక్సైజ్ శాఖ అధికారులు తనిఖీలు చేపట్టారు. తనిఖీల సమయంలో మొత్తం 14,227 లీటర్ల ఐడీ మద్యాన్ని సీజ్ చేశారు. దీంతో పాటు 1,710 కేజీల బెల్లం, 94.8 లీటర్ల మద్యం, 170 కేజీల గంజాయి, 21 వాహనాలను ఎక్సైజ్ శాఖ సీజ్ చేసింది.

రాబోయే ఎన్నికల్లో తాను పార్లమెంట్ (Parliament) బరిలో ఉంటానని మాజీ మంత్రి, కాంగ్రెస్ సీనియర్ నేత జానా రెడ్డి (Jana Reddy) తెలిపారు. కాంగ్రెస్ (Congress) అధికారంలోకి వచ్చాక ప్రజలకు 24 గంటల ఉచిత కరెంట్ ఇస్తామని తెలిపారు. అసలు రాష్ట్రంలో ఉచిత కరెంట్ మొదలు పెట్టిందే కాంగ్రెస్ పార్టీనే అని తెలిపారు.

గత ఎన్నికల్లో మద్యం, డబ్బు పంచకుండా పోటీ చేయాలని సవాల్ విసిరితే బీఆర్ఎస్ స్వీకరించలేదన్నారు. ఉప ఎన్నికలో తనను ఓడించేందుకు శత విధాల ప్రయత్నం చేశారని పేర్కొన్నారు. అయినప్పటికీ బీఆర్​ఎస్ అభ్యర్థి దగ్గర ఫలితం సాధించారని వెల్లడించారు. ప్రజలను చైతన్యవంతం చేసేందుకు గాను తన వారసులను తయారు చేస్తున్నానన్నారు.

60 ఏండ్ల పాలనలో తెలంగాణలో కాంగ్రెస్ రూ. 75 వేల కోట్ల అప్పులు చేసిందన్నారు. కానీ కేవలం తొమ్మిదేండ్లలోనే బీఆర్ఎస్ సర్కార్ రూ. 5 లక్షల 60వేల కోట్ల అప్పు చేసిందని పేర్కొన్నారు. దేశంలో తొమ్మిదేళ్లలో రూ.112 లక్షల కోట్లను ప్రధాని మోడీ ఖర్చు చేశారని అన్నారు. మోడీ, కేసీఆర్‌లు చేసిన అవినీతిపై ఒకరిపై మరొకరు మాట్లాడుతున్నారంటూ ఆగ్రహం వ్యక్తం చేశారు.

ఓ వైపు రైతుబంధు పేరుతో రైతులకు డబ్బులు ఇస్తూ మరో వైపు లిక్కర్ పై ధరలు పెంచి ఒక్కో కుటుంబం నుంచి రూ.40వేల వరకు వసూలు చేస్తున్నారని తీవ్ర ఆరోపణలు గుప్పించారు. నాగార్జున సాగర్ నియోజకవర్గ ప్రజలకు తామంతా అండగా ఉంటామని భరోసా ఇచ్చారు.

రాష్ట్రంలో 11 శాతం ఉన్న ముదిరాజ్ లకు ఏ పార్టీ కూడా రాజకీయంగా ప్రాధాన్యత ఇవ్వడం లేదని బీజేపీ (BJP) తెలంగాణ ఎన్నికల నిర్వహణ కమిటీ చైర్మన్, హుజురాబాద్ ఎమ్మెల్యే ఈటల రాజేందర్ (Etala Rajender) అన్నారు. ముదిరాజ్‌లకు బీఆర్ఎస్ ప్రభుత్వం కనీసం ఒక్క సీటు కూడా ఇవ్వలేదని తీవ్ర స్థాయిలో ఆగ్రహం వ్యక్తం చేశారు.

సికింద్రాబాద్‌లోని పరేడ్ గ్రౌండ్స్‌లో ఆదివారం నిర్వహించిన ముదిరాజ్ ఆత్మగౌరవ సభకు ఈటల రాజేందర్ ముఖ్య అతిథిగా హాజరయ్యారు. సభలో ఆయన మాట్లాడుతూ…. ఈ సభను అడ్డుకునేందుకు అనేక ప్రయత్నాలు చేశారని తెలిపారు. ఈ సభకు హాజరయ్యే వాళ్లకు ప్రభుత్వ పథకాలు ఇవ్వబోమంటూ బెదిరించారని ఆయన ఆరోపించారు.

ఎన్ని అడ్డంకులు సృష్టించినా వాటన్నింటినీ లెక్క చేయకుండా ముదిరాజ్ ఆత్మగౌరవ సభకు భారీగా జనం తరలి వచ్చారని చెప్పారు. తన 20 ఏండ్ల రాజకీయ జీవితం గురించి అందరికీ తెలుసని పేర్కొన్నారు. 14 ఏండ్ల పాటు ప్రత్యేక తెలంగాణ ఉద్యమంలో ముందు నిలబడి పోరాటం చేశానని గుర్తు చేశారు.

తనపై ఎన్ని కేసులు పెట్టినా, చంపుతామని గూండాలతో బెదిరించినా తాను వెనక్కి తగ్గలేదన్నారు. రాష్ట్రంలో అన్ని కులాల సమస్యలపై తాను గొంతెత్తి పోరాటం చేశానన్నారు. ముదిరాజ్‌లను బీసీ – డీ నుండి బీసీ- ఏ కేటగిరీలోకి చేర్చాలని ఆయన డిమాండ్ చేశారు. అన్ని పార్టీల్లో ముదిరాజ్ లకు ప్రాధాన్యత కల్పించాలన్నారు.

బీఆర్ఎస్ (BRS) ఎమ్మెల్యే గంప గోవర్ధన్ (Gampa Govardhan) కు చేదు అనుభవం ఎదురైంది. కామారెడ్డి (Kamareddy) జిల్లాలో పర్యటనకు వెళ్లిన ఎమ్మెల్యే (MLA) ను దళితులు అడ్డుకున్నారు. బీబీపేట్ (BibiPet) గ్రామ పర్యటనకు వెళ్తున్న సమయంలో ఆయన కారును దళితులు అడ్డుకున్నారు.

గ్రామంలోకి ఎమ్మెల్యే కారు రాకుండా అడ్డుకుని నిరసనకు దిగారు. ఇన్ని రోజుల పాటు ఎమ్మెల్యే తమ గ్రామానికి రాలేదని గ్రామస్తులు అన్నారు. ఎన్నికలు సమీపిస్తుండటంతో ఇప్పుడు మళ్లీ తమ గ్రామానికి వస్తున్నారంటూ తీవ్ర స్థాయిలో మండిపడ్డారు. ఇన్నాళ్లు లేనిది ఇప్పుడు తమ గ్రామం గుర్తుకు వచ్చిందా అంటూ ఎమ్మెల్యేను గ్రామస్తులు నిలదీశారు.

గ్రామ అభివృద్ధికి కృషి చేయని వారు ఇప్పుడు ఓట్లు ఎందుకు అడుగుతున్నారంటూ తీవ్ర స్థాయిలో ఆగ్రహం వ్యక్తం చేశారు. ప్రభుత్వానికి, ఎమ్మెల్యేకు వ్యతిరేకంగా గ్రామస్తులు నినాదాలు చేశారు. దీంతో ఒక్క సారిగా ఉద్రిక్త పరిస్థితులు ఏర్పడ్డాయి. ఈ క్రమంలో ఆందోళనకారులను పోలీసులు అడ్డుకునే ప్రయత్నం చేశారు.

దీంతో పోలీసులకు గ్రామస్తులకు మధ్య తోపులాట జరిగింది. పోలీసుల తీరుపై గ్రామస్తులు తీవ్ర స్థాయిలో మండిపడ్డారు. గ్రామంలో అర్హులైన దళితులకు దళితబంధు ఇవ్వడం లేదని అన్నారు. స్థానిక బీఆర్ఎస్ నేతలు అక్రమాలకు పాల్పడుతున్నారని గ్రామస్తులు ఆరోపించారు. అర్హులందరికీ రైతు బంధు ఇవ్వాలని డిమాండ్ చేశారు.

జగిత్యాల (Jagityal) జిల్లాలోని ఆర్టీసీ (RTC) డిపోలో అగ్ని ప్రమాదం చోటు చేసుకుంది. జిల్లాలోని కోరుట్ల (Korutla) డిపోలో బస్సులో మంటలు ( Flames) చెలరేగాయి. బస్సులో డీజిల్ నింపిన కొద్ది సేపటికే మంటలు అంటుకున్నాయి. దీంతో రాజధాని (Rajadhani) బస్సు పూర్తిగా దగ్దమైంది.

భారీగా మంటలు ఎగసి పడటంతో స్థానికులు, సిబ్బంది ఆందోళనకు గురయ్యారు. పక్కనే ఫ్యూయల్ స్టేషన్ ఉండటంతో అధికారులు కంగారు పడ్డారు. వెంటనే ఫైర్ సిబ్బందికి సమాచారం అందించారు. సమాచారం అందుకున్న ఫైర్ సిబ్బంది సకాలంలో అక్కడకు చేరుకుని మంటలు ఆర్పి వేశారు.

దీంతో పెను ప్రమాదం తప్పడంలో అంతా ఊపిరి పీల్చుకున్నారు. రాజధాని బస్సు శంషాబాద్ నుంచి ట్రిప్ ముగించుకుని కోరుట్లకు వచ్చింది. ప్రయాణికులను బస్ స్టాండ్ లో దింపేసి బస్సును డిపోకి తీసుకు వచ్చారు. బస్సును సిబ్బంది శుభ్రం చేస్తుండగా మంటలు చెలరేగాయి.

ప్రమాద సమయంలో బస్సులో ఎవరూ లేక పోవడంతో ఎలాంటి ప్రాణ నష్టం జరగలేదని అధికారులు వెల్లడించారు. బస్సు బ్యాటరీలో షార్ట్ సర్క్యూట్ కావడంతో మంటలు చెలరేగి వుంటాయని అధికారులు ప్రాథమికంగా అంచనా వేస్తున్నారు. ఘటనపై అధికారులు దర్యాప్తు జరుపుతున్నారు.