National

తెలంగాణ (Telangana)లో బీజేపీ అగ్రనేతలు పర్యటించనున్నారు. త్వరలో పార్లమెంట్ ఎన్నికలున్న నేపథ్యంలో ప్రధాని నరేంద్ర మోడీ, కేంద్ర హోం మంత్రి అమిత్‌షా, జేపీ నడ్డా వరుస పర్యటనలతో హోరెత్తించనున్నారు. రాష్ట్రం నుంచి లోక్‌సభ ఎన్నికల్లో కనీసంగా పది ఎంపీ సీట్లు గెలుపొందాలన్న లక్ష్యంతో ఉన్న కాషాయం.. కాంగ్రెస్ (Congress), బీఆర్‌ఎస్‌ (BRS) లు ప్రచారాన్ని ప్రారంభించక ముందే తాము బరిలోకి దిగాలని భావిస్తోంది.

ఆ మేరకు పార్టీ అభ్యర్థుల ప్రకటనకు ముందే ఈ నెలాఖరులోగా బీజేపీ (BJP) అభ్యర్థుల తొలిజాబితాను ప్రకటించి ఎన్నికల ప్రచారపర్వంలోకి దూకాలని నిర్ణయించినట్టు సమాచారం. ఈ క్రమంలో ఎన్నికల షెడ్యూల్‌ వెలువడేలోగానే ఆదిలాబాద్ (Adilabad), సంగారెడ్డి (Sangareddy)లో జరిగే సభల నుంచి మోడీ (Modi) ఎన్నికల ప్రచారానికి శ్రీకారం చుడతారని ప్రచారం జరుగుతుంది.

అయితే ఈ సభలు నిర్వహించడానికంటే ముందే.. రోడ్లు, ఇతర అభివృద్ధి కార్యక్రమాలకు ప్రారంభోత్సవాలు, శంకుస్థాపనలు చేపట్టే ఆలోచనలో నేతలున్నట్లు తెలుస్తోంది. మరోవైపు గత పదేళ్ల పాలనలో తమ ప్రభుత్వం సాధించిన ప్రగతితో పాటు జాతీయ, రాష్ట్రస్థాయిల్లో కాంగ్రెస్‌ తీరును, రాష్ట్రంలో తొమ్మిదిన్నరేళ్లు అధికారంలో ఉన్న కేసీఆర్‌ సర్కారు అనుసరించిన ప్రజా వ్యతిరేక విధానాలపై ప్రజల్లోకి తీసుకెళ్లాలనే ఆలోచనలతో ఉన్నారని.. వీటిపై మోడీ సునిశిత విమర్శలు చేస్తారని రాష్ట్ర పార్టీ వర్గాల నుంచి సమాచారం..

ఈ నెల 29న ఢిల్లీలో జరగనున్న బీజేపీ పార్లమెంటరీ బోర్డు సమావేశంలో రాష్ట్రంలోని 17 సీట్లలో మెజారిటీ స్థానాలకు అభ్యర్థులను ప్రకటించే అవకాశాలున్నాయని టాక్ వినిపిస్తోంది. అదేరోజు ఇద్దరు లేదా ముగ్గురు సిట్టింగ్‌ ఎంపీలు, ఐదారుగురు సిట్టింగ్‌ ఎమ్మెల్యేలు పార్టీ తీర్థం పుచ్చుకొనే అవకాశాలు ఉన్నాయని విశ్వసనీయ వర్గాల సమాచారం. అయితే పార్టీలో చేరుతున్న అభ్యర్థుల బలాబలాల ప్రాతిపదికన పేర్లను ఖరారు చేయనున్నట్టు సమాచారం.

మరోవైపు సరైన అభ్యర్థుల అన్వేషణలో భాగంగా… జహీరాబాద్, పెద్దపల్లి, నల్లగొండ, వరంగల్, ఖమ్మం సీట్లకు క్యాండిడేట్ల ఎంపికను పెండింగ్‌లో పెట్టినట్టుగా పార్టీ నాయకులు చర్చించుకొంటున్నారు. ఇదిలా ఉండగా ఎన్నికల షెడ్యూల్‌ వచ్చేలోగా.. ఆదిలాబాద్, సంగారెడ్డి సభలకు మోడీ..అమిత్‌ షా, జేపీ నడ్డా పాల్గొననుండగా.. మార్చి 4న హైదరాబాద్‌లో అమిత్‌ షా సభ నిర్వహిస్తారని టాక్ వినిపిస్తోంది.

అయితే ముందుగా రాష్ట్ర పర్యటన ఖరారైతే అదే రోజున అమిత్‌ షా బదులు మోడీ సభ ఉండొచ్చునని సమాచారం. ఈ సభ కోసం గచ్చిబౌలి, సరూర్‌నగర్‌ స్టేడియాలను పరిశీలిస్తున్నట్టు తెలుస్తోంది. మరోవైపు విజయ సంకల్పయాత్రల ముగింపు సందర్బంగా హైదరాబాద్‌లో మార్చి 2న అమిత్‌షా సభతో ఎన్నికల ప్రచారాన్ని ప్రారంభించాలని తొలుత భావించారు. ఐతే 2వ తేదీకి బదులు 4న రాష్ట్రానికి వచ్చేందుకు అమిత్‌షా సమయం కేటాయించడంతో ప్లాన్ మార్చినట్లు తెలుస్తోంది.

అమృత్ భారత్ స్టేషన్ (Amrit Bharat Stations) స్కీం ద్వారా నేడు ప్రధాని నరేంద్ర మోడీ (Narendra Modi) దేశంలో 553 రైల్వే స్టేషన్ల పునరాభివృద్ధికి శంకుస్థాపన చేయనున్నారు. రెండు వేల రైల్వే, మౌలిక సదుపాయాల ప్రాజెక్టులకు శంకుస్థాపన, ప్రారంభోత్సవం చేసి వాటిని జాతికి అంకితం చేస్తారు. ఈ నేపథ్యంలో సుమారు రూ.19,000 కోట్ల ఖర్చుతో స్టేషన్లను పునరాభివృద్ధి చేయనున్నారు.

మరోవైపు దేశంలోని పలు ప్రాంతాల్లో దాదాపు రూ.21,520 కోట్లతో నిర్మించిన రోడ్ ఓవర్ బ్రిడ్జి (ROB), అండర్‌పాస్‌లకు శంకుస్థాపన, ప్రారంబోత్సవం చేయనున్నారు. నిర్మాణ పనులు పూర్తైన లెవెల్ క్రాసింగ్ గేట్లను కూడా మోడీ ప్రారంభించనున్నారు. ఇదిలా ఉండగా రైల్వే శాఖ మానవ సహిత లెవల్ క్రాసింగ్ గేట్లను తొలగించే దిశగా కృషి చేస్తుంది.

దీని వల్ల రైళ్ల వేగం పెరగడమే కాకుండా.. రైళ్ల రాకపోకలకు ఎలాంటి ఆటంకం ఉండదని, నగరంలో ట్రాఫిక్‌ వ్యవస్థ కూడా సజావుగా సాగుతుందని భావిస్తున్నారు. ఈ సందర్భంగా మాట్లాడిన మోడీ.. ప్రపంచంలో మూడో ఆర్థిక వ్యవస్థగా భారత్‌ మారుతోందని తెలిపారు. గత ప్రభుత్వాలేవి రైల్వే రంగాన్ని అంతగా పట్టించుకోలేదని అన్నారు. సామాన్యులు ఎక్కువగా ఉపయోగించే ఈ రవాణా రంగాన్ని మరింత బలోపేతం చేసేందుకు కేంద్ర ప్రభుత్వం పదేళ్లుగా కృషి చేస్తోందని తెలిపారు.

కొన్ని దశాబ్ధాలుగా గత ప్రభుత్వాలేవీ వందే భారత్ వంటి రైళ్ల గురించి ఆలోచించలేదని, నేడు ఎన్డీఏ సర్కార్ వాటిని అందుబాటులోకి తీసుకువచ్చిందని పేర్కొన్నారు. ఇక హైదరాబాద్‌ (Hyderabad), బేగంపేట (Begampet) రైల్వే స్టేషన్‌లో జరిగిన కార్యక్రమంలో దృశ్య మాధ్యమం ద్వారా పాల్గొన్న ప్రధాని కార్యక్రమానికి గవర్నర్‌ తమిళిసై, ఉపముఖ్యమంత్రి భట్టి విక్రమార్క, ఎంపీ లక్ష్మణ్‌తో పాటు ప్రజాప్రతినిధులు, అధికారులు పాల్గొన్నారు.

దేశ రాజకీయాలను కుదిపేస్తున్న ఢిల్లీ (Delhi) లిక్కర్ స్కామ్‌ కేసు చూయింగ్ గమ్ములా సాగుతున్న విషయం తెలిసిందే.. అయితే త్వరలో పార్లమెంట్ ఎన్నికలున్న నేపత్యంలో మరోసారి ఈ కేసు తెరపైన సంచలనంగా మారింది. ముఖ్యంగా బీఆర్ఎస్ (BRS) ఎమ్మెల్సీ కవిత (Kavita)కు సీబీఐ (CBI) నోటీసులివ్వడంపై రాజకీయాల్లో ఆసక్తికరంగా మారింది. ఈ క్రమంలో బీజేపీ (BJP) నేతలు చేస్తున్న వ్యాఖ్యలు రాష్ట్రంలో చర్చాంశనీయంగా మారాయి.

ఈ నేపథ్యంలో కవితకు సీబీఐ నోటీసులివ్వడంపై, బీజేపీ జాతీయ ప్రధాన కార్యదర్శి, ఎంపీ బండి సంజయ్ (Bandi Sanjay Kumar) స్పందించారు. నేడు కరీంనగర్‌లో మీడియాతో మాట్లాడిన ఆయన.. కీలక వ్యాఖ్యలు చేశారు. లిక్కర్ స్కామ్ లో సీబీఐ సేకరించిన ఆధారాలు, సాక్ష్యాల మేరకే నోటీసులు ఇచ్చారని వెల్లడించారు. వీటి మీద అనుమానాలు లేవన్నారు.. స్వతంత్ర దర్యాప్తు సంస్థలు అయిన సీబీఐ, ఈడీ తీసుకొనే చర్యల్లో ఎలాంటి రాజకీయ జోక్యం ఉండదని పేర్కొన్నారు.

తప్పు చేసినట్లు ఆధారాలు ఉంటే వారు ఎంతపెద్ద వారైనా ఉపేక్షించకూడదనేదే బీజేపీ విధానమని క్లారిటీ ఇచ్చారు. దోషులు తప్పించుకొరని.. వారి ఆటలు ఎక్కువ రోజులు సాగయని అన్నారు. మరోవైపు ఈ ఎన్నికల్లో బీజేపీ 370 ఎంపీ సీట్లు సాధిస్తుందని, మరోసారి కేంద్రంలో ఎన్డీఏ కూటమి ప్రభుత్వాన్ని ఏర్పాటు చేస్తోందని ధీమా వ్యక్తం చేసిన బండి సంజయ్.. బీజేపీ చేపట్టిన విజయ సంకల్ప యాత్రకు ప్రజల నుంచి అద్భుతమైన స్పందన వస్తోందన్నారు.

ఇకపోతే ఢిల్లీ లిక్కర్ స్కామ్‌లో ఎమ్మెల్సీ కవితను ఇంతకాలం సాక్షిగా మాత్రమే పరిగణించిన సీబీఐ.. తాజాగా నిందితురాలిగా చేర్చిన విషయం తెలిసిందే. ఈ క్రమంలో ఈ నెల 26వ తేదీన విచారణకు హాజరు కావాలని సమన్లు జారీ చేసింది. ఈ క్రమంలో సీబీఐ నోటీసులు రాజ్యాంగ విరుద్ధమని తెలిపిన కవిత.. ఎన్నికల షెడ్యూల్ వల్ల బిజీగా ఉండటం వల్ల విచారణకు హాజరు కావడం లేదని సీబీఐకి లేఖ రాశారు.