ప్రతీకారంతో రగిలిపోతున్న ఇరాన్(Iran)కు ఇజ్రాయెల్(Israel) ఝలక్ ఇచ్చింది. ఇటీవల వందలాది మిస్సెల్స్‌, డ్రోన్లతో ఇరాన్, ఇజ్రాయిల్‌పై దాడి చేసింది. మిడిల్ ఈస్ట్‌లో భయానక వాతావరణం నెలకొంది. అయితే, ఈ దాడికి ప్రతీకారం తీర్చుకుంటామని ఇజ్రాయిల్ చెప్పినట్లుగానే ఇరాన్‌లోని ఒక సైట్ పైకి క్షిపణిని ప్రయోగించిందనే వార్తలు వినిపిస్తున్నాయి.
ఏప్రిల్ 1న సిరియా డమాస్కస్‌లోని ఇరాన్ రాయబార కార్యాలయం(Embassy of Iran)పై ఇజ్రాయెల్ వైమానిక దాడి చేసిన సంగతి తెలిసిందే. ఈ దాడిలో ఇరానియన్ రివల్యూషనరీ గార్డ్స్ కార్పస్‌కు చెందిన ఇద్దరు కీలక జనరల్స్‌తో పాటు పలువురు ఇరాన్ అధికారులు ప్రాణాలు కోల్పోయారు. అయితే, ఈ దాడితో ప్రతీకార చర్యగా ఇరాన్ గత శనివారం ఇజ్రాయిల్‌పై దాడి చేసింది.
ఇజ్రాయెల్ ఎయిర్ డిఫెన్స్ సిస్టమ్స్ చాలా వరకు ఇరాన్ డ్రోన్లు, మిస్సెళ్లను ఆకాశంలోనే అడ్డుకుని కుప్పకూల్చాయి. గురువారం ఐక్యరాజ్యసమితి ఈ పరిణామాలపై ఆందోళన వ్యక్తం చేశాయి. ఇజ్రాయిల్ తమ ప్రయోజనాలకు వ్యతిరేకంగా ఏదైనా తదుపరి సైనిక చర్యలకు పాల్పడకుండా ఆపాలని ఇరాన్ యూఎన్‌కు సూచించింది.
అమెరికా అధికారిని ఉటంకిస్తూ ఓ జాతీయ మీడియా సంస్థ గురువారం ఆలస్యంగా ఈ విషయాన్ని నివేదించింది. ఇరాన్ నగరంలోని ఇసాఫహాన్‌లోని విమానాశ్రయంలో పేలుడు శబ్దం వినిపించిందని, అయితే కారణం వెంటనే తెలియరాలేదని ఇరాన్‌కు చెందిన ఫార్స్ ఆ మీడియా సంస్థ తెలిపింది. దీంతో అనేక విమానాలు ఇరాన్ గగనతలం నుంచి మళ్లించబడ్డాయని పేర్కొంది.
