Breaking News

రిజర్వు బ్యాంక్‌ ఆఫ్‌ ఇండియా కీలక వడ్డీ రేట్లను యథాతథంగా కొనసాగించాలని నిర్ణయించింది. తాజాగా రెపోరేటు (Repo rate)ను 6.5 శాతం వద్ద కొనసాగిస్తున్నట్లు వెల్లడించింది. భారత వృద్ధిరేటు చాలా మంది విశ్లేషకుల అంచనాలను మించి నమోదవుతోందని గవర్నర్‌ (Governor) శక్తికాంత దాస్‌ (Shaktikanta Das)తెలిపారు.

దేశీయంగా ఆర్థిక కార్యకలాపాలు బలంగా ఉన్నాయన్నారు. ఆహార ధరల్లో అనిశ్చితి ప్రధాన ద్రవ్యోల్బణంపై ప్రభావం చూపుతోందని వివరించారు. ఈ నేపథ్యంలో గురువారం రిజర్వ్ బ్యాంక్ ఆఫ్ ఇండియా (RBI) గవర్నర్ శక్తికాంత దాస్ మాట్లాడుతూ.. కీలకమైన రెపో రేటును 6.5 శాతం వద్ద స్థిరంగా ఉంచాలని సెంట్రల్ బ్యాంక్ మానిటరీ పాలసీ కమిటీ (MPC) నిర్ణయించిందని తెలిపారు.

ఈ నిర్ణయం స్థూలంగా ఆర్థికవేత్తలు ఊహించిన దానికి అనుగుణంగానే ఉందని అన్నారు. పరిణామం చెందుతున్న ఆర్థిక పరిణామాల నేపథ్యంలో ద్రవ్య విధాన కమిటీ 5 నుంచి 1 మెజారిటీతో పాలసీ రేటును 6.5 శాతం వద్ద యథాతథంగా ఉంచాలని నిర్ణయించిందని, స్టాండింగ్ డిపాజిట్ ఫెసిలిటీ (SDF) రేటు 6.25 శాతంగా ఉందని, మార్జినల్ స్టాండింగ్ ఫెసిలిటీ (MSF) రేటు, బ్యాంక్ రేటు 6.75 శాతంగా ఉందని ఆర్‌బీఐ గవర్నర్ పేర్కొన్నారు. ప్రపంచ ఆర్థిక వ్యవస్థ వృద్ధి 2024లో స్థిరంగా ఉంటుందన్నారు. మరోవైపు ఆర్బీఐ ఈ రెపోరేటును యథాతథంగా కొనసాగించడం ఇది ఆరోసారి.

లిక్కర్ స్కామ్ (Liquor Scam) కేసులో ఈడీ దూకుడు పెంచింది. పలుసార్లు ఢిల్లీ ముఖ్యమంత్రి, ఆప్​ కన్వీనర్​ అరవింద్ కేజ్రీవాల్​ (Arvind Kejriwal)ను విచారణకు హాజరు కావాలని కోరిన, ఆయన స్పందించ పోవడంతో, కేజ్రీవాల్‌పై న్యాయస్థానంలో ఎన్‌ఫోర్స్‌మెంట్‌ డైరెక్టరేట్‌ (ED) ఇప్పటికే ఫిర్యాదు చేసింది. మరోవైపు ఈ కేసును సీరియస్ గా తీసుకొన్న ఈడీ.. కేజ్రీవాల్​ సన్నిహితుల ఇళ్లపై దాడులు మొదలు పెట్టింది.

నేటి ఉదయం కేజ్రీవాల్​ వ్యక్తిగత కార్యదర్శి వైభవ్​ కుమార్​ సహా ఆప్​తో సంబంధం ఉన్న పలువురి ఇళ్లలో ఈడీ సోదాలు నిర్వహించింది. సుమారు 10 ప్రాంతాల్లో ఈ సోదాలు నిర్వహిస్తున్నట్లు ఈడీ అధికారులు వెల్లడించారు. సీఎం వ్యక్తిగత కార్యదర్శి వైభవ్‌ కుమార్‌, ఢిల్లీ జలబోర్డు మాజీ సభ్యుడు శలభ్‌కుమార్‌, ఆప్‌ రాజ్యసభ ఎంపీ, జాతీయ కోశాధికారి N.D.గుప్తా కార్యాలయంతో పాటు మరికొందరి నివాసాలు, కార్యాలయాల్లో సోదాలు నిర్వహించింది. .

మరోవైపు ఢిల్లీ కేబినెట్‌ మంత్రి అతిషి.. ఈడీకి సంబంధించి కీలక విషయాన్ని వెల్లడించనున్నట్లు పేర్కొన్న మరుసటిరోజే ఈ సోదాలు జరగటంతో ప్రాధాన్యం సంతరించుకొంది. కాగా మరో మంత్రి సౌరభ్‌ భరద్వాజ్‌ కూడా బీజేపీ (BJP)కి చెందిన బెదిరింపు విభాగం-ED గురించి కీలక విషయాలను గుట్టురట్టు చేయనున్నట్లు తెలపడం ఆసక్తికరంగా మారింది. ఈ నేపథ్యంలో అతిషి కీలక వ్యాఖ్యలు చేశారు.. గత రెండేళ్లుగా ఆప్​ నేతలను వేధింపులకు గురి చేస్తున్నారని మండిపడ్డారు.

ఇప్పటికే అనేక సార్లు సమన్లు జారీ చేసినా, కొందరిని అరెస్ట్ చేసినా, ఒక్క రూపాయి సైతం ఈడీ రికవరీ చేయలేదని పేర్కొన్నారు. ఆప్​ నేతలను ఎక్సైజ్​ పాలసీ కుంభకోణంలో తప్పుడు సాక్ష్యాలు చెప్పాలంటూ, ఈడీ బెదిరిస్తోందని ఆరోపించారు. మరోవైపు ఈడీ, కేజ్రీవాల్​కు ఐదుసార్లు సమన్లు జారీ చేసింది. అయితే పలు కారణాలు పేర్కొంటూ, కేజ్రీవాల్​ ప్రతిసారీ విచారణకు గైర్హాజరయ్యారు. దీంతో ఈడీ ఈ వ్యవహారంపై ఢిల్లీలోని రౌస్ ఎవెన్యూ డిస్ట్రిక్ట్ కోర్ట్ ను ఆశ్రయించింది.

దేశంలో కరోనా విజృంభిస్తున్న సమయంలో ఎన్నో కంపెనీలు వర్క్ ఫ్రం హోం విధానాన్ని అమలు చేశాయి. తమ ఉద్యోగులు ఇంటి నుంచి పని చేయాలని ఆదేశించాయి.. ఇదే విధానాన్ని ఇప్పటికి కొన్ని కంపెనీలు అలాగే కొనసాగిస్తున్నాయి. మరి కొన్ని కంపెనీలు ఈ విధానానికి స్వస్తి పలికాయి. అయితే తాజాగా వర్క్ ఫ్రం హోం విధానానికి ముగింపు పలుకుతున్న టెక్ కంపెనీలపై ఉద్యోగుల్లో వ్యతిరేకత వ్యక్తమవుతోంది.

ఐరోపా (Europe)లో అతిపెద్ద సాఫ్ట్‌వేర్ సంస్థ (Software Company) ఎస్ఏపీ (SAP)పై తాజాగా 5 వేల మంది ఉద్యోగులు తిరుగుబాటు ప్రకటించారు. ఆఫీసుకు రమ్మని బలవంతం చేస్తే మరో జాబ్ చూసుకుంటామంటూ హెచ్చరికలు హెచ్చరించారు. ఇంతకాలం వర్క్ ఫ్రం హోంను ప్రోత్సహించిన కంపెనీ అకస్మాత్తుగా ఆఫీసులకు రమ్మంటూ ప్లేటు ఫిరాయించి మమ్మల్ని మోసం చేసిందని ఉద్యోగులు కంపెనీ అంతర్గత లేఖలో పేర్కొన్నట్టు తెలిసింది.

ఇంతకాలం వర్క్ ఫ్రం హోం (Work from home) కొనసాగిస్తామని చెప్పిన కంపెనీ ఇప్పుడు మళ్లీ ఆఫీసులకు రమ్మనడం సహేతుకం కాదని ఉద్యోగులకు ప్రాతినిధ్యం వహిస్తున్న యూరోపియన్ వర్క్ కౌన్సిల్ పేర్కొంది. అయితే వర్క్ కౌన్సిల్ తీరును సంస్థ సీఈఓ కార్యాలయం ఖండించింది. వర్క్ ఫ్రం హోం విధానంతో సంస్థలో పని సంస్కృతి, టీంవర్క్ దెబ్బతింటాయని పేర్కొంది.

మరోవైపు ఏప్రిల్ నుంచి ఉద్యోగులు వారానికి కనీసం మూడు రోజులు ఆఫీసుకు రావాలి. లేదా, కస్టమర్లతో ఆన్‌సైట్‌లో వారానికి మూడు రోజుల పాటు పనిచేయాలనే కొత్త విధానాన్ని జనవరిలో ఎస్ఏపీ ప్రకటించింది. ఇదిలా ఉండగా ప్రపంచవ్యాప్తంగా అనేక టెక్ కంపెనీలు ఇప్పటికే ఉద్యోగులను ఆఫీసులకు రమ్మని ఒత్తిడి పెంచేశాయి. కంపెనీల ఆదేశాలను ధిక్కరిస్తున్న ఉద్యోగులపై చర్యలు తీసుకోవడం ప్రారంభించాయి.

బీజేపీ (BJP)పై సంచలన వ్యాఖ్యలు చేశారు ఆమ్ ఆద్మీ పార్టీ (Aam Aadmi Party) చీఫ్, ఢిల్లీ సీఎం (Delhi CM) అరవింద్ కేజ్రీవాల్ (Arvind Kejriwal).. తనను పార్టీలో చేరాలని బలవంతం చేస్తున్నట్లు వెల్లడించారు. వారు ఎన్ని జిమ్మిక్కులు చేసిన కాషాయ పార్టీకి ఎన్నటికీ లొంగిపోయే ప్రసక్తే లేదని స్పష్టం చేశారు. నేడు ఢిల్లీలో రెండు పాఠశాలల భవనాలకు శంకుస్థాపన చేసిన అనంతరం కేజ్రీవాల్ ఈ వ్యాఖ్యలు చేశారు.

బీజేపీ ఎన్ని కుట్రలు చేసినా.. ఒత్తిడి పెంచినా వాటిని ధీటుగా ఎదుర్కొంటానని తెలిపారు. బీజేపీ నేతృత్వంలో, కేంద్ర ప్రభుత్వం జాతీయ బడ్జెట్‌లో 4 శాతం మాత్రమే ఖర్చు చేస్తుందని ఆరోపించిన కేజ్రీవాల్.. ఢిల్లీ ప్రభుత్వం ప్రతి ఏటా తన బడ్జెట్‌లో 40 శాతాన్ని పాఠశాలలు, ఆస్పత్రుల కోసం ఖర్చు పెడుతోందని వివరించారు. తనను జైలుకు పంపినా పాఠశాలల నిర్మాణం, ప్రజలకు ఉచిత వైద్యం వంటి అభివృద్ధి పనులు ఆగవని స్పష్టం చేశారు.

కేంద్రం తమపై కక్ష కట్టిందని విమర్శించారు.. స్కూళ్లు కట్టినందుకే మనీశ్ సిసోడియాను, మొహల్లా క్లినిక్‌లు నిర్మించినందుకే సత్యేందర్ జైన్‌లను జైలుకు పంపారని ఆరోపణలు చేసిన ఢిల్లీ సీఎం.. తనను కూడా అరెస్ట్ చేసేందుకు ఈడీ ప్రయత్నిస్తోందని తెలిపారు.. మరోవైపు ఢిల్లీ లిక్కర్ స్కామ్ కేసులో 5 సార్లు ఈడీ పంపిన సమన్లను కేజ్రీవాల్ దాటవేశారు. దీంతో ఢిల్లీ రోస్ ఎవెన్యూ కోర్టుకు వెళ్లింది ఈడీ. ఈ నేపథ్యంలో కేజ్రీవాల్‌కి రానున్న రోజుల్లో మరిన్ని చిక్కులు ఎదురయ్యేలా కనిపిస్తున్నాయి.

ఇదిలా ఉండగా ఢిల్లీ మంత్రి అతిశీకి ఎమ్మెల్యేల కొనుగోలుకు సంబంధించిన విషయంలో ఢిల్లీ క్రైమ్ బ్రాంచ్ పోలీసులు నేడు నోటీసులు జారీ చేశారు. ఉదయం అతిశీ ఇంటికి వెళ్లిన పోలీసులు ఆమె లేకపోవడంతో కార్యాలయ సిబ్బందికి ఇచ్చారు. 24గంటల్లోగా దీనిపై స్పందించాలని ఆదేశించారు. కాగా ఈ అంశంపై స్పందించిన అతిశీ.. పార్టీని విచ్ఛిన్నం చేసేందుకు బీజేపీ కుట్ర పన్నిందని ఆరోపించారు. ఈసారి బీజేపీ ఆపరేషన్ కమలం 2.0ని ప్రారంభించిందని విమర్శించారు.