National

పార్లమెంట్ భద్రతా వైఫల్యం (Parliament Security Breach)పై ప్రధాని మోడీ (PM Modi) తొలిసారి స్పందించారు. పార్లమెంట్‌లో జరిగిన ఘటన చాలా దురదృష్టకరమని తెలిపారు. ఇది అత్యంత సీరియస్ ఘటన అని అన్నారు. దీనిపై ప్రతిపక్షాలు అనవసర రాద్దాంతం చేయాల్సిన పనిలేదన్నారు. ఈ ఘటనపై పూర్తి స్థాయి విచారణ అవసరమన్నారు. హిందీ దినపత్రిక దైనిక్‌ జాగరణ్‌కు ప్రధాని మోడీ ఇంటర్వ్యూ ఇచ్చారు.

పార్లమెంట్‌లో ఘటన అనంతరం స్పీకర్‌ ఓం బిర్లా విచారణకు ఆదేశించారని పేర్కొన్నారు. దర్యాప్తుపై తమకు పూర్తి విశ్వాసం ఉందని చెప్పారు. ఈ ఘటనపై దర్యాప్తు సంస్థలు పూర్తిస్థాయిలో విచారణ జరిపి నిందితులపై కఠిన చర్యలు తీసుకుంటున్నాయని వెల్లడించారు. ఈ ఘటన వెనుక ఉన్న వ్యక్తుల మూలాలను, వారి ఉద్దేశాలను తెలుసుకోవాల్సిన అవసరం ఉందన్నారు. సమష్టి స్ఫూర్తితో ఇలాంటి సమస్యల పరిష్కారానికి కృషి చేయాలన్నారు.

ఆర్టికల్‌ 370 రద్దును సమర్థిస్తూ సర్వోన్నత న్యాయస్థానం ఇచ్చిన తీర్పుపై ప్రధాని మోడీ స్పందించారు. తమ ప్రభుత్వం తీసుకున్న నిర్ణయాన్ని సమర్థిస్తూ సుప్రీంకోర్టు స్టాంప్‌ వేసిందని వెల్లడించారు. విశ్వంలో మళ్లీ ఏ శక్తి కూడా ఆర్టికల్ 370ని తీసుకు రాలేదన్నారు. రాబోయే లోక్ సభ సార్వత్రిక ఎన్నికల్లో బీజేపీ మరోసారి చరిత్రాత్మక విజయం దక్కించుకుంటుందన్నారు. ఇటీవల ఐదు రాష్ట్రాల ఎన్నికల ఫలితాల ద్వారా ఆ విషయం స్పష్టమవుతోందన్నారు.

మధ్యప్రదేశ్‌, రాజస్థాన్‌, ఛత్తీస్‌గఢ్‌ సీఎంలుగా కొత్త వారిని ఎంపిక చేసిన అంశంపై ప్రధాని మోడీ స్పందించారు. ఆ మూడు రాష్ట్రాల ముఖ్యమంత్రులు కొత్త వారని చాలా మంది భావిస్తున్నట్టు తెలిపారు. వాస్తవానికి వారు కొత్తవాళ్లేం కాదన్నారు. చాలా కాలంగా ప్రజల కోసం వాళ్లు కష్టపడ్డారన్నారు. వారికి ఎంతో అనుభవం ఉందని వివరించారు. కానీ చాలా కాలంగా మీడియా దృష్టి కొన్ని కుటుంబాలపైనే ఉండిపోయిందన్నారు. కష్టపడి పనిచేసే వారి గురించి పెద్దగా ఎవరికీ తెలియలేదన్నారు. ఇలాంటివి ప్రతి రంగంలోనూ జరుగుతాయన్నారు.

రామ మందిర ప్రారంభోత్సవంపై ప్రధాని మోడీ మాట్లాడారు. భగవాన్ శ్రీ రామున్ని దర్శించుకోవడం ద్వారా జీవితం సఫలం అవుతుందని తెలిపారు. ఈ పవిత్ర కార్యంలో పాలుపంచుకోవాలని తనకు ఆహ్వానం రావడం తన అదృష్టమని పేర్కొన్నారు. ఈ ఆనందం కేవలం మోడీది మాత్రమే కాదన్నారు. ఇది భారత్‌లోని 140 కోట్ల హృదయాల సంతోషమన్నారు. ఈ జనవరి 22 సందర్భం ‘హర్ ఘర్ అయోధ్య, హర్ ఘర్ రామ్’ కల సాకారం అవుతుందన్నారు.

ప్రపంచంలోని అతిపెద్ద, ధనిక ఆర్థిక వ్యవస్థల పరిస్థితి ప్రస్తుతం బాగా లేదని వివరించారు. నేడు భారత్‌లో ఆర్థిక వ్యవస్థకు ఊతమిచ్చే ప్రతి రంగం మెరుగైన పనితీరును కనబరుస్తోందన్నారు. కొత్త బడ్జెట్‌తో పాటు కొత్త పథకాలను కూడా ప్రభుత్వం రూపొందించనుందని వ్యాఖ్యలు చేశారు.

ప్రపంచంలో అతిపెద్ద కార్యాలయ సముదాయం ఆదివారం ప్రారంభమైంది. గుజరాత్ లోని సూరత్ డైమండ్ బోర్స్ (Surat Diamond Bourse)ను ప్రధాని మోడీ (PM Modi) ప్రారంభించారు. ఈ సందర్భంగా ప్రధాని మోడీని సత్కరించారు. ఈ కేంద్రం అంతర్జాతీయ డైమండ్, జ్యుయెల్లరీ వ్యాపారానికి ఆధునిక కేంద్రంగా పని చేయనుంది.

జ్యువెల్లరీతో పాటు కఠినమైన, పాలిషింగ్ వజ్రాల వ్యాపారానికి అంతర్జాతీయ కేంద్రంగా ఉంటుందని ప్రభుత్వ వర్గాలు తెలిపాయి. సూరత్ సమీపంలోని ఖాజోద్ లో దీన్ని నిర్మించారు. ఈ భవనం 67 లక్షల చదరపు అడుగుల కంటే ఎక్కువ విస్తీర్ణంలో విస్తరించి ఉంది. ఇందులో 4,500 కార్యాలయాలు ఉన్నాయి.

భవనంలో మొత్తం 130 ఎలివేటర్లు ఉన్నాయి. డైమండ్‌ కట్టర్లు, పాలిషర్లు, వ్యాపారులతో సహా మొత్తం 65వేల మంది వజ్రాల నిపుణులు ఈ కాంప్లెక్స్‌ కేంద్రంగా పని చేస్తారని అధికారులు తెలిపారు. సుమారు 35.54 ఎకరాల్లో రూ.3,400 కోట్ల వ్యయంతో ఒక హరిత భవనంగా ఈ కార్యాలయాన్ని నిర్మించారు.

మరోవైపు నూతనంగా నిర్మించిన సూరత్​ ఎయిర్​ పోర్టు టెర్మినల్ బిల్డింగ్​ను కూడా ప్రధాని మోడీ ప్రారంభించారు. ఈ టెర్మినల్ బిల్డింగ్ ను గేట్ వే ఆఫ్ సూరత్ గా చెబుతున్నారు. రద్దీ సమయాల్లో 1200 దేశీయ, 600 మది విదేశీ ప్రయాణికులను ఈ టెర్మినల్ హ్యాండిల్ చేయగలదు. వారణాసి-ఢిల్లీ మధ్య రెండవ వందే భారత్ ఎక్స్ ప్రెస్ ను ప్రధాని మోడీ ప్రారంభించనున్నారు.

మధుర శ్రీ కృష్ణ జన్మభూమి (shri krishna janmabhoomi) వివాదంలో షాహిద్ ఈద్గా మసీద్‌లో సర్వేకు ఇటీవల న్యాయస్థానం ఆదేశించింది. ఈ క్రమంలో తాజాగా యూపీలో మరో వివాదం తెరపైకి వచ్చింది. ఆగ్రాలోని షాహీ జామా మసీదు (Shahi Jama Masjid)లో సర్వే చేపట్టాలని హిందూ సంఘాలు డిమాండ్ చేస్తున్నాయి. ఈ నేపథ్యంలో ఆగ్రాలోని మసీదు ప్రాంతంలో ఉద్రిక్త పరిస్థితులు నెలకొన్నాయి.

అఖిల భారతీయ హిందూ మహాసభకు చెందిన నాయకులు పెద్ద ఎత్తున షాహీ జామా మసీదు వద్దకు చేరుకున్నారని పోలీసులు వెల్లడించారు. అనంతరం మసీదు వద్ద మిఠాయిలు పంచి పెట్టారని అన్నారు. అలాంటి కార్యక్రమాలు చేయవద్దని పోలీసులు వారించినా హిందూ సంఘాల నాయకులు వినలేదన్నారు. దీంతో మసీదు సమీపంలో భారీగా పోలీసులను మోహరించామని తెలిపారు.

మరోవైపు హిందూ మహాసభ జాతీయ ప్రతినిధి సంజయ్ జాట్ మాట్లాడుతూ… ఆగ్రాలో షాహీ జామా మసీదులో సర్వే నిర్వహించాలని డిమాండ్ చేశారు. మధురాలోని కేశవ దేవ్ ఆలయంలోని విగ్రహాన్ని మొఘల్ చక్రవర్తి ఔరంగజేబు తీసుకు వెళ్లి షాహీ జామా మసీదులోని మెట్ల కింద పాతి పెట్టారని ఆరోపించారు. ఈ క్రమంలో ఇరు వర్గాల మధ్య వాగ్వాదం చోటు చేసుకునే పరిస్థితి నెలకొంది.

మత పెద్దల సహకారంతో ఘర్షణ జరగకుండా పరిస్థితిని సద్దుమణిగేలా పోలీసులు చేశారు. భారతీయ ముస్లిం వికాస్ పరిషత్ చైర్మన్, సమీ అఘై మాట్లాడుతూ…. అలహాబాద్ హైకోర్టులో జరిగిన న్యాయ పోరాటంలో ముస్లింలు ఓడిపోయారన్నారు. అయినప్పటికీ భారతదేశ న్యాయ వ్యవస్థ, నిష్పాక్షికతపై తమ విశ్వాసం మాత్రం చెక్కు చెదరలేదని వెల్లడించారు.