Politics

తెలంగాణ (Telangana)లో ఊహించని విధంగా అధికారంలోకి వచ్చిన కాంగ్రెస్ (Congress) ప్రస్తుతం రాష్ట్ర పరిస్థితులను చక్కదిద్దే పనిలో పడిందని అంటున్నారు.. ఇందులో భాగంగా సీఎం రేవంత్ రెడ్డి (CM Revanth Reddy) కీలక నిర్ణయాలు తీసుకొంటూ ముందుకు వెళ్తున్నట్లు తెలుస్తోంది. ఇక ఎన్నికల హామీలో నిరుద్యోగులకు ఉద్యోగాల కల్పన విషయంలో కీలక హామీ ఇచ్చిన సీఎం.. ఆ దిశగా అడుగులు వేస్తున్నారు.

ఇప్పటికే వైద్య, ఆరోగ్యశాఖలో తొమ్మిది విభాగాల్లో ఎంపికైన 6,956 మంది స్టాఫ్‌నర్సులకు నియామక పత్రాలను అందించారు. మరోవైపు ఎన్నో రోజులుగా ఎదురుచూస్తున్న కానిస్టేబుల్ పోస్టుల నియామక ప్రక్రియ ఎట్టకేలకు పూర్తయింది. ఈ నేపథ్యంలో నేడు హైదరాబాద్ (Hyderabad) ఎల్బీ స్టేడియంలో జరిగే కార్యక్రమంలో ముఖ్యమంత్రి రేవంత్ రెడ్డి ఎంపిక పత్రాలను అభ్యర్థులకు అందజేయనున్నారు.

ఈ మేరకు హోంశాఖ ఇప్పటికే ఏర్పాట్లు చేసింది. తెలంగాణ రాష్ట్ర స్థాయి పోలీస్ నియామక మండలి.. 2022 ఏప్రిల్లో నోటిఫికేషన్ జారీ చేసింది. గతేడాది అక్టోబరులో తుది జాబితా ప్రకటించింది. కాగా ఇప్పుడు ఎంపికైన అభ్యర్థులకు పత్రాలు అందచేస్తున్నారు. ఇదిలా ఉండగా పోలీస్, ఎక్సైజ్, అగ్నిమాపక, రవాణా, జైళ్ల, స్పెషల్ ప్రొటెక్షన్ ఫోర్స్ విభాగాలకు సంబంధించి 16 వేల 604 పోస్టులకుగాను 12 వేల 866 మంది పురుషులు, 2,884 మంది మహిళ అభ్యర్ధులను ఎంపిక చేసింది. మరోవైపు అర్హులు లేకపోవడంతో మిగిలిన 854 పోస్టులను బ్యాక్‌లాగ్‌గా పరిగణించారు.

ఇక పోలీస్ రవాణా సంస్థలో 100 డ్రైవర్ పోస్టులతో పాటు అగ్నిమాపక శాఖలో 225 డ్రైవర్ ఆపరేటర్ పోస్టులకు సంబంధించి న్యాయస్థానాల్లో ఉన్న వ్యాజ్యాల కారణంగా తుది ఎంపిక ఫలితాలను వెల్లడించలేదు. అయితే ఇంతకాలం న్యాయస్థానాల్లో వ్యాజ్యాల కారణంగా ఆలస్యం నెలకొన్న సంగతి తెలిసిందే.. ప్రస్తుతం అడ్డంకులు తొలిగిపోవడంతో ఎంపిక పత్రాలను అందజేయాలని హోంశాఖ నిర్ణయించింది.

తెలంగాణ (Telangana) అసెంబ్లీ (Assembly) బడ్జెట్ సమావేశాలు (Budget Meetings) వాడిగా వేడిగా కొనసాగుతున్నాయి.. ఈ క్రమంలో బీఆర్ఎస్ ఎమ్మెల్యే కడియం శ్రీహరి (Kadiam Srihari) సీరియస్ అయ్యారు. బడ్జెట్ పై చర్చ జరుగుతున్న సమయంలో సీఎం రేవంత్ రెడ్డి, ఆర్థిక మంత్రి సభలో లేరన్నారు. కీలక సమయంలో ఇద్దరూ లేకపోవడం ప్రభుత్వ తీరు ఎలా ఉందో తెలియచేస్తోందని విమర్శించారు.

కీలక సమావేశాలు జరుగుతున్న సమయంలో ఇలా నిర్లక్ష్యంగా వ్యవహరించడం సరికాదని వెల్లడించారు. సభ నిర్వహణలో ప్రభుత్వానికి తగిన శ్రద్ధ లేదని మండిపడ్డారు. దేశంలో ఆర్థిక అసమానతలు ఉన్నాయని వీటికి కాంగ్రెస్ (Congress) బాధ్యత వహించాలన్నారు.. దేశాన్ని చాలా ఏళ్లు పాలించామని చెప్పుకొంటున్న కాంగ్రెస్.. నేటి పరిస్థితులకు కారణమన్న విషయాన్ని మరచిందని కడియం శ్రీహరి ఆరోపించారు..

మరోవైపు తెలంగాణ ఇచ్చినందుకు సోనియాకు.. కేసీఆర్ కృతజ్ఞతలు తెలిపారని గుర్తు చేసిన కడియం.. మలిదశ ఉద్యమ నాయకులు కేసీఆర్ ను మరిచిపోవడం బాధాకరమని తెలిపారు. తెలంగాణ మలి దశ ఉద్యమం 2001లో చేశారన్నారు. ఆసమయంలో కేంద్రంలో, రాష్ట్రంలో అధికారంలో ఉంది కాంగ్రెస్ ప్రభుత్వాలే అని గుర్తుచేశారు.. కాంగ్రెస్ తెలంగాణకు న్యాయం చేయట్లేదని అందుకే ప్రత్యేక రాష్ట్ర ఉద్యమం వచ్చిందని తెలిపారు.

నియంతృత్వ, నిర్భంధ పోకడలు ఉన్నాయంటున్న వారే.. ఎమర్జెన్సీ విధించిన విషయం మరిచిపోయారా అని కాంగ్రెస్ కు చురకులు అంటించారు. ఇందిరమ్మ రాజ్యంలో దేశ ప్రజలకు ఒరిగిందేమి లేదన్నారు. ఇందిరాగాంధీ మరణం తర్వాత జరిగిన ఎన్నికల్లో కాంగ్రెస్ 404 స్థానాలు గెలుచుకుందని.. ఇప్పుడు ఇందిరమ్మ రాజ్యమని చెప్పినా 40 సీట్లు కూడా ఆ పార్టీకి వచ్చేట్లు లేదని కడియం శ్రీహరి విమర్శించారు.

తెలంగాణ (Telangana) రాజకీయాల్లో కీలక మార్పులు చోటుచేసుకొంటున్నాయని అనుకొంటున్నారు. రాబోయే రోజుల్లో కాంగ్రెస్ (Congress) బలం మరింత పెరగనుందని.. బీఆర్ఎస్ (BRS) తెలంగాణ తెచ్చిన పార్టీగా మాత్రమే ప్రజలకు గుర్తుంటుందని.. అంతకు మించి ఆ పార్టీకి ప్రజల్లో ఎక్కువగా నమ్మకం లేదని విశ్లేషకులు భావిస్తున్నారు. దీనికి కారణం.. బీఆర్ఎస్ పెద్దల స్వయం కృతాపరాధం అని అంటున్నారు. అయితే తెలంగాణ సెంటిమెంటు పేరుతో ఇన్నాళ్లు ఇతర పార్టీలను ఆత్మరక్షణలోకి నెట్టిన బీఆర్ఎస్ నేతలు ఇప్పుడు తామే ఆత్మరక్షణలో పడిపోయినట్లు తెలుస్తోంది.

సెంటిమెంటు ఊపిరితో ఇన్నాళ్లు కళకళలాడిన గులాబీ కండువాలు అసెంబ్లీ ఎన్నికల ఫలితాలతో ఒక్కసారిగా కళావిహీనమైపోయాయి. ఈ ఎన్నికల తర్వాత జరిగిన ఈ పరిణామాల్ని గమనిస్తే ఓ విషయం స్పష్టమౌతుంది. నీతిగా, న్యాయంగా ప్రజలకోసం పోరాడే నేతలకు వారు ఎప్పుడూ జేజేలు పలుకుతారు. కానీ ప్రజల ఆకాంక్షలను, ఆలోచనలను ఏమాత్రం అర్థం చేసుకోకుండా స్వప్రయోజనాల కోసం ప్రజలనే పావులుగా చేసి ఆడుకోవాలని చూస్తే మాత్రం ఓటుతో బుద్ధి చెబుతారన్నది ఈ ఫలితాలు స్పష్టం చేశాయి

అయితే ప్రస్తుతం బీఆర్ఎస్ ఓడిపోయిందంటే అందుకు కారణం ప్రజల్లో తెలంగాణ సెంటిమెంట్ తగ్గిపోయిందని అర్థం కాదు. ఎందుకంటే ప్రత్యేక తెలంగాణ నినాదం అన్నది ఈరోజు పుట్టింది కాదు. రజాకార్ల దౌర్జన్యాలకు తెలంగాణ ప్రజలు కన్నీళ్లు పెట్టిన రోజుల్లోనే ప్రజల్లో ప్రత్యేక తెలంగాణ వాదం మొగ్గతొడిగింది. అందుకే ఆ పేరు చెప్పి ఓట్లడిగిన నేతలందరినీ ఈనాటి వరకు రాష్ట్ర ప్రజలు ఆదరిస్తూనే వచ్చారు.

కానీ సెంటిమెంటును ఆధారం చేసుకొని నేతలు తమ పబ్బం గడుపుకోవాలని ఎప్పుడైతే ఆలోచించారో అప్పుడే ప్రజల్లో మార్పు వచ్చింది. అయితే రాజకీయ నేతలు వెల్లడించినట్టుగా తమ మనసులో మాటను బయటపెట్టకుండా సమయం వచ్చినప్పుడు ఓటు ద్వారా కోలుకోని దెబ్బతీయడం ఓటర్ల అలవాటు. ప్రస్తుతం కాంగ్రెస్ కూడా ఇదే వ్యూహాన్ని అమలుపరించిందని తెలుస్తోంది. బీఆర్ఎస్ అధికారంలో ఉండి చేయలేని పనులు.. తమను గద్దెనెక్కిస్తే చేస్తామని హామీలిచ్చింది. అవినీతిని చూపించి అధికారంలోకి వచ్చింది.

మరోవైపు ఇంకా సెంటిమెంటుని నమ్ముకొన్న కేసీఆర్ (KCR).. అదే స్ట్రాటజీతో కాంగ్రెస్ ను దెబ్బతీయాలనే ఆలోచనలో ఉన్నట్లు తెలుస్తోంది. ఇందుకు ఉదాహరణ.. నిన్న జరిగిన నల్గొండ సభలో మాట్లాడిన తీరు.. పార్టీ ఓటమి చెందిన తర్వాత తొలిసారిగా ప్రజల ముందుకు వచ్చి.. ఏదో నిప్పు పెడదామని ప్రయత్నం చేశారని అంటున్నారు.. మరోవైపు గ్రేటర్ హైదరాబాద్ (Hyderabad) పరిధిలో బీఆర్ఎస్ నేతలు గుడ్ బై చెప్పేందుకు సిద్ధమవుతున్నారు. వరుసగా ఒకరి తర్వాత ఒకరు కాంగ్రెస్ గూటికి చేరేందుకు ఆసక్తి చూపిస్తున్నట్లు టాక్ వినిపిస్తోంది.

అసెంబ్లీ ఎన్నిక‌ల ఫ‌లితాల త‌రువాత కార్పొరేట‌ర్ల‌లో అంత‌ర్మ‌థ‌నం మొద‌లైంది. తాము క‌లిసేందుకు ప్ర‌య‌త్నిస్తున్నా.. కేటీఆర్ క‌నీసం టైమ్ కూడా ఇవ్వ‌డం లేద‌న్న అసంతృప్తితో బీఆర్ఎస్ కార్పొరేట‌ర్లు ఉన్నార‌ు. వీరిని కాంగ్రెస్ వైపు ఆకర్షించేందుకు మాజీ ఎమ్మెల్యే మైనంప‌ల్లి హ‌న్మంత‌రావును కాంగ్రెస్ రంగంలోకి దింపిందనే ప్రచారం జరుగుతోంది. మొత్తానికి పార్ల‌మెంటు ఎన్నిక‌ల్లో ప‌ట్టు పెంచుకోవాల‌నే పట్టుదలతో ఉన్న కాంగ్రెస్ నాయ‌కులు జీహెచ్ఎంసి కౌన్సిల్‌లో బీఆర్ఎస్ ను ఖాళీ చేసి మాన‌సికంగా దెబ్బ‌కొట్టాల‌నే ల‌క్ష్యంతో ఉన్నట్లు తెలుస్తోంది. దీంతో కేటీఆర్ తీరుతో పార్టీ బాలహీనపడుతుండగా.. కాంగ్రెస్ కు బలం పెరుగుతుందని భావిస్తున్నారు..

మరోవైపు కాంగ్రెస్ పార్టీకి మజ్లిస్ అనుబంధంగా మారిపోయిందని తెలుస్తోంది..మేడిగడ్డ సందర్శనకు కాంగ్రెస్ తో పాటు మజ్లిస్ ఎమ్మెల్యేలు కూడా వెళ్లారు. దీంతో తెలంగాణ రాజకీయంలో స్పష్టత వచ్చింది. మజ్లిస్ ఇక ఎంత మాత్రం బీఆర్ఎస్ మిత్రపక్షం కాదని, అందుకే దూరం పాటిస్తోందని తేలిపోయింది. మేడిగడ్డ టూర్ పెట్టుకుంది బీఆర్ఎస్ ..కేసీఆర్ కు వ్యతిరేకంగా . అలాంటి టూర్ కు మజ్లిస్ వెళ్లడం అంటే.. కాంగ్రెస్ వైపు ఉన్నట్లుగా తేల్చడమే అని ఫిక్స్ అవుతున్నారు.. ఈ విషయంలో రేవంత్ రెడ్డి అడ్వాంటేజ్ సాధించినట్లే అని భావిస్తున్నారు.