సంక్రాంతి పండుగ వేళ రాజేంద్రనగర్‌లో (Rajendrnagar) విషాదం చోటుచేసుకున్నది. రాజేంద్రనగర్‌ పరిధిలోని అత్తాపూర్‌లో (Attapur) ఓ ఇంటిపై పతంగి ఎగురవేస్తున్న బాలుడు విద్యుధాఘాతంతో మృతిచెందాడు.
అత్తాపూర్‌ లక్ష్మీవాణి టవర్స్‌పై పిల్లలు పతంగులు ఎగురవేస్తున్నారు. వారితోపాటు మహారాష్ట్రకు చెందిన తనిష్క్(11) గాలిపటం ఎగురవేస్తుండగా విద్యుత్‌ తీగలు తగిలి ప్రమాదానికి గురయ్యాడు. గమనించిన తనిష్క్ అన్న విషయాన్ని తల్లిదండ్రులకు చెప్పాడు.
వారు బాలుడిని ఓ ప్రైవేట్ ఆసుపత్రికి తీసుకెళ్లారు. అయితే, అప్పటికే తనిష్క్ మృతిచెందినట్లు వైద్యులు నిర్ధారించారు. దీంతో పండుగ పూట ఆ ఇంట్లో తీరని విషాదం నెలకొంది. అల్లారుముద్దుగా పెంచుకున్న కొడుకు కళ్లముందు ఇక లేడని తెలిసి కన్నీరు మున్నీరుగా విలపించారు.
సమాచారం అందుకున్న పోలీసులు ఘటనాస్థలానికి చేరుకుని మృతదేహాన్ని స్వాధీనం చేసుకున్నారు. పోస్టుమార్టం నిమిత్తం మృతదేహాన్ని ఉస్మానియా దవాఖానకు తరలించారు. ఈ ఘటనపై కేసు నమోదుచేసి దర్యాప్తు చేస్తున్నారు.
