Telangana

ఏ శుభకార్యం జరిగినా తొలి పూజ వినాయకుడికే. అటువంటి విఘ్నేశ్వరుడ్ని (Lord Ganesh) ప్రత్యేకంగా ఆరాధించే పండుగను కులమతాలకు అతీతంగా ఎంతో వేడుకగా జరుపుకుంటారు. కేవలం భారత్‌ (Bharat) లోనే కాదు ప్రపంచంలోని అనేక ప్రాంతంలో వినాయక చవితి ఉత్సవాలను చేస్తుంటారు. ఈసారి కూడా ఆదిపూజ్యుడైన వినాయకుడిని వాడవాడలా ఏర్పాటు చేసి పూజలు చేస్తున్నారు భక్తులు. చిన్నా పెద్ద అనే తేడా లేకుండా గణేశ్ ఉత్సవాలను ఎంతో వైభవంగా జరుపుతున్నారు. బుధవారం నుంచి నిమజ్జన కార్యక్రమం ప్రారంభం అవుతుంది.

హైదరాబాద్ (Hyderabad) లో గణేష్ నిమజ్జనం అనగానే ఎంతో కోలాహలంగా ఉంటుందో తెలుసు. వాడవాడలా ఏర్పాటు చేసిన వినాయకులు హుస్సేన్ సాగర్ తీరానికి వస్తుంటాయి. ఈసారి కూడా నిమజ్జనానికి ఏర్పాట్లు చేశారు అధికారులు. ఈ నేపథ్యంలో నెక్లెస్ రోడ్ లో నిమజ్జన ఏర్పాట్లను మంత్రి తలసాని శ్రీనివాస్ యాదవ్ (Talasani Srinivas Yadav) పరిశీలించారు. జీహెచ్ఎంసీ (GHMC) కమిషనర్ రొనాల్డ్ రోస్, హైదరాబాద్ పోలీస్ కమిషనర్ సీవీ ఆనంద్ (CV Anand) కూడా ఉన్నారు.

ఈ సందర్భంగా మాట్లాడిన తలసాని.. బుధవారం నుంచి గణేష్ నిమజ్జనం మొదలు అవుతుందని.. ప్రభుత్వం పకడ్బందీగా ఏర్పాట్లు చేసిందని తెలిపారు. జీహెచ్ఎంసీ పరిధిలో దాదాపు 90వేల వినాయక విగ్రహాలు ఉన్నాయని చెప్పారు. ఎవరు ఎక్కడ నిమజ్జనం చేయాలో అందరికీ సమాచారం అందించామన్నారు. ఉత్సవ సమితి సభ్యులకు ప్రభుత్వం అండగా ఉంటుందని తెలిపారు.

గణేష్ నిమజ్జనం ఏర్పాట్లను ఈసారి మరింత పెంచామన్న తలసాని.. ఎవరూ అపోహలు నమ్మొద్దని కోరారు. ప్రశాంతంగా నిమజ్జనం జరిగేలా అందరూ సహకరించాలని అన్నారు.

పార్లమెంట్ ప్రత్యేక సమావేశాల్లో ఉమ్మడి ఏపీ రాష్ట్ర విభజనపై ప్రధాని మోడీ (PM Modi) చేసిన వ్యాఖ్యలపై మంత్రి కేటీఆర్(KTR)తీవ్ర స్థాయిలో విరుచుకుపడ్డారు. తెలంగాణ(Telangana) ఏర్పాటుపై ప్రధాని మోడీ వ్యాఖ్యలు తీవ్ర దిగ్భ్రాంతిని కలిగించాయన్నారు. కాంగ్రెస్‌ను విమర్శించే ప్రయత్నంలో తెలంగాణ రాష్ట్రాన్ని ప్రధాని మోడీ అవమానిస్తున్నారని ఆయన మండిపడ్డారు.

తెలంగాణ ఏర్పాటును మోడీ అవమానించడం ఇదే మొదటి సారి కాదన్నారు. గతంలోనూ మోడీ ఇలాంటి వ్యాఖ్యలు చేశారని ఆయన గుర్తు చేశారు. చారిత్రక వాస్తవాల పట్ల మోడీ నిర్లక్ష్యానికి ఇది అద్దం పడుతోందని ఫైర్ అయ్యారు. ప్రత్యేక రాష్ట్రం కోసం తెలంగాణ ప్రజలు ఆరు దశాబ్దాల పాటు పోరాటం చేశారన్నారు.

స్వరాష్ట్రం కోసం తెలంగాణ ప్రజలు చేసిన త్యాగాలు, భావోద్వేగాలను ప్రధాని పరిగణించాలని మంత్రి సూచించారు. తెలంగాణ ప్రజలు రాష్ట్ర ఆవిర్భావ వేడుకలను జరుపుకోలేదనడం పూర్తిగా అవాస్తవమని ఆయన ఖండించారు. మోడీ వ్యాఖ్యలు అజ్ఞానం, అహంకార పూరితంగా ఉన్నాయంటూ తీవ్రంగా ధ్వజమెత్తారు.

తల్లిని చంపి బిడ్డను తీశారంటూ ఇంకెన్ని సార్లు అలా అజ్ఞానంతో తమ అస్థిత్వాన్ని అవమానిస్తారంటూ ప్రశ్నించారు. వడ్లు కొనాలని అడిగితే నూకలు బుక్కాలని.. తెలంగాణ రైతుల్ని మోడీ కించపర్చిండన్నారు. ప్రజాస్వామ్య దేవాలయంలో ప్రతిసారీ పనిగట్టుగొని మరి తమ ఆత్మగౌరవాన్ని గాయపర్చి ఎందుకు ఆనందిస్తున్నారు..?అని నిలదీశారు.

తెలంగాణ మీద ప్రధానికి పదే..పదే అదే అక్కసు ఎందుకని ఆయన ప్రశ్నించారు. అమృతకాల సమావేశాలని పేరు పెట్టి విషం చిమ్మడం ఏం సంస్కారం..? అని ఆయన నిలదీశారు. తెలంగాణ రాష్ట్రమంటే గిట్టనట్టు.. మమ్మల్ని పగబట్టినట్టు.. మా పుట్టుకను ప్రశ్నించడం పద్ధతేనా..? అని ఆయన తీవ్ర ఆగ్రహం వ్యక్తం చేశారు.

కోటి ఆశలు కొత్త ఆకాంక్షలతో తెలంగాణ పురుడుపోసుకుందన్నారు. తమకు సహకరించక పోగా మొదటి నుంచి ఈ రాష్ట్ర ప్రజలపై కక్షను పెంచుకున్నారంటూ తీవ్రంగా విమర్శించారు. ఏడు మండలాలను లాక్కొని.. లోయర్ సీలేరు ప్రాజెక్టును గుంజుకుని పురిట్లోనే మీరు చేసిన తొలి ద్రోహాన్ని మరచిపోలేమంటూ తీవ్రంగా విరుచుకపడ్డారు.

ఐటీఐఆర్‌ను రద్దు చేస్తరన్నారు. హైదరాబాద్‌కు ఆర్బిట్రేషన్ సెంటర్ వస్తే ఓర్వలేదన్నారు బయ్యారంలో ఉక్కు ఫాక్టరీకి ఉరేసి.. గిరిజన వర్సిటీ పెట్టకుండా నానబెట్టారన్నారు. ఆదివాసులపై ఎందుకు కక్షసాధిస్తున్నారని అడిగారు. సింగరేణి బొగ్గుబావులను వేలం వేస్తరన్నారు.

కృష్ణాలో నీటి వాటాలు తేల్చకుండా గత పదేండ్లుగా దక్షిణ తెలంగాణ రైతులను దగాచేస్తున్నారని ఆరోపించారు. మీ పగను ఎట్లా అర్థంచేసుకోవాలి..? అని అన్నారు. కాజీపేట కోచ్‌ ఫాక్టరీని గుజరాత్‌కు తరలించుకుపోయి దశాబ్దాల కలని కల్లలు చేసిన మీ దుర్మార్గాన్ని క్షమించగలమా..? అని ఆగ్రహం వ్యక్తం చేశారు.