Breaking News

తాము గెలిస్తే బీసీ అభ్యర్థిని సీఎం చేస్తామంటూ బీజేపీ (BJP) చేసిన ప్రకటనపై రాహుల్ గాంధీ (Rahul Gandhi) విమర్శలు గుప్పించారు. బీజేపీ రెండు శాతం ఓట్ల కూడా సంపాదించలేదని, అలాంటి పార్టీ ఇలాంటి హామీలు ఇవ్వడం విడ్డూరంగా ఉందని ఎద్దేవా చేశారు. అమెరికాకు వెళ్లి బీసీని ప్రెసిడెంట్ చేస్తామని హామీ ఇచ్చినట్టుగా బీజేపీ ప్రకటన ఉందని సెటైర్లు వేశారు.

మహబూబ్ నగర్ జిల్లా కల్వకుర్తిలో కాంగ్రెస్ అగ్రనేత రాహుల్ గాంధీ పర్యటించారు. ఈ సందర్బంగా ఆయన మాట్లాడుతూ….. బీజేపీ ఇచ్చే డబ్బులకు ఆశపడి కాంగ్రెస్ ఒడించే ఉద్దేశంతో మజ్లిస్ పలు రాష్ట్రాల్లో పోటీ చేస్తోందని ఆరోపించారు. మొదట ఇక్కడ కారు పార్టీని ఓడించి ఆ తర్వాత ఢిల్లీలో బీజేపీని ఓడిద్దామన్నారు.

తెలంగాణలో బీజేపీ అభ్యర్థి సీఎం అయ్యేది లేదన్నారు. తెలంగాణ ప్రజల వద్ద ఇలాంటి ఉల్టాపల్టా మాటలు వద్దని బీజేపీకి సూచించారు. పలు రాష్ట్రాల్లో తామ పార్టీ విజయం సాధిస్తుందని ధీమా వ్యక్తం చేశారు. కాబట్టి పంక్చర్ అయిన తమ వాహనాన్ని బీజేపీ సరి చేసుకోవాలని సెటైర్లు వేశారు.

అంతకు ముందు అప్పుల బాధతో ఆత్మహత్య చేసుకున్న రైతు కుటుంబాన్ని రాహుల్ గాంధీ పరామర్శించారు. జిల్లెల్ల గ్రామంలో అప్పు తీర్చలేక ఆత్మహత్య చేసుకున్న కౌలు రైతు కుమ్మరి చంద్రయ్య (35) నివాసానికి రాహుల్ గాంధీ వెళ్లారు. అక్కడ బాధిత కుటుంబాన్ని రాహుల్ గాంధీ పరామర్శించారు.

తెలంగాణలో బ్యారేజీల్లో లీకింగ్ ఘటనలు కలకలం రేపుతున్నాయి. మొన్న మేడిగడ్డ లక్ష్మీ బ్యారెజ్ (Lakshmi Barrage) పిల్లర్ల ఘటన మరచి పోకముందే తాజాగా అలాంటిదే మరో ఘటన వెలుగు చూడటం ఆందోళన కలిగిస్తోంది. తాజాగా అన్నారం సరస్వతి బ్యారేజి (Saraswathi Barrage) లో 28,38 నంబర్ గల రెండు గేట్ల వద్ద నీరు పైకి ఉబికి వస్తోంది.

ఈ క్రమంలో స్థానికులు ఆందోళన చెందుతున్నారు. ఇది ఇలా వుంటే సంచులతో నీటి ఊటలను ఆపేందుకు తీవ్ర ప్రయత్నాలు చేస్తున్నారు. ఈ బ్యారేజీ నిల్వ సామర్థ్యం 10.87 టీఎంసీలు ఉండగా, ప్రస్తుతం బ్యారేజీలో 5.71 టీఎంసీల నీటిమట్టం ఉంది. ప్రస్తుతం బ్యారేజీ గేటును ఎత్తి 2,357 టీఎంసీల నీటిని కిందకు వదిలేందుకు అధికారులు ఏర్పాట్లు చేస్తున్నారు.

ఇటీవల మేడిగడ్డ లక్ష్మీ బ్యారెజ్ లో పిల్లర్లు కుంగి పోయాయి. పిల్లర్ నెంబర్ 15 నుంచి 20 వరకు కుంగి పోయాయి. ఈ నేపథ్యంలో వెంటనే మహారాష్ట్ర- తెలంగాణ రాష్ట్రాల మధ్య బ్యారేజీ పైనుంచి రాకపోకలు అధికారులు నిలిపి వేశారు. బ్యారేజీ వద్దకు వెళ్లేందుకు ఎవరినీ పోలీసులు అనుమతించలేదు.

పిల్లర్లు కుంగి పోయిన ఘటనపై బీఆర్ఎస్ సర్కార్ ను ప్రతిపక్షాలు టార్గెట్ చేశాయి. ప్రాజెక్టు నాణ్యత విషయంలో సర్కార్ పై తీవ్ర విమర్శలు గుప్పించాయి. మరోవైపు ఇటు బ్యారేజిని పరిశీలించేందుకు కేంద్రం నుంచి నిపుణుల బృందం కూడా రాష్ట్రానికి వచ్చింది. తాజాగా అన్నారం బ్యారేజీ ఘటన వెలుగులోకి రావడంతో ప్రాజెక్టు నాణ్యతపై విపక్షాలు మరోసారి అనుమానం వ్యక్తం చేస్తున్నాయి.

బీజేపీ (BJP) కి రాజీనామా చేసిన వివేక్ వెంకటస్వామి (Vivek Venkataswami) కాంగ్రెస్ (Congress) గూటికి చేరారు. హైదరాబాద్ (Hyderabad) లోని నోవాటెల్ హోటల్ లో రాహుల్ గాంధీ (Rahul Gandhi) తో ప్రత్యేకంగా భేటీ అయిన ఆయన.. హస్తం కండువా కప్పుకున్నారు. వివేక్ తో పాటు ఆయన కుమారుడు వంశీకృష్ణ కాంగ్రెస్ లో చేరారు. ఈ సందర్భంగా వివేక్ మాట్లాడుతూ.. కేసీఆర్ (KCR) ను గద్దె దించాల్సిన అవసరముందన్నారు. అందరం కలిసికట్టుగా ఆ దిశగా అడుగులు వేద్దామని చెప్పారు.

కాంగ్రెస్ పార్టీ నిర్ణయం ప్రకారం పనిచేస్తానని చెప్పారు వివేక్. తెలంగాణ సాధనలో తమ కుటుంబం ఎంతో కృషి చేసిందని గుర్తుచేశాు. కేసీఆర్ రాక్షస పాలనను గద్దె దించేందుకే కాంగ్రెస్ లో చేరానని చెప్పారు. తనకు టికెట్ ముఖ్యం కాదని బీఆర్ఎస్ సర్కార్ కు వ్యతిరేకంగా పోరాడటమే లక్ష్యమన్నారు. తొమ్మిదేళ్ల పాలనలో కేసీఆర్ కుటుంబం రాష్ట్రాన్ని దోచుకుందని ఆరోపించారు. సోనియా తెలంగాణ ఇచ్చారని.. రాష్ట్రం వచ్చినా ప్రజల ఆకాంక్షలు నెరవేరలేదన్నారు.

ఇక, టీపీసీసీ చీఫ్ రేవంత్ రెడ్డి మాట్లాడుతూ.. వివేక్ వెంకటస్వామి కుటుంబం కాంగ్రెస్ పార్టీలో చేరికతో 4 కోట్ల తెలంగాణ ప్రజలకు, కాంగ్రెస్ పార్టీకి వెయ్యి ఏనుగుల బలం వచ్చిందన్నారు. రాష్ట్రం కోసం పార్లమెంట్ లో కొట్లాడిన ఎంపీల్లో వివేక్ ఒకరని గుర్తు చేశారు. మార్పు రావాలి.. కాంగ్రెస్ రావాలి అనే నినాదంతో.. వచ్చే ఎన్నికల్లో విజయ ఢంకా మోగిస్తామని తెలిపారు.

పార్టీలో అందరితో చర్చించి.. ఆహ్వానం మేరకు వివేక్ చేరినట్లు వెల్లడించారు రేవంత్ రెడ్డి. గాంధీ కుటుంబంతో.. వెంకటస్వామి కుటుంబానికి మూడు తరాల అనుబంధం ఉందని.. సొంత కుటుంబంలోకి ఆయన వచ్చారన్నారు.