బంగ్లాదేశ్ (Bangladesh)లో ఘోర రైలు ప్రమాదం (Train Accident) జరిగింది.. రాజధాని ఢాకా (Dhaka)కు 80 కిలోమీటర్ల దూరంలో ఉన్న భైరబ్‌లో ఈ ఘటన చోటు చేసుకోంది. పూర్తిగా ప్రమాదానికి సంబంధించిన వివరాలు తెలియలేదని స్థానిక పోలీసులు వెల్లడించారు. కాగా రెండు కోచ్‌లు ఢీ కొనడంతో ఈ ప్రమాదం జరిగినట్టు ప్రాథమిక నివేదికలు చెబుతున్నాయని ఢాకా రైల్వే పోలీస్ సూపరింటెండెంట్ (Railway Police Superintendent) అన్వర్ హొస్సేన్ తెలిపారు.
మరోవైపు ఘటనా స్థలిలో అగ్నిమాపక సిబ్బంది సహాయక చర్యలు చేపట్టారు. కాగా ఈ ప్రమాదంలో 15 మంది మృతి చెందగా, 100 మంది వరకు గాయపడ్డట్టు సమాచారం.. ఢాకా ట్రిబ్యూన్ నివేదిక ప్రకారం.. కిషోర్‌గంజ్‌లోని భైరబ్ వద్ద మధ్యాహ్నం గూడ్స్ రైలు, ప్యాసింజర్ రైలును ఢీకొట్టిందని చెబుతున్నారు.
ఈ ప్రమాదంలో మృతులు, క్షతగాత్రుల సంఖ్య మరింత పెరిగే అవకాశం ఉన్నట్టు స్థానిక పోలీసు అధికారి సిరాజుల్ ఇస్లాం తెలుపుతున్నారు. రైలు కింద పలువురు ఉన్నట్టు ప్రత్యక్ష సాక్షులు చెప్పారు.. ఈ ఘటనలో గాయపడిన క్షతగాత్రులను చికిత్స నిమిత్తం సమీప ఆసుపత్రికి తరలించినట్టు పోలీసులు తెలిపారు.
