Politics

వరల్డ్ ఎకనామిక్ ఫోరం సదస్సు కోసం దావోస్ (Davos) వెళ్లిన సీఎం రేవంత్ రెడ్డి (CM Revanth Reddy) బృందం విజయవంతంగా పర్యటనను ముగించుకొంది. రేవంత్ రెడ్డి, మంత్రి శ్రీధర్ బాబు, ఇతర అధికారులు మూడు రోజుల్లో 200లకుపైగా ప్రముఖ వ్యాపార సంస్థలు, నాయకులను కలుసుకొన్నట్లు సీఎంవో కార్యాలయం ప్రకటించింది. ఈ పర్యటన వల్ల రాష్ట్రానికి రూ.40,232 కోట్ల పెట్టుబడులు వచ్చాయని ప్రకటించింది. గతేడాదితో పోలిస్తే దాదాపు రెట్టింపు పెట్టుబడులు వచ్చాయని పేర్కొంది.

అయితే సీఎం రేవంత్ రెడ్డి దావోస్ పర్యటన వల్ల రికార్డు స్థాయిలో పెట్టుబడులు రావడంతో కేసీఆర్ (KCR), కేటీఆర్ (KTR)లపై తీవ్ర విమర్శలు వస్తున్నాయి. ఈ క్రమంలో సోషల్ మీడియాలో కేటీఆర్ పై కేసీఆర్ సీరియస్ అయినట్టు ఉన్న ఒక వీడియో వైరల్ గా మారింది. 7జీ బృందావన కాలనీ సినిమాలో తండ్రి కొడుకును కొడుతున్న వీడియోకి కేసీఆర్, కేటీఆర్, కవిత పేర్లు జత చేశారు.

రాష్ట్రం ఏర్పడినప్పటి నుంచి ఇదే అత్యధిక పెట్టుబడులు అని ఉన్న పేపర్ క్లిప్పింగ్ దానిపై ఉంచారు. ఇందులో కేసీఆర్ తలబాదుకుంటూ వెళ్లి కేటీఆర్ ను కొడుతున్నట్లుగా, అది చూసి కవిత ఏడుస్తున్నట్లుగా ఉన్న వీడియోను సోషల్ మీడియాలో వైరల్ చేశారు.. ఈ వీడియో చూసిన నెటిజన్స్ రకరకాల కామెంట్స్ పెడుతోన్నారు.

మరోవైపు విదేశీ పర్యటనలకు వెళ్ళి కేటీఆర్ జల్సాలు చేసి వచ్చేటోడు.. రేవంత్ రెడ్డి పెట్టుబడులతో వస్తుండు అని, ప్రస్తుతం కేటీఆర్ ఇంట్లో ఇదే పరిస్థితి కావొచ్చు అని నెటిజన్స్ పలు రకాల కామెంట్లు పెడుతున్నారు. ప్రస్తుతం ఈ వీడియో నెట్టింట వైరల్ గా మారగా.. బీఆర్ఎస్ అభిమానులకు బాధగా.. కాంగ్రెస్ సానుభూతి పరులకు ఆనందంగా ఉందంటున్నారు..

మాజీమంత్రి హరీశ్​రావు (Harish rao) కాంగ్రెస్ (Congress) ప్రభుత్వంపై కీలక వ్యాఖ్యలు చేశారు.. రాష్ట్ర పరిపాలనపై దృష్టి సారించక బీఆర్​ఎస్​ (BRS)పై బురద జల్లే ప్రయత్నం చేస్తోందని ఆరోపించారు. కృష్ణా జలాల విషయంలో ఏమాత్రం అలసత్వం వహించినా భవిష్యత్ తరాలకు గొడ్డలి పెట్టు అవుతుందని పేర్కొన్నారు. రాష్ట్ర హక్కులను కేంద్రం చేతిలో పెడితే అడుక్కోవాల్సి వస్తుందని ఆందోళన వ్యక్తం చేశారు.

ఉమ్మడి ప్రాజెక్టులను కృష్ణా బోర్డుకు (KRMB) అప్పజెప్తే తెలంగాణకు తీవ్ర అన్యాయం జరుగుతుందని.. కాబట్టి ఈ అంశంపై దృష్టి పెట్టి భవిష్యత్ తరాలకు ఇబ్బంది కాకుండా చూసే బాధ్యత రాష్ట్ర ప్రభుత్వంకు ఉందని సూచించారు. ఉమ్మడి ప్రాజెక్ట్ లు KRMB కి అప్పజెప్పడనికి తెలంగాణ సర్కార్ ఒప్పుకుందని మండిపడ్డారు. 2021 జులైలో నోటిఫికేషన్ వస్తే కేసీఆర్ (KCR) ప్రభుత్వం తీవ్రంగా వ్యతిరేకించిందని తెలిపారు.

కేంద్రం ఎంత ఒత్తిడి తెచ్చినప్పటికీ బీఆర్​ఎస్​ ప్రభుత్వం ఏకపక్షంగా అప్పగించలేమని స్పష్టం చేసినట్టు హరీశ్​రావు పేర్కొన్నారు.. కృష్ణా జలాల్లో తెలంగాణకు సగం వాటా ఇవ్వాలని, ముందు ఆపరేషన్ మ్యానువల్ ఖరారు చేయాలని కోరినట్లు చెప్పారు. ఏకపక్షంగా నోటిఫై చేశారని, అపెక్స్ కమిటీకి నివేదించాలని కేసీఆర్ ప్రభుత్వం స్పష్టంగా చెప్పినట్లు హరీశ్​రావు పేర్కొన్నారు.

వారం రోజుల్లో ప్రాజెక్టులను అప్పగిస్తామని అంటున్నారని, జాతీయ హోదా తీసుకొస్తామని చెప్పి ఉన్న ప్రాజెక్టులను అప్పగిస్తున్నారని హరీశ్​రావు ఆరోపించారు. ఇదే జరిగితే హైదరాబాద్, ఇతర జిల్లాలకు తాగునీటి సమస్యలు వస్తాయని, పాలమూరు రంగారెడ్డి సహా ఆన్ గోయింగ్ ప్రాజెక్టులు ప్రశ్నార్థకం అవుతాయని హరీశ్​రావు తెలిపారు.

నాడు ఏడు మండలాలు, లోయర్ సీలేరు విద్యుత్ ఉత్పత్తి కేంద్రం విషయంలో బీజేపీ, కాంగ్రెస్ తెలంగాణకు తీవ్ర అన్యాయం చేశాయన్నారు. పోతిరెడ్డిపాడు ద్వారా ఎక్కువ నీరు తీసుకుపోతే సాగర్ ఆయకట్టు, ఎడమ కాల్వకు నీరు ఉండదని, రాష్ట్ర ప్రభుత్వం వెంటనే మేల్కొని రాష్ట్ర హక్కులు, ప్రయోజనాలు కాపాడాలని హరీశ్​రావు డిమాండ్ చేశారు..

పార్లమెంటు ఎన్నికలే (Parliament Elections) లక్ష్యంగా బీఆర్ఎస్ (BRS) ముందుకు వెళ్తుంది. ఎంపీ ఎన్నికల్లో ఎలాగైనా గెలిచి.. పరువు నిలబెట్టుకోవాలనే తాపత్రయంలో ఉన్న కేటీఆర్.. కాంగ్రెస్ ప్రభుత్వం పై గట్టిగానే ఫోకస్ చేసినట్టు ప్రచారం జరుగుతోంది. ఈ క్రమంలో నేడు మెదక్ పార్లమెంట్ నియోజకవర్గ స్థాయి సమావేశాన్ని తెలంగాణ భవన్‌లో నిర్వహించారు. ఈ సమావేశంలో పాల్గొన్న కేటీఆర్.. కాంగ్రెస్ పై మండిపడ్డారు..

ప్రియాంక గాంధీ నిరుద్యోగ భృతి ఇస్తామని చెబితే, డిప్యూటీ సీఎం తమ మేనిఫెస్టోలో ఈ అంశం లేదని చెప్పడం హాస్యాస్పదంగా ఉందని ఎద్దేవా చేశారు. అసెంబ్లీ సాక్షిగా డిప్యూటీ సీఎం అబద్ధం చెప్పారని కేటీఆర్ (KTR) సీరియస్ అయ్యారు. కాంగ్రెస్ నేతలు అసెంబ్లీలో చెప్పేవి అబద్ధాలని రుజువు చేసేందుకు స్వేదపత్రం విడుదల చేశామని గుర్తుచేశారు. కాంగ్రెస్ (Congress) ఇచ్చింది ఆరు గ్యారంటీలు కాదని అన్నారు..

అధికారంలోకి రావాలనే ఆత్రంలో మొత్తం 420 హామీలు ఇచ్చారని ఎద్దేవా చేశారు. దీనిని ఎండగట్టే బాధ్యత మనందరి మీద ఉందని పేర్కొన్నారు. కాంగ్రెస్ ప్రభుత్వం అధికారంలోకి వచ్చాక డిసెంబర్ 9 నాడు రుణమాఫీ చేస్తా, 2 లక్షల రుణం తెచ్చుకోండి అని రేవంత్ మాట్లాడిన మాటలను కేటీఆర్ గుర్తుచేశారు. ఒక పక్క రాహుల్ గాంధీ, అదానీని విమర్శిస్తుంటే.. అదే రోజు అదానీతో.. రేవంత్ రెడ్డి భేటీ కావడం ఆశ్చర్యం కలిగిస్తోందని విమర్శించారు.

నోటికి ఎంత వస్తే అంత మాట్లాడుతూ ప్రజలను గందరగోళానికి గురిచేస్తున్నారని ఆరోపణలు చేసిన కేటీఆర్.. కాంగ్రెస్ అధికారింలోకి వచ్చిన నెలరోజుల్లోనే తెలంగాణ అదానీ చేతుల్లోకి వెళ్లిందని ఆరోపించారు.. కేసీఆర్, హరీష్ రావు నాయకత్వంలో క్రియాశీలకంగా పని చేసి వచ్చే ఎంపీ ఎన్నికల్లో అత్యధిక మెజార్టీ సాధించాలని కార్యకర్తలకు పిలుపునిచ్చారు. ఈసారి కూడా మెదక్‌లో బీఆర్ఎస్ జెండా ఎగరబోతోందని ధీమా వ్యక్తం చేశారు..

కాంగ్రెస్ (Congress) ప్రభుత్వం అధికారంలోకి వచ్చాక ఇచ్చిన హామీలలో రెండు అమలు చేస్తున్నారు.. ఇంకా నాలుగు హామీల అమలుపై ప్రతిపక్షాలు అనుమానాలను లేవనెత్తుతోన్నారు. కాగా ఈ అంశంపై మంత్రి జూపల్లి కృష్ణారావు (Jupalli Krishna Rao) క్లారిటీ ఇచ్చారు.. మరోవైపు ముఖ్యమంత్రి రేవంత్ రెడ్డి (CM Revanth Reddy), అదానీని కలవడంపై సోషల్ మీడియాలో ట్రోలింగ్ జరుగుతోంది.

దీనిపై కూడా స్పందించిన మంత్రి.. రాష్ట్రానికి పెట్టుబడులు తీసుకురావడంలో భాగంగా ముఖ్యమంత్రి అదానీని కలినట్టు తెలిపారు.. నేడు మీడియా సమావేశంలో పాల్గొన్న జూపల్లి.. ప్రజల్లో తిరుగుబాటు వచ్చే బీఆర్ఎస్‌ను తరిమి కొట్టారని పేర్కొన్నారు. బీఆర్ఎస్ (BRS) 2018 అసెంబ్లీ ఎన్నికల సమయంలో అనేక హామీలు ఇచ్చిందని.. అందులో ఒక్కటి కూడా పూర్తిగా అమలుకు నోచుకోలేదని అన్నారు..

గతంలో ప్రతిపక్షాలు బీఆర్ఎస్‌ను, ప్రత్యేక తెలంగాణ వచ్చిన రెండేళ్ల తర్వాత విమర్శిస్తే.. రెండేళ్ల పసికందును విమర్శిస్తారా? అని వాపోయినట్లు గుర్తుచేశారు. ప్రస్తుతం గులాబీ నేతలు చేస్తున్న విమర్శలు చూస్తుంటే.. అందితే జుట్టు లేకుంటే కాళ్ళు అన్నట్టు ఉందని మండిపడ్డారు.. ప్రజలకు ఇచ్చిన హామీలను అమలు చేయడంలో నిర్లక్ష్యం వహించిన బీఆర్ఎస్‌కు ప్రజలు గడ్డి పెట్టారని ఎద్దేవా చేశారు.. ప్రస్తుతం కాంగ్రెస్‌ అధికారంలోకి రావడాన్ని జీర్ణించుకోలేక రెండు నెలలకే విమర్శలు ప్రారంభించారని జూపల్లి ఆగ్రహించారు.

2014లో ప్రజలు కేసీఆర్ చేతిలో బంగారు పళ్లాన్ని పెడితే.. తొమ్మిదేళ్లలో రూ.7 లక్షల కోట్ల అప్పు చేసి కామ్ గా ఉన్నారని తెలిపారు.. కేసీఆర్ పుణ్యమా అని ఇవాళ రూ.40 వేల కోట్లు వడ్డీకే పోతోందని వ్యాఖ్యానించారు. ఇచ్చిన ఆరు గ్యారంటీల్లో అధికారంలోకి వచ్చిన రెండ్రోజుల్లోనే రెండు అమలు చేశామని.. మిగతా నాలుగు గ్యారంటీల అమలు కోసమే ప్రజాపాలన పేరుతో దరఖాస్తులు స్వీకరించామని జూపల్లి కృష్ణారావు వివరించారు.