Breaking News

కాళేశ్వరం (Kaleswaram) ప్రాజెక్టులో అతి కీలకమైంది మేడిగడ్డ (Medigadda Barrage) బ్యారేజ్. పిల్లర్లు కూలడంతో ఇప్పుడీ బ్యారేజీ పేరు మార్మోగుతోంది. ప్రభుత్వాన్ని ఇరకాటంలో పెట్టాలని ప్రతిపక్షాలు తెగ ప్రయత్నిస్తున్నాయి. అయితే.. బ్యారేజీ పిల్లర్లు కుంగడంపై కుట్ర కోణం ఉందని ఇరిగేషన్ అధికారులు అనుమానిస్తున్నారు. ఈ క్రమంలోనే పోలీస్ స్టేషన్ మెట్లెక్కారు. ఫిర్యాదు అందజేశారు.

మేడిగడ్డ బ్యారేజ్ కుంగడంపై కేసు నమోదైంది. మహదేవ్‌పూర్ పోలీసులు (Police) ఈ కేసు రిజిష్టర్ చేశారు. ఇరిగేషన్ అధికారుల ఫిర్యాదు మేరకు ఈ కేసు నమోదైంది. పిల్లర్ కింద భారీ శబ్ధం రావడంతో కుట్ర కోణం ఉందన్న అనుమానంతో అధికారులు ఈ ఫిర్యాదు చేశారు. అసెంబ్లీ ఎన్నికలకు కొద్దిరోజుల ముందు పిల్లర్లు కుంగటంపై కుట్ర ఉందన్న కోణంలో అనుమానాలు వ్యక్తం చేస్తున్నారు. ఈ అనుమానంతోనే ఫిర్యాదు చేశారు.

పబ్లిక్ ప్రాపర్టీ డ్యామేజ్ 3, 4 సెక్షన్ల కింద పోలీసులు కేసు నమోదు చేశారు. కేసుపై విచారణకు ప్రత్యేక బృందాలను ఏర్పాటు చేశారు. పిల్లర్ కింద భారీ శబ్దం వచ్చిందని ఫిర్యాదు ఇవ్వడంతో ఆ కోణంపై పోలీసులు దృష్టి పెట్టనున్నారు. అసెంబ్లీ ఎన్నికలకు కొద్దిరోజుల ముందు ఇది జరగడంతో ఎవరైనా కావాలనే ఇది చేశారా? అనే అనుమానంతో పోలీసుల దర్యాప్తు కొనసాగనుంది.

మరోవైపు, నేషనల్ డ్యామ్ సేఫ్టీ అథారిటీ ఛైర్మన్ అనిల్ జైన్ నేతృత్వంలోని ఆరుగురు సభ్యుల బృందం.. మేడిగడ్డ బ్యారేజీ వంతెన కుంగుబాటును క్షేత్రస్థాయిలో పరిశీలించింది. ప్రాజెక్టు ఈఎన్​సీ నల్లా వెంకటేశ్వర్లు, ఇతర అధికారులు, ఎల్ అండ్ టీ ప్రతినిధులు.. కేంద్ర బృందంతో కలిసి పరిశీలించారు. జరిగిన నష్టం, బ్యారేజీ పటిష్టత తదితర అంశాలను కేంద్ర కమిటీ సభ్యులు కూలంకశంగా తెలుసుకున్నారు. నిర్మాణంలో నాణ్యతపై విపక్షాలు విమర్శనాస్త్రాలు సంధిస్తున్న వేళ.. ఈ కమిటీ పర్యటన చర్చనీయాంశంగా మారింది.

మొదటి విడత కాంగ్రెస్ (Congress) బస్సు యాత్ర సక్సెస్ అయింది. అగ్రనేతలు రాహుల్ గాంధీ (Rahul Gandhi), ప్రియాంక గాంధీ (Priyanka Gandhi) రాష్ట్రానికి వచ్చి పార్టీ శ్రేణుల్లో ఉత్సాహాన్ని నింపారు. ఇదే జోష్ తో రెండో విడత బస్సు యాత్రకు రాష్ట్ర నాయకత్వం ప్లాన్ చేసింది. అధిష్టానం నుంచి ఆదేశాలు రావడంతో దీనికి సంబంధించిన డేట్ ను ఫిక్స్ చేసుకుంది. ఈనెల 28 నుంచి తెలంగాణ (Telangana) లో రెండో విడత బస్సు యాత్ర చేపట్టాలని నిర్ణయించింది కాంగ్రెస్.

ఈసారి బస్సు యాత్రకు రాహుల్ గాంధీ, ప్రియాంక గాంధీతోపాటు కర్ణాటక సీఎం సిద్ధరామయ్య (Siddharamaiah) ను కూడా తీసుకొస్తోంది రాష్ట్ర కాంగ్రెస్. ఉమ్మడి మహబూబ్ నగర్, మెదక్, రంగారెడ్డి, నల్గొండ జిల్లాల్లో ఈసారి యాత్ర కొనసాగేలా షెడ్యూల్ ఫిక్స్ చేసింది. 4 జిల్లాలు కవర్ అయ్యేలా టీపీసీసీ నాయకులు రూట్ మ్యాప్ ను సిద్ధం చేస్తున్నారు. ఏ క్షణమైనా అధికారికంగా షెడ్యూల్ కూడా విడుదల అయ్యే అవకాశం ఉంది.

28, 29 తేదీల్లో సిద్ధరామయ్య ఎన్నికల ప్రచారం నిర్వహిస్తారని సమాచారం. 30, 31 తేదీల్లో ప్రియాంక గాంధీ, వచ్చే నెల 1 నుంచి 5 వరకు రాహుల్‌ గాంధీ బస్సు యాత్రలో పాల్గొననున్నారని తెలుస్తోంది. ఇప్పటికే ఖమ్మం, వరంగల్, హైదరాబాద్ పై ఫోకస్ పెట్టి సభలు, సమావేశాలు నిర్వహించింది కాంగ్రెస్. ఆ తర్వాత ఉత్తర తెలంగాణలోని కరీంనగర్ నిజామాబాద్ జిల్లాలు కవర్ అయ్యేలా బస్సు యాత్రను పూర్తి చేసింది. ఇప్పుడు రంగారెడ్డి, మహబూబ్ నగర్, నల్గొండ, మెదక్ జిల్లాలో బస్సుయాత్ర నిర్వహించి క్యాడర్ లో నూతన ఉత్సాహం భరోసా నింపేందుకు సిద్ధమైంది.

4 జిల్లాల్లో బస్సు యాత్రతో పాటు బహిరంగ సభలను కూడా నిర్వహించేందుకు కసరత్తు జరుగుతోంది. తెలంగాణలో పవర్ లోకి వచ్చేందుకు అన్ని ప్రయత్నాలూ చేస్తున్న కాంగ్రెస్.. దూకుడుగా ముందుకెళ్తోంది. ఇప్పటికే తొలి విడతలో 55 మంది అభ్యర్థులను ప్రకటించింది. రెండో లిస్ట్ కూడా ఫైనలైజ్ అవుతోంది. గెలుపే లక్ష్యంగా అగ్రనేతలను వరుసగా రంగంలోకి దిపుతోంది. ఈ క్రమంలోనే బస్సు యాత్రలకు శ్రీకారం చుట్టింది. తొలి విడతలో ములుగు సహా మొత్తం 8 నియోజకవర్గాల్లో రాహుల్ గాంధీ మూడు రోజులు పర్యటించారు. రెండో విడతలో ఉమ్మడి 4 జిల్లాల్లో జోరుగా ప్రచారం నిర్వహించనున్నారు హస్తం నేతలు.

– తెలంగాణ బీజేపీలో టికెట్ల లొల్లి
– ఫస్ట్ లిస్ట్ తో బయటపడ్డ అసంతృప్తి సెగలు
– రెండో జాబితాపై ఫోకస్ పెట్టిన అధిష్టానం
– అసంతృప్తులను బుజ్జగించే పనిలో కీలక నేతలు
– ఎన్నికల ప్రచారం ముమ్మరం
– రాష్ట్రానికి అగ్ర నేతల రాక
– 27న అమిత్ షా, 28న హిమంత శర్మ, 31న యోగి
– 15పైగా సభల్లో పాల్గొననున్న షా, నడ్డా

తెలంగాణ (Telangana) లో ఈసారి పాగా వేస్తామని ధీమాగా ఉంది బీజేపీ (BJP). అధికార బీఆర్ఎస్ (BRS) ను ప్రజలు నమ్మే పరిస్థితిలో లేరని.. కాంగ్రెస్ (Congress) కు ఓటేసినా కారు గుర్తుకు వేసినా ఒకటేనని జనానికి తెగ నూరిపోస్తోంది. డబుల్ ఇంజన్ సర్కార్ తోనే అభివృద్ధి సాధ్యమని చెబుతోంది. ఇదే క్రమంలో అభ్యర్థుల ఎంపికలో ఎన్నో జాగ్రత్తలు తీసుకుంటోంది. ఇప్పటికే 52 మందితో మొదటి జాబితాను విడుదల చేసింది. రెండో లిస్ట్ కోసం తెగ కష్టపడుతోంది. ఫస్ట్ లిస్టుతో పార్టీలో చెలరేగిన చిచ్చును చల్లార్చుతూనే.. ఇంకోవైపు అగ్ర నేతలను వరుసగా రాష్ట్రానికి తీసుకొస్తోంది.

ఎంతో కసరత్తు చేసి తొలి జాబితాను విడుదల చేసింది బీజేపీ అధిష్టానం. కానీ, ఈ జాబితా పార్టీలో అసంతృప్తి చిచ్చు రగిలించింది. సీనియర్లు, జూనియర్లు అనే తేడా లేకుండా టికెట్‌ ఆశించి భంగపడ్డ చాలా మంది నేతలు అసంతృప్తితో రగిలిపోతున్నారు. కొందరైతే మీడియా ముందుకొచ్చి కన్నీరు మున్నీరవుతున్నారు. మరికొందరు గుడ్ బై చెప్పేందుకు సిద్ధమౌతున్నారు. క్రమశిక్షణకు మారుపేరుగా చెప్పుకునే కమలం పార్టీలో టికెట్ల వ్యవహారం కలకలం రేపుతోంది. అందుకే, సెకెండ్ లిస్ట్ లో అసంతృప్త జ్వాలలు ఎగిసిపడకుండా ఉండేందుకు ప్రణాళికలు రచిస్తోంది అధిష్టానం.

మరోవైపు, ఎన్నికల ప్రచారంపై మరింత ఫోకస్ పెట్టింది బీజేపీ. 119 నియోజకవర్గాల్లో సభలకు ప్లాన్ చేస్తోంది. ఈక్రమంలోనే రాష్ట్రంలో 5 బహిరంగ సభల్లో ప్రధాని మోడీ ప్రసంగించనున్నారు. ఈనెల 27న అమిత్‌షా సభ జరగనుంది. 15పైగా సభల్లో అమిత్ షా, జేపీ నడ్డాలు పాల్గొననున్నారు. 28, 29 తేదీల్లో అసోం సీఎం హిమంత బిస్వ శర్మ ప్రచారం జరుపుతారు. 31న తెలంగాణలో యూపీ సీఎం యోగి ప్రచారం నిర్వహిస్తారు. యడ్యూరప్ప, దేవేంద్ర పడ్నవిస్, అర్జున్ ముండా, చిరాగ్ పాశ్వాన్, పలువురు కేంద్ర మంత్రులు ప్రచారం నిర్వహించనున్నారు. అగ్ర నేతల పర్యటన కోసం బీజేపీ నాలుగు హెలికాప్టర్లను అద్దెకు తీసుకుంది.

తెలంగాణలో ఎన్నికల షెడ్యూల్ రిలీజ్ అయ్యాక అమిత్ షా రాష్ట్రానికి రావడం ఇది రెండో సారి. ఇంతకుముందు అదిలాబాద్ లో పర్యటించారు. అలాగే, ప్రధాని మోడీ రెండు సభల్లో పాల్గొన్నారు. తెలంగాణలో నవంబర్‌ 30న అసెంబ్లీ ఎన్నికలు జరగనున్నాయి. ఉన్న తక్కువ టైమ్ లో వీలైనన్ని సభలు ఏర్పాటు చేసి జనాన్ని ఆకర్షించాలని కమలనాథులు భావిస్తున్నారు. ఇక, రెండు మూడు రోజుల్లో సెకండ్ లిస్ట్‌ ను కూడా విడుదల చేయాలని చూస్తోంది. మొత్తానికి అసంతృప్త సెగలను తగ్గిస్తూనే.. ఇంకోవైపు ఎన్నికల ప్రచారం ముమ్మరం చేయాలని చూస్తోంది బీజేపీ.