Featured

– ఢిల్లీ లిక్కర్ స్కామ్ కేసులో కీలక పరిణామం
– ఎమ్మెల్సీ కవితను నిందితురాలిగా చేర్చిన సీబీఐ
– 41-ఏ సీఆర్పీసీ కింద నోటీసుల జారీ
– 26న ఢిల్లీలో విచారణకు రావాలని ఆదేశం
– కవిత పేరును ఛార్జిషీట్ లో చేర్చిన సీబీఐ
– విచారణకు హాజరవ్వడంపై ఉత్కంఠ
– 28న సుప్రీంలో కవిత పిటిషన్ పై విచారణ
– అది సాకుగా చూపి వెళ్లకుండా ఉంటారా?
– లేక, విచారణకు హాజరవుతారా?
– ఒకవేళ సీబీఐ ముందుకెళ్తే.. అరెస్ట్ తప్పదా..?

ఢిల్లీ లిక్కర్‌ కేసులో కీలక మలుపు చోటుచేసుకుంది. కేసులో ఎమ్మెల్సీ కవితను సీబీఐ నిందితురాలిగా చేర్చింది. కవితను నిందితురాలిగా పరిగణిస్తూ నోటీసులు జారీ చేసింది. ఈ నెల 26న విచారణకు హాజరుకావాలని నోటీసుల్లో పేర్కొంది. గతంలో సమాచారం కోసం కవితను సీబీఐ ప్రశ్నించింది. దర్యాప్తు తర్వాత నిందితురాలిగా పేర్కొంటూ.. 41 కింద నోటీసులు ఇచ్చామని కోర్టుకు తాజాగా సీబీఐ తెలిపింది. లిక్కర్‌ కేసులో నిందితుల స్టేట్‌మెంట్స్‌ ఆధారంగా కవితకు నోటీసులు జారీ చేసినట్టు చెప్పింది. 2022 డిసెంబర్‌లో కవితను సీబీఐ ప్రశ్నించింది.

గతంలో ఇదే కేసుకు సంబంధించి ఈడీ అధికారులు కవితను మూడు సార్లు ప్రశ్నించారు. నాలుగో సారి విచారణకు రావాలని సమన్లు జారీ చేసినప్పుడు హాజరు కాకుండా సుప్రీంకోర్టులో పిటిషన్ దాఖలు చేశారు. సుప్రీంలో వేసిన పిటీషన్ పై ఈ నెల 28న విచారణ జరగనుంది. ఇదే సమయంలో కవితకు ఇచ్చిన నోటీసును సవరించి సీబీఐ నిందితురాలిగా చేర్చడంతో కేసు కీలక మలుపు తిరిగింది. అయితే.. ఈ నోటీసులపై కవిత ఓ నిర్ణయానికి వచ్చినట్లు తెలుస్తోంది. ఈడీ కేసులో సుప్రీం విచారణ ఉండటంతో సీబీఐ విచారణకు హాజరు కావొద్దని ఫిక్స్ అయినట్లు సమాచారం. కేసీఆర్ ఆదేశాలతోనే ఈ నిర్ణయం తీసుకున్నట్లు ప్రచారం జరుగుతోంది.

గతంలో సీబీఐ అధికారులు విచారణ ముగించుకుని వెళ్తూ కవితకు మరో నోటీసు ఇచ్చారు. ధ్వంసం చేసిన ఫోన్లు.. ఢిల్లీ లిక్కర్ స్కామ్‌ కు సంబంధించిన డాక్యుమెంట్లు ఇవ్వాలని ఆ నోటీసులో ఉంది. ఇవి ఆ కేసులో సాక్ష్యాల కిందకు వస్తాయి. ఆమె వద్ద ఖచ్చితంగా ఉన్నాయని నిరూపణ చేసుకునే సీబీఐ ఈ నోటీసులు జారీ చేసింది. మళ్లీ విచారణ ఎప్పుడు అన్నది గత విచారణలో తేదీ ఇవ్వలేదు. త్వరలోనే అని సమాచారం ఇచ్చారు అధికారులు. అయితే.. ఇప్పటి వరకూ మళ్లీ విచారణకు పిలవలేదు.

ఈ మధ్య కాలంలో చాలా మంది నిందితులు అప్రూవర్లుగా మారారు. వారు ఇచ్చిన స్టేట్‌మెంట్ల ఆధారంగా మరిన్ని ఆధారాలతో కవితను నిందితురాలిగా చేర్చారు. ఈ సారి ఇంటికి వచ్చి విచారణ జరిపే అవకాశం లేదు. ఢిల్లీ వెళ్లి హాజరు కావాల్సి ఉంటుంది. ఢిల్లీ లిక్కర్ స్కామ్‌లో సీబీఐ కానీ.. ఈడీ కానీ ఆషామాషీగా ఏమీ చేయడం లేదని.. ప్రణాళికాబద్దంగానే చేస్తున్నారన్న అభిప్రాయాలు వ్యక్తం అవుతున్నాయి. ముందు ముందు కవితకు ఈ కేసులో చిక్కులు పెరిగే అవకాశాలే ఎక్కువగా ఉన్నాయని అంటున్నారు.

డే వన్ నుంచి జరిగింది ఇదే..!

– 2020 సెప్టెంబ‌ర్ నుంచి మే 2021 వ‌ర‌కు ఢిల్లీ మ‌ద్యం పాల‌సీ కొత్త విధానం త‌యారు చేశారు.
– 2021 న‌వంబ‌ర్ 8న లెఫ్టినెంట్ గ‌వ‌ర్న‌ర్ విన‌య్ కుమార్ స‌క్సేనా లిక్క‌ర్ పాల‌సీ విధానంపై మొద‌టిసారిగా ఆరోప‌ణ‌లు చేశారు.
– 2022 జులై 20న కేంద్ర హోంశాఖ కార్య‌ద‌ర్శి అజ‌య్ భ‌ల్లాకు లిక్కర్ పాలసీపై లెఫ్టినెంట్ గ‌వ‌ర్న‌ర్ లేఖ రాశారు.
– జులై 22న సీబీఐకి లేఖ రాశారు ఎల్జీ.. కేసు న‌మోదు చేసి ద‌ర్యాప్తు చేయాల‌ని కోరారు.
– ఆగస్ట్ 17న సీబీఐ ఎఫ్‌ఐఆర్ న‌మోదు చేసింది. 15 మంది పేర్లను నిందితులుగా చేర్చింది. ఈడీ ఒక్కరోజు వ్య‌వధిలోనే కేసును టేక్ ఓవ‌ర్ చేసుకుంది.
– సెప్టెంబ‌ర్ 5, 6, 7 తేదీల్లో హైద‌రాబాద్ లోని 6 ప్రాంతాల్లో ఈడీ సోదాలు జరిగాయి.
– సెప్టెంబ‌ర్ 17, 18 తేదీల్లో ఎమ్మెల్సీ క‌విత ఆడిట‌ర్ గోరంట్ల బుచ్చిబాబు ఆఫీస్ లో సోదాలు చేశారు అధికారులు.
– సెప్టెంబ‌ర్ 21న అర‌బిందో ఫార్మా అధినేత శ‌ర‌త్ చంద్రారెడ్డిని విచారించింది ఈడీ.
– అక్టోబ‌ర్ 7, 8 తేదీల్లో హైద‌రాబాద్ మీడియా సంస్థ‌ల్లో సోదాలు జరిగాయి.
– అక్టోబ‌ర్ 10న బోయిన‌ప‌ల్లి అభిషేక్ రావును సీబీఐ అరెస్ట్ చేసింది.
– అక్టోబ‌ర్ 12న ఆంధ్ర‌ప్ర‌భ ఎండీ ముత్తా గౌత‌మ్ అరెస్ట్ అయ్యారు.
– అక్టోబ‌ర్ 17న ఢిల్లీ డిప్యూటీ సీఏం సిసోడియాను ప్ర‌శ్నించింది సీబీఐ.
– న‌వంబ‌ర్ 10న శ‌ర‌త్ చంద్రారెడ్డిని అరెస్ట్ చేసింది ఈడీ.
– న‌వంబ‌ర్ 14న అప్ కి చెందిన విజ‌య్ నాయ‌ర్, అభిషేక్ బోయినప‌ల్లిని సీబీఐ కేసులో బెయిల్ రాగానే ఈడీ అరెస్ట్  చేసింది.
– న‌వంబ‌ర్ 16న దినేష్ అరోరా అప్రూవ‌ర్ గా మారడానికి రౌస్ ఎవెన్యూ కోర్టు అనుమ‌తి.
– న‌వంబ‌ర్ 25న 10 వేల పేజీల‌తో సీబీఐ తొలి చార్జీషీట్.
– న‌వంబ‌ర్ 26న ఈడీ మొద‌టి చార్జీషీట్ దాఖ‌లు.
– న‌వంబ‌ర్ 29న అమిత్ అరోరాను ఈడీ అరెస్ట్ చేసింది. అదేరోజు కవిత పేరును రిమాండ్ రిపోర్టులో 25 సార్లు ప్ర‌స్తావించింది. 10 సెల్ ఫోన్స్ వాడార‌ని ధ్వంసం చేశార‌ని కోర్టుకు నివేదించింది.
– డిసెంబ‌ర్ 6న క‌విత‌కు సీబీఐ నోటీసులు.
– డిసెంబ‌ర్ 11న క‌విత‌ను విచారించింది సీబీఐ. సీఆర్పీసీ 191 కింద నోటీసుల జారీ.
– 2023 జ‌న‌వరి 6న ఈడీ రెండో చార్జీషీట్ దాఖ‌లు చేసింది. ఇందులో సీఎం కేజ్రీవాల్.. స‌మీర్ మ‌హేంద్రతో మాట్లాడిన‌ట్లు ఆధారాలతో స‌హా ప్ర‌స్తావించింది.
– నెల రోజులు 118 ప్రాంతాల్లో సోదాలు నిర్వహించిన డేటాను ఎన‌లైజ్ చేసుకున్నాక ఈ విషయాన్ని బయటపెట్టింది.
– ఫిబ్ర‌వ‌రి 8న క‌విత మాజీ ఆడిట‌ర్ గోరంట్ల బుచ్చిబాబును సీబీఐ అరెస్ట్ చేసింది.
– ఫిబ్ర‌వ‌రి 18న సిసోడియాకు సీబీఐ నోటీసులు
– ఫిబ్ర‌వ‌రి 25న స‌మీర్ మ‌హేంద్ర‌, విజ‌య్ నాయ‌ర్, దినేష్ అరోరా, అమిత్ అరోరా, అరుణ్ రామచంద్ర‌ పిళ్లై ఆస్తుల‌ను జప్తు చేసింది ఈడీ.
– ఫిబ్ర‌వ‌రి 26న 8 గంట‌ల పాటు మ‌నీష్ సిసోడియాను విచారించి సాయంత్రం అరెస్ట్ చేసింది సీబీఐ.
– మార్చి 7న అరుణ్ రామ‌చంద్ర ఫిళ్లైని ఈడీ అరెస్ట్ చేసింది. 7 రోజుల క‌స్ట‌డీ విధించింది కోర్టు. రిమాండ్ రిపోర్ట్ లో పిళ్లై.. క‌విత బినామీయే అని పేర్కొంది ఈడీ.
– మార్చి 8న క‌విత‌కు ఈడీ నోటీస్ పంపంది. 9 తేదీన విచారణకు రావాలని ఆదేశం
– మార్చి 16, 20, 21 తేదీల్లో ఈడీ విచారణకు హాజరైన కవిత
– ఈడీ విచారణపై సుప్రీంలో కవిత పిటిషన్
– 2024 జనవరి 16న మరోసారి విచారణకు రావాలని కవితకు ఈడీ నోటీసులు. సుప్రీంలో విచారణ జరుగుతోందని రాలేనని ఈడీకి కవిత లేఖ రాశారు.
– ఫిబ్రవరి 21న కవితకు నోటీసులు పంపిన సీబీఐ. 26న విచారణకు రావాలని ఆదేశం.
– ఫిబ్రవరి 23న కవితను కేసులో నిందితురాలిగా పేర్కొంది సీబీఐ.

కవిత తన సొంత ఇమేజ్ కంటే కేసీఆర్ కూతురుగా పాపులారిటీ సంపాదించుకొందని అంటారు.. బీఆర్ఎస్ అధికారంలోకి వచ్చాక తండ్రి చాటు బిడ్డగా పదవి దక్కించుకొన్నారు. వడ్డించే వారు మనవారైతే నల్లి బొక్కలకు కొదువేముంది అనే తీరుగా ఇంటి పార్టీలో ఆమె ఆడింది ఆట.. పాడింది పాటలా సాగిందనే విమర్శలు పుట్టాయి.. ఇక తెలంగాణ (Telangana)లో అసలు ఆడపడచులు లేనటట్లు.. కవిత మాత్రమే తెలంగాణ ఆడపడచు అనే స్టాంప్ ముద్రించుకొని చేసిన ఘనకార్యాలపై ఎన్నో ఆరోపణలున్నాయి..

ఇదేసమయంలో ఢిల్లీ లిక్కర్ స్కామ్ బీఆర్ఎస్ పునాదులను కదిలించింది. ఇది కొనసాగుతుండగా అసెంబ్లీ ఎన్నికల్లో ఓటమితో అధికారానికి దూరమైన బీఆర్ఎస్ అధినేత కేసీఆర్.. అధికారం కోల్పోగానే అనారోగ్యం బారిన పడటం పార్టీకి ఊహించని మైనస్ గా మారింది. ఇలా వరుసపెట్టి ఎదురు దెబ్బలు తగులుతున్నాయి. మరోవైపు గత ప్రభుత్వంలో జరిగిన కాళేశ్వరం ప్రాజెక్టు అక్రమాలతో పాటు ఒక్కొ నిర్ణయాలపై రేవంత్ రెడ్డి సర్కార్ ఫోకస్ చేయడం గులాబీ బాస్ కు మింగుడుపడటం లేదని అంటున్నారు.

ఈ క్రమంలో రాబోయే పార్లమెంట్ ఎన్నికల్లో కాంగ్రెస్ (Congress), బీజేపీ (BJP) నుంచి గట్టి పోటీ తప్పదనే ప్రచారం మొదలైంది.. ఇలా బీఆర్ఎస్ కు ఎదురు దెబ్బలు ఎదురవుతున్న తరుణంలో అనూహ్యంగా కవిత (kavtha)కు ఢిల్లీ (Delhi) లిక్కర్ స్కామ్ (Liqure Scam) కేసులో సీబీఐ నోటీసులు ఇవ్వడం.. ఈ నెల 26న తమ ఎదుట విచారణకు హజరు కావాలంటూ పేర్కొనడం హాట్ టాపిక్ గా మారింది.

అదీగాక కవిత దాఖలు చేసిన పిటిషన్ పై సుప్రీం కోర్టులో విచారణ జరగనున్నది. తాజా పరిమాణాల నేపథ్యంలో ఎప్పుడేం జరగబోతున్నదనే ఆందోళనలో బీఆర్ఎస్ శ్రేణులు ఉన్నట్లు సమాచారం. మరోవైపు కవితకు అరెస్ట్ తప్పదా అనే చర్చ తెరమీదకు వస్తోంది. ఇక గతంలో కవితను ఈడీ మూడు సార్లు ప్రశ్నించగా.. ఒక సారి సీబీఐ విచారించింది. తాజా నోటీసులు ఎలాంటి ట్విస్ట్ కు దారి తీస్తోందనే చర్చ మొదలైంది.

ఇక మునిగిపోతున్న పార్టీని కాపాడాలనే ధ్యాసలో ఉన్న గులాబీ బాస్.. కాంగ్రెస్, బీజేపీలను ఎదుర్కొనే అంశంపై మల్లగుల్లాలుపడుతుండగా.. కవిత ఇష్యూ మరోసారి తెరపైకి రావడంతో పార్లమెంట్ ఎన్నికల్లో కేసీఆర్ కు చిక్కులు తప్పవా అనే చర్చ జోరందుకోంది. ఇప్పటికే ఈ కేసు వల్ల పార్టీకి జరగాల్సిన నష్టం జరిగిపోయిందనే విమర్శలు సొంత పార్టీలోనే వినిపిస్తున్నాయి. ఈ నేపథ్యంలో కేసీఆర్ ఎలాంటి నిర్ణయం తీసుకోబోతున్నారనేది రాష్ట్ర రాజకీయాల్లో హాట్ టాపిక్ గా మారింది.