Politics

అసెంబ్లీ ఎన్నికల సమయంలో బీఆర్ఎస్ (BRS), కాంగ్రెస్ (Congress) మధ్య ఊహించని స్థాయిలో మాటల యుద్ధం జరిగిందన్న సంగతి తెలిసిందే. అయితే త్వరలో లోక్ సభ ఎన్నికలు సమీపిస్తుండటంతో మరో సారి ఈ రెండు పార్టీల మధ్య వార్ మొదలైనట్లు తెలుస్తోంది. ఇప్పటికే ఒకరి మీద ఒకరు ఆరోపణలు, విమర్శలు చేసుకొంటున్నారు. ఈ క్రమంలో బీఆర్‌ఎస్‌ ఎమ్మెల్సీ కవితకి మంత్రి కొండా సురేఖ సవాల్ విసిరారు..

హనుమకొండ (Hanumakonda) జిల్లా గ్రేటర్ వరంగల్ లో పలు అభివృద్ధి పనులపై సమీక్షా సమావేశంలో పాల్గొన్న దేవాదాయ, పర్యావరణ శాఖ మంత్రి కొండా సురేఖ (Konda Surekha).. అనంతరం కవితపై విరుచుకుపడ్డారు.. తాము అధికారంలో ఉన్నప్పుడు చేసిన తప్పులు మరచి.. ప్రజలకు మంచి చేయాలని తాపత్రయ పడుతున్న కాంగ్రెస్ పై విమర్శలు చేయడం తగదని సూచించారు.. ఈ సందర్భంగా మళ్ళీ నిజామాబాద్ లో పోటీ చేసి గెలవాలని సవాల్ విసిరారు.

కవిత (Kavitha) నిన్న ప్రభుత్వం పై చాలా మాటలు మాట్లాడారని, ఇంద్రవెల్లి సభలో ప్రభుత్వం డబ్బులు వినియోగించారాని, మలిదశ ఉద్యమకారులకు ఏం చేస్తారని నోటికి వచ్చినట్టు మాట్లాడారని అన్నారు.. ప్రియాంక గాంధీ తో రెండు గ్యారెంటీలు ఏ విధంగా అమలు చేస్తారని ప్రశ్నించిన కవిత.. నీ అన్న కొడుకు హిమన్ష్ ఏ హోదా తో రాములవారికి పట్టు వస్త్రలు సమర్పించారని సురేఖ ఎదురు ప్రశ్న వేశారు. గతంలో అమెరికాలో అంట్లు తోముకునే మీరు మాట్లాడుతారా? అని ఆగ్రహం వ్యక్తం చేశారు

మరోవైపు లిక్కర్ రాణి నువ్వు మాట్లాడితే ప్రజలు నవ్వుతారంటూ ఎద్దేవా చేసిన మంత్రి.. మమ్ములను విమర్శించే ముందు మీ తప్పులను పరిశీలించు కోవాలని సూచించారు. ఇక జ్యోతి రావు పూలె మీద తొమ్మిదిన్నర సంవత్సరాల నుంచి లేని ప్రేమ ఇప్పుడే వచ్చిందా అని ప్రశ్నించారు. గత ప్రభుత్వ ఎమ్మెల్యే లు కబ్జాలకు, రౌడీయిజంకే పరిమితం అయ్యి.. రాష్ట్ర సొమ్మును అందినకాడికి దోచుకున్నారని ఆరోపించారు..

మరోవైపు ప్రియాంక గాంధీని అడ్డుకుంటామన్న కవితపై మంత్రి సీతక్క తీవ్ర స్థాయిలో ధ్వజమెత్తారు. కవిత ప్రియాంక కాలి గోటికి కూడా సరిపోదని మండిపడ్డారు. ఇంద్రవెల్లి సభ చూసిన బీఆర్ఎస్ నాయకులు ఓర్వలేక అక్కసు వెళ్ల గక్కుతున్నారని విమర్శించారు. ప్రియాంకది త్యాగాల కుటుంబం అయితే.. కవితది అమరుల త్యాగాల మీద రాజభోగాలు అనుభవిస్తున్న కుటుంబమని ధ్వజమెత్తారు.

కాంగ్రెస్ (Congress) ప్రభుత్వాన్ని ఇరుకున పెట్టేలా ఇప్పటికే విమర్శలు చేస్తున్న హరీష్ రావు (Harish Rao).. తాజాగా సంచలన వ్యాఖ్యలు చేశారు.. నేడు భద్రాచలం (Bhadrachalam)లో బీఆర్ఎస్ (BRS) కార్యకర్తలతో నిర్వహించిన పార్లమెంట్ నియోజకవర్గ సమీక్ష సమావేశంలో పాల్గొన్నారు.. అనంతరం మాట్లాడిన ఆయన.. కేసీఆర్ (KCR) ముఖ్యమంత్రి పదవిని రేవంత్ రెడ్డికి పెట్టిన భిక్ష అని షాకిచ్చారు.

తెలంగాణ రాష్ట్రం ఏర్పడకపోతే రేవంత్ రెడ్డి పీసీసీ చీఫ్ అయ్యేవారే కాదని.. పీసీసీ చీఫ్ కాకపోతే ఆయన సీఎం అయ్యేవారే కాదని తెలిపారు. మరోవైపు రాహుల్ గాంధీ ప్రధాని కావాలన్న సీఎం రేవంత్ రెడ్డి వ్యాఖ్యలకు సైతం హరీష్ రావు కౌంటర్ ఇచ్చారు. రేవంత్ రెడ్డి తలకిందులుగా తపస్సు చేసిన, రాహుల్ గాంధీ ప్రధాని కాలేరని జోస్యం చెప్పారు. ప్రస్తుతం కాంగ్రెస్ ఊహల్లో తెలుతుందని.. ఏవేవో ఊహించుకోంటుందని.. వారు ఊహించుకొన్నట్లు ఏం జరగదని అన్నారు.

బీజేపీకి కాంగ్రెస్ పార్టీ ప్రత్యామ్నాయం కాదని.. బీఆర్ఎస్ పార్టీ మాత్రమే బీజేపీని ఢీకొట్టగలదని తెలిపిన హరీష్ రావు.. ఇటీవల జరిగిన అసెంబ్లీ ఎన్నికల్లో తెలంగాణ బీజేపీ కీలక నేతలందరిని ఓడించింది బీఆర్ఎస్ పార్టీ అనే విషయాన్ని గమనించాలని పేర్కొన్నారు. బీజేపీ, కాంగ్రెస్ కుమ్మక్కైయ్యాయని ఆరోపించారు. ఇక గతంలో బీఆర్ఎస్ అప్పులు చేసిందని ఆరోపణలు చేస్తున్న కాంగ్రెస్.. వారు అధికారంలోకి వచ్చి రెండు నెలల కాకముందే రూ.14 వేల కోట్ల అప్పులు చేశారని వెల్లడించారు.

రాష్ట్రంలో కాంగ్రెస్ ను నమ్మే పరిస్థితి లేదని విమర్శించిన హరీష్ రావు.. తెలంగాణవాదం ఢిల్లీలో వినిపించాలంటే పార్లమెంట్‌లో బీఆర్ఎస్ ఎంపీలు ఉండాలని అన్నారు. అందుకే బీఆర్ఎస్‌ను పార్లమెంట్ ఎన్నికల్లో మెజార్టీ సీట్లలో గెలిపించాలని విజ్ఞప్తి చేశారు. ప్రశ్నించే గొంతు లేకుంటే రాష్ట్రం అన్యాయం అవుతుందని తెలిపారు..

సీఎం రేవంత్ రెడ్డి(CM Revanth Reddy)పై మాజీ ఎమ్మెల్యే బాల్క సుమన్(Balka Suman) కీలక వ్యాఖ్యలు చేశారు. శనివారం ఆయన మీడియాతో మాట్లాడుతూ… ఆదివాసీలకు రేవంత్ రెడ్డి క్షమాపణ చెప్పడం కాదు.. సోనియా, రాహుల్ గాంధీ, ఖర్గేలతో చెప్పించాలని డిమాండ్ చేశారు.

కాంగ్రెస్ ప్రభుత్వాన్ని కూలుస్తామని ఎవరూ చెప్పలేదన్నారు. అనవసరంగా రేవంత్ రెడ్డి రెచ్చగొడుతున్నారని బాల్క సుమన్ మండిపడ్డారు. తాము కాంగ్రెస్ ప్రభుత్వం ఐదేళ్లు ఉండాలని కోరుకుంటున్నామని స్పష్టం చేశారు. గౌరవంగా, నిర్మాణాత్మక ప్రతిపక్ష పాత్ర పోషిస్తామని కేసీఆర్ ముందే చెప్పారని గుర్తుచేశారు. అయినా రేవంత్ రెడ్డిలో అభద్రతా భావం పెరిగిపోతోందని అన్నారు.

కాంగ్రెస్ అధిష్టానం నుంచి, సీనియర్ల నుంచి పదవీ గండం ఉందని రేవంత్ భయపడుతున్నారని సెటైర్లు వేశారు. అందుకే అసహనంగా మాట్లాడుతున్నారని అన్నారు. సీఎం భాషను అందరూ అసహ్యించుకుంటున్నారని తెలిపారు. కళ్లుండి చూడలేని కబోది రేవంత్ రెడ్డి అని బాల్క సుమన్ విమర్శించారు. విష జ్వరాలతో బాధపడే ఆదివాసి గూడాలు, తండాల్లో వైద్య సదుపాయాలు కల్పించింది కేసీఆర్ కాదా? అని ఆయన ప్రశ్నించారు.

హడావుడిగా రెండు గ్యారంటీలు అమలు చేసి.. మిగిలినవి మర్చిపోయారని విమర్శించారు. తాము మర్చిపోనివ్వమని.. తప్పకుండా ప్రజాక్షేత్రంలో నిలదీస్తామని బాల్క సుమన్ హెచ్చరించారు. కేసీఆర్‌ను బూతులు తిట్టినంత మాత్రాన రేవంత్ రెడ్డి పెద్దోడు అయిపోడని ఎద్దేవా చేశారు.

పార్లమెంటు ఎన్నికల్లో కాంగ్రెస్‌కు కర్రు కాల్చి వాతపెట్టాలని పార్టీ శ్రేణులకు, రాష్ట్ర ప్రజలకు బాల్క సుమన్ పిలుపునిచ్చారు. ఇంద్రవెల్లిపై కపట ప్రేమ చూపించడం కాదని.. దమ్ముంటే అమరవీరుల కుటుంబాలకు పది లక్షల ఎక్స్‌గ్రేషియా ప్రకటించాలని ఆయన డిమాండ్ చేశారు.

ఇంద్రవెల్లి స్థూపాన్ని తాకే హక్కు సీఎం రేవంత్‌రెడ్డి(CM Revanth Reddy)కి లేదని మాజీ మంత్రి జోగు రామన్న(Ex Minister Jogu Ramanna) ధ్వజమెత్తారు. ఆయన శనివారం మీడియాతో మాట్లాడుతూ.. ఇంద్రవెల్లి సభలో సీఎం చేసిన వ్యాఖ్యలను ఖండించారు. కేసీఆర్ కుటుంబంపై ఇష్టానుసారం మాట్లాడితే సహించేది లేదని హెచ్చరించారు.

నాగోబా ఆలయానికి కేసీఆర్ నిధులు ఇస్తే రేవంత్ ప్రారంభోత్సవాలు చేశారని అసహనం వ్యక్తం చేశారు. కాంగ్రెస్ పార్టీ ఇంద్రవెల్లిలో వందలాది మంది ఆదివాసీలను పొట్టన బెట్టుకుందని జోగు రామన్న ఆరోపించారు. సీఎం క్షమాపణ చెబితే సరిపోతుందా? అని ప్రశ్నించారు. ప్రజా సంఘాల ఒత్తిడితో ఆ స్థూపం మళ్లీ నిర్మితమైందని గుర్తుచేశారు. కేసీఆర్ సీఎం అయ్యాకే స్థూపం దగ్గరకు వెళ్లే స్వేచ్ఛ దొరికిందని తెలిపారు.

శుక్రవారం ఐదు జిల్లాల పోలీసుల పహారాలో ఇంద్రవెల్లి సభ జరిగిందన్నారు. కాంగ్రెస్‌కు అధ్యక్షుడిగా ఉన్నప్పుడు ఏం మాట్లాడారో అవే మాటలను రేవంత్‌ మాట్లాడారని ఎద్దేవా చేశారు. నాలుగు కోట్ల తెలంగాణ ప్రజలను రేవంత్ రెడ్డి అవమాన పరిచారని ఆగ్రహం వ్యక్తం చేశారు. ఆదిలాబాద్‌కు కేసీఆర్ హయాంలోనే నిధులొచ్చాయని గుర్తుచేశారు. 220కి పైగా తండాలు, గూడాలు, గ్రామ పంచాయతీలు అయ్యాయని తెలిపారు.

50ఏళ్లలో కాంగ్రెస్ పార్టీ ఏనాడు ఆదిలాబాద్ జిల్లాను పట్టించుకోలేదని జోగు రామయ్య అన్నారు. రాష్ట్రాన్ని, దేశాన్ని నాశనం చేసింది కాంగ్రెస్ పార్టీనే అని ఆవేదన చెందారు. సీఎం హోదాలో ఉన్న రేవంత్‌రెడ్డి వివరాలు తెప్పించుకుని వాస్తవాలు మాట్లాడాలని హితవు పలికారు. బ్రోకర్ దందాలు చేసి రేవంత్ సీఎం కావడం ప్రజలు దురదృష్టం అని ఘాటు వ్యాఖ్యలు చేశారు.