Breaking News

బీజేపీ (BJP)లో జనసేన (Janasena) చిచ్చు పెట్టింది. నాగర్ కర్నూల్ సీటు జనసేనకు కేటాయిస్తారంటూ వార్తలు రావడంతో బీజేపీ శ్రేణులు భగ్గుమన్నాయి. అసలు జిల్లాలో జనసేన ఉనికే లేదని బీజేపీ శ్రేణులు మండిపడుతున్నాయి. అలాంటిది అక్కడ జనసేనకు ఎలా టికెట్ కేటాయిస్తారంటూ అధిష్టానం నిర్ణయంపై బీజేపీ నేతలు అగ్గిమీద గుగ్గిలం అవుతున్నారు.

జనసేనకు నాగర్ కర్నూల్ సీటు ఇవ్వొద్దంటూ బీజేపీ నేత దిలీప్ చారి ఆధ్వర్యంలో కార్యకర్తలు బీజేపీ స్టేట్ ఆఫీస్ కార్యాలయం ఎదుట ఆందోళనకు దిగారు. నాగర్ కర్నూల్ సీటును జనసేనకు కేటాయిస్తారంటూ వస్తున్న వార్తలతో బీజేపీ శ్రేణుల్లో ఆందోళన రేకెత్తించిందని దిలీప్ చారి అన్నారు. తాము నిరసనలు తెలిపేందుకు రాలేదని స్పష్టం చేశారు. కేవలం తమ బాధను రాష్ట్రపార్టీ దృష్టికి తీసుకు వచ్చేందుకు వచ్చామన్నారు.

జనసేనను రంగంలోకి దించితే పార్టీకి వచ్చే లాభం ఏంటని ప్రశ్నించారు. జిల్లాలో ఎప్పటి నుంచో మంత్రి అక్రమాలకు వ్యతిరేకంగా తాము పోరాడుతున్నామని దిలీప్ చారీ గుర్తు చేశారు. మంత్రి అక్రమాలను ప్రశ్నించి ఎన్నో కేసులు ఎదుర్కొన్నామని చెప్పారు. ఇలాంటి నేపథ్యంలో బీజేపీ నేతలకు కాకుండా జనసేనకు టికెట్ ఇవ్వడం సరికాదన్నారు. జనసేనకు టికెట్ కేటాయిస్తున్న వార్త నిజమైతే ఆత్మహత్య చేసుకునే ఆలోచనలో బీజేపీ కార్యకర్తలు ఉన్నారని తెలిపారు.

జిల్లాలో ఐదేండ్లుగా యుద్ధం చేశామన్నారు. అలుపెరగని పోరాటం చేస్తున్న బీజేపీ శ్రేణుల స్థైర్యాన్ని దెబ్బతీసేలా, ప్రజల్లో చులకన భావం వచ్చే విధంగా జనసేనకు టికెట్ కెటాయిస్తున్నారంటూ మండిపడ్డారు. ఇంతకన్నా అవమానకరమైన విషయం మరొకటి లేదన్నారు. జనసేనకు టికెట్ కేటాయించడం లేదని స్పష్టమైన ప్రకటన వచ్చే వరకు పార్టీ కార్యాలయంలోనే ఉంటామన్నారు.

జీహెచ్ఎంసీ (GHMC) పరిధిలో ఈ రోజు ఐటీ దాడులు (IT Raids) కలకలం రేపాయి. కాంగ్రెస్ నేతలే టార్గెట్‌గా ఈ దాడులు సాగాయి. ఎన్నికల నేపథ్యంలో పలు పార్టీల అభ్యర్థులపై ఇటీవల ఆదాయపన్ను శాఖ నజర్ పెట్టింది. ఈ క్రమంలో తాజాగా కాంగ్రెస్ అభ్యర్థుల నివాసాలు, కార్యాలయాలే లక్ష్యంగా ఐటీ అధికారులు ఈ రోజు తనిఖీలు నిర్వహించారు.

రంగారెడ్డి జిల్లాలో ఈ రోజు ఐటీ అధికారులు దాడులు చేశారు. మహేశ్వరం నియోజక వర్గం కాంగ్రెస్ అభ్యర్థి కిచ్చన్నగారి లక్ష్మారెడ్డి నివాసంలో ఐటీ అధికారులు సోదాలు నిర్వహించారు. దీంతో పాటు శంషాబాద్ బహదూర్ గూడలోని కేఎల్ఆర్ ఫామ్ హౌస్ తో పాటు ఆయన నివాసం, సికింద్రబాద్ లోని కేఎల్ఆర్ కన్ స్ట్రక్షన్స్ కార్పొరేట్ కార్యాలయాలపై అధికారులు దాడులు చేశారు.

మరో వైపు బడంగ్ పేట మేయర్ చిగురింత పారిజాత రెడ్డి ఇంటిపై ఐటీ దాడులు జరిగాయి. ఆమె భర్త నర్సింహా రెడ్డికి పెద్ద ఎత్తున రియల్ ఎస్టేట్ వెంచర్స్, పెద్ద సంఖ్యలో వైన్స్ వ్యాపారాలు వున్నాయి. స్థానిక ఎమ్మెల్యే సబితా ఇంద్రారెడ్డికి అత్యంత నమ్మకస్తునిగా ఉన్నారు. ఇటీవల సబితా ఇంద్రారెడ్డితో విభేదాల నేపథ్యంలో నర్సింహా రెడ్డి కాంగ్రెస్ పార్టీలో చేరారు. ఆ తర్వాత మహేశ్వరం టికెట్ కోసం లాబీయింగ్ కూడా చేశారు.

ఇది ఇలా వుంటే బాలాపూర్ గణేశ్ లడ్డూను వేలంలో కొనుగోలు చేసిన వంగేటి లక్ష్మారెడ్డి నివాసంపై ఐటీ దాడులు చేసింది. అటు నల్లగొండ కాంగ్రెస్ అభ్యర్థి కోమటిరెడ్డి వెంకటరెడ్డి తోడల్లుడు గిరిధర్ రెడ్డి ఇంటిపై కూడా ఐటీ దాడులు జరిగాయి. మొత్దం 14 ప్రాంతాల్లో 32 మంది ఐటీ అధికారుల బృందం దాడులు చేసింది.

మంత్రి సబితా ఇంద్రారెడ్డి ప్రోద్బలంతోనే ఈ దాడులు జరిగాయని కాంగ్రెస్ నేతలు ఆరోపిస్తున్నారు. ఐటీ దాడుల నేపథ్యంలో కేఎల్ఆర్ ఫాం వద్ద కాంగ్రెస్ కార్యకర్తలు ఆందోళనకు దిగారు. కేఎల్అర్‌ను బయటికి పంపించాలని కాంగ్రెస్ నేతలు డిమాండ్ చేశారు. మంత్రి సబితా ఇంద్రారెడ్డికి వ్యతిరేకంగా కాంగ్రెస్ నేతలు నినాదాలు చేశారు.

కాంగ్రెస్ అగ్రనేత రాహుల్ గాంధీ (Rahul Gandhi) పై బీజేపీ జాతీయ ప్రధాన కార్యదర్శి, ఎంపీ బండి సంజయ్ (Bandi Sanjay) తీవ్ర స్థాయిలో ఫైర్ అయ్యారు. అధికారంలోకి వస్తే ఓబీసీ కులగణన చేపడతామంటూ రాహుల్ గాంధీ చేసిన వ్యాఖ్యలు వింటే నవ్వొస్తోందంటూ ఎద్దేవా చేశారు. తెలంగాణలో కాంగ్రెస్ అధికారంలోకి వస్తే బీసీని ముఖ్యమంత్రిగా చేసే దమ్ము రాహుల్ గాంధీకి ఉందా అని ఆయన ప్రశ్నించారు.

దేశంలో అధికారం కోల్పోయి కాంగ్రెస్ మనుగడే ఇప్పుడు ప్రశ్నార్థకంగా మారిందన్నారు. అందుకే ఇప్పుడు రాహుల్ గాంధీ కాంగ్రెస్ జపం చేస్తున్నారంటూ మండిపడ్డారు. దేశాన్ని 50 ఏళ్లకు పైగా కాంగ్రెస్ పాలించిందన్నారు. కానీ ఏనాడూ ఓబీసీ కులగణన చేయాలనే ఆలోచనే ఆ పార్టీకి రాలేదని ఫైర్ అయ్యారు.

తెలంగాణలో 2 శాతం ఓట్లు కూడా రాని బీజేపీ బీసీని సీఎం ఎట్లా చేస్తుందని రాహుల్ గాంధీ చెప్పడం ప్రజలను తప్పుదోవ పట్టించడమేనని తీవ్ర ఆగ్రహం వ్యక్తం చేశారు. అది బీసీలను అవమానించడమేనన్నారు. బీజేపీని విమర్శించే నైతిక అర్హత కాంగ్రెస్ కు లేదని తీవ్ర స్థాయిలో ధ్వజమెత్తారు. మొన్న కేటీఆర్,నిన్న రాహుల్ గాంధీ చేసిన వ్యాఖ్యలు బీసీలను అవమానించడమేనని వ్యాఖ్యానించారు.

ఆ నాయకులు వెంటనే బీసీలకు క్షమాపణ చెప్పాలన్నారు. ఆ తరువాతే బీసీలను ఓట్లు అడగాలని అన్నారు. గత పార్లమెంట్ ఎన్నికల నుంచి , ఆ తర్వాత ఎన్నికల నుంచి ఉప ఎన్నికల్లోనూ , స్థానిక సంస్థల ఎన్నికల్లోనూ కాంగ్రెస్ కంటే తమ పార్టీకే ఎక్కువ సీట్లు వచ్చాయన్నారు. ప్రజా సమస్యలపై తమ పార్టీ నిరంతరం పోరాటం చేస్తోందన్నారు. కేసీఆర్ ప్రభుత్వ అవినీతి, నియంత, కుటుంబ పాలనను ఎప్పటికప్పుడు తమ పార్టీ ఎండగడుతోందన్నారు. బీఆర్ఎస్‌కు ప్రత్యామ్నాయంగా ఆవిర్భవించిన పార్టీ బీజేపీ అని చెప్పారు.

ఓబీసీ జపం చేస్తున్న రాహుల్ గాంధీ ఈ ఎన్నికల్లో ఎంతమంది బీసీ అభ్యర్థులకు టికెట్లు ఇచ్చారని ఆయన ప్రశ్నించారు. రాష్ట్రంలో బీసీలకు అత్యధిక సీట్లు కేటాయిస్తున్న పార్టీ బీజేపీనేనని తెలిపారు. ఈ విషయంలో కాంగ్రెస్ పార్టీ బహిరంగ చర్చకు సిద్దమా? సవాల్ విసిరారు. ఓబీసీ కులగణన విషయంలో రాహుల్ గాంధీ తీరు చూస్తుంటే నోటితో పొగిడి నొసటితో వెక్కిరించినట్లుగా ఉందన్నారు.

పేదింటి ఓబీసీ బిడ్డ నరేంద్ర మోడీని ప్రధానిని చేసిన ఘనత బీజేపీకి ఉందన్నారు. 27 మంది ఓబీసీలను కేంద్ర మంత్రులుగా చేసిన పార్టీ తమదేనన్నారు. దళిత, ఆదివాసీ, మైనారిటీ బిడ్డలను రాష్ట్రపతి చేసిన ఘనత బీజేపీకే ఉందన్నారు. ఇచ్చిన మాటకు కట్టుబడే పార్టీ బీజేపీనేనన్నారు. అదే బాటలో తెలంగాణలో అధికారంలోకి రాగానే బీసీ వ్యక్తిని సీఎం చేస్తామని స్పష్టం చేశారు.

50 ఏండ్లు పాలించిన కాంగ్రెస్ ఓబీసీ వ్యక్తిని ప్రధాన మంత్రిని ఎందుకు చేయలేదు? అని నిలదీశారు. పార్లమెంట్‌లో ప్రతిపక్ష స్థానం కూడా కోల్పోయి మనుగడ కోల్పోయాక ఇప్పుడు బీసీ కుల గణన గుర్తుకు వచ్చిందా అని అడిగారు. తెలంగాణలో డిపాజిట్లు కూడా తెచ్చుకోలేని పార్టీగా హీనదశకు చేరిన తరువాత ఓబీసీలు గుర్తుకొచ్చారా? అని ఫైర్ అయ్యారు.

తెలంగాణలో అధికారంలోకి వస్తే బీసీ వ్యక్తిని సీఎంగా చేసే దమ్ము రాహుల్ గాంధీకి ఉందా? అని సవాల్ విసిరారు. ఈ మేరకు ప్రకటన చేసే సత్తా ఉందా? అని నిలదీశారు. కాంగ్రెస్‌కు నిజంగా బీసీల పట్ల ప్రేమ, చిత్తశుద్ధి ఉంటే వెంటనే తెలంగాణలో అధికారంలోకి వచ్చిన వెంటనే బీసీ వ్యక్తిని సీఎం చేస్తానని ప్రకటించాలన్నారు. లేనిపక్షంలో కాంగ్రెస్ ను బీసీలే రాజకీయ సమాధి చేయడం తథ్యమన్నారు.

కాంగ్రెస్ (Congress) వాళ్లు కత్తులతో దాడి చేస్తున్నారని సీఎం కేసీఆర్ (CM KCR) అన్నారు. రైతు బంధు దుబారా అని ఉత్తమ్ కుమార్ రెడ్డి అంటున్నాడని మండిపడ్డారు. టీపీసీసీ చీఫ్ రేవంత్ రెడ్డి కేవలం మూడు గంటల కరెంట్ చాలంటున్నారని అన్నారు. మూడు గంటల కరెంట్ కావాలా? 24 గంటల కరెంట్ కావాలా ప్రజలే తేల్చుకోవాలన్నారు.

నిర్మల్ నియోజకవర్గంలో ఏర్పాటు చేసిన బీఆర్ఎస్ ప్రజా ఆశీర్వాద సభలో సీఎం కేసీఆర్ పాల్గొన్నారు. ఈ సభలో ఆయన మాట్లాడుతూ…. రాష్ట్రంలో గిరిజనులకు రైతు బంధు ఇచ్చామని చెప్పారు. పోడు పట్టాలు ఇచ్చామని వెల్లడించారు. నిర్మల్‌కు ఇంజనీరింగ్ కాలేజీ అడిగారని, మంజూరు చేయిస్తానని చెప్పారన్నారు.

రాష్ట్రంలో ఎక్కడా కర్ఫ్యూ లేదు.. గడబిడ లేదన్నారు. ధరణి వల్ల రైతులు చాలా నిశ్చింతగా ఉన్నారని అన్నారు. ధరణి ఉండాలా.. పోవాలా.. మీరే చెప్పాలని అడిగారు. పొరపాటున కాంగ్రెస్ గెలిస్తే పైరవీకారులు పుట్టుకు వస్తారని చెప్పారు. మా తండాల్లో మా రాజ్యాన్ని తీసుకు వచ్చామన్నారు. తండాలు గూడెలను గ్రామపంచాయతీలుగా చేశామన్నారు.

4 లక్షల ఎకరాలకు పోడు పట్టాలను మంజూరు చేశామన్నారు. ప్రజా హక్కుల కోసం 15 ఏండ్లు పోరాడమన్నారు. చివరకు చావు నోట్లో తలకాయపెట్టి రాష్ట్రాన్ని సాధించుకున్నామని చెప్పారు. తాను చెప్పే మాటలను గ్రామాల్లో, మీ బస్తీల్లో చర్చ పెట్టాలని ప్రజలకు సీఎం కేసీఆర్ సూచించారు.

రాష్ట్రంలో అభివృద్ధి అలాగే కొనసాగాలంటే బీఆర్‌ఎస్ ను గెలిపించాలన్నారు. బీఆర్ఎస్ పుట్టిందే ప్రజల కోసమన్నారు. 30న ఓట్లు వేస్తారని అన్నారు. డిసెంబర్ 3న లెక్క తీస్తారని పేర్కొన్నారు. ఎవరో ఒకరు గెలుస్తారని అన్నారు.. ప్రజాస్వామ్య దేశంలో పార్లమెంటరీ డెమోక్రసీలో ప్రజలకు ఒక ఓటు వజ్రాయుధం అన్నారు.

తెలంగాణలో బీజేపీ (BJP) తరఫున పోటీ చేసే మూడో విడత అభ్యర్థుల జాబితాను ఆ పార్టీ ప్రకటించింది. మొత్తం 35 మంది అభ్యర్థుల (Candidates)తో మూడో విడత జాబితాను బీజేపీ విడుదల చేసింది. అంతకు ముందు రెండో విడతల్లో 53 మంది అభ్యర్థుల పేర్లను బీజేపీ పార్టీ ప్రకటించింది. ఈ ఎన్నికల్లో ముగ్గురు ఎంపీలను బీజేపీ బరిలోకి దింపింది.

కరీంనగర్ అసెంబ్లీ నియోజక వర్గం నుంచి ఎంపీ బండి సంజయ్‌ను బరిలో ఉన్నారు. ఇక సోయం బాపు రావు బోథ్ నుంచి, ధర్మపురి అరవింద్ కోరుట్ల నుంచి బరిలో దిగారు. ఈ జాబితాలో సీనియర్ నేత మర్రి శశిధర్ రెడ్డికి సనత్ నగర్ నుంచి టికెట్ కేటాయించారు. అదే సమయంలో ఉప్పల్ నుంచి మాజీ ఎమ్మెల్యే ఎన్వీఎస్ ప్రభాకర్ ను అభ్యర్థిగా ప్రకటించింది.

ఇక సీఎం కేసీఆర్ కి పోటీగా కామా రెడ్డి నుంచి ఎవరు పోటీ చేస్తారనే విషయాన్ని ఇంకా బీజేపీ వెల్లడించలేదు. తాజా జాబితాలో బాన్సువాడ నుంచి యెండల లక్ష్మీనారాయణ, అందోల్‌ (ఎస్సీ) నియోజక వర్గం నుంచి పల్లి బాబూమోహన్‌, నారాయణ్‌ఖేడ్‌ – జనవాడె సంగప్ప, జడ్చర్ల నుంచి చిత్తరంజన్‌ దాస్‌ ఉన్నారు.

ఇక బోధన్‌ నుంచి వడ్డి మోహన్‌రెడ్డి, మంచిర్యాల నుంచి వీరబెల్లి రఘునాథ్‌ , ఆసిఫాబాద్‌ (ఎస్టీ)నుంచి అజ్మీరా ఆత్మారాం నాయక్‌, మంథని నుంచి చందుపట్ల సునీల్‌రెడ్డి, జహీరాబాద్‌ (ఎస్సీ) నుంచి రామచంద్ర రాజ నరసింహా, మెదక్‌ నుంచి పంజా విజయ్‌కుమార్‌, ఎల్బీనగర్‌ నుంచి సామ రంగారెడ్డి, రాజేంద్రనగర్‌ నుంచి తోకల శ్రీనివాస్‌రెడ్డి బరిలో ఉన్నారు.

మలక్‌పేట్‌ నుంచి శ్యామ్‌రెడ్డి సురేందర్‌రెడ్డి, అంబర్‌పేట నుంచి కృష్ణ యాదవ్‌, జూబ్లీహిల్స్‌ నుంచి లంకల దీపక్‌ రెడ్డి, సికింద్రాబాద్‌ నుంచి మేకల సారంగపాణి,
చేవెళ్ల (ఎస్సీ) నుంచి కేఎస్‌ రత్నం, పరిగి నుంచి బోనేటి మారుతి కిరణ్‌ , ముషీరాబాద్‌ నుంచి పోస రాజు ,పరకాల నుంచి కాలి ప్రసాద్‌రావు, పినపాక (ఎస్టీ) నుంచి పొడియం బాలరాజు, పాలేరు నుంచి నున్న రవికుమార్‌ పోటీ చేస్తున్నారు.

సత్తుపల్లి (ఎస్సీ) నుంచి రామలింగేశ్వరరావు, నారాయణ్‌పేట్‌ నుంచి రతంగ్‌ పాండురెడ్డి, మక్తల్‌ నుంచి జలంధర్‌రెడ్డి, వనపర్తి నుంచి అశ్వత్థామరెడ్డి, అచ్చంపేట (ఎస్సీ) నుంచి దేవని సతీశ్‌ మాదిగ, షాద్‌నగర్‌ నుంచిఅండె బాబయ్య, దేవరకొండ (ఎస్టీ) నుంచి కేతావత్‌ లాలూ నాయక్‌, హుజూర్‌నగర్‌ నుంచి చల్ల శ్రీలతారెడ్డి
నల్గొండ నుంచి మాదగాని శ్రీనివాస్‌గౌడ్‌, ఆలేరు నుంచి పడాల శ్రీనివాస్‌ ఉన్నారు.