Ramu

బీజేపీ (BJP) ప్రభుత్వం పదేండ్లుగా దేశాభివృద్ధి కోసం శ్రమిస్తోందని బీజేపీ జాతీయ ప్రధాన కార్యదర్శి తరుణ్ చుగ్ (Tarun Chugh) అన్నారు. దేశ ప్రజలంతా మోడీ ప్రభుత్వంపై విశ్వాసంతో ఉన్నారని వెల్లడించారు. దేశంలో మళ్లీ రాబోయేది బీజేపీ ప్రభుత్వమేనని చెప్పారు.. ఔర్ ఏక్ బార్ మోడీ సర్కార్ అని ఆయన వ్యాఖ్యానించారు.

వికసిత్ భారత్ లక్ష్యంగా మోడీ ప్రభుత్వం అడుగులు వేస్తోందన్నారు. కరీంనగర్‌లో తరుణ్ చుగ్ మాట్లాడుతూ.. దేశాన్ని ఆర్థికంగా నిలబెట్టేలా తమ ప్రభుత్వం చర్యలు తీసుకుంటోందని అన్నారు. ప్రపంచంలోనే ఇండియాను 3 వ స్థానానికి తీసుకు వెళ్లేందుకు నిరంతరంగా కృషి చేస్తున్నారని పేర్కొన్నారు. అభివృద్ధి, సంక్షేమాన్ని సమతూకంతో బడ్జెట్ ప్రవేశపెట్టారని వివరించారు.

మహిళలు ఆర్థికంగా నిలదొక్కుకునేందుకు లక్ పతి పథకం ప్రవేశ పెట్టారని, 3కోట్ల మంది మహిళలకు లబ్ది చేకూరేలా బడ్జెట్ కేటాయించిందన్నారు. గత పదేళ్లుగా మహిళల అక్షరాస్యత శాతం 25 పెరిగిందన్నారు. కేసీఆర్ బీఆర్ఎస్ అవినీతి ప్రభుత్వం పోయినప్పటికీ .కాంగ్రెస్ రూపంలో మరో అవినీతి ప్రభుత్వం వచ్చిందని నిప్పులు చెరిగారు. రేవంత్ రెడ్డి సర్కార్ జాతీయ కాంగ్రెస్ కు ఫండింగ్ చేస్తోందన్నారు.

రాహుల్ యాత్ర కోసం రేవంత్ రెడ్డి విలువైన బస్సును ఏర్పాటు చేశారని ఆరోపించారు. బీఆర్ఎస్‌కు రాజకీయ భవిష్యత్తు లేదని విమర్శించారు. దేశంలో అధికారంలోకి రాని కాంగ్రెస్, బీఆర్ఎస్‌లకు ఓటు వేయడం దండగ అని వ్యాఖ్యలు చేశారు. ప్రజలను మభ్యపెట్టి కాంగ్రెస్ అధికారంలోకి వచ్చిందని వ్యాఖ్యానించారు. అది కాంగ్రెస్ గెలుపు కాదన్నారు.

గ్యారెంటీ లు అమలు చేయకుండా దాట వేస్తోందని తీవ్ర ఆగ్రహం వ్యక్తం చేశారు. ఓఆర్ఆర్, కాళేశ్వరం, ధరణి అవినీతి అని ప్రస్తావించిన రేవంత్ రెడ్డి నేడు నోరు మెదపడం లేదని నిలదీశారు. సీబీఐ విచారణ అని గతం లో చెప్పిన రేవంత్ రెడ్డి మిన్నకుండి పోవడం దేనికి సంకేతమని ప్రశ్నించారు. కాంగ్రెస్ నేతలు బీజేపీని నిలువరించే ప్రయత్నం చేస్తున్నారని, తెలంగాణా లో పదికి తగ్గకుండా పార్లమెంట్ స్థానాలను గెలుస్తామని ధీమా వ్యక్తం చేశారు.

కాంగ్రెస్‌ (Congress)పై బీఆర్ఎస్ నేత బాల్క సుమన్ (Balka Suman) తీవ్ర స్థాయిలో విరుచుకు పడ్డారు. ప్రజల‌కు అత్యాశ చూపి కాంగ్రెస్ అధికారం చేజిక్కించు కుందని మండిపడ్డారు. ప్రభుత్వాన్ని కూల్చే అవ‌స‌రం బీఆర్ఎస్‌కు లేదని స్పష్టం చేశారు. ప్రజ‌లు ఇచ్చిన ప్రతిప‌క్ష పాత్రను తాము స‌మ‌ర్థవంతంగా నిర్వహిస్తామని వెల్లడించారు. ప్రజా గొంతుకగా నిలుస్తామన్నారు.

చెన్నూరు నియోజకవర్గ బీఆర్ఎస్ సమావేశాన్ని ఆదివారం నిర్వహించారు. ఈ సమావేశంలో బాల్క సుమన్ పాల్గొని మాట్లాడుతూ….. సీఎం రేవంత్‌రెడ్డి తన ప‌ద‌విని మ‌రిచి… స్థాయి త‌గ్గించుకుని మాట్లాడుతున్నారని ఫైర్ అయ్యారు. సింగ‌రేణి బొగ్గు బావుల‌ను అదానీకి అప్పజెప్పేందుకు సీఎం రేవంత్‌ రెడ్డి, వివేక్ ఒప్పందం చేసుకున్నారని ఆరోపణలు చేశారు.

డిసెంబ‌ర్ 9న చేస్తామ‌న్న రుణ‌మాఫీ, 4 వేల రూపాయ‌ల పెన్షన్, 5వంద‌ల రూపాయ‌ల గ్యాస్‌, మెగా డీఎస్సీ, జాబ్ క్యాలెండ‌ర్ సహా ఏ ఒక్క హామీని కూడా కాంగ్రెస్ నెర‌వేర్చలేదని తీవ్ర స్థాయిలో ధ్వజమెత్తారు. కాంగ్రెస్ ప్రభుత్వం ఇచ్చిన అన్ని హామీల‌ను అమలు చేసేలా బీఆర్ఎస్ తరఫున ఒత్తిడి తీసుకువ‌స్తామన్నారు.

ఎన్నిక‌ల్లో ఎమ్మెల్యే వివేక్ ఇచ్చిన అన్ని హామీలను నెర‌వేర్చాలని ఈ సందర్బంగా డిమాండ్ చేశారు. తాను చెన్నూరు విడిచి వెళ్లిపోనని దుష్పచారం చేస్తున్నారని మండిపడ్డారు. మ‌ళ్లీ ఈ నేలపై గులాబీ జెండా ఎగ‌రే వ‌ర‌కు తన ఇల్లే అడ్డా… చెన్నూరే తన ఇలాకా అని బాల్క సుమన్ పేర్కొన్నారు.

చెన్నూరు నియోజ‌క‌వ‌ర్గానికి నిధులు తీసుకుర‌మ్మంటే, త‌న కొడుకు ఎంపీ సీటు కోసం వివేక్ ఢిల్లీ, హైద‌రాబాద్‌లో బిజీగా ఉంటున్నారని ఆగ్రహం వ్యక్తం చేశారు. బీఆర్ఎస్ కుటుంబ పాల‌న అయితే వినోద్, వివేక్ ఎమ్మెల్యేలు ఎలా అయ్యారని ప్రశ్నించారు. ఇప్పుడు త‌న కొడుకు వంశీకి ఎంపీ టిక్కెట్టు ఇప్పించాలని వివేక్ ఆశ‌ప‌డ‌టం కుటుంబ పాల‌న కాదా..? అని ప్రశ్నించారు.

తెలంగాణ కేబినెట్ సమావేశం (Cabinet Meeting) జరుగుతోంది. సచివాలయంలో సీఎం రేవంత్ రెడ్డి (CM Revanth Reddy) అధ్యక్షతన ఈ సమావేశాన్ని నిర్వహిస్తున్నారు. ఆరు గ్యారెంటీల అమలు, బడ్జెట్ సమావేశాలపై ఈ భేటీలో ప్రధానంగా చర్చించారు. దీంతో పాటు పలు శాఖలు అందించిన ప్రతిపాదనలపై సీఎం, డిప్యూటీ సీఎం ఇతర మంత్రులు సమీక్షలు నిర్వహించారు.

అసెంబ్లీ బడ్జెట్ సమావేశాల తేదీల ఖరారుపై ఈ సమావేశంలో చర్చిస్తున్నారు. ఈ సారి పూర్తి స్థాయి బడ్జెట్ కు బదులుగా మధ్యంతర బడ్జెట్ ను ప్రవేశ పెట్టాలని రేవంత్ రెడ్డి సర్కార్ నిర్ణయించింది. ఈ నెల 8 నుంచి అసెంబ్లీ సమావేశాలు నిర్వహించాలని ప్రభుత్వం భావిస్తున్నట్టు తెలుస్తోంది. ఈ మేరకు అసెంబ్లీ బడ్జెట్ సమావేశాల తేదీలు, గవర్నర్ ప్రసంగం గురించి కేబినెట్ సమావేశం చర్చిస్తున్నారు.

కుల గణనపై కూడా సమావేశంలో చర్చిస్తున్నారు. ఉద్యోగాల భర్తీ నోటిఫికేషన్లపై ఈ సమావేశంలో చర్చ జరుగుతోంది. గ్రూప్‌-1 పరీక్షపై కేబినెట్ చర్చిస్తోంది. గ్రూప్-1 లో 160 అదనపు పోస్టులను కలపడంపై ప్రభుత్వం ఆలోచనలు చేస్తోంది. మరోవైపు రెండు కొత్త పథకాలపై మంత్రులతో రేవంత్ రెడ్డి చర్చిస్తున్నారు. 500కే గ్యాస్‌ సిలిండర్, 200 యూనిట్ల వరకు ఉచిత్ విద్యుత్ పథకాలను త్వరలోనే అమలు చేయనున్నట్లు ఇప్పటికే రేవంత్ రెడ్డి ప్రకటించారు.

అంతకు ముందు మీడియా సమావేశంలో కృష్ణా నది జలాల వివాదంపై రేవంత్ రెడ్డి మాట్లాడారు. జల దోపిడికి కేసీఆర్ కారణమని అన్నారు. నీటి ప్రాజెక్టులపై శ్వేత పత్రం విడుదల చేస్తామని అన్నారు. దమ్ముంటే కేసీఆర్ చర్చకు రావాలని సవాల్ కూడా విసిరారు. ఈ నేపథ్యంలో శ్వేత పత్రం విడుదలపై కూడా ఈ సమావేశంలో చర్చిస్తున్నట్టు సమాచారం.

కాంగ్రెస్ (Congress) సర్కార్ చేతకాని ప్రభుత్వమని బీఆర్ఎస్ (BRS) వర్కింగ్ ప్రెసిడెంట్ కేటీఆర్ (KTR) అన్నారు. కాంగ్రెస్ వి మాటలే తప్ప చేతలు లేవని ఫైర్ అయ్యారు. కాంగ్రెస్‌ 420 హామీలను చూసి ప్రజలు మోసపోయారని అన్నారు. వంద రోజుల్లో ఇచ్చిన హామీలను అమలు చేయకపోతే కాంగ్రెస్‌ను బొందపెట్టుడేనని తీవ్ర స్థాయిలో ఫైర్ అయ్యారు.

ఉప్పల్ నియోజకవర్గం బీఆర్ఎస్ కార్యకర్తల విస్తృతస్థాయి సమావేశంలో కేటీఆర్ పాల్గొని మాట్లాడారు. ఉప్పల్‌ జోష్ చూస్తుంటే అధికారంలో మనం ఉన్నామా? కాంగ్రెసోడు ఉన్నాడా? అర్థం కావడం లేదని తెలిపారు. యాభై వేల మెజారిటీతో గెలిపించిన ఉప్పల్ నియోజక వర్గ ప్రజలకు ముందుగా ధన్యవాదాలు తెలిపారు. రాబోయే పార్లమెంట్ ఎన్నికల్లో మల్కాజ్‌గిరిలో గెలుపు తమదేనన్నారు.

కాంగ్రెస్‌ను మల్కాజ్‌గిరిలో మడత పెట్టీ కొట్టుడేనని పేర్కొన్నారు. ఎన్నికల్లో ఇచ్చిన 420 హామీలను నెరవేర్చకుండా కాంగ్రెస్ నేతలు అబద్దాలు మాట్లాడుతున్నారని మండిపడ్డారు. ఇచ్చిన ఏ హామీని నెరవేర్చలేదని ధ్వజమెత్తారు. సీఎం రేవంత్ రెడ్డి 100 రోజుల్లో అన్ని హామీలు నెరవేర్చుతామని అన్నారు. అప్పటివరకు ఏం చేస్తారో చూద్దామని అన్నారు.

ప్రజలు తమకు రెండు సార్లు అవకాశం కల్పించారని.. రాజకీయాల్లో చీకటి వెలుగులు సర్వ సాధారణమని వెల్లడించారు. రేవంత్ రెడ్డి మాట్లాడే భాషను చూసి జనం అసహ్యించుకుంటున్నారని ఎద్దేవా చేశారు. చిన్నాపెద్ద తేడా లేకుండా నోటికొచ్చినట్లు మాట్లాడుతున్నాడని తీవ్ర ఆగ్రహం వ్యక్తం చేశారు. చీకటి ఉంటేనే వెలుగు విలువ తెలుస్తుందని.. నికృష్ట కాంగ్రెస్ పాలన ఎలా ఉంటుందో జనానికి తెలుస్తుందన్నారు.

లంకె బిందెల కోసం దొంగలు తిరుగుతారని విమర్శించారు. గతంలో రేవంత్ రెడ్డి అదే కావచ్చని.. తనకైతే తెల్వదన్నారు. రేవంత్‌రెడ్డి లాగా తాము తిట్టగలుతామని.. మొన్నటి ఫలితాలు తమ మంచికే వచ్చాయని అనుకుంటున్నామని చెప్పుకొచ్చారు.

కాంగ్రెస్‌పై మాజీ మంత్రి జగదీశ్ రెడ్డి (Jagadish Reddy) తీవ్ర స్థాయిలో విరుచుక పడ్డారు. కృష్ణా జలాల పంపిణీని కేఆర్‌ఎం‌బీకి అప్పగించటం పూర్తిగా కాంగ్రెస్ (Congress) సర్కార్ చేతగాని తనమని తీవ్ర స్థాయిలో ఫైర్ అయ్యారు. అధికారంలోకి వచ్చిన రెండు నెలల్లోనే కాంగ్రెస్ పనితీరు బయటపడిందని మండిపడ్డారు. పార్టీకి ఓటు వేసి తప్పు చేశామని ప్రజలు బాధపడుతున్నారని అన్నారు.

కోదాడ పట్టణంలో బీఆర్ఎస్ పార్టీ నియోజకవర్గ విస్తృత స్థాయి సమావేశాన్ని గుడుగుంట్ల అప్పయ్య ఫంక్షన్ హాల్‌లో నిర్వహించారు. ఈ సమావేశంలో గుంటకండ్ల జగదీశ్వర్ రెడ్డి ముఖ్య అతిథులుగా పాల్గొని మాట్లాడుతూ…. ఏపీ, తెలంగాణ మధ్య కృష్ణ జలాల ట్రిబ్యునల్ వివాదం తీర్చేందుకు ప్రధాని మోడీకి తొమ్మిదేండ్లకు పైగా సమయం పట్టిందని వెల్లడించారు.

గతంలో కేసీఆర్ సీఎంగా ఉన్న సమయంలో కృష్ణా జలాల విషయంలో ఏపీ- తెలంగాణలు తీర్చుకుంటాయని కేంద్రం ఆ విషయంలో తల దూర్చవద్దని కరాకండిగా మాట్లాడి పోరాడారని పేర్కొన్నారు. కృష్ణా జలాలపై కేంద్రం పెత్తనంతో ఉమ్మడి నల్లగొండ, రంగారెడ్డి, పాలమూరు జిల్లాలు సాగు, తాగునీటి కోసం కేంద్రం నుంచి అనుమతుల కోసం ఎదురు చూడాల్సిన పరిస్థితి వస్తుందని ఆందోళన వ్యక్తం చేశారు.

తెలంగాణ హక్కుల కోసం మాజీ సీఎం కేసీఆర్ నిరంతరం పోరాడుతూనే ఉన్నారని అన్నారు. గత పదేండ్లలో సాగునీరు, తాగునీరుతో పాటు నాణ్యమైన విద్యుత్ అందించామని వివరించారు. కానీ ఇప్పుడు కాంగ్రెస్ వచ్చి తెలంగాణకు అన్ని కష్టాలు తీసకు వస్తోందన్నారు.

ఉమ్మడి రాష్ట్రంలో ఉమ్మడి నల్లగొండ జిల్లా కరువుతో కొట్టుమిట్టాడుతున్న సమయంలో ఒక్క తడి నీటి కోసం కేసీఆర్ కోదాడ నుంచి నాగార్జునసాగర్ వరకు పాదయాత్ర చేశారని గుర్తు చేశారు. కేసీఆర్ పోరాటానికి ప్రభుత్వం తలొగ్గి ఒక పంట నీరు విడుదల చేసిందన్నారు. రాష్ట్ర రైతాంగానికి కేసీఆర్ ఎప్పుడూ అండగా ఉంటారని స్పష్టం చేశారు. కేసీఆర్ ఆదేశాల మేరకు ఉమ్మడి జిల్లాలో పార్లమెంట్ ఎన్నికల సన్నాహక సమావేశాలను నిర్వహిస్తున్నామన్నారు.

సీఎం రేవంత్ రెడ్డి (CM Revanth Reddy) కీలక వ్యాఖ్యలు చేశారు. కేసీఆర్‌ (KCR), హరీశ్‌రావు (Harish Rao)నీటి పారుదల శాఖ మంత్రులుగా ఉన్న సమయంలోనే ప్రాజెక్టులను కేంద్రానికి అప్పగించారని తెలిపారు. కృష్ణా, గోదావరి మీద ఉన్న ప్రాజెక్టులు కేంద్రానికి స్వాధీనం చేయాలని రాష్ట్ర విభజన చట్టంలోనే స్పష్టంగా ఉందని వెల్లడించారు.

హైదరాబాద్‌లో నిర్వహించిన మీడియా సమావేశంలో సీఎం రేవంత్ రెడ్డి మాట్లాడుతూ….. ‘మాజీ సీఎం కేసీఆర్, మాజీ మంత్రులు హరీశ్ రావు, కేటీఆర్‌లు తాము చేసిన పాపాలను కప్పిపుచ్చుకునేందుకు కాంగ్రెస్ పైకి నెట్టి వేసేందుకు ప్రయత్నిస్తున్నారు. రాజకీయంగా లబ్ధి పొందేందుకు కుట్ర చేస్తున్నారు’అని తీవ్ర స్థాయిలో ఫైర్ అయ్యారు.

‘గత ప్రభుత్వం కృష్ణా గోదావరి నదులపై ప్రాజెక్టులను కేంద్రానికి అప్పగించింది. కేసీఆర్ లోక్ సభలో ఉండగానే 2014 పునర్విభజన చట్టం అమోదం పొందింది. కేంద్రం తనను అడిగే విభజన చట్టంలోని ప్రతి అంశాన్ని రాసిందని కేసీఆర్ చెప్పారు. గత ప్రభుత్వం ఏపీకి లొంగి పోయింది. కేసీఆర్, కేటీఆర్, హరీశ్ రావు చేసిన పాపాలకు లెక్కే లేదు’అని మండిపడ్డారు.

‘బీఆర్ఎస్ ఆమోదం మేరకే ఈ చట్టం వచ్చింది. విభజన చట్టంలో కృష్ణా, గోదావరి ప్రాజెక్టుల నిర్వహణ, ఇతర అంశాలు చాలా స్పష్టంగా ఉన్నాయి. విభజన చట్టం మేరకు కృష్ణా, గోదావరిపై ఉన్న ప్రాజెక్టులను కేంద్రానికి అప్పగించారు. తెలంగాణకు శాశ్వతంగా రావాల్సిన నీటి హక్కును ధారాదత్తం చేశారు. ఇప్పుడు చట్టం వల్ల తెలంగాణకు ఏదైనా నష్టం జరిగితే దానికి కేసీఆర్ దే బాధ్యత’అని అన్నారు.

‘కేసీఆర్ ఈ చట్టానికి, పుస్తకానికి పూర్తి రచయిత. 2015లో కేఆర్ఎంబీ మీటింగ్‌లో తెలంగాణకు 299 టీఎంసీల నీళ్లు చాలని కేసీఆర్ అంగీకారం తెలిపారు. కృష్ణానదిలో 811 టీఎంసీల నీటిని ఇరు రాష్ట్రాల మధ్య పంపకాలపై కేంద్రం కమిటీ వేసింది. ఏపీకి 512, తెలంగాణకు 299 టీఎంసీలు ఇస్తున్నట్లు ప్రతిపాదించారు. ఆ ప్రతిపాదనకు కేసీఆర్‌, అధికారులు ఒప్పుకొని సంతకాలు పెట్టి.. ఏపీకి ఎక్కువ నీరు వచ్చేలా చేశారు’అని తీవ్ర ఆగ్రహం వ్యక్తం చేశారు.

కృష్ణా నదిపై ఉన్న 15 ప్రాజెక్టులను కేంద్రానికి అప్పగిస్తూ 2022లో సంతకాలు చేశారని వెల్లడించారు. కేఆర్‌ఎంబీ, జీఆర్‌ఎంబీ నిర్వహణకు 2023 బడ్జెట్‌లో రూ.400 కోట్లను కేటాయించారని తెలిపారు. రాష్ట్ర విభజన చట్టం ఆమోదం పొందినప్పుడు ప్రాజెక్టులపై కేసీఆర్‌ పార్లమెంట్‌లో ప్రశ్నించలేదన్నారు. కానీ ఇప్పుడు మాత్రం కృష్ణా నీటిలో 50 శాతం వాటా కావాలని అడుగుతున్నారని మండిపడ్డారు.

కమీషన్ల కోసం జగన్‌తో కేసీఆర్ చీకటి ఒప్పందాలు చేసుకున్నారని ఫైర్ అయ్యారు. జల దోపిడీకి కారణం కేసీఆర్ అన్నారు. ప్రాజెక్టులపై అసెంబ్లీ శ్వేత పత్రం విడుదల చేస్తామన్నారు. అసెంబ్లీలో ప్రాజెక్టులపై చర్చిద్దామన్నారు. కేసీఆర్ కు నిజాయితీ ఉంటే చర్చకు రావాలని సవాల్ విసిరారు. చర్చ జరిగినంత సేపు కేసీఆర్ కూర్చోవాలన్నారు. కేసీఆర్ కు మాట్లాడేందుకు పూర్తి అవకాశం ఇస్తామన్నారు.

తెలంగాణకు రావాల్సిన నీటిని జగన్ ఎత్తుకు పోతుంటే కేసీఆర్ నోరు మెదపలేదు. గ్రావిటీ ద్వారా కృష్ణా నదిలో వచ్చే 8 టీఎంసీల నీటిని వదులుకున్నారు. నేరుగా కేసీఆర్ తెలంగాణపై కుట్ర చేశారు. తెలంగాణకు కేసీఆర్ మరణ శాసనం రాశారు. కేసీఆర్ రాసిన మరణ శాసనాన్ని తిరిగి రాసేందుకు పయత్నాలు చేస్తున్నాం. కాళేశ్వరంపై నిపుణులే తేలుస్తారు’అని వెల్లడించారు.

కాళేశ్వరంపై విచారణ కోసం జడ్జిలను నియమించాలని లేఖలు రాశాం. చట్ట పరిధిలో ఏం చేయాలో.. ఎలాంటి చర్యలు తీసుకోవాలో తీసుకుంటాం. ప్రాజెక్టులను కేఆర్ఎంబీకి అప్పగించేది లేదు. ప్రాజెక్టుల విషయంలో కేసీఆర్ సర్వ నాశనం చేశారు. రూ. 95000 కోట్లు ఖర్చు పెట్టి ఒక్క ఎకరానికి కూడా నీరవ్వలేదు. కేసీఆర్, జగన్ ఏకాంత చర్చల్లో ఏం కుట్రలు చేశారో’అని నిప్పులు చెరిగారు.