Politics

తెలంగాణ (Telangana)లో ఐఏఎస్‌ (IAS) అధికారుల బదిలీ విషయంలో నెలకొన్న సందిగ్ధత వీడింది.. తాజాగా రాష్ట్ర ప్రభుత్వం 11 మంది ఐఏఎస్‌ అధికారులను బదిలీ చేస్తోన్నట్టు వెల్లడించింది. ఈ మేరకు ప్రభుత్వ ప్రధాన కార్యదర్శి శాంతికుమారి (Shantikumari) ఉత్తర్వులు జారీ చేశారు. కాగా తెలంగాణలో 11 మంది ఐఏఎస్‌ల బదిలీ (Transfers) వివరాలు చూస్తే..

ఇప్పటి వరకి పురపాలకశాఖ ప్రత్యేక ప్రధాన కార్యదర్శిగా ఉన్న అర్వింద్‌ కుమార్‌ విపత్తు నిర్వహణశాఖకు బదిలీ అయ్యారు.. ఇక విద్యాశాఖ ముఖ్య కార్యదర్శిగా బుర్రా వెంకటేశం నియమితులయ్యారు. కళాశాల, సాంకేతిక విద్యాశాఖ కమిషనర్‌గా అదనపు బాధ్యతలు ఆయనకి అప్పగించారు. మరోవైపు దానకిశోర్‌ పురపాలకశాఖ ముఖ్య కార్యదర్శిగా నియమితులయ్యారు. ఆయనకు హెచ్‌ఎండీఏ, సీడీఎంఏ కమిషనర్‌గా అదనపు బాధ్యతలు అప్పగించారు.

జలమండలి ఎండీగా సుదర్శన్‌రెడ్డి నియమించగా.. వైద్య ఆరోగ్యశాఖ కార్యదర్శిగా క్రిస్టినాకి బాధ్యలు అప్పగించారు. మరోవైపు ఆర్‌అండ్‌బీ శాఖ ముఖ్య కార్యదర్శిగా కె.ఎస్. శ్రీనివాసరాజును నియమించారు.. రాహుల్‌ బొజ్జాను జీఏడీ కార్యదర్శిగా నియమించారు. అదీగాక ఎస్సీ అభివృద్ధిశాఖ కార్యదర్శిగా అదనపు బాధ్యతలు సైతం అప్పగించారు.

ఇక అటవీ, పర్యావరణశాఖ ముఖ్యకార్యదర్శిగా వాణి ప్రసాద్‌ను నియమించారు. ఈపీటీఆర్‌ఐ డైరెక్టర్‌ జనరల్‌గా అదనపు బాధ్యతలు కూడా అప్పగించారు. మహిళా శిశుసంక్షేమ శాఖ కార్యదర్శిగా వాకాటి కరుణ నియమితులవ్వగా.. టి.కె.శ్రీదేవి వాణిజ్యపన్నులశాఖ కమిషనర్‌గా నియమించారు.. నల్గొండ కలెక్టర్‌ ఆర్‌.వి.కర్ణన్‌ ని బదిలీ చేసిన ప్రభుత్వం.. వైద్య, ఆరోగ్య, కుటుంబ సంక్షేమశాఖ డైరెక్టర్‌గా నియమించారు..

బీఆర్ఎస్ (BRS) ప్రభుత్వం తెచ్చిన ధరణి పోర్టల్ (Dharani Portal) పై మొదటి నుంచి వ్యతిరేకత ఉన్న విషయం తెలిసిందే.. తప్పుల తడకలా ధరణి పోర్టల్ రూపొందించారని ఎన్నో ఆరోపణలు వచ్చాయి. ధరణి వల్ల రైతులకి న్యాయం జరగలేదనే వాదనలు కూడా వినిపించాయి. ఈ క్రమంలో రాష్ట్రంలో ధరణి పోర్టల్ మార్చాలనే నిర్ణయానికి ప్రభుత్వం వచ్చినట్టు తెలుస్తోంది. ధరణి పోర్టల్ స్థానంలో భూమాత ఆనే పేరుతో రైతుకి న్యాయం చేయాలని కాంగ్రెస్ ప్రభుత్వం ఆలోచనలో ఉన్నట్టు సమాచారం..

అయితే ధరణిలో మార్పు.. భూమాత ఎలా ఉండాలి అనే అంశంపై కీలక సూచనలు చేశారు రిటైర్డ్ ఐఏఎస్ అధికారి ఆకునూరి మురళి (Akunuri Murali).. వాయిస్ ఆఫ్ తెలంగాణ (Voice Of Telangana) ఆధ్వర్యంలో ఖైరతాబాద్ (Khairatabad) వాసవీ క్లబ్ లో ‘‘ధరణిలో మార్పు రావాలి.. భూమాత ఎలా ఉండాలి’’ అనే అంశంపై నిర్వహించిన వర్క్ షాప్ లో పాల్గొన్న మురళి.. తహశీల్దార్లకు, కలెక్టర్లకు, ధరణి పోర్టల్ సాఫ్ట్ వేర్ పై పూర్తిస్థాయిలో శిక్షణ ఇవ్వాలన్నారు.

భూమిపై మంచి అవగాహన ఉన్న మాజీ అధికారులతో కమిటీ వేస్తే.. సమస్య తీరుతుందని తెలిపిన మురళి.. ఈ కమిటీలో ఒక వర్కింగ్ ఐఏఎస్ ఆఫీసర్ కూడా ఉండాలని సూచించారు. ప్రతి గ్రామానికి.. గ్రామ రెవెన్యూ అధికారి ఉండేలా చూడాలని.. దాని వల్ల గ్రామస్థాయిలోనే పరిష్కారం దొరుకుతుందని మురళి అభిప్రాయపడ్డారు.

మరోవైపు తహశీల్దార్లకు పవర్ లేకుండా పోయినందు వల్ల.. గ్రామాల్లో రైతులకు సమస్యలు వస్తే చెప్పుకోవడానికి ఎవరూ లేరని, మురళి ఆందోళన వ్యక్తం చేశారు.. ప్రస్తుత పరిస్థితుల్లో రైతులకు సమస్యలు వస్తే సిటీలకు రావలసిన అవసరం ఏర్పడిందని.. దీని వల్ల వారు ఇబ్బందులు పడుతున్నారని మురళి పేర్కొన్నారు. అధికారులకు లంచం ఇస్తే అన్ని వివరాలు మారిపోతున్నాయని, అలా జరగకుండా చూడాలని ప్రభుత్వాన్ని కోరారు మురళి..

ప్రత్యేక తెలంగాణ (Telangana) ఉద్యమ సమయంలో డీఎస్పీ పదవికి రాజీనామా చేసిన నళిని.. అంశం మరోసారి తెరపైకి వచ్చింది. ఆమె తిరిగి ఉద్యోగంలోకి చేరడానికి సీఎం రేవంత్ రెడ్డి (Revanth Reddy) అవకాశం కల్పించారు. కానీ, ఆమె నిరాకరించారు.. ఈ నిరాకరణ వెనక పగిలిన గుండె ఘోషను.. అనుభవించిన కన్నీటి వేదనను వినిపించారు.. కాగా 2009లో తెలంగాణ ఉద్యమ సమయంలో మెదక్‌ డీఎస్పీ (DSP)గా పని చేస్తున్న నళిని తన పదవికి రాజీనామా చేశారు.

ఇలా ఎందరో ఉద్యోగాలను వదిలిన వారు తిరిగి తమ కొలువుల్లో చేరారని, రాజకీయ నేతలు ఇతర పదవులను అనుభవిస్తున్నారని తెలిపిన రేవంత్ రెడ్డి.. నళినిని తిరిగి ఉద్యోగంలోకి తీసుకోవడానికి అవకాశం కల్పించాలని రాష్ట్ర ప్రధాన కార్యదర్శి శాంతి కుమారి, డీజీపీ రవి గుప్తాలను ఆదేశించారు. కానీ నళిని మాత్రం.. రాజీనామా చేసి నేను రాజకీయ నేతల నుంచి తప్పించుకున్నాను. నా ఉద్యోగం తెలంగాణ ప్రజలకు న్యాయం చేయలేదు. కాబట్టి, దయచేసి తనను డిస్టర్బ్ చేయవద్దని విజ్ఞప్తి చేశారు.

నా లోని ఒక డైనమిక్ కమిటెడ్ ఆఫీసర్ ను ఆ రోజే హత్య చేశారని తెలిపిన నళిని (Nalini).. 12 ఏండ్ల తర్వాత సీఎంగా రేవంత్ రెడ్డి.. నా కేస్ ను వెలికితీయడం చాలా సంతోషంగా వుందని తెలిపారు.. కానీ తెలంగాణ ఉద్యమంలో బ్రతికి బయటపడి సర్వస్వం కోల్పోయిన వాళ్ళలో నేను ముందు వరుసలో ఉన్నానన్న విషయం ప్రజలకు మీ ద్వారా అర్థం అయ్యిందని భావోద్వేగానికి గురైయ్యారు.. అప్పటి ఘటన నన్ను జీవితంలో ఒంటరిని చేసిందని తెలిపిన నళిని.. అందరూ నన్ను వెలివేశారు. ఇల్లు, కుటుంబం, ఆరోగ్యం, మనశ్శాంతి అన్నీ కోల్పోయాను. తీవ్ర ఇబ్బందులు ఎదుర్కొన్నాను. జీవచ్చవంలా బతికానని తెలిపారు.

రెండేండ్ల క్రితం దేవుడి దయ వల్ల నా జీవితంలోకి మహర్షి దయానంద సరస్వతి ప్రవేశించాడు. వేదమాత, యజ్ఞ దేవతలు తిరిగి నాలో ప్రాణం పోశారు.అందుకే నేను నా జీవితాన్ని ఆ మహనీయుని చరణాలకు సమర్పించుకున్నానని నళిని వివరించారు. సీఎంగా మిమ్మల్ని కోరేది ఏమిటంటే.. నాలా ఇంకే ఆఫీసర్ డిపార్ట్మెంట్ లో ఇబ్బందులు పడకుండా తగిన చర్యలు తీసుకోండని సూచించారు.. నాకు న్యాయం చేయాలి అనుకొంటే ఉద్యోగం ఇవ్వడానికి బదులుగా నా ధర్మ ప్రచారానికి ఉపయోగ పడేలా ఏదైనా సహాయం చేస్తే స్వీకరిస్తానని నళిని తెలిపారు..

తెలంగాణ రాష్ట్ర ఆర్థిక వ్యవస్థను గాడిలో పెట్టేందుకు ముందుకు వచ్చారు మాజీ ఆర్బీఐ గవర్నర్(RBI Ex Governor) రఘురామ్ రాజన్(Raghuram Rajan). ఈ మేరకు తెలంగాణ ప్రభుత్వం(Telangana Government)తో చర్చలు జరుపుతున్నారు. ఇందులో భాగంగా రఘురామరాజన్ ఆదివారం సీఎం రేవంత్‌రెడ్డితో జూబ్లీహిల్స్ నివాసంలో ఆదివారం సమావేశమయ్యారు.

కేంద్ర ప్రభుత్వ ఆర్థిక మాజీ ముఖ్య సలహాదారుగా కూడా పనిచేసిన రఘురామరాజన్ సీఎం రేవంత్ రెడ్డితో తన అనుభవాలను పంచుకున్నారు. రాష్ట్ర ప్రస్తుత ఆర్థిక పరిస్థితి, రాష్ట్ర ఆర్థిక అభివృద్ధికి అనుసరించాల్సిన వ్యూహాలపై చర్చించారు. రాష్ట్ర ఆర్థిక పరిస్థితిని మెరుగుపరిచేందుకు పలు సూచనలు చేశారు.

ఈ సమావేశంలో ఉపముఖ్యమంత్రి భట్టివిక్రమార్క, శాసనసభ వ్యవహారాలు, ఐటీ శాఖ మంత్రి శ్రీధర్ బాబు, సీఎస్ శాంతి కుమారి, స్పెషల్ ఫైనాన్స్ సెక్రటరీ రామకృష్ణా రావు, సీఎం సెక్రటరీ శేషాద్రి పాల్గొన్నారు. అయితే, ఇటీవలే రఘురామ్ రాజన్ ఓ ఇటర్వ్యూలో మాట్లాడుతూ ప్రభుత్వాలు దివాలా తీసే స్థాయిలో ఉచితాలు ఇవ్వొద్దని సూచించిన విషయం తెలిసిందే.

ఆ ఇంటర్వ్యూలో రాజన్ మాట్లాడుతూ.. ఉచితాలు దేశ ఆర్థిక వ్యవస్థపై తీవ్ర ప్రభావాన్ని చూపిస్తాయన్నారు. పేదలకు ఉపయోగపడే ఉచితాలు సమర్థనీయమైనా కొన్న రాజకీయ పార్టీలు పోటాపోటీగా ఉచితాలు ఇవ్వరాదని హెచ్చరించారు. ప్రస్తుత వృద్ధిరేటులో భారత్ అభివృద్ధి చెందడం కష్టమని అభిప్రాయపడ్డారు.

ఈ నేపథ్యంలో కాంగ్రెస్ ప్రభుత్వం ఎన్నికల్లో అనేక ఉచితాలను ప్రకటించిన విషయం తెలిసిందే. అందులో భాగంగా ఇటీవలే ‘మహాలక్ష్మి’ పథకం పేరుతో మహిళలకు ఉచిత బస్సు ప్రయాణాన్ని ప్రారంభించింది. ఈ క్రమంలో ప్రభుత్వ విధానాలు సరికాదని వ్యాఖ్యానించిన రఘురామ్ రాజన్.. తెలంగాణ సీఎం రేవంత్‌రెడ్డిని కలవడం ప్రాధాన్యతను సంతరించుకుంది.