Breaking News

– తెలంగాణ ఎన్నికలకు ఏర్పాట్లు
– కట్టుదిట్టమైన భద్రత, నిఘా
– పోలీసులు, జిల్లాల అధికారులతో వికాస్ రాజ్ సమీక్ష
– ప్రలోభాల కట్టడి, చర్యలపై సూచనలు
– సమస్యాత్మక ప్రాంతాల్లో అదనపు ఫోర్స్
– 5 గంటలకు ప్రచారానికి తెర
– రాష్ట్రవ్యాప్తంగా అమల్లోకి 144 సెక్షన్​

తెలంగాణ (Telangana) ఎన్నికల ప్రక్రియ చివరి దశకు చేరుతోంది. ఎన్నికల సంఘం (Election Commission) పోలింగ్ ఏర్పాట్లలో తలమునకలైంది. గురువారం ఎటువంటి ఇబ్బందులు లేకుండా పకడ్బందీగా ఎన్నికలు పూర్తి చేయాలని చూస్తోంది. ఈ నేపథ్యంలో అన్ని శాఖల అధికారులతో సమావేశాలు, సమీక్షలు నిర్వహిస్తోంది. తాజాగా సీఈవో వికాస్‌ రాజ్‌ (Vikas Raj) సమీక్ష నిర్వహించారు. పోలీసులు, అన్ని జిల్లాల ఎన్నికల ఉన్నతాధికారులు ఇందులో పాల్గొన్నారు.

ఎన్నికల సందర్భంగా ప్రలోభాలు కామన్ గా జరుగుతుంటాయి. ఇప్పటివరకు రాష్ట్రవ్యాప్తంగా 7 వందల కోట్లకు పైగా నగదు పట్టుపడింది. ఉన్న ఈ కొద్ది సమయంలోనూ ప్రలోభాలు జోరుగా సాగే అవకాశం ఉండడంతో వాటి కట్టడికి ప్లాన్ చేస్తోంది ఈసీ. అలాగే, పోలింగ్‌ రోజున తీసుకోవాల్సిన చర్యలపైనా అధికారులతో చర్చలు జరిపింది. ఎన్నికల సందర్భంగా అవాంఛనీయ ఘటనలు జరగకుండా అధికారులు భారీ భద్రతా ఏర్పాట్లు చేశారు. తెలంగాణకు సెంట్రల్‌ ఫోర్స్‌ కూడా వచ్చేసింది. సమస్యాత్మక, మావోయిస్టు ప్రభావిత ప్రాంతాల్లో అదనపు ఫోర్స్‌ ను కేటాయించారు.

మంగళవారం సాయంత్రం 5 గంటలకి ప్రచారానికి తెర పడనుంది. పోలింగ్​ నేపథ్యంలో 48 గంటల ముందు నుంచే సైలెన్స్ పీరియడ్ మొదలు అవుతుంది. రాష్ట్రవ్యాప్తంగా 144 సెక్షన్​ అమల్లోకి వస్తుంది. సంబంధిత నియోజకవర్గానికి చెందని వారంతా ఆయా నియోజకవర్గాల్లో ఉండరాదని ఎలక్షన్​ కమిషన్​ ఇప్పటికే స్పష్టం చేసింది. అలాగే, టీవీ, సోషల్‌ మీడియాలో ప్రకటనలకు అనుమతి లేదు. పత్రికల్లో వేసే ప్రకటనలకు మోడల్‌ కోడ్‌ మీడియా కమిటీ ముందస్తు అనుమతి ఉండాలి.

రాష్ట్ర వ్యాప్తంగా మొత్తం 19,375 ప్రాంతాల్లో పోలింగ్ కేంద్రాలు ఏర్పాటు చేశారు. ఎన్నికల విధుల్లో లక్ష మంది పోలీస్ సిబ్బంది పాల్గొననున్నారు. 65 వేల మంది తెలంగాణ పోలీసులతో పాటు 18వేల మంది హోంగార్డులు ఉన్నారు. రాష్ట్ర పోలీసులతోపాటు కేంద్ర బలగాలు కూడా రంగంలోకి దిగాయి. ఈ ఎన్నికల విధుల్లో 375 కంపెనీల కేంద్ర బలగాలు పాల్గొంటున్నాయి. రాష్ట్రంలో 4,400 సమస్యాత్మక ప్రాంతాలను అధికారులు గుర్తించారు. సమస్యాత్మక ప్రాంతాలు, మావోయిస్టు ప్రభావిత ప్రాంతాల్లో అదనపు బలగాల ద్వారా పటిష్ట భద్రతను ఏర్పాటు చేశారు.

ఎన్నికల విధుల్లో అసోం రైఫిల్స్, బోర్డర్స్ సెక్యూరిటీ ఫోర్స్, సెంట్రల్ ఇండస్ట్రియల్ సెక్యూరిటీ ఫోర్స్, సెంట్రల్ రిజర్వ్ పోలీస్ ఫోర్స్, ఇండో టిబెటన్ బోర్డర్ పోలీస్, నేషనల్ సెక్యూరిటీ గార్డ్స్ పాల్గొంటున్నారు. హైదరాబాద్ లో అయితే ఎన్నికలకు అధికారులు భారీగా భద్రత చేపట్టారు. బందోబస్తులో భాగంగా 70 కంపెనీల కేంద్ర, రాష్ట్ర బలగాలను 3 కమిషనరేట్ల పరిధిలో 40 వేల మంది పహారా కాయనున్నారు. హైదరాబాద్ లో వెయ్యి వరకు సమస్యాత్మక కేంద్రాలను అధికారులు గుర్తించారు. వాటి దగ్గర ఉన్న విధుల్లో కేంద్ర బలగాలు పకడ్బందీ ఏర్పాట్లు చేశారు. పోలింగ్ కేంద్రాలకు కిలోమీటర్ పరిధిలో.. ర్యాలీలు, సమావేశాలను ఎన్నికల అధికారులు నిషేధాజ్ఞలు విధించారు.

తెలంగాణ ఎన్నికలు చివరి దశకు చేరుకున్నాయి. మంగళవారం ప్రచార పర్వానికి తెరపడుతుండగా.. 30న పోలింగ్ జరగనుంది. అయితే.. చివరి రోజు ప్రచారంలో భాగంగా కాంగ్రెస్ అగ్ర నేత రాహుల్ గాంధీ పలువురితో చిట్ చాట్ నిర్వహించారు. జూబ్లీహిల్స్ లో డ్రైవర్స్, డెలివరీ బాయ్స్, శానిటరీ వర్కర్లు, హెల్త్ వర్కర్లతో ముఖాముఖి అయ్యారు. ఈ సందర్భంగా కాంట్రాక్ట్ వర్కర్ల సమస్యలను అడిగి తెలుసుకున్నారు.

తాము పడుతున్న బాధలు, సమస్యలను రాహుల్‌ కు కార్మికులు వివరించారు. తరచూ ప్రమాదాలు జరుగుతున్నాయని పారిశుద్ధ్య కార్మికులు ఆవేదన వ్యక్తం చేశారు. జీహెచ్‌ఎంసీ కాంట్రాక్టు ఉద్యోగులను అధికారులు వేధిస్తున్నారని ఆరోపించారు. తమకు డబుల్ బెడ్రూం ఇళ్లు ఇస్తామని ఇవ్వలేదని.. కాంట్రాక్టర్లు 11 గంటలు పనిచేయిస్తున్నారని వాపోయారు. సదుపాయాలు అడిగితే ఉద్యోగం మానేయమంటున్నారని ఆవేదన చెందారు.

డెలివరీ బాయ్స్ తమ కష్టాలను రాహుల్ కు చెప్పారు. రోజుకు ఎంత డబ్బు వస్తుందని ఆయన ఆరా తీయగా.. తమకు టూ వీలర్స్ ఇప్పించాలని, పెట్రోల్ రేట్ తగ్గించాలని కోరారు. ఇతర వర్కర్లు కూడా తమ సమస్యలను రాహుల్ ముందు ఏకరుపెట్టారు. గంటల కొద్దీ పని చేసినా తగినంత వేతనం రావడం లేదని చెప్పుకొచ్చారు. తెలంగాణ సర్కార్ ఇచ్చిన హామీలు నెరవేర్చలేదని కాంట్రాక్ట్ వర్కర్లు వాపోయారు.

రాహుల్ గాంధీ మాట్లాడుతూ.. కాంగ్రెస్ గెలవగానే.. కార్మికులతో సీఎం సమావేశం అవుతారన్నారు. అందరి సమస్యల పరిష్కారానికి ప్రత్యేక చొరవ చూపుతానని వారికి హామీ ఇచ్చారు. తెలంగాణ ప్రజల ఆకాంక్షలకు అనుగుణంగా బీఆర్ఎస్ ప్రభుత్వం నడుచుకోలేదని.. కేవలం తన కుటుంబం కోసమే కేసీఆర్ పని చేశారని ఆరోపించారు. కాంగ్రెస్ హయాంలో అన్ని వర్గాల సంక్షేమం కోసం కృషి చేస్తామని తెలిపారు రాహుల్ గాంధీ.

మహాభారత సంగ్రామాన్ని తలపిస్తున్న తెలంగాణ అసెంబ్లీ ఎన్నికల్లో పార్టీల ప్రచారం నేటితో ముగియనుంది. ఇప్పటికే ఇల్లీగల్ యాక్టివిటీస్ (Illegal Activities)పై గట్టి నిఘా ఉంచిన అధికారులు.. ఎన్నికల పోరుకు అసాధారణ భద్రతా ఏర్పాట్లు చేస్తున్నారు. ఈ ఎన్నికల కోసం మూడు కమిషనరేట్లలో కలిపి సుమారు 70 కంపెనీల కేంద్ర బలగాలు విధుల్లో ఉన్నాయని అధికారులు చెబుతున్నారు. పోలింగ్‌ ప్రశాంతంగా జరిగేలా బూత్‌ స్థాయి నుంచి సూక్ష్మ ప్రణాళికలతో సిద్ధమవుతున్నట్టు వెల్లడించారు.

రాష్ట్రంలో జరగనున్న అసెంబ్లీ ఎన్నికలను (Assemble Elections) మూడు ప్రధాన పార్టీలు పతిష్టాత్మకంగా తీసుకున్న నేపథ్యంలో.. పోలింగ్‌ బూత్, రూట్‌ మొబైల్, పెట్రోలింగ్, బ్లూకోల్ట్స్​తో పాటు డీసీపీ (DCP)..ఏసీపీ (ACP) స్థాయి అధికారుల ఆధ్వర్యంలో సత్వర స్పందన బృందాలు ఏర్పాటు చేసినట్టు అధికారులు తెలుపుతున్నారు. ఇప్పటికే సిబ్బంది కేటాయింపు.. అధికారులకు శిక్షణ పూర్తయ్యాయని.. సమస్యాత్మక పోలింగ్‌ కేంద్రాల్లో కేంద్ర బలగాలు విధుల్లో ఉంటాయని వెల్లడించారు.

ఎన్నికల కోసం స్పెషల్‌ స్ట్రైకింగ్‌ ఫోర్స్, రిజర్వు ఫోర్స్‌, ఏఆర్, ఎస్పీఎఫ్‌కు చెందిన దాదాపు 30 వేల మందికి పైగా బందోబస్తులో పాల్గొంటారని వివరించారు. మరోవైపు హైదరాబాద్‌ కమిషనరేట్‌ పరిధిలో పోలింగ్‌ రోజున 129 పెట్రోలింగ్‌ వాహనాలు, 122 ఇతర పోలీసు వాహనాలు, 391 రూట్‌ మొబైల్స్‌ గస్తీలో పాల్గొంటున్నట్టు తెలిపిన అధికారులు.. 9 స్పెషల్‌ ఫోర్స్, 9 టాస్క్‌ఫోర్స్‌ బృందాలను, 71 మంది ఇన్‌స్పెక్టర్లు, 125 మంది ఎస్సైల్ని సత్వర స్పందన బృందాలుగా విభజించి వేర్వేరు ప్రాంతాల్లో గస్తీ నిర్వహిస్తారని వెల్లడించారు..

ముఖ్య ప్రాంతాలుగా గుర్తించిన చోట అదనంగా 45 ఫ్లయింగ్‌ స్వ్కాడ్‌లతో పికెట్లు ఏర్పాటు చేస్తున్నట్టు అధికారులు పేర్కొన్నారు. పోలింగ్‌ కేంద్రాల వద్ద అసాంఘిక చర్యలకు అవకాశం లేకుండా 144 సెక్షన్‌ అమలు చేస్తున్నట్టు తెలిపారు. 30వ తేదీ ఉదయం 6 గంటల నుంచి సాయంత్రం 8 గంటల వరకూ పోలింగ్‌ జరిగే కేంద్రాలకు 200 మీటర్ల పరిధిలో ఐదుగురికి మించి సంచరించకూడదని అధికారులు ఆదేశాలిచ్చారు.