Breaking News

గ్యాస్ వినియోగదారులకు చమురు కంపెనీ ( oil companies) లు షాక్ ఇచ్చాయి. దేశ వ్యాప్తంగా పలు నగరాల్లో కమర్షియల్ సిలిండర్ (commercial LPG cylinders) ధరలను పెంచాయి. ఏకంగా రూ. 100 పెంచుతున్నట్టు చమురు కంపెనీలు ప్రకటించాయి. నూతన ధరల ప్రకారం దేశ రాజధాని ఢిల్లీలో కమర్షియల్ సిలిండర్ ధర రూ. 1833కు చేరుకుంది.

ఇక అత్యధికంగా కమర్షియల్ సిలిండర్ ధర చెన్నైలో రూ. 1,999.50కు చేరుకుంది. ఆ తర్వాత స్థానంలో కోల్ కతాలో రూ. 1943 ఉంది. దేశ ఆర్థిక రాజధాని ముంబైలో 19 కిలోల సిలిండర్ ధర రూ. 1,785.50 గా ఉంది. నాలుగు మెట్రో సిటీల్లో ఇదే అత్యల్ప ధర కావడం విశేషం.

గత రెండు నెలల్లో కమర్షియల్ సిలిండర్ ధరలను చమురు కంపెనీలు రెండు సార్లు పెంచాయి. అంతకు ముందు సెప్టెంబర్‌లో కమర్షియల్ సిలిండర్ పై రూ. 157ను చమురు కంపెనీలు తగ్గించాయి. ఆ తర్వాత అక్టోబర్ 1న కమర్షియల్ సిలిండర్ ధరను ఏకంగా రూ. 209లు చమురు కంపెనీలు పెంచాయి.

తాజాగా పెంచిన ధరలు కేవలం 19 కేజీల వాణిజ్య సిలిండర్లకు మాత్రమే వర్తిస్తాయని కంపెనీలు తెలిపాయి. గృహ వినియోగ సిలిండర్ లో ఎలాంటి మార్పు లేదని చమురు కంపెనీలు తెలిపాయి. ఇది కాస్త ఊరట కలిగించే విషయం. ఢిల్లీలో గృహ వినియోగ సిలిండర్ ధర రూ. 929గా ఉంది.

దేశ రాజధాని ఢిల్లీలో వాయు నాణ్యత (AQI) అత్యంత పేలవంగా (Very Poor) ఉంది. ఢిల్లీలో వాయు నాణ్యత సూచీ ఈరోజు 336గా ఉన్నట్టు అధికారులు తెలిపారు. గత నాలుగు రోజులుగా ఢిల్లీలో వాయు నాణ్యత చాలా పేలవంగా ఉన్నట్టు సఫర్ వెల్లడించింది. అదివారం వాయు నాణ్యత సూచీ 309 అత్యంత పేలవంగా ఉందని పేర్కొంది.

ఇక ఢిల్లీ యూనివర్శిటీ ప్రాంతంలో ఏక్యూఐ 391 ఉండగా, పూసాలో 311గా ఉన్నట్టు వెల్లడించింది. ఐఐటీ ఢిల్లీ ఏరియాలో 329గా ఉంది. అదే విధంగా ఢిల్లీ ఎయిర్ పోర్టు, మధురా రోడ్డులో కూడా ఏక్యూఐ చాలా పేలవంగా ఉన్నట్టు చెప్పింది. ఎయిర్ పోర్టు ఏరియాలో 339, మధురా రోడ్డులో 362గా ఉన్నట్టు వెల్లడించింది.

నోయిడాలో ఏక్యూఐ 391, గురుగావ్ 323 అత్యంతం పేలవంగా ఉన్నట్టు అధికారులు తెలిపారు. ఏక్యూఐ 0 నుంచి 100 మధ్య ఉంటే వాయు నాణ్యత బాగా ఉన్నట్టు పరిగణించవచ్చు. 100 నుంచి 200 వరకు ఉంటే వాయు కాలుష్యం మితంగా ఉన్నట్టు అని పేర్కొన్నారు. 200 నుంచి 300 వరకు ఉంటే పేలవంగా ఉన్నట్టని అన్నారు.
300 నుంచి 400 మధ్య ఉంటే అత్యంత పేలవంగా, 400 నుంచి 500 అత్యంత తీవ్రమైన కాలుష్యంగా పరిగణిస్తారని అన్నారు. ఇక ఢిల్లీలో వాయు కాలుష్యాన్ని నియంత్రించేందుకు 15 పాయింట్స్ తో వింటర్ యాక్షన్ ప్లాన్ రెడీ చేసినట్టు ఢిల్లీ పర్యావరణ శాఖ మంత్రి గోపాల్ రాయ్ వెల్లడించారు.

యాపిల్ ఫోన్ల హ్యాకింగ్ (APPle Phones Hacking) కలకలంపై కేంద్ర మంత్రి పీయూష్ గోయెల్ (Piyush Goel) స్పందించారు. ప్రతిపక్ష నేతలు చేస్తున్న ఆరోపణలను ఆయన తోసి పుచ్చారు. బహుశా ప్రతిపక్ష నేతలపై ఎవరైనా ఫ్రాంక్ చేసి ఉండవచ్చని ఎద్దేవా చేశారు. దానిపై ప్రతిపక్ష నేతలు అధికారికంగా ఫిర్యాదు చేయాలని సూచించారు.

ఆ ఫిర్యాదుపై దర్యాప్తు చేసి చర్యలు తీసుకునేందుకు కేంద్రం రెడీగా ఉందని తెలిపారు. ప్రతిపక్షాలు ప్రస్తుతం అత్యంతం బలహీనమైన దశలో ఉన్నాయని పేర్కొన్నారు. అందువల్ల ప్రతిపక్ష నేతలు ప్రతి విషయంలో కుట్రను చూస్తున్నారని కేంద్ర మంత్రి అన్నారు. వాస్తవమేమిటంటే సాఫ్ట్ వేర్ లోపం వల్ల ఇలా జరిగి ఉండవచ్చని యాపిల్ సంస్థ వెల్లడించిందన్నారు.

ఇలాంటి సందేశం మొత్తం 150 దేశాల్లోని ప్రజలకు వచ్చినట్టు ఆయన చెప్పారు. ఇది యాపిల్ సాఫ్ట్ వేర్ లోపం వల్ల వచ్చినట్టు తెలుస్తోందన్నారు. హ్యాకర్లు కూడా ప్రపంచవ్యాప్తంగా చురుకుగా ఉన్నాని పేర్కొన్నారు. దీనిపై విచారణ జరుపుతామన్నారు. దర్యాప్తుకు సహకరించాలని యాపిల్ ను కోరామన్నారు.

ప్రతిపక్షాలు తాము కోరుకున్నట్టు ఆరోపణలు చేసుకోవచ్చన్నారు. కానీ వారి పరిస్థితి దేశ ప్రజలకు తెలుసని కౌంటర్ ఇచ్చారు. ప్రతిపక్ష నేతలు తమ కూటమిలో అంతర్గత పోరులో చిక్కుకుపోయారన్నారు. బీజేపీపై వ్యాఖ్యలు చేసే బదులు ముందు వారి బలహీనతలను చూసుకోవాలని చురకలు అంటించారు.

యాపిల్ ( Apple) ఐ ఫోన్లు (I Phones) హ్యాకింగ్ కు గురయ్యాయంటూ విపక్ష పార్టీల నేతలు చేస్తున్న వ్యాఖ్యలపై కేంద్రం స్పందించింది. మొత్తం 150 దేశాల్లో యాపిల్ కంపెనీ ఇలా వార్నింగ్ మెసేజ్‌లు పంపిందని కేంద్ర ఐటీ శాఖ మంత్రి అశ్వనీ వైష్ణవ్ తెలిపారు. అప్పుడప్పుడు అలర్ట్‌లు తప్పుగా కూడా వచ్చే అవకాశాలు ఉన్నాయని వెల్లడించారు.

ఇప్పటికే ఈ వార్నింగ్ మెసేజ్‌ల విషయంలో కేంద్రం దర్యాప్తునకు ఆదేశించిందన్నారు. దర్యాప్తునకు సహకరించాలని యాపిల్ సంస్థను కూడా కోరుతున్నట్టు తెలిపారు. గతంలో కూడా విపక్ష ఎంపీలు ఇలాంటి ఆరోపణలే చేశారన్నారు. అప్పుడు కూడా తాము దర్యాప్తు చేపట్టామని కేంద్ర మంత్రి వివరించారు.

ప్రియాంక గాంధీ ఇద్ద‌రు పిల్ల‌ల ఫోన్లను కూడా హ్యాక్ చేశారంటూ అప్పుడు ఆరోపణలు చేశారన్ని అన్నారు. కానీ అలా జరగలేదన్నారు. న్యాయ‌ వ్య‌వ‌స్థ పర్యవేక్షణలోనే దర్యాప్తు పూర్తి చేశామన్నారు. కేవలం ప్ర‌భుత్వాన్ని విమ‌ర్శించాలని అనుకున్న వాళ్లే ఇలా అసత్య ప్రచారాలు చేస్తున్నారంటూ విపక్షాలపై ఆయన మండిపడ్డారు.

దేశంలో ఈ రోజు యాపిల్ ఫోన్ల హ్యాకింగ్ వార్త కలకలం రేపింది. తమ ఐఫోన్లు హ్యాకింగ్ అవుతున్నాయంటూ విపక్ష నేతలు ఈ రోజు సోషల్ మీడియాలో వెల్లడించారు. తమ ఫోన్లు హ్యాక్ అవుతున్నాయంటూ యాపిల్ సంస్థ అలర్ట్ పంపిందని తెలిపారు. ఈ మేరకు యాపిల్ సంస్థ పంపిన సందేశాలను స్క్రీన్ షాట్స్ తీసి సోషల్ మీడియాలో పోస్టు చేశారు.