Breaking News

అమెరికాలో ఖలిస్తానీ ఉగ్రవాది గురుపత్వంత్ సింగ్ పన్ను ( Gurpatwant Singh Pannun)ను హత్యకు చేసేందుకు భారతీయుడు ఒకరు కుట్ర పన్నారన్న అమెరికా ఆరోపణలపై ప్రధాని మోడీ (PM Modi) స్పందించారు. ఈ ఆరోపణలను తాము పరిశీలిస్తామని వెల్లడించారు. కానీ కొన్ని సంఘటనలు భారత్, అగ్రరాజ్యం అమెరికా మధ్య సంబంధాలను దెబ్బతీయలేవని మోడీ స్పష్టం చేశారు.

గురు పత్వంత్ సింగ్ పన్నును హత మార్చేందుకు కుట్రలు జరిగాయని అమెరికా ఆరోపించింది. ఈ కుట్రలో భారత్ కు చెందిన నిఖిల్ గుప్తా అనే వ్యక్తి ప్రమేయం ఉందంటూ అమెరికా అటార్నీ కార్యాలయం తీవ్ర ఆరోపణలు చేసింది. ఈ కుట్రలో నిఖిల్ గుప్తాకు భారత ప్రభుత్వానికి చెందిన ఓ అధికారి నుంచి ఆదేశాలు కూడా అందాయని ఆరోపించింది.

తాజాగా ఈ ఆరోపణలపై ప్రధాని మోడీ మాట్లాడుతూ… హత్య కుట్రకు సంబంధించి ఎవరైనా సమాచారం ఇస్తే దాన్ని పరిశీలించేందుక తాము సిద్ధంగా ఉన్నామని తెలిపారు. భారత పౌరులు విదేశాల్లో మంచి లేదా చెడు పనులు చేసినట్టు తమకు సమాచారం ఇస్తే దాన్ని పరిశీలిస్తామన్నారు. చట్టానికి లోబడి పాలన చేసేందుకు తమ ప్రభుత్వం కట్టుబడి ఉందన్నారు.

మరోవైపు భారత్‌కు వ్యతిరేకంగా విదేశాల్లో కొన్ని ఉగ్రవాద గ్రూపులు కార్యకలాపాలు నిర్వహిస్తున్నారని అన్నారు. ఇది చాలా ఆందోళన కలిగించే విషయమన్నారు. భావప్రకటనా స్వేచ్ఛ పేరుతో కొంత మంది హింసను ప్రేరేపిస్తున్నారని ఆందోళన వ్యక్తం చేశారు. ఇటీవల వెలుగుచూసిన కొన్ని ఘటనలు భారత్-అమెరికా దౌత్య సంబంధాలపై ఎలాంటి ప్రభావం చూపవని ఆయన తేల్చి చెప్పారు.

రామ మందిర ప్రారంభోత్సవం నేపథ్యంలో అయోధ్య (Ayodhya)కు విమాన సర్వీసులను ప్రారంభించనున్నట్టు విమానయాన సంస్థ ఎయిర్ ఇండియా (Air India)ప్రకటించింది. ఈ నెల 30 నుంచి అయోధ్యకు విమాన సర్వీసులు మొదలవుతాయని పేర్కొంది. దేశ రాజధాని ఢిల్లీ నుంచి అయోధ్యకు నేరుగా విమానాలు నడపడం అయోధ్య చరిత్రలో ఇదే మొదటి సారి అని సంస్థ వెల్లడించింది.

డిసెంబర్ 30న ఉదయం 11 గంటలకు ఢిల్లీ నుంచి ఐఎక్స్ 2789 విమానం బయలు దేరుతుందని తెలిపింది. మధ్యాహ్నం 12.20 గంటలకు అయోధ్యలోని మర్యాద పురుషోత్తమ్‌ శ్రీరామ అంతర్జాతీయ విమానాశ్రయానికి ఐక్స్ విమానం చేరుకుంటుందని చెప్పింది. మరోవైపు అదే రోజు మధ్యాహ్నం 12:50 గంటలకు ఐఎక్స్ 1769 విమానం బయలుదేరుతుందని అధికారులు తెలిపారు.

మధ్యాహ్నం 2:10 గంటలకు ఆ విమానం ఢిల్లీ చేరుకుంటుందని తెలిపారు. ఈ మార్గంలో జనవరి 16 నుంచి ప్రయాణికులకు రోజూవారీ సేవలను అందుబాటులోకి తీసుకొస్తామని వెల్లడించారు. విమానాశ్రయం ప్రారంభం అయిన తర్వాత అయోధ్య నుంచి విమాన సర్వీసులు ప్రారంభించేందుకు ఎయిర్ ఇండియా ఎక్స్ ప్రెస్ ఉత్సాహంగా ఉందని ఆ సంస్థ ఎండీ అలోక్ సింగ్ అన్నారు.

దేశవ్యాప్తంగా ఉన్న టైర్ 2, టైర్ 3 నగరాల మధ్య కనెక్టివిటీని పెంపొందించే విషయంలో ఇది తమ నిబద్దతను తెలియజేస్తుందన్నారు. అయోధ్యలో జరగబోయే అభివృద్ధి గురించి తాము ఉత్సాహంగా ఉన్నామన్నారు. సమీప, సుదూర యాత్రికులు, ప్రయాణీకులను ఆకర్షించే ప్రయత్నాలు చేస్తున్నామన్నారు. ఈ వృద్ధిలో తాము కూడా భాగమైనందుకు గర్విస్తున్నామన్నారు.

పార్లమెంట్‌లో రచ్చ కొనసాగుతోంది. పార్లమెంట్‌(Parliament)లో భద్రతా వైఫల్యంపై కేంద్ర హోం మంత్రి ప్రకటన చేయాలంటూ కేరళ కాంగ్రెస్ (మణి), సీపీఎం (CPM)ఎంపీలు నిరసనకు దిగారు. దీంతో లోక్ సభలో ఇద్దరు ఎంపీలు కాంగ్రెస్ నేత థామస్ చాకీదాన్, సీపీఎం ఎంపీ అరిఫ్ ను స్పీకర్ సస్పెండ్ (Suspend) చేశారు. లోక్ సభలో ఇప్పటి వరకు సస్పెండ్ అయిన ఎంపీల సంఖ్య 97కు చేరుకుంది.

శీతాకాల సమావేశాలు ముగిసే వరకు ఇద్దరు ఎంపీలపై స్పీకర్ సస్పెన్షన్ వేటు వేశారు. ఇప్పటి వరకు పార్లమెంట్‌లో మొత్తం 143 మందిపై సస్పెన్షన్ వేటు పడింది. ఇక ఉపరాష్ట్రపతిని అనుసరిస్తూ టీఎంసీ ఎంపీ కళ్యాణ్ బెనర్జీ వ్యవహరించిన తీరుపై విమర్శలు వెల్లువెత్తుతున్నాయి. ఈ ఘటనను ఖండిస్తున్నట్టు రాష్ట్రపతి ద్రౌపది ముర్ము తెలిపారు. మరోవైపు ఉపరాష్ట్రపతికి ప్రధాని మోడీ ఫోన్ కాల్ చేశారు.

టీఎంసీ ఎంపీ కళ్యాణ్ బెనర్జీ తీరును బీజేపీ ఎంపీలు తీవ్రంగా తప్పుబట్టారు. ఈ ఘటనను తప్పుబడుతున్నట్టు చెప్పారు. విపక్షాల ఎంపీలు హద్దు మీరి ప్రవర్తిస్తున్నారని ఆగ్రహం వ్యక్తం చేశారు. రాజ్యాంగ పదవుల్లో ఉన్న వ్యక్తులను పదే పదే అవమానిస్తున్నారంటూ ఫైర్ అయ్యారు. గత 20 ఏండ్లుగా ప్రధాని మోడీ ఇలాంటి అవమానాలే ఎదుర్కొంటున్నారని అన్నారు.

ఉపరాష్ట్రపతిపై గౌరవంతో విపక్ష ఎంపీల చర్యలకు నిరసనగా ప్రశ్నోత్తరాల సమయంలో నిలబడే ఉంటామన్నారు. ఈ మేరకు సభలో కాసేపు ఎంపీలంతా నిల్చుండే ఉండటంతో రాజ్యసభ చైర్మన్ స్పందించారు. ఎంపీల సంఘీభావం తమ మనసును తాకిందన్నారు. అందువల్ల ఎంపీలంతా కూర్చోవాలని కోరుతున్నానన్నారు. ధన్ ఖర్ కోరక మేరకు ఎంపీలంతా సీట్లలో కూర్చున్నారు.

ఉపరాష్ట్రపతిని టీఎంసీ ఎంపీ అనుకరించిన ఘటనపై రాహుల్ గాంధీ స్పందించారు. ఎంపీలంతా పార్లమెంట్ ఆవరణలో కూర్చున్నారని, ఆ సమయంలో తాను ఫోటోలు తీశానన్నారు. ఆ వీడియో తన ఫోన్ లోనే ఉందన్నారు. ఎవరు ఎవరిని అవమానించారని ఆయన ప్రశ్నించారు. పార్లమెంట్ నుంచి సుమారు 150 మంది ఎంపీలను బయటకు పంపించారని అన్నారు. దానిపై ఎలాంటి చర్చ జరగడం లేదన్నారు. మిమిక్రీ గురించి మాట్లాడుతున్న మీడియా సంస్థలు కొన్ని వార్తలను చూపించాలన్నారు అది వారి బాధ్యత అని పేర్కొన్నారు.

ఇది ఇలా వుంటే సస్పెండ్ అయిన ఎంపీలంతా జంతర్ మంత్ వద్ద మాక్ పార్లమెంట్ నిర్వహించనున్నారు. ఇందులో ఆర్జేడీ ఎంపీ మనోజ్ ఝా స్పీకర్ గా పని చేయనున్నారు. సస్పెండ్ అయిన ఎంపీలంతా ఈ నిరసన కార్యక్రమంలో పాల్గొననున్నారు. నిరసనలకు సంబంధించి మల్లికార్జున ఖర్గే తుది నిర్ణయం తీసుకోనున్నారు.

పశ్చిమ బెంగాల్ ముఖ్యమంత్రి మమతా బెనర్జీ (Mamata Banerjee) కీలక వ్యాఖ్యలు చేశారు. రాబోయే పార్లమెంట్ సార్వత్రిక ఎన్నికలకు విపక్ష ఇండియా కూటమి ప్రధాని అభ్యర్థిగా కాంగ్రెస్ జాతీయ అధ్యక్షుడు మల్లికార్జున ఖర్గే (Mallikarjun Kharghe) పేరును ప్రతిపాదించినట్టు తెలిపారు. తనతో పాటు ఢిల్లీ సీఎం అరవింద్ కేజ్రీవాల్ కూడా ఖర్గే పేరును ప్రతిపాదించారని పేర్కొన్నారు.

ప్రస్తుతం మమతా బెనర్జీ ఢిల్లీ పర్యటనలో ఉన్నారు. పార్లమెంట్ ఆవరణలో ఈ రోజు ఆమె మీడియాతో మాట్లాడారు. విపక్షాల తరఫున ప్ర‌ధాని అభ్య‌ర్థిగా ఎవరు ఉంటారని అంతా తమను అడుగుతున్నారని చెప్పారు. అందుకే తాము ప్రధాని అభ్యర్థిగా ఖర్గే పేరును సూచించామన్నారు. ఈ విషయంలో ఎవరికీ ఎలాంటి అభ్యంతరాలు లేవన్నారు.

తమ అభ్యర్థిగా ఖర్గే పేరును సూచించడంపై అంతా సంతోషంగా ఉన్నారని అన్నారు. ఈ నిర్ణయం పట్ల ఎవరికీ ఎలాంటి అభ్యంతరాలు లేవని స్పష్టం చేశారు. మరోవైపు ఆప్ ఎంపీ రాఘవ్ చద్దా కూడా దీనిపై మాట్లాడారు. ఖర్గే ఒక గొప్ప నాయకుడని కొనియాడారు. రాజ్యసభలో ఖర్గేతో కలిసి పనిచేయడం తన అదృష్టమని వెల్లడించారు.

మరోవైపు పార్ల‌మెంట్ ఎన్నిక‌ల్లో పీఎం అభ్య‌ర్థిగా పోటీ చేసే విషయంలో ఖర్గే ఆసక్తిగా లేరని తెలుస్తోంది. తాను ఒక ఫైటర్ అంటూ ఖర్గే చెబుతున్నట్టు సమాచారం. తాను అణగారిన వర్గానికి చెందిన వ్యక్తిగానో లేదా దళితున్ని అని చెప్పుకుని రాజకీయాలు చేయలేదని అన్నారని తెలుస్తోంది. జీవితం మొత్తం స‌మాన‌త్వం కోసం పోరాడిన‌ట్లు ఇండియా కూట‌మి స‌భ్యుల‌తో ఖ‌ర్గే అన్నట్టు పార్టీ వర్గాల ద్వారా తెలుస్తోంది.

పార్లమెంట్‌ (Parliament)లో ఎంపీ (MP)ల సస్పెన్షన్ పై కాంగ్రెస్ మాజీ అధినేత్రి సోనియాగాంధీ (Sonia Gandhi) ఫైర్ అయ్యారు. పూర్తిగా సహేతుకమైన, చట్టబద్ధమైన డిమాండ్లను విపక్షాలు లేవనెత్తినందుకు ప్రజాస్వామ్య గొంతును ఈ ప్రభుత్వం నొక్కి వేసిందని తెలిపారు. గతంలో ఇంత పెద్ద ఎత్తున ఎంపీలను ఎప్పుడూ పార్లమెంట్ లో సస్పెండ్ చేయలేదని పేర్కొన్నారు.

డిసెంబర్ 13న జరిగిన పార్లమెంట్ భద్రతా లోపంపై కేంద్ర హోం మంత్రి ఓ ప్రకటన చేయాలని మాత్రమే ఎంపీలు పట్టుబట్టారని వెల్లడించారు. ఈ ఘటన క్షమించరానిదని, సమర్థించలేవని వెల్లడించారు. ఈ ఘటనపై జాతిని ఉద్దేశించి మాట్లాడేందుకు, ఘటనపై తన అభిప్రాయాలను వ్యక్తం చేసేందుకు ప్రధాని మోడీకి నాలుగు రోజుల సమయం పట్టిందన్నారు. అది కూడా పార్లమెంట్ బయట స్పందించారన్నారు.

ఇలా చేయడం ద్వారా పార్లమెంట్ పట్ల తనకున్న అసహ్యతను, ప్రజల పట్ల ఉన్న నిర్లక్ష్యాన్ని ప్రధాని స్పష్టంగా వెల్లడించారన్నారు. జమ్ము కాశ్మీర్ బిల్లులపై చర్చ సందర్భంగా దివంగత మాజీ ప్రధాని జవహర్‌లాల్ నెహ్రూపై పలు వ్యాఖ్యలు చేశారన్నారు. నెహ్రూ లాంటి దేశ భక్తుల పరువు తీసేందుకు చరిత్రను మోడీ వక్రీకరించారంటూ ధ్వజమెత్తారు.

ఈ ప్రచారానికి స్వయంగా ప్రధాని, హోం మంత్రి అమిత్ షా నేతృత్వం వహించారని నిప్పులు చెరిగారు. కానీ తాము భయపడలేదన్నారు. ఈ విషయంలో వాస్తవాలను ప్రజల ముందు ఉంచాలని తాము నిర్ణయించుకున్నామని చెప్పారు. జమ్ముకశ్మీర్ రాష్ట్ర హోదాను తక్షణమే పునరుద్ధరించాలని డిమాండ్ చేశారు. వీలైనంత త్వరగా జమ్ములో ఎన్నికలు నిర్వహించాలన్నారు. లఢక్ ప్రజల ఆకాంక్షల్ని నెరవేర్చాలన్నారు.

ఛత్తీస్‌గఢ్, మధ్యప్రదేశ్, రాజస్థాన్ అసెంబ్లీ ఎన్నికల ఫలితాలు తమ పార్టీకి తీవ్ర నిరాశనకు కలిగించాయన్నారు. దీనిపై ఇప్పటికే కాంగ్రెస్ అధ్యక్షుడు మల్లికార్జున ఖర్గే పూర్తి స్థాయిలో సమీక్ష నిర్వహించారని అన్నారు. ప్రస్తుతం పార్టీ అనేక సవాళ్లను ఎదుర్కుంటోందన్నారు. అయినప్పటికీ తమ ధైర్యమే తమను ముందుకు నడిపిస్తోందన్నారు.