Politics

తెలంగాణ(Telangana) ప్రజలకు ఎన్నికల్లో ఇచ్చిన హామీలను అమలు చేసేందుకు కాంగ్రెస్ ప్రభుత్వం(Congress Government) కసరత్తు చేస్తోంది. ఆరు గ్యారంటీ పథకాల అమలుకు లబ్ధిదారులను ఎంపిక చేసేందుకు సరికొత్త కార్యక్రమానికి శ్రీకారం చుట్టింది. ఈనెల 28వ తేదీ నుంచి జనవరి 6వ తేదీ వరకు ప్రజాపరిపాలన నిర్వహించాలని నిర్ణయించిన విషయం తెలిసిందే.

ఈ మేరకు ప్రభుత్వం అధికారులను సమాయత్తం చేసింది. దరఖాస్తుల స్వీకరణకు ప్రత్యేకాధికారులను నియమించింది. ఈ ప్రజాపరిపాలన కార్యక్రమంలో భాగంగా పదిరోజుల పాటు గ్రామసభలు నిర్వహించి ప్రజల నుంచి నేరుగా అధికారులు దరఖాస్తులు తీసుకోనున్నారు. తాజాగా, ప్రభుత్వం అభయహస్తం పబ్లిక్ గవర్నెన్స్ అప్లికేషన్ పేరుతో దరఖాస్తు ఫారాన్ని విడుదల చేసింది. ఒక్కో పథకానికి ప్రత్యేకంగా దరఖాస్తు చేయాల్సిన అవసరం లేకుండా.. అందరికీ ఒకే దరఖాస్తును సిద్ధం చేసింది.

ముందుగా కుటుంబ వివరాలను పూరించాలి. ఇందులో కుటుంబ వివరాల్లో.. కుటుంబ యజమాని పేరుతో ప్రారంభించి.. పుట్టిన తేదీ, ఆధార్ కార్డు నంబర్, రేషన్ కార్డు నంబర్, మొబైల్ నంబర్, వృత్తి, కులంతోపాటు కుటుంబ సభ్యుల వివరాలను కూడా నింపాల్సి ఉంటుంది. ఆ తర్వాత మహాలక్ష్మి పథకం, రైతు భరోసా, ఇందిరమ్మ ఇండ్లు, గృహజ్యోతి, చేనేత పథకాలకు సంబంధించిన వివరాలను వరుసగా నమోదు చేయాలి. ఏదైనా పథకానికి దరఖాస్తు చేసుకోవాలంటే ఆ పథకం కింద అడిగిన వివరాలను నమోదు చేయాలి.

ఉదాహరణకు మహాలక్ష్మి పథకం కింద ఆర్థిక సాయం పొందాలంటే సంబంధిత బాక్సులో టిక్ మార్క్ వేయాలి. రూ.500 సబ్సిడీ గ్యాస్ సిలిండర్ పొందాలనుకునే వారు గ్యాస్ కనెక్షన్ నంబర్, ఏజెన్సీ పేరు, ఏడాదికి ఉపయోగించే సిలిండర్ల సంఖ్యను నమోదు చేయాలి. అలా రైతు భరోసా, గృహజ్యోతి, చేనేత పథకం, ఇతర పథకాలకు చెందిన బాక్సుల్లో సంబంధిత వివరాలను రాయాలి.

ఈ దరఖాస్తుకు ఆధార్ కార్డు జిరాక్స్‌తో పాటు తెల్ల రేషన్‌కార్డు జిరాక్స్‌ను జతచేయాలి. నింపిన దరఖాస్తును గ్రామసభలో అధికారికి ఇచ్చి.. వారు అడిగిన వివరాలు చెబితే.. దరఖాస్తుదారు ఏ పథకానికి అర్హులో పరిశీలించి నిర్ణయిస్తారు. అందుకే.. దరఖాస్తు చివర రసీదులో నమోదు చేసి.. సంతకం చేసి ప్రభుత్వ ముద్ర ఇచ్చారని దీనిని గమనించాలని కోరారు. టిక్ మార్కులు కొట్టివేయకుండా ఒకటికి రెండు సార్లు చూసి వేయాలని సూచిస్తున్నారు.

తెలంగాణ (Telangana) రాష్ట్రాన్ని ప్రజల ఆకాంక్షలు, వారి త్యాగాల కారణంగా కాంగ్రెస్ పార్టీ, యూపీఏ ప్రభుత్వం, సోనియాగాంధీ ఇచ్చిందని, కేసీఆర్ ఫ్యామిలీ ప్రయోజనాల కోసం కాదని ఇప్పటికి కాంగ్రెస్ నేతలు ఆరోపణలు చేస్తోన్న విషయం తెలిసిందే.. రాష్ట్రంలో కాంగ్రెస్ అధికారంలోకి వచ్చిన తర్వాత.. బీఆర్ఎస్ చేసిన అభివృద్ధి పై సమీక్షలు నిర్వహిస్తోన్న హస్తం నేతలు.. గత ప్రభత్వం పై విరుచుకుపడుతోన్నారు. ప్రతి శాఖలో అవినీతి జరిగిందని ఆరోపణలు గుప్పిస్తున్నారు.

ఈ క్రమంలో ప్రజా పాలనపై ఉమ్మడి నల్లగొండ (Nalgonda) ఎంఎన్ఆర్ కన్వెన్షన్ హాల్ లో మంత్రులు సమీక్ష సమావేశం నిర్వహించారు. జిల్లా కలెక్టర్లు, ఎస్పీలు, ఉన్నత అధికారులు, ప్రజాప్రతినిధులతో జిల్లా ఇన్ చార్జి మంత్రి తుమ్మల నాగేశ్వరరావు, ఉత్తమ్ కుమార్ రెడ్డి (Uttam Kumar Reddy).. కోమటిరెడ్డి వెంకటరెడ్డి సమావేశమైయ్యారు.. ఈ సందర్భంగా మంత్రులు సంచలన వ్యాఖ్యలు చేశారు.. పదేళ్ల బీఆర్ఎస్ (BRS) పాలనలో ఏ వర్గానికి న్యాయం జరగలేదని కోమటిరెడ్డి వెంకట్ రెడ్డి మండిపడ్డారు.

రాష్ట్రంలో కాంగ్రెస్ (Congress) అధికారంలోకి వచ్చిన రెండు రోజుల్లోనే ఆరు గ్యారెంటీల్లో రెండు హామీలను అమలు చేశామని తెలిపిన కోమటిరెడ్డి వెంకట్ రెడ్డి.. ఉమ్మడి నల్గొండ జిల్లాల్లో పెండింగ్ ప్రాజెక్టులను పూర్తి చేస్తామన్నారు. డిసెంబర్ 28 నుండి జనవరి 6 వరకు ప్రజా పాలన పారదర్శకంగా చేస్తామని మంత్రి ఉత్తమ్ కుమార్ రెడ్డి తెలిపారు.. గత ప్రభుత్వంలా కమిషన్లకి కక్కుర్తిపడే ప్రభుత్వం తమది కాదని అన్నారు.. పనులు పూర్తి అయ్యే వరకి.. ప్రాజెక్టుల వద్దే కుర్చీ వేసుకుని.. నిర్మాణ పనులను పూర్తి చేస్తామని ఉత్తమ్ తెలిపారు.. పీడీఎస్ రైస్ రీసైక్లింగ్ చేస్తే కఠిన చర్యలు తీసుకుంటామని హెచ్చరించారు.

మరోవైపు తుమ్మల నాగేశ్వర రావు మాట్లాడుతూ.. ఐదేళ్లలో రాష్ట్ర సంక్షేమం, అభివృద్ధిపై దృష్టి సారిస్తామని వెల్లడించారు. గతంలో ఉమ్మడి నల్గొండ జిల్లా నేతలతో తనకు మంచి రాజకీయ సంబంధం ఉందన్నారు.. తన హయాంలో మొదలైన ప్రాజెక్టులు, రోడ్ల నిర్మాణాలు మళ్లీ ఉత్తమ్ కుమార్ రెడ్డి, కోమటిరెడ్డి వెంకటరెడ్డి హయాంలో పూర్తి కాబోతున్నాయని తుమ్మల నాగేశ్వర రావు చెప్పారు.

నిజామాబాద్ (Nizamabad) ఎంపీ ధర్మపురి అర్వింద్.. పార్లమెంట్ ఎన్నికలపై కీలక వ్యాఖ్యలు చేశారు. ప్రధాని నరేంద్ర మోడీ (PM Modi) నిజామాబాద్ పార్లమెంటు స్థానం నుంచి పోటీ చేస్తానంటే, తానే స్వయంగా ధన్యవాద పాదయాత్ర చేస్తానంటూ తెలిపారు. నిజామాబాద్ జిల్లా పార్టీ కార్యాలయంలో ఏర్పాటు చేసిన సమావేశంలో పాల్గొన్న అర్వింద్.. కాంగ్రెస్ (Congress) ప్రభుత్వం శ్వేత పత్రాల పేరుతో ఆరు గ్యారంటీల (Six Guarantees) అమలుపై ప్రజలను అయోమయంలో పడేసిందని ఆరోపించారు.

ఎన్నికలప్పుడు ఆరు గ్యారంటీలని హడావుడి చేసిన కాంగ్రెస్.. గెలిచాక శ్వేత పత్రాల పేరుతో పరోక్షంగా గ్యారంటీల అమలుకు డబ్బులు లేవని చెప్పడం సరైన పద్ధతి కాదని ధర్మపురి అర్వింద్ పేర్కొన్నారు. అయితే కొత్తగా ఏర్పాటైన ప్రభుత్వానికి సమయం ఇవ్వాల్సిన అవసరం ఉందని అన్నారు.. రాష్ట్ర పాలన విషయంలో బీజేపీ సహకారం ఖచ్చితంగా ఉంటుందని ఎంపీ ధర్మపురి అర్వింద్(MP Arvind) స్పష్టం చేశారు.

మరోవైపు ప్రజలకు మేలు చేసే పనులకు మద్దతిస్తామని తెలిపిన ధర్మపురి అర్వింద్.. ప్రజా వ్యతిరేక కార్యక్రమాలను మాత్రం ఖచ్చితంగా వ్యతిరేకిస్తామని చెప్పారు. ఈ క్రమంలో తబ్లికీ జమాత్​కు రూ.3 కోట్లు ఇవ్వడం ఏంటని ప్రశ్నించారు.. ఇలాంటి వాటికి తాము వ్యతిరేకమని తెలిపారు.. ఇచ్చిన గ్యారంటీలకు డబ్బులు లేవంటే ఊరుకొనే పరిస్థితి లేదని.. ఇచ్చిన హామీలు ఖచ్చితంగా అమలు చేయవలసిందే అని అరవింద్ డిమాండ్ చేశారు..

మరోవైపు కాంగ్రెస్ గ్యారంటీలు పూర్తిస్థాయిలో అమలు కావడం లేదని నిజామాబాద్ అర్బన్ ఎమ్మెల్యే ధన్​పాల్ సూర్యనారాయణ ఆరోపించారు. ఆర్మూర్ ఎమ్మెల్యే రాకేశ్ రెడ్డి సైతం ప్రభుత్వంపై విమర్శలు చేశారు.. కాంగ్రెస్ బీ ఫాంలు తీసుకొని ఓడిపోయిన నాయకులే నియోజకవర్గాల్లో అధికార కార్యక్రమాలు చేస్తారని సీఎం రేవంత్ రెడ్డి చెప్పడం ప్రజాస్వామ్యాన్ని అవమానించడమే అవుతుందని అన్నారు.

రాష్ట్రంలో కాంగ్రెస్ (Congress) అధికారంలోకి వచ్చాక.. బీఆర్ఎస్ (BRS) పాలనలో అవినీతి జరిగిందనే ఆరోపణలపై చర్చ జరుపుతోన్న విషయం తెలిసిందే.. ఈ నేపథ్యంలో కాంగ్రెస్ నేతలు దూకుడుగా వ్యవహరిస్తున్నట్టు తెలుస్తోంది. ఇప్పటికే కాళేశ్వరం (Kaleswaram) అవినీతి పై జోరుగా చర్చలు సాగుతోన్న క్రమంలో.. బీఆర్ఎస్ అవినీతిపై రోడ్లు భవనాల శాఖ, సినిమాటోగ్రఫీ శాఖా మంత్రి కోమటిరెడ్డి వెంకటరెడ్డి (Komatireddy Venkat Reddy) కీలక వ్యాఖ్యలు చేశారు..

ప్రభుత్వ విభాగాలు అన్ని, నష్టాల్లో వున్నాయని తెలిపిన వెంకటరెడ్డి.. కాళేశ్వరం వల్ల ఒక్క ఎకరా పంట పండిన దాఖలాలు లేవని మండిపడ్డారు. ఫామ్ హౌజ్ కి మాత్రమే ప్రయోజనం కలిగిందని వెల్లడించారు. పిట్టల దొరలా గొప్పలు చెప్పుకొనే కేసీఆర్ ఘనతలు మాకన్నా.. ప్రజలకే ఎక్కువ తెలుసని కోమటిరెడ్డి వెంకటరెడ్డి అన్నారు. ఖమ్మం జిల్లాలో రోడ్లు అన్ని మంత్రి తుమ్మల కవర్ చేశారని.. ఇంకా మిగిలిన వున్న వాటిని పూర్తి చేస్తామని ఆయన తెలిపారు..

ఎన్నికల్లో ఇచ్చిన హామీ మేరకు 6 గ్యారెంటీలు అమల్లోకి తెచ్చేందుకు రివ్యూ జరుగుతోందని తెలిపిన వెంకటరెడ్డి.. హామీలు ఎదో తూ తూ మంత్రంగా కాకుండా పకడ్బందీగా అమలు చేసేలా పని చేస్తున్నామని వివరించారు.. గత ప్రభుత్వ పాలనలో తెలంగాణ అల్లకల్లోలంగా మారిందని ఆరోపించిన వెంకటరెడ్డి.. ఏ శాఖలో చూసిన వేల కోట్లలో అప్పులు ఉన్నాయంటూ ఆగ్రహం వ్యక్తం చేశారు. దాన్ని గాడిలో పెట్టాలనే ఆలోచనలతో ప్రభుత్వం ముందుకి వెళ్తుందని పేర్కొన్నారు..

కాళేశ్వరం గురించి గొప్పలు చెప్పుకొన్న గత ప్రభుత్వం.. కమీషన్ కోసం హడావిడిగా ప్రారంభించి రాష్ట్రాన్ని కోలుకోలేని విధంగా చేశారని వెంకటరెడ్డి మండిపడ్డారు..కాళేశ్వరం విషయంలో కేసీఆర్ గొప్పలకి వెళ్ళి.. నేనే ఇంజినీర్ అని ప్రాజెక్ట్ ని నిండా ముంచాడని వెంకటరెడ్డి అన్నారు.. కాళేశ్వరం నిర్మాణం తీరు రాష్ట్ర పరువుతీసేలా ఉందని వెంకటరెడ్డి మండిపడ్డారు.. కేసీఆర్ ఘనతలు మాకన్నా ప్రజలకే ఎక్కువ తెలుసని కోమటిరెడ్డి వెంకటరెడ్డి ఎద్దేవా చేశారు..