Andhra Pradesh

కొద్ది రోజుల నుంచి వైసీపీలో చేరుతున్నట్లు ప్రకటిస్తున్న కాపు ఉద్యమ నేత ముద్రగడ పద్మనాభం(Mudragada Padmanabham) సస్పెన్స్‌కు తెరదించారు. ఎట్టకేలకు సీఎం వైఎస్ జగన్మోహన్‌రెడ్డి సమక్షంలో వైసీపీ కండువా కప్పుకున్నారు. ఇవాళ ఉదయం తాడేపల్లి క్యాంపు కార్యాలయంలో(Thadepalli Camp Office) ముద్రగడతో పాటు ఆయన తనయుడు గిరి వైసీపీలో చేరారు.

ఈ సందర్భంగా ముద్రగడను సీఎం జగన్ ఆప్యాయంగా హత్తుకొని అభినందనలు తెలిపారు. ముద్రగడ రాజకీయ పార్టీలో చేరికపై ఇటీవల ప్రచారం ఊపందుకుంది. అయితే, తొలుత ఏపార్టీలో చేరతారో ఆయన స్పష్టత ఇవ్వలేదు. అనేక ఊహాగానాల మధ్య వైసీపీలో చేరతానని కుండబద్దలు కొట్టారు. అయితే సెక్యూరిటీ కారణాలతో అది కాస్త వాయిదా పడుతూ వచ్చింది.

ఇటీవల ఆయనే స్వయంగా వైసీపీలో తానొక్కడినే వెళ్లి సీఎం జగన్ సమక్షంలో వైసీపీలో చేరతానని ఓ లేఖలో పేర్కొన్నారు. ఎట్టకేలకు ఆయన వైసీపీలో చేరగా ఎక్కడి నుంచి పోటీ చేస్తారనేది ఉత్కంఠగా మారింది. ఇప్పటికే పిఠాపురం నియోజకవర్గం నుంచి జనసేన అధినేత పవన్ కల్యాణ్ కూటమి అభ్యర్థిగా పోటీ చేస్తున్నట్లు ప్రకటించారు.

అయితే, ముద్రగడ పవన్ పై పోటీ చేస్తారంటూ ప్రచారం జరుగుతోంది. ముద్రగడ పోటీకిదూరంగా ఉంటే ఆయన కుమారుడు గిరి వైసీపీ అభ్యర్థిగా పవన్‌పై బరిలోకి దిగే అవకాశం ఉంది. ఈ విషయంపై రెండుమూడు రోజుల్లో స్పష్టత వచ్చే అవకాశాలు కనిపిస్తున్నాయి. ప్రస్తుతం పిఠాపురం వైసీపీ నియోజకవర్గం సమన్వయకర్తగా వంగా గీత విశ్వనాథ్ కొనసాగుతున్నారు.

సీఎం జగన్(CM Jagan) ఇలాగే అప్పులు చేసుకుంటూ పోతే శ్రీలంక అధ్యక్షుడి(Srilanka President)కి పట్టిన గతే పడుతుందని జనసేన అధినేత పవన్ కల్యాణ్(Pawan Kalyan)అన్నారు. మంగళగిరి(Mangalagiri)లోని పార్టీ కార్యాలయంలో నిర్వహించిన జనసేన ఆవిర్భావ దినోత్సవ కార్యక్రమంలో ఆయన మాట్లాడారు.

అప్పులు తెచ్చి వెల్ఫేర్ చేసుకుంటూ వెళ్లిపోతే.. ప్రతి ఆటో డ్రైవర్, ప్రతి మహిళ.. శ్రీలంక అధ్యక్షుడి భవనాన్ని ఎలా వాడుకున్నారో తాడేపల్లి ప్యాలెస్‌ను కూడా అలాగే వాడుకుంటారని అన్నారు. సీఎం జగన్‌కూ అలాగే జరగదని గ్యారంటీ ఏంటని ప్రశ్నించారు. జనం తిరగబడితే ఎలా ఉంటుందో ఆంధ్రా-తెలంగాణ సరిహద్దులో చూశారని ప్రజలు తిరగబడితే ఎవరూ తట్టుకోలేరని అని పవన్ అన్నారు.

తగ్గే కొద్దీ ఎదుగుతాం తప్ప.. నాశనం ఉండదన్నారు. తనపై దాడికి పాల్పడితే ఏం జరుగుతుందో మీ ఊహకే వదిలేస్తున్నానని జనసేనాని వ్యాఖ్యానించారు. తాను రాజకీయాల్లోకి వచ్చింది అధికారం కోసం కాదని మార్పు కోసమేనని స్పష్టం చేశారు. 150 మందితో జనసేనను ప్రారంభించామని ఇవాళ 6.50 లక్షల మంది క్రియాశీలక కార్యకర్తలు, నాయకులు ఉన్నారని తెలిపారు.

తాను ఒక ఆశయం కోసం వచ్చిన వాడినని, ఓడిపోయినప్పుడు శూన్యమనిపించిందని చెప్పారు. అన్యాయం జరిగితే సగటు మనిషి తిరగబడేలా ధైర్యం ఇచ్చేందుకు వచ్చానన్నారు. వైకాపా, జగన్‌పై నాకు వ్యక్తిగతంగా ద్వేషం లేదని చెప్పారు. తొక్కేయాలని చూస్తే తామూ తొక్కేస్తామన్నారు. అధికారంలో ఉన్న మనుషులు ఇంత క్రూరంగా ఉంటారా అనిపిస్తోందన్నారు. ఒక సమూహాన్ని ప్రభావితం చేసే వ్యక్తి రాజకీయాల్లోకి వస్తే పుట్టగతులు ఉండవనుకున్నారు.

పవన్ కల్యాన్ పోటీ చేసే స్థానం ఖరారు

జనసేన అధినేత పవన్ కల్యాణ్ పోటీ చేసే స్థానంపై ఉత్కంఠ వీడింది. పిఠాపురం నియోజకవర్గం నుంచి పోటీ చేయనున్నట్లు పవన్ స్వయంగా వెల్లడించారు. మంగళగిరిలోని పార్టీ కేంద్ర కార్యాలయంలో ఏర్పాటు చేసిన ఆవిర్భావ దినోత్సవ సభలో ఈమేరకు ప్రకటన చేశారు. తనకు ఎమ్మెల్యేగా పోటీ చేయాలని ఉందని, ప్రస్తుతానికి ఎంపీగా పోటీ చేసే ఆలోచన లేదని స్పష్టం చేశారు. దీనిపై కూటమి పెద్దలతో మాట్లాడిన తర్వాత తుది నిర్ణయం తీసుకుంటానని వెల్లడించారు.

టీడీపీ(TDP) హయాంలో డ్వాక్రా సంఘాలు ఏర్పాటు చేసి మహిళల్లో చైతన్యం తీసుకొచ్చామని.. ఇప్పుడు అవి ప్రపంచానికే ఆదర్శమయ్యాయని టీడీపీ అధినేత చంద్రబాబు నాయుడు (Chandrababu Naidu) అన్నారు. ఉండవల్లిలోని తన నివాసంలో ‘కలలకు రెక్కలు’ కార్యక్రమంలో ఆయన మాట్లాడారు. టీడీపీ కూటమి అధికారంలోకి రాగానే ‘మహాశక్తి’ కింద ఐదు కార్యక్రమాలు తీసుకొస్తామని ప్రకటించారు.

మహాశక్తి కార్యక్రమంలో భాగంగా తల్లికి వందనం పేరుతో ఏడాదికి రూ.20 వేలు ఇవ్వాలని నిర్ణయం తీసుకున్నట్లు ఆయన చెప్పారు. ఎంత మంది పిల్లలుంటే అంత మందికి తల్లికి వందనం పథకం అమలు చేస్తామని చెప్పుకొచ్చారు. దీపం పథకం పేరుతో ఏడాదికి ఉచితంగా మూడు గ్యాస్ సిలిండర్లు.. ఆర్టీసీ బస్సుల్లో మహిళలకు ఉచిత ప్రయాణం.. 18-59 మధ్య వయస్సున్న మహిళలకు ఏడాదికి రూ.18 వేలు ఇవ్వనున్నట్లు చంద్రబాబు తెలిపారు.

అదేవిధంగా స్థానిక సంస్థల్లో మహిళలకు 50 శాతం రిజర్వేషన్లు వచ్చాయంటే ఎన్టీఆర్ చొరవే అని చెప్పారు. టీడీపీ హయాంలో 22 కొత్త పథకాలు తీసుకొచ్చినట్లు ఆయన గుర్తుచేశారు. ఒకప్పుడు ఐటీ అని తానంటే అందరూ నవ్వారని.. ఇప్పుడు ఆ రంగంలో ప్రపంచమంతా మనవాళ్లు ఉన్నారని వివరించారు. టీడీపీ హయాంలో ఉద్యోగాలు, కళాశాల సీట్లలో రిజర్వేషన్లు తీసుకొచ్చామని అన్నారు. ఆడబిడ్డలకు రిజర్వేషన్లతో ప్రస్తుతం మగవారితో సమానంగా పని చేస్తున్నారని అన్నారు.

అయితే, మెరుగైన అవకాశాలు కల్పిస్తే మరింత ముందుకెళ్తారని చంద్రబాబు తెలిపారు. ఉజ్వల భవిష్యత్తు కోసం ఆలోచించి ఆచరణ సాధ్యం చేసే పార్టీ తెలుగుదేశం అని వివరించారు. మహిళలకు ఆస్తి హక్కు కల్పించామని చంద్రబాబు గుర్తు చేశారు. పిల్లల భవిష్యత్తు కోసం టీడీపీ తీసుకొచ్చిన పథకాలతో ఎంతో మంది విదేశాలకు వెళ్లి స్థిరపడ్డారని వివరించారు.

ఇంటింటికి మంచి నీటి కుళాయిలు అందిస్తామని చంద్రబాబు హామీ ఇచ్చారు. ఈ పథకాలన్నీ మహిళల కోసం ప్రవేశ పెట్టామన్నారు. విద్యార్ధినుల కోసం ‘కలలకు రెక్కలు’ పేరుతో మరో పథకం ప్రవేశపెట్టినట్లు వివరించారు. పేద విద్యార్థినులు కలల సాకారం చేసుకోవాలంటే ఆర్థిక ఇబ్బందులు వస్తున్నాయనీ.. ఉన్నత చదువుల కోసం బ్యాంక్ లోన్లు తీసుకునేలా మేం సహకరిస్తామని వెల్లడించారు.

మరోవైపు ప్రధాని మోడీ చెబుతున్న వికసిత్ భారత్ 2047 జరిగి తీరుతుందన్నారు చంద్రబాబు. జగన్ పాలనలో జరిగిన విధ్వంసం వల్ల రాష్ట్రంలో ఏ వ్యవస్థా సక్రమంగా లేదన్నారు. రైతులు, యువత, కార్మికులు నిరుద్యోగులు.. అన్ని వర్గాలు నలిగిపోయాయని మండిపడ్డారు. విద్యా రాజధానిగా ఎదగాల్సిన రాష్ట్రం సర్వనాశనమైందన్నారు. ప్రజలు గెలవాలంటే వైసీపీ ఓడి తీరాలని చంద్రబాబు పేర్కొన్నారు.

భీమవరం (Bhimavaram) రాజకీయాలు సెగలు పుట్టిస్తున్నాయి. జనసేన అధినేత చేసిన వ్యాఖ్యలు, దీపావళి పటాసుల్లా పేలగా.. ఆ మాటలకు ఎమ్మెల్యే గ్రంధి శ్రీనివాస్ (MLA Grandhi Srinivas) మండిపడ్డారు. రాబోయే ఎన్నికల్లో ఎలాగైనా భీమవరంలో గెలిచి తీరాలనే ఆశతో తనపై రౌడీ అనే ముద్రవేసి మతి తప్పినట్లు మాట్లాడుతున్నారని పవన్ కళ్యాణ్ పై విరుచుకుపడ్డారు..

చంద్రబాబు (Chandrababu) రాసిచ్చిన స్క్రిప్ట్‌తో పవన్ రౌడీలా మాట్లాడుతున్నారని విమర్శించారు. పవన్ మానసిక స్థితి ఏంటో అర్థం కావడం లేదని, ఆయన మంచోడైతే.. జేడీ లాంటి మేధావులు ఎందుకు దూరం అయ్యారో చెప్పాలని ప్రశ్నించారు. తనపై కోపం లేదని గత నెలలో భీమవరంకు వచ్చినప్పుడు అన్నారని… ఇప్పుడేమో తనను రౌడీ అంటున్నారని, ఒక్క సారి తన గతం తెలుసుకొని మాట్లాడాలని గ్రంధి శ్రీనివాస్ విమర్శించారు.

జనసేన పార్టీ కార్యాలయానికి భీమవరంలో స్థలం ఇవ్వకుండా తాను అడ్డుకున్నారని పవన్ ఆరోపించారు. ఇదంతా కావాలనే తనను చులకన చేయడానికి మాట్లాడిన మాటలుగా గ్రంథి శ్రీనివాస్ పేర్కొన్నారు.. పవన్‌కు స్థలం కావాలంటే.. తన భూమి నుంచి ఇచ్చేవాడినని తెలిపారు. తన మీద పవన్ కు ఎందుకంత అసూయ అనేది తనను అర్థం కావడం లేదని అన్నారు.. పవన్ నిజ స్వరూపం తెలియని అభిమానులు ఆయనను సీఎం సీఎం అంటూ ఆకాశానికి ఎత్తుతున్నారని అన్నారు.

కానీ పవన్ (Pavan) మాత్రం 21 సీట్లకే పరిమితమై చంద్రబాబు మోచేతి నీళ్లు తాగుతున్నారని ఎద్దేవా చేశారు. అసలు రాజకీయాల్లో చిరంజీవికి, పవన్ కళ్యాణ్ కు అసలు పోలికే లేదని విమర్శించారు.. ఎన్నికల్లో పోటీ చేసి చిరంజీవి 18 సీట్లు గెలిచారని.. పవన్ మాదిరి విమర్శలు చేయలేక రాజకీయాల నుంచి వెళ్లిపోయారని గుర్తు చేశారు.. సొంత అన్న నాగబాబుకు కూడా అన్యాయం చేసి రాజకీయ చరిత్రలో నిలిచిపోయారని గ్రంథి శ్రీనివాస్ ఆరోపించారు..

కాపు ఉద్యమ నేత ముద్రగడ పద్మనాభం(Mudragada Padmanabham) వైసీపీ(YCP)లో చేరతానని ప్రకటించిన విషయం తెలిసిందే. అయితే ఆ పార్టీలో చేరిక వాయిదా పడింది. ఈ విషయాన్ని ఆయన ఓ ప్రకటనలో పేర్కొన్నారు.

సెక్యూరిటీ కారణాలతో కిర్లంపూడి(Kirlampudi) నుంచి తాడేపల్లి ర్యాలీని రద్దు చేసుకున్నట్లు తెలిపారు. ఈ నెల 15వ తేదీన లేదా 16న ముద్రగడ ఫ్యామిలీ మాత్రమే సీఎం వైఎస్ జగన్ మోహన్ రెడ్డి(CM Jaganmohan Reddy) సమక్షంలో వైసీపీలో చేరబోతున్నట్లు స్పష్టం చేశారు.

ప్రజల ఆశీస్సులతో వైసీపీలో చేరాలని నిర్ణయం తీసుకున్నట్లు వెల్లడించారు. ఊహించిన దానికన్నా భారీ స్థాయిలో స్పందన రావడంతో కూర్చోవడానికే కాదు.. నిలబడడానికీ స్థలం సరిపోదన్నారు. వచ్చిన ప్రతీఒక్కరినీ తనిఖీ చేయడం ఇబ్బంది అని చెప్పడంతో తాడేపల్లి కార్యక్రమాన్ని రద్దు చేసుకున్నట్లు వెల్లడించారు.

ప్రజలను నిరుత్సాహపరిచినందుకు క్షమాపణలు తెలిపారు. ఈనెల 15వ తేదీ లేదా 16వ తేదీన తానే స్వయంగా తాడేపల్లికి వెళ్లి సీఎం జగన్ సమక్షంలో పార్టీలో చేరాతానని స్పష్టం చేశారు. ప్రజల ఆశీస్సులు ఎప్పటికీ తనపై ఉండాలని కోరుకుంటున్నట్లు ముద్రగడ పద్మనాభం ఆ ప్రకటనలో పేర్కొన్నారు.

సీట్ల కేటాయింపులో హెచ్చు తగ్గులకంటే రాష్ట్ర శ్రేయస్సే ముఖ్యమని జనసేన అధినేత పవన్ కల్యాణ్ అన్నారు. లోక్ సభ, శాసనసభ ఎన్నికల్లో బీజేపీ(BJP), తెలుగుదేశం (TDP), జనసేన కలసి పని చేస్తున్న విషయం తెలిసిందే. ఈ మేరకు సోమవారం సీట్ల కేటాయింపుపై ఆయా పార్టీల అధినేతలు భేటీ అయ్యారు.

సుధీర్ఘ చర్చల అనంతరం అసెంబ్లీ, లోక్ సభ స్థానాలకు పోటీకి సంబంధించి మూడు పార్టీలకు సీట్లను కేటాయించారు. తదనంతరం జనసేన అధినేత సీట్ల కేటాయింపుపై మంగళవారం ఆసక్తికర ట్వీట్ చేశారు. రాష్ట్ర భవిష్యత్తును దృష్టిలో పెట్టుకుని సీట్ల పంపకాన్ని చేపట్టినట్లు వెల్లడించారు. మూడు పార్టీలు ధృడ సంకల్పంతో ముందడుగు వేశాయని తెలిపారు.

ఈ కూటమి ఆవిర్భావంతో రాష్ట్ర పురోభివృద్ధికి ఒక బలమైన పునాదిపడిందని ప్రగాఢ విశ్వాసంతో ఉన్నట్లు జనసేనాని తెలిపారు. ఎన్డీఏ భాగస్వాములుగా రాష్ట్ర ప్రజలకు సేవ చేసే అవకాశాన్ని సద్వినియోగపరచుకుంటామన్నారు. ‘‘చర్చల్లో పాల్గొన్న కేంద్ర మంత్రి గజేంద్ర సింగ్ షెకావత్, బీజేపీ జాతీయ ఉపాధ్యక్షుడు శ్రీ బైజయంత్ పాండా గారికి, టీడీపీ జాతీయ అధ్యక్షుడు చంద్రబాబు నాయుడు గారికి కృతజ్ఞతలు’’ అంటూ రాసుకొచ్చారు.

అదేవిధంగా ‘‘గౌరవ ప్రధాన మంత్రి నరేంద్ర మోదీ గారి శక్తిమంతమైన, దార్శనిక నాయకత్వంలో ఆంధ్రప్రదేశ్ రాష్ట్రంలో జరగనున్న లోక్‌సభ, శాసనసభ ఎన్నికల్లో బీజేపీ, తెలుగుదేశం, జనసేన కలసి పనిచేస్తాయి. రాష్ట్ర అభివృద్ధి, ప్రగతి, ప్రజల స్థితిగతుల మెరుగుదలకు మూడు పార్టీలు కట్టుబడి ఉన్నాయి.’ అని పేర్కొన్నారు.