Politics

– ఆరు గ్యారెంటీల అమలే లక్ష్యంగా ప్రజా పాలన
– అర్హులైన ప్రజలకు ప్రభుత్వ పథకాలు అందుతాయి
– ప్రజల స్థితిగతులు తెలుసుకునేందుకు ప్రజా పాలన
– ఏ ఒక్క దరఖాస్తు తిరస్కరించవద్దు
– అధికారులకు మంత్రి ఉత్తమ్ ఆదేశం

కాంగ్రెస్ ప్రకటించిన ఆరు గ్యారెంటీలను అమలు చేయాలన్న లక్ష్యంతోనే ప్రజా పాలన కార్యక్రమాన్ని చేపడుతున్నట్టు పౌరసరఫరాల శాఖ మంత్రి ఉత్తమ్ కుమార్ రెడ్డి వెల్లడించారు. కొత్త రేషన్ కార్డులపై త్వరలోనే నిర్ణయం తీసుకుంటామని తెలిపారు. ప్రజా పాలన కింద జనవరి 6 వరకు అభయ హస్తం పేరిట దరఖాస్తులు స్వీకరిస్తామని చెప్పారు. దీనిపై అధికారులకు అవగాహనా కార్యక్రమాన్ని కరీంనగర్ కలెక్టరేట్‌ లో నిర్వహించారు. దీనికి మంత్రి ఉత్తమ్ కుమార్ రెడ్డి సహా మంత్రులు శ్రీధర్ బాబు, పొన్నం ప్రభాకర్ హాజరయ్యారు.

ఈ సందర్భంగా ఉత్తమ్ మాట్లాడుతూ.. ప్రజా పాలన కార్యక్రమంలో ప్రజలకు ఎలాంటి ఇబ్బందులు తలెత్తకుండా చర్యలు తీసుకోవాలని ఆదేశించారు. ఆరు గ్యారెంటీలను ప్రజల్లోకి తీసుకుపోయి, ఒక చరిత్రాత్మక ఆదేశాలను ఇచ్చామన్నారు. ఈ గ్యారెంటీలన్నింటినీ వంద రోజుల వ్యవధిలో అమలు చేయబోతున్నామని వివరించారు.

ప్రతి విషయంలోనూ పారదర్శకంగా ఉండాలని, అవినీతికి తావు లేకుండా పథకాల అమలు జరగాలని ఆదేశాలు జారీ చేశారు. ప్రజలకు  అధికారులు 24 గంటలు అందుబాటులో ఉండాలని సూచించారు. అధికారులు ఎవరి స్థాయిలో వారు చొరవ తీసుకుని కార్యక్రమాన్ని దిగ్విజయంగా జరిగేలా పని చేయాలని సూచించారు. ఇటీవల తాను పలు రేషన్ షాపులను తనిఖీ చేశానన్నారు ఉత్తమ్.

బియ్యం రీసైక్లింగ్‌ జరుగుతున్న విషయం తన దృష్టికి వచ్చిందని తెలిపారు. రేషన్ బియ్యాన్ని ఎవరైనా రీసైక్లింగ్ చేసే ప్రయత్నం చేస్తే వారిపై కఠిన చర్యలు తీసుకుంటామని హెచ్చరించారు. ఉమ్మడి కరీంనగర్ జిల్లాలో ఎత్తిపోతల పథకాలపై దృష్టి సారిస్తామన్నారు. మేడిగడ్డ బ్యారేజీ పరిశీలనకు ఈ నెల 29న వెళ్తున్నట్లు చెప్పారు.

– రాష్ట్ర నిధులపై కేంద్రాన్ని ఎన్నోసార్లు అడిగాం
– ఒక్క రూపాయి ఇచ్చింది లేదు
– విభజన హామీలను నెరవేర్చాలని కోరాం
– అమలు చేసింది లేదు
– రాష్ట్ర హక్కుల విషయంలో..
– కేంద్రం దగ్గర బీఆర్ఎస్ రాజీ పడింది లేదు
– మోడీ, రేవంత్ భేటీపై వినోద్ కుమార్ రియాక్షన్

తెలంగాణ వచ్చిన తర్వాత విభజన చట్టంలో పేర్కొన్న నిధుల విషయంలో ప్రధాని మోడీని కేసీఆర్ చాలా సార్లు కలిశారని మాజీ ఎంపీ బోయినపల్లి వినోద్ కుమార్ తెలిపారు. కలిసిన ప్రతిసారి నిధుల గురించి చూస్తామని మోడీ అన్నారని చెప్పారు. కానీ, ఒక్క రూపాయి ఇవ్వలేదని విమర్శలు గుప్పించారు. ప్రమాణ స్వీకారం చేసిన తర్వాత తొలిసారి ప్రధాని మోడీని రేవంత్ రెడ్డి కలవడాన్ని ఆయన స్వాగతించారు.

గతంలో విభజన చట్టంలో ముఖ్యంగా రహదారులకు సంబంధించి బీఆర్ఎస్ ప్రభుత్వం ఎన్నో సార్లు విజ్ఞప్తి చేసిందన్నారు. కానీ, ఒక్క హామీని కూడా కేంద్రం నెరవేర్చలేదని మండిపడ్డారు. తాము అధికారంలో ఉన్నప్పుడు రాసిన లేఖలనే మరోసారి కాంగ్రెస్ పార్టీ మోడీకి అందజేసిందని చెప్పారు. తెలంగాణకు రావాల్సిన రహదారుల గురించి పార్లమెంట్‌ లో చాలా సార్లు మాట్లాడామని తెలిపారు. సైనిక్ స్కూల్ కోసం ఇప్పుడు మనం కొత్తగా అడగవల్సిన అవసరం లేదన్నారు వినోద్ కుమార్. కాజీపేటలో రైల్వే కోచ్ ఫ్యాక్టరీ కోసం కొట్లాట చెయ్యాల్సిన అవసరం ఉందన్నారు.

బయ్యారం ఉక్కు తెలంగాణ హక్కు అని నినాదం ఇచ్చిందే బీఆర్ఎస్ అని గుర్తు చేశారు. ఇవాళ తెలంగాణకు రావాల్సిన హక్కుల కోసం కాంగ్రెస్ కొట్లాట చెయ్యాల్సిన అవసరం ఉందన్నారు. 2014 వరకు కాంగ్రెస్ అధికారంలో ఉన్నప్పుడు ఏపీకి ఎయిమ్స్ ఇచ్చినప్పుడు ఒక్కరు కూడా మాట్లాడలేదని.. ఇవాళ బీబీనగర్‌ లో ఎయిమ్స్ వచ్చిందంటే దానికి కారణం బీఆర్ఎస్ అని స్పష్టం చేశారు.

వరంగల్‌ లో భూ సేకరణ చేశామని.. ఒక్క రూపాయి కూడా కేంద్రం ఇవ్వదని మొత్తం మీరే చూసుకోవాలని చెప్పిందన్నారు. రాష్ట్రానికి సంబంధించిన హక్కుల కోసం ఎన్నడూ కేంద్రం దగ్గర బీఆర్ఎస్ రాజీ పడలేదని తెలిపారు. కానీ, కాంగ్రెస్ మాత్రం నవోదయ విద్యాలయం కావాలని మోడీని అడగలేదన్నారు. తాము అధికారంలో ఉన్న సమయంలో సైనిక్ స్కూల్‌ ను అడిగామని.. బుల్లెట్ ట్రైన్లు అన్ని ఉత్తరాది రాష్ట్రాలకు ఇచ్చారన్నారు.

హైదరాబాద్, విజయవాడ, మద్రాస్ వరకు బుల్లెట్ ట్రైన్ కావాలని అడిగామని.. కాంగ్రెస్ మాత్రం ఆ విషయాన్ని ప్రస్తావించలేదని తెలిపారు. విభజన చట్టంలో చెప్పిన వాటికోసం ప్రతి సారి బీఆర్ఎస్ పార్టీ పోరాటం చేసిందన్నారు. మోడీకి కేసీఆర్ వందల లేఖలు రాశారని, కానీ వాటిని ప్రధాని పట్టించుకోలేదని వివరించారు. అందుకే, తాము అప్పటి నుంచి ప్రధానిని కలువలేదన్నారు వినోద్.

– స్వేద పత్రం కాదు.. సౌధ పత్రం రిలీజ్ చేయండి
– మీ ఆస్తులన్నీ బయటపెట్టండి
– ఎన్ని బంగ్లాలు కట్టారు..
– ఎన్ని ఫాంహౌస్‌ లు కట్టారు..
– వందల కోట్లు ఎలా దోచుకున్నారో చెప్పండి
– కేసీఆర్ కుటుంబంపై మంత్రి పొన్నం ఫైర్
– ఉద్యోగులు, పెన్షనర్లకు గుడ్‌ న్యూస్
– జీతాలపై కీలక ప్రకటన

బీఆర్ఎస్ స్వేద పత్రంపై మంత్రి పొన్నం ప్రభాకర్ మండిపడ్డారు. సిద్దిపేట జిల్లా హుస్నాబాద్ నియోజకవర్గ కేంద్రంలో కాంగ్రెస్ కార్యకర్తలతో సమావేశమైన ఆయన.. ప్రజా పాలనపై దిశానిర్దేశం చేశారు. ఈ సందర్భంగా మాట్లాడుతూ.. ఆరు గ్యారెంటీలను ప్రతి కుటుంబానికి అందేలా దరఖాస్తు ఫారాలను ప్రభుత్వమే అందిస్తుందన్నారు.

తెలంగాణ అప్పులపై స్వేద పత్రం విడుదల చేసిన బీఆర్ఎస్ నాయకులు, ముందు కల్వకుంట్ల కుటుంబ ఆస్తులపై సౌధ పత్రం విడుదల చేయాలన్నారు. ప్రభుత్వ ఉద్యోగులకు, పెన్షన్ దారులకు ప్రతి నెలా ఒకటవ తేదీ నుంచి ఐదో తేదీ లోపు జీతాలు అందే విధంగా ప్రభుత్వం చర్యలు తీసుకోబోతుందని చెప్పారు.

జనవరి 6వ తేదీ వరకు జరిగే ప్రజా పాలనను విజయవంతం చేయాలని కోరారు. అనంతరం కరీంనగర్ జిల్లా తిమ్మాపూర్ మండలం ఆలుగునూర్ లోని శ్రీ రాజరాజేశ్వరి దేవి ఆలయంలో మంత్రి ప్రత్యేక పూజలు చేశారు. ప్రతీ కుటుంబానికి ఆరు హామీలు వచ్చేలా ప్రభుత్వం దరఖాస్తు ఫారాలను అందిస్తుందని తెలిపారు.

తెలంగాణ ప్రభుత్వం అభయహస్తం పబ్లిక్ గవర్నెన్స్ అప్లికేషన్ పేరుతో దరఖాస్తు ఫారం సిద్ధం చేసింది. అయితే.. ఒక్కో పథకానికి ప్రత్యేకంగా దరఖాస్తు చేయాల్సిన అవసరం లేకుండా.. అందరికీ ఒకే దరఖాస్తును అందిస్తోంది. ఈ ప్రజా పాలన కార్యక్రమంలో భాగంగా పది రోజుల పాటు గ్రామ సభలు నిర్వహించి ప్రజల నుంచి నేరుగా అధికారులు దరఖాస్తులు తీసుకోనున్నారు.