Breaking News

తమిళనాడు ( Tamilnadu)లో ఘోర రోడ్డు ప్రమాదం చోటు చేసుకుంది. చెన్నై- బెంగళూరు జాతీయ రహదారి (National Highway)పై రెండు బస్సులు ఒక దానితో ఒకటి ఢీ కొన్నాయి. ఈ ఘటనలో ఐదుగురు మృతి చెందగా, మరో 60 మందికి తీవ్ర గాయాలయ్యాయి. మృతుల్లో ఒక మహిళ కూడా ఉన్నట్టు అధికారులు తెలిపారు.

బెంగళూరు నుంచి చెన్నైకి వెళ్తున్న స్టేట్ ఎక్స్‌ప్రెస్ ట్రాన్స్‌పోర్ట్ కార్పొరేషన్ బస్సు, చెన్నై నుంచి బెంగళూరు వెళ్తున్న ఓమ్ని బస్సు చెట్టియప్పనూర్ వద్ద ఒక దానితో ఒకటి ఢీ కొన్నాయి. సమాచారం అందుకున్న పోలీసులు ఘటనా స్థలానికి చేరుకున్నారు. క్షతగాత్రులను సమీపంలోని ఆస్పత్రికి తరలించారు.

మృతులను గుడువంచెర్రికి చెందిన రితిక (32), మహమ్మద్ ఫిరోజ్ (37), వనియంబడి, బస్సు డ్రైవర్ కే.ఎలుమలై (47)గా గుర్తించారు. మృతుల్లో ఏపీలోని చిత్తూరుకు చెందిన అజిత్ (25) కూడా ఉన్నట్టు అధికారులు వెల్లడించారు. ఓమ్ని బస్సు డ్రైవర్ ఎన్. సయ్యద్ కు తీవ్రగాయాలు కాగా ఆయన్ని ఆస్పత్రికి తరలించగా చికిత్స పొందుతు మృతి చెందాడని పేర్కొన్నారు.

మరోవైపు యూపీలోని గురుగావ్ ప్రాంతంలో కారును ఆయిల్ ట్యాంకర్ ఢీ కొట్టింది. ఈ ఘటనలో ఐదుగురు వ్యక్తులు మృతి చెందారు. జైపూర్ నుంచి వస్తున్న ఆయిల్ ట్యాంకర్ కారును ఢీ కొట్టింది. దీంతో కారులో ఉన్న సీఎన్ జీ సిలిండర్లలో మంటలు చెలరేగాయి. క్షణాల్లోనే కారులో ఉన్న ముగ్గురు వ్యక్తులు మంటల్లో కాలిపోయారు. కారును ఢీ కొట్టడంతో ట్యాంకర్ అదుపు తప్పి మరో వ్యాన్ ను ఢీ కొట్టింది. దీంతో వ్యాన్ లోని ఇద్దరు వ్యక్తులు మృతి చెందినట్టు అధికారులు తెలిపారు.

హర్యానా (Haryana)లో కల్తీ మద్యం (Spurious Liqour) కాటు వేసింది. తాజాగా కల్తీ మద్యం తాగి మరో ఐదుగురు మృతి చెందారు. దీంతో ఇప్పటి వరకు కల్తీ మద్యం మృతుల సంఖ్య 12కు చేరినట్టు అధికారులు తెలిపారు. మృతులు పూస్ ఘర్, మందే బరి, పంజేటో కి మజ్రా, యమునా నగర్‌లోని శరణ్ గ్రామానికి చెందిన వారిగా అధికారులు పేర్కొన్నారు.

మృతుల్లో యూపీకి చెందిన ఇద్దరు వలస కూలీలు ఉన్నట్టు వెల్లడించారు. అంబాలలో కల్తీ మద్యం సేవించిన తర్వాత వారి ఆరోగ్యం క్షీణించిందని చెప్పారు. ఇప్పటికే కల్తీ మద్యం కేసులో దర్యాప్తును పోలీసులు వేగవంతం చేశారు. ఈ కేసులో ఇప్పటికే సిట్ ను పోలీసులు ఏర్పాటు చేశారు.

మొదట యమునానగర్ జిల్లాలోని మండేబరి గ్రామంలో కల్తీ మద్యం మరణాలు వెలుగు చూసినట్టు అధికారులు తెలిపారు. సోమ, బుధవారం నాడు కల్తీ మద్యం తాగి మొత్తం ఏడుగురు మరణించారు. కానీ పోలీసులకు సమాచారం ఇవ్వకుండానే మృతులకు కుటుంబ సభ్యులు అంత్యక్రియలు నిర్వహించారు.

ఆస్పత్రిలో ఓ వ్యక్తి మరణంపై అనుమానాలు రావడంతో పోలీసులు దర్యాప్తు మొదలు పెట్టారు. దీంతో అసలు విషయం వెలుగులోకి వచ్చింది. ఈ కేసుకు సంబంధించి ఇప్పటికే పలువురుని పోలీసులు విచారించారు. రాష్ట్ర వ్యాప్తంగా పలు చోట్ల కల్తీ మద్యంపై పోలీసులు దాడులు చేస్తున్నారు.

దేశ రాజధాని ఢిల్లీలో వాయు నాణ్యత (AQI) స్వల్పంగా మెరుగుపడింది. నిన్న కురిసిన వర్షానికి వాతావరణంలోని విషపూరిత పొగమంచు (Toxic haze) కొట్టుకుపోయింది. దీంతో ఢిల్లీ వాసులకు కాస్త ఉపశమనం లభించింది. కానీ ఇప్పటికీ వాయు నాణ్యత సూచీ పేలవమైన స్థాయిలోనే ఉన్నట్టు కేంద్ర కాలుష్య నియంత్రణ బోర్డు (CPCB) వెల్లడించింది.

ఢిల్లీలో వాయు నాణ్యత సూచీ 339 గా ఉన్నట్టు సిస్టమ్ ఆఫ్ ఎయిర్ క్వాలిటీ అండ్ వెదర్ ఫోర్ కాస్టింగ్ అండ్ రీసెర్చ్ (SAFAR)తెలిపింది. ఆనంద్ విహార్ ప్రాంతంలో వాయు నాణ్యత సూచీ 282 గా ఉన్నట్టు పేర్కొంది. ఆర్ కే పురంలో 220, పంజాబీ బాగ్ లో 236, ఐటీఓ 263గా ఏక్యూఐ ఉన్నట్టు చెప్పింది.

ఇది ఇలా వుంటే ఢిల్లీలో కాలుష్య స్థాయి కాస్త తగ్గడంతో సరి-బేసి విధానాన్ని ప్రస్తుతానికి వాయిదా వేయాలని అనుకుంటున్నట్టు ఢిల్లీ పర్యావరణ మంత్రి గోపాల్ రాయ్ వెల్లడించారు. నగరంలో వాయు నాణ్యత సూచీ 450 నుంచి 300కు తగ్గి పోయిందన్నారు. ఈ నేపథ్యంలో సరి-బేసీ విధానాన్ని వాయిదా వేయాలని నిర్ణయించామన్నారు.

దీపావళి పండుగ తర్వాత మరోసార కాలుష్య స్థాయిపై సమీక్ష నిర్వహిస్తామన్నారు. అప్పటి పరిస్థితుల ఆధారంగా సరి-బేసి విధానంపై నిర్ణయం తీసుకుంటామన్నారు. దీపావళి నేపథ్యంలో కాలుష్యం పెరిగే అవకాశం ఉన్న నేపథ్యంలో ‘దీపాలు వెలిగించండి… బాణా సంచా కాల్చకండి’అనే క్యాంపెయిన్ ను ఢిల్లీ ప్రభుత్వం విస్తృతంగా ప్రచారం చేస్తోంది.

తృణ ధాన్యాల ప్రాముఖ్యతను వివరిస్తు ప్రధాని మోడీ (PM Modi) సాహిత్య సహాయం అందించిన పాట గ్రామీ అవార్డు (Grammy Award)లకు నామినెట్ అయింది. తృణ ధాన్యాల ప్రాముఖ్యతను వివరిస్తు ప్రధాని మోడీ ‘అంబండెన్స్ ఆఫ్ మిల్లెట్స్’ టైటిల్ తో ఓ పాటను జూన్‌లో విడుదల చేశారు. హిందీతో పాటు ఇంగ్లీష్ భాషల్లో ఈ పాటను విడుదల చేశారు.

ఈ పాట చాలా పాపులర్ అయింది. ఈ పాటను ఇండో అమెరికన్ అవార్డు విన్నింగ్ సింగర్ పాల్గుణి షా, తన భర్త గౌరవ్ షాతో కలిసి పాడారు. ఈ పాటకు ప్రధాని మోడీ కూడా గొంతు కలిపారు. అదే సమయంలో ఈ పాటకు ప్రధాని మోడీ సాహిత్య సహకారాన్ని కూడా అందించారు. పలు సందర్బాల్లో మిల్లెట్స్ గురించి ప్రధాని మోడీ చేసిన ప్రసంగాలను కూడా ఇందులో జోడించారు.

ఈ పాట గ్రామి అవార్డుకు నామినెట్ అయిన విషయాన్ని సింగర్ పాల్గుణి షా తెలిపారు. గతేడాది తాను గ్రామీ అవార్డు అందుకున్న తర్వాత ప్రధాని మోడీని ఢిల్లీలో కలుసుకున్నట్టు ఆమె చెప్పారు. ఆ సమయంలోనే తృణ ధాన్యాలపై పాట పాడితే బాగుంటుదని ఒక ఆలోచన వచ్చిందని పేర్కొన్నారు.

సమాజంలో మార్పు తీసుకు రావడానికి, మానవళికి మంచి సందేశం పంపేందుకు సంగీతం ఎలా ఉపయోగపడుతుందని అప్పుడు తమ మధ్య చర్చ జరిగిందన్నారు. అప్పుడు ఆకలిని అంతం చేసే ఒక గొప్ప సందేశంతో కూడిన పాటను రాయాలని ప్రధాని మోడీ తనకు సూచించారని ఆమె వెల్లడించారు.