National

2024-25 ఆర్థిక సంవత్సరానికి సంబంధించి మధ్యంతర బడ్జెట్‌ (Interim Budget)ను కేంద్ర ఆర్థిక మంత్రి నిర్మలా సీతారామన్ (Nirmala Sita Raman) గురువారం ప్రవేశ పెట్టనున్నారు. ఇప్పుడు దేశ ప్రజలందరి దృష్టి మధ్యంతర బడ్జెట్ పైనే ఉంది. లోక్ సభ సార్వత్రిక ఎన్నికల నేపథ్యంలో ప్రజలపై కేంద్రం వరాల జల్లు కురిపిస్తుందని వార్తలు వినిపిస్తున్నాయి. ముఖ్యంగా పీఎం కిసాన్, ఆయుష్మాన్ భారత్ లాంటి పథకాలు, పన్నులు, చమురు, వంట గ్యాస్​ ధరల తగ్గింపు వంటి అంశాల గురించి ప్రజలు ఆసక్తిగా ఎదురు చూస్తున్నారు.

ఈ మధ్యంతర బడ్జెట్‌తో రైతులను ఆకట్టుకునేందుకు కేంద్రం ప్రయత్నం చేసే అవకాశం ఉందని అంతా భావిస్తున్నారు. పీఎం కిసాన్ యోజన కింద రైతులకు ఏటా రూ.6000 అందిస్తున్నారు. కానీ ఈ సారి ఆ మొత్తాన్ని 9000కు పెంచి అందించాలనే యోచనలో మోడీ సర్కార్ ఉన్నట్టు వార్తలు వినిపిస్తున్నాయి. గతేడాది ఈ పథకం కోసం రూ. 60వేల కోట్లను ప్రభుత్వం కేటాయించింది. ఈ ఏడాది ఈ పథకానికి 50 శాతం నిధులు అదనంగా కేటాయిస్తారని తెలుస్తోంది.

త్వరలో లోక్ సభ సార్వత్రిక ఎన్నికలు జరగనున్నాయి. ఈ నేపథ్యంలో ఎన్నికలకు ముందు ప్రజలను ఆకట్టుకునేలా పలు ప్రకటనలు చేసే అవకాశం ఉందని భావిస్తున్నారు. ముఖ్యంగా పెట్రోల్, డీజిల్ ధరల తగ్గింపుపై ఈ బడ్జెట్‌లో ప్రకటన ఉంటుందని వార్తలు చెక్కర్లు కొడుతున్నాయి. అదే సమయంలో వంట గ్యాస్​ సిలిండర్​ ధరలను తగ్గించే అవకాశం ఉందని లేదా సబ్సిడీలను పెంచి ప్రజలను ఆకట్టుకునే ప్రయత్నం చేయవచ్చంటున్నారు.

ఈ బడ్జెట్‌లో నేషనల్ పెన్షన్ స్కీమ్‌ను కేంద్రం బలోపేతం చేస్తుందని తెలుస్తోంది. ముఖ్యంగా అధిక పన్ను రాయితీలు, విత్ డ్రా లిమిట్ పెంచడం లాంటివి ఉండే అవకాశం ఉన్నట్టు తెలుస్తోంది. ఇవే జరిగితే పెన్షనర్లకు, బ్యాంకు ఖాతాదారులకు మంచి లబ్ధి చేకూరుతుంది. అయితే ఇది 75 ఏండ్ల వయస్సు పైబడిన వారికి మాత్రమే వర్తింప చేసే అవకాశం ఉన్నట్టు తెలుస్తోంది.

ఇక ఈ బడ్జెట్‌లో ఎలాంటి కొత్త పన్ను విధింపులు ఉండబోవని తెలుస్తోంది. ఆదాయపన్ను చట్టంలో 1961 సెక్షన్​ 80డీ కింద ఆరోగ్య బీమా ప్రీమియం చెల్లింపులపై, వైద్య ఖర్చులపై ట్యాక్స్ డిడక్షన్ చేసుకునే అవకాశం ఉంది. తాజాగా ఈ మధ్యంతర బడ్జెట్లో సెక్షన్ 80డీ కింద చేసుకునే హెల్త్ క్లెయిమ్​ పరిమితిని పెంచే అవకాశాలు ఉన్నాయని ఆర్థికనిపుణులు చెబుతున్నారు. దీంతో అదపన్న పను లాభాలను కల్పించే అవకాశం ఉందని తెలుస్తోంది.

ఇక ఇంటి పైకప్పులపై సోలార్ ప్యానెల్స్ ఏర్పాటు కోసం సూర్యోదయ పథకాన్ని కేంద్రం తీసుకు వచ్చింది. దీనిలో భాగంగా కోటి ఇళ్లకు రూఫ్​టాప్ సోలార్​ ప్యానల్స్ కల్పించాలని లక్ష్యంగా పెట్టుకుంది. ఇప్పటికే దీని కోసం సబ్సిడీలు అందించి సోలార్ ప్యానెల్ ఇన్ స్టాలేషన్ ప్రక్రియను కేంద్రం ప్రోత్సహిస్తోంది. ఈ పథకంలో భాగంగా 10 కిలోవాట్​ కెపాసిటీ ఉన్న సిస్టమ్​లకు ఫేజ్-2 కింద కిలోవాట్​కు రూ.9 వేలు నుంచి రూ.18 వేలు వరకు కేంద్రం సబ్సిడీ రూపంలో అందిస్తోంది. 10 కిలోవాట్​ల కంటే ఎక్కువ ఉన్న సిస్టమ్​లకు రూ.1,17,000 వరకు ఫిక్స్​డ్ సబ్సిడీ అందిస్తోంది. తాజాగా ఈ బడ్జెట్‌లో ఈ సబ్సిడీ మొత్తాన్ని భారీగా పెంచే అవకాశం ఉంది.

జ్ఞానవాపి కేసులో వారణాసి కోర్టు కీలక ఆదేశాలు జారీ చేసింది. జ్ఞానవాపి మసీదు (Gyanvapi mosque)లోని దక్షిణ సెల్లార్‌లో ప్రార్థనలు చేసుకునేందుకు హిందూ పక్షానికి వారణాసి కోర్టు (Varanasi court) అనుమతి ఇచ్చింది. హిందువుల పక్షాన పూజా కార్యక్రమాలు నిర్వహించేందుకు ఏర్పాట్లు చేయాలని వారణాసి జిల్లా మేజిస్ట్రేట్‌ను న్యాయస్థానం ఆదేశించింది.

పూజా కార్యక్రమాలు చేసేందుకు వీలుగా బారికేడ్లను తొలగించాలని అధికారులకు కోర్టు ఆదేశాలు జారీ చేసింది. కాశీ విశ్వనాథ ఆలయం నామినెట్ చేసిన పూజారితో పూజలు చేయించాలని సూచించింది. జ్ఞానవాపి వ్యాసాజీ బేస్‌మెంట్‌లో పూజలు చేసేందుకు అనుమతించాలంటూ దాఖలైన పిటిషన్ పై ఈ రోజు వారణాసి కోర్టులో విచారణ జరిగింది.

పిటిషన్‌ పై ఇరువర్గాల వాదనలను కోర్టు విన్నది. అనంతరం బేస్‌మెంట్‌లో పూజలు చేసేందుకు హిందువులకు అనుమతి ఇచ్చింది. వారం రోజుల్లో పూజ ప్రారంభం అవుతుందని ఈ పిటిషన్ పై హిందువుల తరఫున వాదించిన న్యాయవాది విష్ణు శంకర్ జైన్ వెల్లడించారు. పూజ చేసే హక్కు ప్రతి ఒక్కరికీ ఉందని ఈ సందర్బంగా ఆయన వివరించారు.

మరోవైపు వారణాసి కోర్టు ఇచ్చిన తీర్పును హైకోర్టులో సవాల్ చేస్తామని అంజుమన్ ఇంతేజామియా మసీదు కమిటీ తరఫు న్యాయవాది అఖ్లాక్ అహ్మద్ తెలిపారు. యూపీలో వారణాసిలో గల కాశీ విశ్వనాథ ఆలయ సమీపంలో ఉన్న జ్ఞానవాపి ప్రార్థనా మందిరం విషయంలో యాజమాన్య హక్కుల కోసం చాలా కాలంగా పోరాటం జరుగుతోంది. ఈ క్రమంలో మసీదు ప్రాంగణంలోని దేవతా మూర్తులను దర్శించుకునేందుకు తమకు అవకాశం ఇవ్వాలని కొందరు మహిళలు కోర్టును ఆశ్రయించారు.

ఈ క్రమంలో మసీదు ప్రాంగణంలో శాస్త్రీయ సర్వేకు న్యాయస్థానం ఆదేశాలు జారీ చేసింది. అనంతరం సుప్రీంకోర్టు ఆదేశాల మేరకు సీల్‌ చేసిన వాజూఖానా మినహా మసీదు ప్రాంగణమంతా కార్బన్‌ డేటింగ్‌, ఇతర పద్ధతులతో ఏఎస్ఐ సర్వే నిర్వహించింది.

మద్యం కుంభకోణం కేసు (Delhi liquor policy case)లో ఢిల్లీ ముఖ్యమంత్రి, ఆమ్‌ ఆద్మీ పార్టీ (AAP) అధినేత అరవింద్‌ కేజ్రీవాల్‌ (Arvind Kejriwal)కు ఎన్‌ఫోర్స్‌మెంట్‌ డైరెక్టరేట్‌(Enforcement Directorate) అధికారులు మరోసారి సమన్లు జారీ చేశారు.

ఢిల్లీ ఎక్సైజ్‌ పాలసీ కేసులో కేజ్రీవాల్‌కు ఈడీ అధికారులు ఇప్పటికే నాలుగు సార్లు సమన్లు జారీ చేసిన విషయం తెలిసిందే. అయితే ఆయన ఒక్కసారి కూడా విచారణకు హాజరు కాలేదు. దీంతో తాజాగా ఐదోసారి ఈడీ సమన్లు పంపింది. ఫిబ్రవరి 2న విచారణకు హాజరుకావాలని ఆదేశించింది.

గ‌తంలో న‌వంబ‌ర్ 2, డిసెంబ‌ర్ 21, జనవరి 3న కేజ్రీవాల్‌కు ఈడీ అధికారులు నోటీసులు ఇచ్చిన విషయం తెలిసిందే. ఆ తర్వాత జనవరి 13వ తేదీన నాలుగోసారి విచారణకు హాజరు కావాలని నోటీసులు పంపింది. అయితే, నాలుగు సార్లూ ఈడీ నోటీసులను కేజ్రీవాల్ లెక్కచేయలేదు.

ఈడీ నోటీసులు అక్రమమంటూ కొట్టిపారేశారు. తనను అరెస్ట్‌ చేసే కుట్రలో భాగంగానే నోటీసులు పంపుతున్నారంటూ ఆగ్రహం వ్యక్తం చేశారు. ఈ నేపథ్యంలో తాజాగా మరోసారి ఈడీ నోటీసులు జారీ చేసింది. తాజా నోటీసులపై సీఎం ఇంకా స్పందించలేదు. మరి ఈసారైనా ఆయన హాజరవుతారో లేదో చూడాలి.

కాంగ్రెస్ అగ్రనేత రాహుల్ గాంధీ (Rahul Gandhi) కారుపై దాడి జరిగింది. బెంగాల్‌లో భారత్ జోడో న్యాయ యాత్ర (Bharat Jodo Nyay Yatra) చేస్తుండగా ఆయన కారుపై గుర్తు తెలియని వ్యక్తులు రాళ్ల దాడి చేశారు. కతిహార్‌లోని డీఎస్ కళాశాల సమీపంలో ఈ ఘటన చోటు చేసుకుంది. దాడిలో రాహుల్ గాంధీ కారు వెనుక అద్దం ధ్వంసమైంది. ఈ ఘటనలో రాహుల్ గాంధీకి ఎలాంటి గాయాలు కాలేదని తెలుస్తోంది.

పశ్చిమ బెంగాల్‌లోని మాల్దాలోకి ప్రవేశించగానే రాహుల్ గాంధీ కారుపై రాళ్ల దాడి జరిగిందని కాంగ్రెస్ చెబుతోంది. హరిశ్చంద్రపూర్ ప్రాంతానికి సమీపంలో గుర్తు తెలియని వ్యక్తులు రాహుల్ గాంధీ కాన్వాయ్ పై రాళ్లతో దాడి చేశారని బెంగాల్ కాంగ్రెస్ చీఫ్ అధిర్ రంజన్ చౌదరి వెల్లడించారు. ఈ దాడిలో రాహుల్ గాంధీ వెనుక అద్దం పగిలిందని వివరించారు.

ఇలాంటి దాడులు ఆమోద యోగ్యం కాదని అన్నారు. రాహుల్ గాంధీ భయపడే వ్యక్తి కాదని చెప్పారు. ఈ దాడి వెనుక తృణమూల్ కాంగ్రెస్ హస్తం ఉందని ఆయన ఆరోపించారు. దాడి జరిగినప్పుడు భద్రతా దళాలు పట్టించుకోలేదని పేర్కొన్నారు. అందుకే ఇలాంటి ఘటన జరిగిందని ఆరోపణలు చేశారు. రాహుల్ గాంధీకి ఏదైనా జరిగి ఉంటే పరిస్థితి ఏంటని ఆందోళన వ్యక్తం చేశారు.

మరోవైపు మమతా బెనర్జీ కూడా మాల్దాలోనే ఉండటం గమనార్హం. సీఎం మమతా బెనర్జీ ఈరోజు ‘జోనోసంజోగ్ యాత్ర’ చేస్తున్నారు. యాత్రలో భాగంగా కాంగ్రెస్ పై ఆమె తీవ్ర స్థాయిలో విరుచుకుపడ్డారు. తాను రాజకీయాల కోసం చాలా అరుదుగా వస్తానని అన్నారు. కానీ కొన్ని పార్టీలు ఎన్నికల సమయంలో కోకిలల్లాగా కిలకిలాలు ప్రారంభిస్తాయని ఎద్దేవా చేశారు. బీజేపీతో తమ పోరాటం కొనసాగుతుందని చెబుతాయన్నారు. బీజేపీని ఓడించగలిగిది టీఎంసీ మాత్రమేనన్నారు.

గత పదేండ్లలో భారత్ ఐదవ అతి పెద్ద ఆర్థిక వ్యవస్థగా ఎదగడం చూశామని రాష్ట్రపతి ద్రౌపది ముర్ము (Droupadi Murmu) అన్నారు. అయోధ్యలో రామ మందిరాన్ని (Ram Mandhir) నిర్మించాలనే శతాబ్దాల నాటి ఆకాంక్ష నెరవేరిందని తెలిపారు. దేశంలో మహిళల సాధికారత కోసం ప్రభుత్వం ప్రతి స్థాయిలోనూ పని చేస్తోందని వెల్లడించారు. ప్రపంచం మొత్తం సంక్షోభం ఎదుర్కొంటున్న సమయంలోనూ కేంద్రం ద్రవ్యోల్బణాన్ని అదుపులో ఉంచిందన్నారు.

పార్ల‌మెంట్ బ‌డ్జెట్ స‌మావేశాల నేప‌థ్యంలో పార్లమెంట్ కొత్త భవరనంలో ఉభయసభలను ఉద్దేశించి రాష్ట్రపతి ద్రౌపది ముర్ము ప్రసంగించారు. గత ఏడాది భారత్‌ అద్బుతమైన విజయాలను అందుకుందని తెలిపారు. వేగంగా అభివృద్ధి చెందుతున్న ఆర్థిక వ్యవస్థగా దేశం మారింన్నారు. చంద్రుని దక్షిణ ధృవాన్ని చేరుకున్న మొదటి దేశంగా భారత్ అవతరించిందని గుర్తు చేశారు.

భారత్ నిర్వహించిన జీ20 సమ్మిట్ ప్రపంచంలో భారత్ పాత్రను బలోపేతం చేసిందని వివరించారు. ఆసియా క్రీడల్లో భారత్ 100కు పైగా పతకాలు సాధించిందని పేర్కొన్నారు.. భారత్‌లో అటల్ టన్నెల్ వచ్చిందని అధ్యక్షుడు ముర్ము చెప్పారు. దేశంలో నక్సలైట్ల సంబంధిత సంఘటనలు గణనీయంగా తగ్గాయని వెల్లడించారు. ఎంఎస్ఎంఈలు, చిన్న పారిశ్రామికవేత్తలకు సాధికారత కల్పించేందుకు తమ ప్రభుత్వం పూర్తి నిబద్ధతతో పని చేస్తోందని వివరించారు.

దేశంలో రైతులకు మద్దతు ధర కింద రూ. 18 లక్షల కోట్లను వెచ్చించామన్నారు. అయోధ్య‌లో రామ మందిర నిర్మాణం కోసం ప్రజలంతా కొన్ని శతాబ్దాల పాటు ఎదురు చూశారని తెలిపారు. ఇప్పుడు రామ్‌ల‌ల్లా భవ్యమందిరంలో కొలువు దీరాడని పేర్కొన్నారు. కోట్లాది మంది ప్ర‌జ‌ల ఆశ‌యం దీంతో నెరవేరిందని చెప్పారు. ఆ పండుగ‌ను దేశ ప్ర‌జ‌లు సంబురంగా జ‌రుపుకున్న‌ట్లు వివరించారు.

‘మేక్ ఇన్ ఇండియా’, ‘ఆత్మనిర్భర్ భారత్’ దేశాన్ని శక్తివంతంగా తయారు చేశాయన్నారు. వీటి వల్ల రక్షణ రంగ ఉత్పత్తుల విలువ రూ.లక్ష కోట్ల మార్కును దాటిందని చెప్పారు. చిన్న నాటి నుంచి గ‌రీబీ హ‌టావో అనే నినాదాన్ని వింటున్నామని…. కానీ తొలిసారి విస్తార‌మైన స్థాయిలో పేద‌రిక నిర్మూల‌న జరిగిందని స్పష్టం చేశారు. జ‌మ్మూక‌శ్మీర్‌లో 370 ఆర్టిక‌ల్‌ను ర‌ద్దు చేయ‌డం చారిత్రాత్మక నిర్ణయమని కొనియాడారు. భారత్ 1200 కోట్ల యూపీఐ లావాదేవీలను నమోదు చేసిందని చెప్పారు. భారత్ అంతటా బ్రాడ్‌ బ్యాండ్ ఉపయోగిస్తున్న వారి సంఖ్య 14 శాతం పెరిగిందని చెప్పారు. భారత డిజిటల్ పురోగతి ప్రపంచ దేశాలు ప్రశంసిస్తున్నాయన్నారు.

ఛత్తీస్‌గఢ్‌(Chhattisgarh)లోని బీజాపూర్‌ (Bijapur)లో మావోయిస్టులు, పోలీసుల మధ్య నిన్న జరిగిన ఎదురు కాల్పుల్లో ముగ్గురు జవాన్లు మృతి చెందగా 15మందికి గాయాలైన విషయం తెలిసిందే.

భద్రతా బలగాలు దంతేవాడ-బీజాపూర్(Dantewada-Bijapur border) బార్డర్ గ్రామాల్లో సెర్చ్ ఆపరేషన్ కొనసాగిస్తున్నారు. ఈ క్రమంలో మావోయిస్టులు(Maoists) ఏర్పాటు చేసుకున్న భారీ బంకర్ బుధవారం బయటపడింది.

బీజాపూర్ జిల్లా టెకల్ గూడెం గ్రామ సమీపంలో ఈ సొరంగాన్ని గుర్తించారు. ఇది కిలోమీటర్ పొడవు ఉన్నట్లు అధికారులు అంచనా వేస్తున్నారు. మావోయిస్టులు ఈ సొరంగాన్ని శిక్షణలో భాగంగా ఉపయోగిస్తున్నట్లు పోలీసులు అనుమానం వ్యక్తం చేస్తున్నారు.

డీఆర్జీ బృందం ఈ సొరంగాన్ని కూల్చివేసింది. ఇటీవల టేకలగూడెం దాడి తర్వాత నక్సలైట్లు దాక్కొవడానికి నిర్మించినట్లు దంతేవాడ ఎస్పీ గౌరవ్ రాయ్ వెల్లడించారు.

ఉత్తర కొరియా(North Korea) నిన్న (మంగళవారం) తన పశ్చిమ సముద్రంలోకి అనేక క్రూజ్ క్షిపణులను ప్రయోగించిందని దక్షిణ కొరియా పేర్కొనింది. ఈనెలలో ఈ తరహా క్షిపణులను పరీక్షించడం పది రోజుల వ్యవధిలో ఉత్తర కొరియా మూడో కవ్వింపు చర్యగా చెబుతున్నారు. ఈ నెల 24, 28వ తేదీల్లో జలాంతర్గాముల(Submarines) నుంచి ప్రయోగించగల క్రూజ్ క్షిపణులను ప్రయోగించింది.

ఈ నెల 14న ఘన ఇంధనంతో నడిచే మధ్యశ్రేణి క్షిపణిని సైతం నార్త్ కొరియా పరీక్షించింది. ఉత్తర కొరియా దుందుడుకు చర్యల నేపథ్యంలో అమెరికా, దక్షిణ కొరియా, జపాన్ల త్రివిధ దళాలు సంయుక్త విన్యాసాలు నిర్వహిస్తున్నాయి. ఉత్తర కొరియా తాజా క్షిపణి ప్రయోగాలు పరిస్థితిని మరింత ఉద్రిక్తంగా మార్చింది.

ఈనెల 28న ఉత్తర కొరియా తూర్పు తీరం దిశగా పలు క్రూజ్ క్షిపణులు ప్రయోగించిన సంగతి తెలిసిందే. తమదేశం లోని ప్రధాన సైనిక స్థావరం మీదుగా వెళ్లినట్లు దక్షిణ కొరియా తెలిపింది. అమెరికా నిఘా విభాగం దీన్ని ధ్రువీకరించింది. అయితే ఉత్తర కొరియా ఎన్ని క్షిపణులను ప్రయోగించిందనే సమాచారాన్ని మాత్రం వెల్లడించలేదు.

గత వారం కిమ్‌జోంగ్ ఉన్ ప్రభుత్వం ఒక వ్యూహాత్మక క్రూజ్ క్షిపణిని పరీక్షించింది. దానికి అణ్వాయుధ సామర్థ్యం ఉందని పేర్కొంది. గతవారం తమ సరిహద్దుల్లో అమెరికా, దక్షిణ కొరియా ఉమ్మడి సైనిక విన్యాసాలు నిర్వహించడాన్ని ఉత్తర కొరియా ఖండించింది. వాటికి ప్రతిచర్యలు తీవ్రంగా ఉంటాయని హెచ్చరించింది.

జార్ఖండ్‌లో ఉత్కంఠకు తెర పడింది. గత రెండు రోజులుగా కనిపించకుండా పోయిన సీఎం హేమంత్ సోరెన్ (Hemant Soren)మంగళవారం రాంచీలో ప్రత్యక్షం అయ్యారు. రాంచీలోని తన నివాసంలో జేఎంఎం (JMM) ఎమ్మెల్యేలతో ఆయన సమావేశం నిర్వహించారు. ఆ సమావేశంలో సోరెన్ సతీమణి కల్పనా సోరెన్ కూడా ఉండటం ఆసక్తి రేపుతోంది. రాష్ట్రంలో సీఎం పగ్గాలను కల్పనా సోరెన్ కు అప్పగిస్తారన్న వార్తలో నేపథ్యంలో సమావేశంలో ఆమె పాల్గొనడం ఇప్పుడు ఆసక్తి రేపుతోంది.

మహాత్మా గాంధీ వర్ధంతి సందర్భంగా రాంచీకి చేరుకున్న తర్వాత సీఎం హేమంత్ సోరెన్ బాపూధామ్‌లో మహాత్మ గాంధీ విగ్రహానికి నివాళులర్పించారు. గాంధీ లాంటి అత్యంత గొప్ప వ్యక్తులు మన మధ్యే పుట్టి మనకు మార్గనిర్దేశం చేసినందుకు తాను చాలా గర్వపడుతున్నానని ఈ సందర్బంగా సోరెన్ వెల్లడించారు. అయితే సోమవారం అర్ధరాత్రి హేమంత్‌ సోరెన్ రాంచీలోని తన నివాసానికి చేరుకున్నారని సీఎం కార్యాలయ వర్గాలు వెల్లడించాయి.

అంతకుముందు సీఎం హేమంత్ సోరెన్ మిస్సింగ్ అంటూ వార్తలు వచ్చిన నేపథ్యంలో మాజీ సీఎం, రాష్ట్ర బీజేపీ చీఫ్ బాబూలాల్ మరండి కీలక ట్వీట్ చేశారు. సీఎం హేమంత్ సోరెన్ గురించి ఈడీ వెతుకుతోందని, సీఎం సమాచారం అందించిన వారికి రూ. 11,000 నగదు బహుమతి అందిస్తామని ట్వీట్ చేశారు. సోరెన్​​ అకస్మిక అదృశ్యం కారణంగా రాష్ట్రంలో రాజ్యాంగ సంక్షోభం లాంటి పరిస్థితి ఏర్పడిందని ఆరోపణలు చేశారు.

మరోవైపు సీఎం హేమంత్ సోరెన్ నివాసంలో ఈడీ సోదాల నేపథ్యంలో గవర్నర్ సీపీ రాధాకృష్ణన్ అలర్ట్ అయ్యారు. రాష్ట్రంలో నెలకొన్న పరిస్థితులపై ఉన్నతాధికారులను అడిగి తెలుసుకున్నారు. రాష్ట్రంలో భద్రతా ఏర్పాట్ల గురించి ఈ సందర్బంగా ఆరా తీశారు. శాంతిభద్రతల పరిరక్షణకు పటిష్టమైన ఏర్పాట్లు చేశామని అధికారులు తెలిపారు. మరో 7 వేల మంది పోలీసులను అదనంగా మోహరిస్తున్నామని వెల్లడించారు.

జార్ఖండ్‌లో కీలక పరిణామాలు చోటు చేసుకుంటున్నాయి. రాష్ట్రం సీఎం హేమంత్ సోరెన్ (Hemant Soren) అందుబాటులో లేకపోవడంపై పెద్ద ఎత్తున చర్చ నడుస్తోంది. తాజాగా సోరెన్ మిస్సింగ్ నేపథ్యంలో రాష్ట్రంలో నాయకత్వ మార్పు ఉంటుందని వార్తలు వినిపిస్తున్నాయి. సీఎంగా సోరెన్ భార్య కల్పనా సోరెన్ (Kalpana Soren( అధికార పగ్గాలు చేపడుతారని వార్తలు చెక్కర్లు కొడుతున్నాయి.

ఇప్పటికే సంకీర్ణ కూటమిలోని జేఎంఎం, కాంగ్రెస్, ఆర్జేడీ ఎమ్మెల్యేలంతా రాజధాని రాంచీకి చేరుకోవడం ఆ వార్తలకు బలం చేకూరుస్తోంది. కొన్ని రోజుల పాటు ఎమ్మెల్యేలంతా రాంచీలో అందుబాటులో ఉండాలని హైకమాండ్ నుంచి ఆదేశాలు వచ్చినట్టు రాజకీయ వర్గాల్లో చర్చ నడుస్తోంది. తాజా రాజకీయ పరిణామాలపై ఎమ్మెల్యేలంతా సీఎం నివాసంలో సమావేశం కానున్నట్టు తెలుస్తోంది.

ఈ వార్తల నేపథ్యంలో బీజేపీ ఎంపీ నిషికాంత్ దూబే ట్వీట్ చేశారు. సీఎం హేమంత్ సోరెన్ పరారీలో ఉన్నారని ట్వీట్‌లో ఆరోపించారు. ఎమ్మెల్యేలందరినీ హేమంత్ సోరెన్ రాంచీకి పిలిపించుకున్నారని అన్నారు. హేమంత్ తన సతీమణి కల్పనా సోరెన్​కు సీఎం పగ్గాలు అప్పగించే అవకాశం ఉన్నట్టు తమకు విశ్వసనీయ వర్గాల ద్వారా తెలిసిందన్నారు. ఈడీ విచారణకు సీఎం భయపడుతున్నారని ఆరోపించారు.

రోడ్డు మార్గంలో ఢిల్లీ నుంచి రాంచీకి వస్తానని సోరెన్ జేఎంఎం నేతలకు చెప్పినట్టు తమకు సమాచారం ఉందన్నారు. మరోవైపు సీఎం సోరెన్ కనిపించడం లేదని జార్ఖండ్ మాజీ సీఎం, రాష్ట్ర బీజేపీ చీఫ్ బాబూలాల్ మరాండి ట్వీట్ చేశారు. ఆయన కోసం ఈడీ వేట కొనసాగుతోందన్నారు. ఎవరైనా సీఎం సోరెన్ చూస్తే తమకు సమాచారం అందించాలని కోరారు.

సమాచారం అందించిన వారికి రూ. 11,000 నగదు బహుమతి అందిస్తామని వెల్లడించారు. ఇది ఇలా వుంటే మనీలాండరింగ్ కేసుకు సంబంధించి జార్ఖండ్ సీఎం హేమంత్ సోరెన్ నివాసంలో ఈడీ తనిఖీలు చేపట్టింది. ఆయన నివాసం నుంచి రూ.36 లక్షలు స్వాధీనం చేసుకున్నట్లు ఈడీ వర్గాలు పేర్కొన్నాయి. రెండు కార్లను సైతం సీజ్ చేసినట్లు వెల్లడించాయి.