– ఆసియా కప్ లో ఘన విజయం
– ఫైనల్లో చేతులెత్తేసిన లంక
– సిరాజ్ ధాటికి విలవిల్లాడిన లంకేయులు
– 50 పరుగులకే ఆలౌట్
– వికెట్ పడకుండా లక్ష్యాన్ని ఛేదించిన భారత్
– 8వసారి ఆసియాకప్ అందుకున్న రోహిత్ సేన
ఆసియా కప్-2023 ఫైనల్ లో భారత్ ఘన విజయం సాధించింది. ఆతిథ్య శ్రీలంకకు భారత బౌలర్లు చుక్కలు చూపించారు. ముఖ్యంగా సిరాజ్ నిప్పులు కక్కే బంతులతో విరుచుకుపడ్డాడు. లంక నిర్దేశించిన చిన్న లక్ష్యాన్ని మనోళ్లు అలవోకగా ఛేదించారు. దీంతో ఎనిమిదో ఆసియా కప్ టైటిల్ ను భారత్ సాధించినట్టైంది.
కొలంబోలోని ఆర్ ప్రేమదాస స్టేడియంలో టాస్ గెలిచి తొలుత బ్యాటింగ్ చేసింది శ్రీలంక జట్టు. 15.2 ఓవర్లలో కేవలం 50 పరుగులే చేసి ఆలౌటైంది. ఈ స్వల్ప లక్ష్యాన్ని భారత ఓపెనర్లు 6.1 ఓవర్లలో పూర్తి చేశారు. భారత స్టార్ పేసర్ సిరాజ్ ధాటికి నిలబడలేకపోయింది లంక జట్టు. ఏకంగా ఏడుగురు బ్యాటర్లు సింగిల్ డిజిట్ కు పరిమితం అయ్యారు. వారిలో నలుగురు పరుగుల ఖాతానే తెరవలేదు. 17 పరుగులు చేసిన కుశాల్ మెండిస్.. లంక బ్యాటర్లలో టాప్ స్కోరర్.
ముందుగా వికెట్ల పతనానికి బుమ్రా శ్రీకారం చుట్టగా.. దాన్ని సిరాజ్ కొనసాగించాడు. ఆరు వికెట్లను పడగొట్టిన సిరాజ్ లంక జట్టును చిత్తు చేశాడు. హార్దిక్ పాండ్య 3, బుమ్రా 1 వికెట్ పడగొట్టారు. సిరాజ్ ఈ మ్యాచ్ లో 16 బంతుల్లోనే 5 వికెట్లు పడగొట్టి రికార్డ్ నెలకొల్పాడు. శ్రీలంక దిగ్గజం చమిందా వాస్ రికార్డును సమం చేశాడు. మొత్తంగా ఈ మ్యాచ్ లో సిరాజ్.. 7 ఓవర్లు వేసి 21 పరుగులు మాత్రమే ఇచ్చాడు.
