తోషాఖానా కేసులో అరెస్టయిన పాకిస్తాన్ మాజీ ప్రధాని, తెహ్రీక్-ఇ-ఇన్సాఫ్ (PTI) పార్టీ వ్యవస్థాపకుడు ఇమ్రాన్ ఖాన్(Imran Khan) ఇదే నెలలో విడుదలవుతారని ఆ పార్టీ కీలక నేత లతీఫ్ ఖోసా ఆశాభావం వ్యక్తం చేశారు. ఆదివారం ఓ కార్యక్రమంలో పాల్గొన్న ఆయన మాట్లాడుతూ ఇమ్రాన్ ఖాన్‌కు విధించిన శిక్షను కోర్టు సస్పెండ్ చేసిందని తెలిపారు.
ఇమ్రాన్ తన విడుదలపై చర్చలు జరపరని లేదా దేశం విడిచి పారిపోరని స్పష్టం చేశారు. పాకిస్తాన్ రాజ్యాంగం ప్రకారం అన్ని సంస్థలు పనిచేయాలని, ఫిబ్రవరి 8 ఎన్నికల్లో పార్టీ ఆదేశాన్ని తిరిగి పొందిన తర్వాత ఇమ్రాన్‌తో సంభాషణ సాధ్యమవుతుందని ఆయన తెలిపారు. ఈ సందర్భంగా షెహబాజ్ షరీఫ్ ప్రభుత్వంపై లతీఫ్ ఖోసా విరుచుకుపడ్డారు.
ఇమ్రాన్ పూర్తిగా ప్రతీకార రాజకీయాలకు వ్యతిరేకమని చెప్పుకొచ్చారు. సైఫర్ కేసు ఒక వారం కూడా నిలబడదని అనుకున్నట్లు చెప్పారు. మే 9 అల్లర్లకు సంబంధించిన ఏ కేసులోనూ పీటీఐ వ్యవస్థాపకుడి ప్రమేయం రుజువు కానప్పటికీ, సైఫర్ కేసులో మాజీ ప్రధాని ఇమ్రాన్ ఖాన్ దోషిగా నిర్ధారించిన పత్రాలు కోర్టు ముందు అందించబడలేదని ఖోసా పేర్కొన్నారు.
అంతకుముందు ఇమ్రాన్ ఖాన్ జైలు నుంచి విడుదల అవుతారని పీటీఐ ఛైర్మన్ బారిస్టర్‌ గోహర్ అలీ ఖాన్ పేర్కొన్నారు. పీటీఐ వ్యవస్థాపకుడిపై కేసులను “రాజకీయ ప్రేరేపిత కేసులు”గా అభివర్ణించారు. ఇమ్రాన్ ఖాన్‌పై చట్టపరమైన చర్యలన్నీ ముగుస్తున్నాయని ఆయన వెల్లడించారు.
