Breaking News

దేశంలోని కోట్లాది మంది ప్రజల ఏండ్ల నాటి కల ఈ ఏడాది జనవరి 22తో సాకారం అయ్యిందనే ఆనందంలో ఉన్నారు.. ఉత్తరప్రదేశ్‌ (Uttar Pradesh), అయోధ్య (Ayodhya)లో బాల రాముడి ప్రాణ ప్రతిష్ట కార్యక్రమం వేడుకకు విదేశాల్లోని ప్రముఖులు హాజరయ్యారు. ఇందులో భాగంగా ఆల్ ఇండియా ఇమామ్ ఆర్గనైజేషన్ చీఫ్ ఇమామ్ డాక్టర్ ఉమర్ అహ్మద్ ఇలియాసి (Umar Ahmed Ilyasi) సైతం అయోధ్య ట్రస్ట్ ఆహ్వానం మేరకు ప్రాణ ప్రతిష్ట కార్యక్రమానికి హాజరయ్యారు.

అయితే ఈ అంశాన్ని జీర్ణించుకోలేని కొన్ని వర్గాలు డాక్టర్ ఉమర్ అహ్మద్ ఇలియాసి పై బెదిరింపులకు దిగారు. బాబ్రీ మసీద్ (Babri Masjid) కూలగొట్టి నిర్మించిన అయోధ్య రామ మందిరం ఓపెనింగ్‌కు ఇలియాసి వెళ్లడం ముస్లింలోని కొన్ని వర్గాలకు ఏ మాత్రం నచ్చలేదని తెలుస్తోంది. దీంతో ఆయనను చంపేస్తామని గుర్తు తెలియని వ్యక్తులు ఫోన్‌లు చేసిన బెదిరింపులకు గురి చేయడం సంచలనంగా మారింది.

అదీగాక సోషల్ మీడియాలో ఆయనకు వ్యతిరేకంగా పోస్ట్‌లు పెడుతూ ఇబ్బందులకు గురిచేస్తున్నట్లు తెలుస్తోంది. ఆల్ ఇండియా ఇమామ్ ఆర్గనైజేషన్ చీఫ్ పదవికి రాజీనామా చేయాలని డిమాండ్‌లు సైతం వినిపిస్తున్నాయి. ఈ నేపథ్యంలో బెదిరింపు వార్తలపై స్పందించిన ఇలియాసి.. రామ మందిరం ఓపెనింగ్‌కు వెళ్లినందుకు కొన్ని వర్గాల నుంచి తనకు బెదిరింపులు వస్తోంది నిజమేనని దృవీకరించారు.

అయితే వివాదాలు చుట్టుముట్టినప్పటికీ తన సంఘం నుంచి ఎదురవుతున్న పరిస్థితులకు అధైర్యపడకుండా ఐక్యత, సామరస్యాన్ని పెంపొందించడంలో నిబద్ధతతో ఉన్నానని ఇలియాసీ పేర్కొన్నారు.. ఈ విషయంలో తనపై ద్వేషం చిమ్ముతున్న వారంతా పాకిస్థాన్ వెళ్లిపోవాలని కౌంటర్ ఇచ్చారు. భిన్నత్వంలో ఏక్వత్వానికి నిదర్శనమైన భారత్‌లో, మత సామరస్యం కోసమే తాను అయోధ్యకు వెళ్లినట్లు క్లారిటీ ఇచ్చారు. తాను ఎలాంటి తప్పు చేయలేదని.. ఎట్టి పరిస్థితుల్లో క్షమాపణ చెప్పనని తేల్చారు.

ఢిల్లీ (Delhi)ని దట్టమైన పొగ మంచు (Smoke Snow)కమ్మేసింది. కాలుష్యానికి తోడు పొగ మంచు అలుముకొనడంతో ప్రజలు తీవ్ర ఇబ్బందులు పడుతున్నారు. పొరుగు రాష్ట్రాలైన పంజాబ్ (Punjab), ఉత్తరప్రదేశ్(Uttar Pradesh), హర్యానా (Haryana)లోని పలు నగరాల్లో సైతం ఇదే పరిస్థితి నెలకొంది. కాగా ఢిల్లీలో కనిష్ట ఉష్ణోగ్రత 8 డిగ్రీల సెల్సియస్‌గా నమోదయ్యే అవకాశం ఉందని.. గరిష్ట ఉష్ణోగ్రత 22 డిగ్రీల సెల్సియస్‌గా నమోదయ్యే అవకాశం ఉందని భారత వాతావరణ శాఖ తెలిపింది.

మరోవైపు పొగ మంచు ప్రభావంతో 30 రైళ్లు ఆలస్యంగా నడుస్తున్నాయి. క్యాట్ -3 టెక్నాలజీ లేని విమానాలపై పొగ మంచు ప్రభావం పడుతోంది. ఢిల్లీ వాయు నాణ్యత 328 పి.ఎం.తో వెరీ పూర్ కేటగిరికి చేరింది. కాలుష్యం, పొగ మంచుతో ప్రజలకు అనారోగ్య సమస్యలు తెలుత్తుతున్నాయని ఇక్కడి వైద్యులు వెల్లడిస్తున్నారు.. అదీగాక చలితీవ్రత ఎక్కువగా ఉండే అవకాశాలు ఉన్నందున అనవసరంగా ప్రజలు ఇళ్ల నుంచి బయటకు రాకూడదని అధికారులు హెచ్చరికలు జారీ చేశారు.

వృద్ధులు, చిన్నపిల్లలు మరిన్ని జాగ్రత్తలు తీసుకోవాలని.. మాస్క్‌లు తప్పనిసరిగా వాడాలని పేర్కొన్నారు. ఇక CAT III లేని విమానాలు ప్రభావితం కావచ్చని విమానయాన అధికారులు తెలిపారు. సమాచారం కోసం ప్రయాణికులు సంబంధిత ఎయిర్‌లైన్‌ను సంప్రదించాలని కోరారు. అసౌకర్యం ఏర్పడనున్న నేపథ్యంలో విచారం వ్యక్తం చేస్తున్నట్లు తెలిపారు. గత కొద్ది రోజులుగా ఢిల్లీలో పొగమంచు విపరీతంగా పెరిగిపోయింది. ప్రజలు ఉదయం బయటకు రావాలంటేనే భయపడి పోతున్నారు.

అదీగాక వాహనదారులు రోడ్లపైకి వచ్చి ప్రమాదాలకు గురవుతున్నారు. పట్టపగలే హెడ్ లైట్లు వేసుకుని ప్రయాణించాల్సిన పరిస్థితి ఏర్పడింది. ఉదయం తొమ్మిది గంటలయినా పొగమంచు వీడటం లేదు. దీంతో ప్రజలు అనేక ఇబ్బందులకు గురవుతున్నారు. రోజు వారీ పనులకు ఆటంకం కలుగుతుందని వాహనదారులు వెల్లడిస్తున్నారు. ఇక వాతావరణ కారణంగా ఢిల్లీలోని పలు వీధులు నిర్మానుష్యంగా మారాయి..

రేడియో కార్యక్రమం మన్ కీ బాత్ (Mann Ki Bath) ద్వారా ప్రధాని నరేంద్ర మోడీ (PM Modi) దేశప్రజలను ఉద్దేశించి ప్రసంగించారు. రెండు రోజుల క్రితం 75వ రిపబ్లిక్ డే వేడుకలను ఘనంగా జరుపుకొన్నామని తెలిపారు. ఈ రిపబ్లిక్ డే తో.. రాజ్యాంగం, సుప్రీంకోర్టు 75 ఏళ్లు పూర్తి చేసుకొన్నాయన్నారు.. రామ మందిరంలో ప్రతిష్టాపన కార్యక్రమం గురించి కూడా ప్రస్తావించారు.

కోట్లాది మంది దేశ ప్రజలను ఒక్కతాటిపైకి అయోధ్య ప్రాణ ప్రతిష్ఠా కార్యక్రమం తెచ్చిందని పేర్కొన్నారు. అందరి భావాలు ఒక్కటే, అందరి భక్తి ఒక్కటే, అందరి మాటల్లో రాముడు ఉన్నారని తెలిపారు. జనవరి 22 సాయంత్రం దేశం మొత్తం రామజ్యోతి వెలిగించి దీపావళిని జరుపుకొందని అన్నారు. అంతేకాకుండా జనవరి 26న జరిగిన కవాతు చాలా అద్భుతంగా సాగిందని మోడీ తెలిపారు.

మహిళా అథ్లెట్లు ఎన్నో పెద్ద టోర్నమెంట్లలో పాల్గొని భారతదేశ పతాకాన్ని ఎగురవేశారు. ఈసారి 13 మంది మహిళా అథ్లెట్లకు అర్జున అవార్డు లభించడం ఆనందంగా ఉందని తెలిపారు. మూడు రోజుల క్రితం, దేశం పద్మ అవార్డులను ప్రకటించింది. ఇందులో అట్టడుగు వర్గాలతో మమేకమై సమాజంలో పెద్ద మార్పులు తీసుకురావడానికి కృషి చేసిన వ్యక్తులకు పద్మ గౌరవాలు ఇస్తున్నారన్నారు.

ఈ వ్యక్తులు మీడియాకు దూరంగా సామాజిక సేవలో నిమగ్నమై ఉన్నారు. పద్మ అవార్డు ప్రకటించిన తర్వాత ఇలాంటి వారిపై సర్వత్రా చర్చ జరగడం సంతోషకరమని మోడీ అన్నారు. ఇక దేశంలోని మహిళలు ప్రతి రంగంలో అద్భుతాలు చేస్తున్నారని పేర్కొన్నారు. ఈసారి ఛత్తీస్‌గఢ్‌ (Chhattisgarh)కు చెందిన హేమ్‌చంద్ మాంఝీ కూడా పద్మ అవార్డును అందుకోవడం సంతోషంగా ఉందని తెలిపారు..

విపక్ష ఇండియా (India) కూటమిలో విభేదాలు హాట్ హాట్ గా కొనసాగుతున్న సమయంలో కాంగ్రెస్‌ ఎంపీ శశి థరూర్‌ (Shashi Tharoor) కీలక వ్యాఖ్యలు చేశారు. కేంద్రంలో భాజపా సర్కార్‌ను గద్దె దించడమే లక్ష్యంగా ముందుకు వెళ్తున్నామని తెలిపారు. ఈ క్రమంలో కూటమిలోని పార్టీలు కొన్ని విషయాల్లో సర్దుబాటు చేసుకోవాల్సిన అవసరం ఉందన్నారు.

మరోవైపు కాంగ్రెస్‌ (Congress) సార్వత్రిక ఎన్నికల ముసాయిదా మేనిఫెస్టో.. ఫిబ్రవరి 15 నాటికి ప్రకటిస్తుందని థరూర్‌ వెల్లడించారు. ఇండియా కూటమిలోని అన్ని పార్టీల మేనిఫెస్టోలను పరిగణనలోకి తీసుకొని.. కీలక అంశాలతో రూపొందిస్తామన్నారు. నిరుద్యోగం, ధరల పెరుగుదల, పేదలకు ఆర్థిక సాయం, మహిళల హక్కులు, యువత, రైతాంగంపై ప్రధానంగా దృష్టి సారిస్తామని వెల్లడించారు.

ప్రజా సమస్యల పరిష్కారమే మా ప్రధాన అజెండాగా ముందుకు సాగుతున్నామని తెలిపారు. అయితే త్వరలో జరగబోయే లోక్ సభ ఎన్నికల సమరానికి కాంగ్రెస్ సన్నద్ధమవుతోంది. ఇందులో భాగంగా కీలకమైన మేనిఫెస్టోని (Manifesto) రూపొందించడానికి ఇప్పటికే ఓ కమిటీ వేసింది. కాగా విపక్ష కూటమి వరుస షాకులతో ఇబ్బంది పడుతోన్న విషయం తెలిసిందే..

తాజాగా బీహార్‌ సీఎం, జేడీయూ అధినేత నీతీశ్‌ కుమార్‌ సైతం గుడ్‌బై చెప్పారు.. ఇప్పటికే బలహీనం అవుతోన్న ఈ కూటమి, బీజేపీ ప్రభుత్వాన్ని ఎదుర్కొంటుందా అనే అనుమానాలు చోటు చేసుకొంటున్న నేపథ్యంలో థరూర్‌ వ్యాఖ్యలు రాజకీయాల్లో ఆసక్తికరంగా మారాయి..

బీహార్‌ ముఖ్యమంత్రి(Birhar CM) నితీశ్‌కుమార్‌(Nitish Kumar) తన పదవికి రాజీనామా చేశారు. ఈ ఉదయం రాజ్‌భవన్‌(Rajbhavan)కు వెళ్లి గవర్నర్‌ రాజేంద్ర అర్లేకర్‌(Governor Rajendra Arlekar)కు తన రాజీనామా లేఖను సమర్పించారు. సీఎం పదవికి రాజీనామా చేసిన నితీశ్‌కుమార్‌ బీజేపీతో కలిసి రాష్ట్రంలో కొత్త ప్రభుత్వాన్ని ఏర్పాటు చేయనున్నట్లు తెలుస్తోంది.

సీఎంగా మళ్లీ ఆయనే ప్రమాణస్వీకారం చేయనున్నట్లు సమాచారం. ఇప్పటికే బీజేపీ నుంచి ఆయనకు మద్దతు లేఖ అందినట్లు కూడా చెబుతున్నారు. నితీష్ మళ్లీ ఈ సాయంత్రం ఐదు గంటలకు రాజ్‌భవన్‌లో ముఖ్యమంత్రిగా ప్రమాణం చేస్తారు. ఈ ఉదయం దాకా ఆయన ఆర్జేడీ, కాంగ్రెస్‌ మద్దతుతో ముఖ్యమంత్రిగా ఉంటే, సాయంత్రం మాత్రం బీజేపీ మద్దతుతో అదే కుర్చీలో కూర్చుంటారు.

ఇప్పటివరకు 8సార్లు ముఖ్యమంత్రి పగ్గాలు చేపట్టారు నితీష్‌కుమార్‌. అయితే ఒక్కసారి కూడా సొంతంగా ప్రభుత్వాన్ని ఏర్పాటు చేయలేదు. ప్రతీసారి ఏదోఒక పార్టీతో జత కట్టే సీఎం పగ్గాలు అందుకున్నారు. జేడీయూకి తక్కువ సీట్లు వచ్చినా.. ప్రతిసారీ ముఖ్యమంత్రి మాత్రం నితీష్‌ కావడం గమనార్హం. నితీష్‌కుమార్ 2000 మార్చి 3న బీజేపీతో కలిసి ప్రభుత్వాన్ని ఏర్పాటు చేసి సీఎం అయ్యారు.

అదేవిధంగా బీజేపీతో కలిసి ఇప్పటి వరకు 2000, 2005, 2010, 2017, 2020 ఎన్నికల్లో మొత్తం ఐదు సార్లు ప్రభుత్వాన్ని ఏర్పాటు చేశారు. మరో మూడు సార్లు ఆర్జేడీ, కాంగ్రెస్‌తో కలిసి 2015 ఫిబ్రవరిలో ఒకసారి, 2015 నవంబర్‌లో మరొకసారి, 2022లో ఒకసారి ప్రభుత్వాన్ని ఏర్పాటు చేశారు. ఇప్పుడు మళ్లీ బీజేపీతో నితీష్‌కుమార్ తొమ్మిదో సారి ముఖ్యమంత్రి పీఠం ఎక్కబోతున్నారు.

రాష్ట్రంలో తాము మహాకూటమితో పొత్తును తెంచుకోవాలని నిర్ణయించుకున్నామని ఈ సీనియర్ పొలిటీషియన్ గవర్నర్‌తో తెలిపారు. నితీశ్‌ రాజీనామాకు గవర్నర్‌ అర్లేకర్‌ ఆమోదం తెలిపారు. కొత్త ప్రభుత్వం కొలువుదీరేవరకు ఆపద్ధర్మ ముఖ్యమంత్రిగా కొనసాగాలని సూచించారు. అయితే బీజేపీ కూడా ముఖ్యమంత్రి పదవి కోసం పట్టుబడుతున్నట్లు మరో ప్రచారం జరుగుతోంది. తాజా పరిణామాల నేపథ్యంలో ఏం జరుగుతుందనేది మరి కొన్ని గంటల్లో తేలే అవకాశం ఉన్నది.

బీహార్ (Bihar) రాజకీయాలు నాటకీయ పరిణామాల మధ్య రసవత్తరంగా మారాయి. లాలూ ప్రసాద్ యాదవ్ నేతృత్వంలోని ఆర్జేడీతో బంధాన్ని తెంచుకోవాలని జేడీయూ అధ్యక్షులు, ఆ రాష్ట్ర సీఎం నితీశ్ కుమార్ (CM Nitish Kumar) నిర్ణయించుకున్నాడు. మళ్లీ పాత మిత్రుడు బీజేపీ (BJP)తో జతకట్టేందుకు సిద్ధమయ్యారు. కమలంతో కలిసి ప్రభుత్వ ఏర్పాటుకు సిద్ధమయ్యారు. దీంతో బీహార్ రాజకీయాల్లో బిగ్ సండే కాబోతుంది.

మరికొన్ని గంటల్లో బీజేపీ, జేడీయూ నేతృత్వంలో బీహార్‌లో కొత్త ప్రభుత్వం ఏర్పడబోతుంది. అయితే ఇదే సమయంలో నితీష్ కు, బీజేపీ బిగ్ ట్విస్ట్ ఇచ్చినట్లు తెలుస్తోంది. పొత్తుకు ముందే జేడీయూ చీఫ్‌కు షరతులు విధించినట్లు ప్రచారం జరుగుతోంది. గోడ మీది పిల్లిలా వ్యవహరించే నితీష్ విషయం తెలిసిన బీజేపీ అధిష్టానం.. తొలుత సీఎం పదవికి రాజీనామా చేయాలని డిమాండ్ చేస్తోన్నట్లు టాక్ వినిపిస్తోంది.

మద్దతు లేఖను ముఖ్యమంత్రి పదవికి రిజైన్ చేసిన తర్వాతే ఇస్తామని నితీష్‌కు కండిషన్ పెట్టినట్లు తెలుస్తోంది. ఊహించని పరిణామంతో సీఎం నితీష్ కుమార్, జేడీయూ శ్రేణులు కంగుతిన్నట్లు తెలుస్తోంది. మరోవైపు సీఎం నితీష్ కుమార్ నివాసంలో నేడు జేడీయూఎల్పీ సమావేశం కానుంది. ఈ మీటింగ్ అనంతరం నితీష్ కుమార్ సీఎం పదవికి రాజీనామా చేయనున్నట్లు సమాచారం.

అనంతరం బీజేపీ మద్దతుతో సీఎంగా నితీశ్ సాయంత్రం 4గంటలకు ప్రమాణ స్వీకారం చేసే అవకాశం ఉన్నట్లు తెలుస్తోంది. కాగా తాజా రాజకీయ నిర్ణయంతో, దేశ రాజకీయాల్లో సరికొత్త సమీకరణాలకు తెరలేస్తుందని రాజకీయ వర్గాలు భావిస్తున్నాయి. అధికారమే ముఖ్యమనే తీరులో వ్యవహరిస్తున్న నితీశ్ కుమార్ పై విమర్శలు సైతం వెల్లువెత్తుతున్నాయి. ఇక నేటితో ఇక్కడి రాజకీయ పరిణామాలు క్లైమాక్స్‌కు చేరగా.. బీహార్ మహాకూటమి ప్రభుత్వం కూలిపోతుందని అనుకొంటున్నారు..