Breaking News

బిహార్ విద్యా శాఖ మంత్రి చంద్రశేఖర్(chandra shekar) వివాదాస్పద వ్యాఖ్యల(Controversial comments)తో మరోసారి వార్తల్లో నిలిచారు. తాజాగా రామ్ చరిత్ మానస్ పై ఆయన చేసిన వ్యాఖ్యలపై పెద్ద ఎత్తున దుమారం రేగుతోంది. రామ్ చరిత్ మానస్‌ను పొటాషియం సైనేడ్ తో పోల్చుతూ ఆయన చేసిన వ్యాఖ్యలపై హిందూ సంఘాలు, బీజేపీ నేతలు తీవ్ర స్థాయిలో నిప్పులు చెరుగుతున్నారు.

హిందీ దివస్ సందర్భంగా నిర్వహించిన కార్యక్రమంలో మంత్రి చంద్రశేఖర్ పాల్గొన్నారు. ఈ సందర్భంగా ఆయన మాట్లాడుతూ…. మీ ముందు 55 రకాల వంటకాలు పెట్టి వాటిలో పొటాషియం సైనేడ్ కలిపితే దాన్ని మీరు ఇష్టంగా తింటారా? అని ప్రశ్నించారు. లేదు కదా… హిందూ మత గ్రంథాలు కూడా అంతేనని తీవ్ర వ్యాఖ్యలు చేశారు. బాబా నాగార్జున, లోహియా లాంటి రచయితలు గతంలో హిందూ మత గ్రంథాలను విమర్శించారని అన్నారు.

రామ్ చరిత్ మానస్ పట్ల తనకు తీవ్రమైన అభ్యంతరం ఉందన్నారు. తన జీవితాంతం ఈ అభ్యంతరం కొనసాగుతుందన్నారు. దీనిపై ఆర్ఎస్ఎస్ చీఫ్ మోహన్ భాగవత్ కూడా కామెంట్ చేశారన్నారు. కుల వివక్ష పోనంత వరకు రిజర్వేషన్లు, కుల గణన చేపట్టాల్సిందేనన్నారు. ఈ వ్యాఖ్యలపై బీజేపీ నేతలు తీవ్ర ఆగ్రహం వ్యక్తం చేస్తున్నారు.

రామ్ చరిత్ మానస్ పై మంత్రి చంద్రశేఖర్ తరుచూ వివాదాస్పద వ్యాఖ్యలు చేస్తున్నారని బీజేపీ అధికార ప్రతినిధి నీరజ్ కుమార్ మండిపడ్డారు. ఈ వ్యాఖ్యలు ముఖ్య మంత్రి నితీశ్ కుమార్ కు వినపడం లేదా అని ఆయన ప్రశ్నించారు. హిందూ మతంతో మంత్రికి ఏమైనా సమస్యలు వుంటే ఆయన మతం మారాలని నీరజ్ కుమార్ సూచించారు.

ఢిల్లీ లిక్కర్ స్కాం (Liquor Scam) కేసులో కీలక పరిణామాలు చోటు చేసుకుంటున్నాయి. ఢిల్లీ మాజీ డిప్యూటీ సీఎం మనీష్ సిసోడియా (Manish Sisodia) కు చుక్కెదురైంది. ఆయన బెయిల్ పిటిషన్ పై విచారణ మరోసారి వాయిదా పడింది. విచారణను అక్టోబర్ 4కి వాయిదా వేసినట్లు ఢిల్లీ (Delhi) హైకోర్టు పేర్కొంది. తన భార్యకు అనారోగ్యం కారణంగా బెయిల్ ఇవ్వాలని కోరుతూ గతంలో సిసోడియా అత్యున్నత న్యాయస్థానాన్ని ఆశ్రయించారు.

బెయిల్ పిటిషన్ ను విచారించేందుకు అనుమతించిన ధర్మాసనం.. విచారణను వాయిదా వేసింది. మనీ లాండరింగ్ కేసులో మనీశ్ సిసోడియా అరెస్ట్ అయ్యారు. ప్రస్తుతం ఆయన తీహార్ జైలులో ఉన్నారు. లిక్కర్ పాలసీ రూపకల్పనలో అవకతవకలకు పాల్పడ్డారనే ఆరోపణల నేపథ్యంలో సీబీఐ (CBI) అధికారులు సిసోడియాను అదుపులోకి తీసుకున్నారు.

మరోవైపు, బీఆర్ఎస్ ఎమ్మెల్సీ కవిత (Kavitha) ఈడీ విచారణపై ఉత్కంఠ నెలకొంది. కాసేపట్లో ఆమె ప్రగతి భవన్‌ కు వెళ్తున్నట్టు తెలుస్తోంది. ముఖ్యమంత్రి కేసీఆర్‌ (KCR)తో చర్చలు జరిపి తదుపరి నిర్ణయం తీసుకునే అవకాశం కనిపిస్తోంది. ఇప్పటికే తన లీగల్ టీం తో కవిత చర్చలు జరుపుతున్నారు.

ఢిల్లీ లిక్కర్ పాలసీ స్కాం కేసులో కవితకు ఈడీ నోటీసులు జారీ చేసింది. విచారణ కోసం ఢిల్లీలోని ఈడీ కార్యాలయానికి రావాలని ఆదేశించింది. కేసీఆర్ తీసుకునే నిర్ణయాన్ని బట్టి కవిత విచారణకు వెళ్తారా? లేదా? అనేది ఇప్పుడు హాట్ టాపిక్ గా మారింది. కవితకు దర్యాప్తు సంస్థలు నోటీసులు జారీ చేయడం ఇది నాలుగోసారి.

రెండు జాతుల మధ్య ఘర్షణతో మణిపూర్ రాష్ట్రం అట్టుడికి పోయింది. అల్లర్ల నేపథ్యంలో ఎంతో మంది ప్రాణాలు కోల్పోయారు. మరెందరో నిరాశ్రయులయ్యారు. అల్లర్లు మొదలై సుమారు ఐదు నెలలు గడుస్తున్నా ఇంకా పరిస్థితులు అదుపులోకి రాలేదు. ఈ ఘర్షణల్లో ఇప్పటి వరకు 175 మంది మరణించినట్టు రాష్ట్ర పోలీసులు వెల్లడించారు. ఇప్పటి వరకు 1,118 మంది గాయపడగా, మరో 98 గుర్తు తెలియని మృత దేహాలు ఇంకా మార్చురీలోనే వున్నాయని తెలిపారు.

పోలీసు శాఖ విడుదల చేసిన డేటా ప్రకారం….. ఆస్తులకు నిప్పటించిన ఘటనల్లో ఇప్పటి వరకు 5172 కేసులు నమోదయ్యాయి. అందులో 4,786 ఇళ్లను, 386 మత పరమైన ప్రదేశాలకు అల్లరి మూకలు నిప్పంటిచాయి. ఈ ఘటనలో 254 చర్చిలు, 132 ఆలయాలకు అల్లరి మూకలు నిప్పు పెట్టాయి. హింస చెలరేగిన రోజు నుంచి ఇప్పటి వరకు రాష్ట్ర ఆయుధగారంలోని 5,668 ఆయుధాలను అల్లరి మూకలు ఎత్తుకెళ్లాయి.

వాటిలో 1,329 ఆయుధాలను భద్రతా బలగాలు తిరిగి స్వాధీనం చేసుకున్నాయి. వాటితో పాటు 15,050 మందు గుండు సామాగ్రి, 400 బాంబులను భద్రతా దళాలు రికవరీ చేశాయి. రాష్ట్రంలోని 360 అక్రమ బంకర్లను భద్రతా దళాలు ధ్వంసం చేశాయి. ఇది ఇలా వుంటే రాష్ట్రంలో నెలకొన్న హింస గురించి ఎడిటర్స్ గిల్డ్ ఆఫ్ ఇండియా పబ్లిష్ చేసిన ఫ్యాక్ట్ ఫైండింగ్ రిపోర్టును కొట్టి వేయాలని ఇంటర్నేషనల్ మెయిటీస్ ఫోరమ్ ప్రజాప్రయోజన వ్యాజ్యం దాఖలు చేసింది.

ఇది ఇలా వుంటే మెయితీ తెగ ప్రతినిధులు రక్షణ శాఖ మంత్రి రాజ్ నాథ్ సింగ్ ను గురువారం కలిశారు. రాష్ట్రం నుంచి అసోం రైఫిల్స్ బలగాలను ఉపసంహరించాలని కోరారు. అసోం రైఫిల్స్ బదులుగా మరో యూనిట్ కు చెందిన భద్రతా బలగాలను రాష్ట్రానికి పంపాలని రాజ్ నాథ్ సింగ్ ను కోరారు. ఈ మేరకు కేంద్ర మంత్రికి మెయిటీ ప్రతినిధులు మెమోరాండం అందజేశారు.

నిపా వైరస్ విజృంభిస్తోంది. పెరుగుతున్న కేసులు కరోనా నాటి పరిస్థితులను తలపిస్తున్నాయి. కరోనా కట్టడికి ఉపయోగించిన కంటైన్ మెంట్ జోన్ల విధానాన్ని అధికారులు ఉపయోగిస్తున్నారు. పలు చోట్ల పాఠశాలలను తాత్కాలికంగా మూసి వేస్తున్నారు. పాజిటివ్ వ్యక్తులను, వారితో కాంటాక్ట్ లో ఉన్న వ్యక్తులను గుర్తించి అధికారులు చికిత్స అందిస్తున్నారు.

తాజాగా కేరళలో మరో నిపా కేసు నమోదైంది. దీంతో ఇప్పటి వరకు నమోదైన నిపా కేసుల సంఖ్య ఆరుకు చేరుకున్నట్టు కేరళ ఆరోగ్య శాఖ మంత్రి వీణా జార్జి వెల్లడించారు. 39 ఏండ్ల వ్యక్తిలో నిపా వైరస్ ను గుర్తించినట్టు పేర్కొన్నారు. ప్రస్తుతం అతని ఆరోగ్య పరిస్థితిని ఎప్పటికప్పుడు పర్య వేక్షిస్తున్నట్టు తెలిపారు. నిపా కేసుల సంఖ్య ఆరు వుండగా అందులో ఇద్దరు మరణించినట్టు చెప్పారు.

ప్రస్తుతం నాలుగు కేసులు యాక్టివ్ గా వున్నాయన్నారు. మరోవైపు కోజికోడ్ లో ఆంక్షలు కొనసాగుతాయన్నారు. నిపా కేసుల నేపథ్యంలో కొజికోడ్ జిల్లాలోని అన్ని విద్యా సంస్థలకు రెండు రోజుల పాటు మూసి వేయాలని జిల్లా కలెక్టర్ గీతా ఆదేశించారు. విద్యార్థులకు రెండు రోజుల పాటు ఆన్ లైన్ క్లాసులు నిర్వహించేందుకు ఏర్పాట్లు చేయాలని విద్యాసంస్థలకు ఆదేశాలు జారీ చేశారు.

నిపా కేసులు పెరుగుతున్న క్రమంలో వైద్యాధికారులతో సీఎం పినరయి విజయన్ సమీక్షా సమావేశం ఏర్పాటు చేశారు. నిపా కట్టడికి అవసరమైన అన్ని రకాల చర్యలను తాము తీసుకుంటున్నామని సీఎం తెలిపారు. ఎవరూ భయపడాల్సిన పని లేదన్నారు. అటవీ ప్రాంతాల్లో నివసించే వాళ్లు తగిన జాగ్రత్తలు తీసుకోవాలని ఆయన సూచనలు చేశారు.