Politics

రాష్ట్రంలో కొత్తగా ఏర్పడ్డ కాంగ్రెస్ (Congress) ప్రభుత్వంపై సిద్దిపేట ఎమ్మెల్యే, మాజీ మంత్రి హరీశ్ రావు (Harish Rao) కీలక వ్యాఖ్యలు చేశారు.. డిసెంబర్ 9న రైతు బంధు ఇస్తామని మాట తప్పారు.. ఎప్పుడు వేస్తారు అని అసెంబ్లీ ఆవరణలో మాజీ మంత్రి హరీశ్ రావు ప్రశ్నించారు. ప్రతిపక్షంలో ఉన్నాం కాబట్టి విమర్శ చేయాలని కాదు. రైతాంగం అంతా రాష్ట్ర ప్రభుత్వం వైపు చూస్తుందని తెలిపారు.

ఎన్నికల సమయంలో రైతులకు బోనస్ ఇస్తాం అని చెప్పిన కాంగ్రెస్.. వడ్లకు 5వందల బోనస్ ఎప్పుడు ఇస్తారు? వడ్లు కొనుగోలు ఎప్పుడు చేస్తారు చెప్పాలని హరీశ్ రావు ప్రశ్నించారు. దీనిపై ప్రభుత్వం స్పందిస్తే రైతులకు మేలు జరుగుతుందని హరీశ్ రావు పేర్కొన్నారు. తుపాను కారణంగా కొన్ని చోట్ల వడ్లు తడిసాయని, వాళ్ళను ఆదుకోవాలని హరీష్ రావు కోరారు.

కాంగ్రెస్ అధికారంలోకి వచ్చాక రైతుబంధు (Rythu Bandhu) కింద ఎకరాకి రూ.15000 డిసెంబర్ 9వ ఇస్తామని చెప్పినట్టు గుర్తు చేశారు. మరోవైపు కొత్త ప్రమాణ స్వీకారం చేసిన ఎమ్మెల్యేలకు హరీశ్ రావు శుభాకాంక్షలు చెప్పారు. శనివారం అసెంబ్లీ సమావేశాల (Assembly Meetings) ముగింపు అనంతరం మీడియా పాయింట్ వద్ద మాట్లాడిన హరీష్ రావు.. అధికార పక్షం అయినా ప్రతిపక్షం అయినా ఎప్పుటికీ తాము ప్రజల పక్షాన నిలబడతామని ప్రకటించారు.

రాష్ట్రంలో కాంగ్రెస్ ప్రభుత్వం(Congress Government) కొలువుదీరిన వేళ.. ఎన్నికల హామీలను ఒక్కొక్కటిగా నెరవేరుస్తోంది. తాజాగా రాష్ట్రవ్యాప్తంగా మహిళలకు ఉచిత బస్సు ప్రయాణాన్ని అందుబాటులోకి తీసుకొచ్చింది. తెలంగాణ రాష్ట్ర వ్యాప్తంగా మహిళలకు ఆర్టీసీ బస్సుల్లో ఇకపై ఉచిత ప్రయాణం చేయవచ్చు. అసెంబ్లీ ప్రాంగణంలో సీఎం రేవంత్‌రెడ్డి మహాలక్ష్మి(Mahalaxmi), ఆరోగ్య శ్రీ పథకాల(Arogyasri scheme)ను సీఎం రేవంత్‌రెడ్డి ప్రారంభించారు.

ఈ ఉచిత పథకం కేవలం ఆర్టీసీ బస్సులకు మాత్రమే వర్తిస్తుంది. అయితే జిల్లాల్లో పల్లె వెలుగు, ఎక్స్‌ప్రెస్, నగరాల్లో సిటీ ఆర్డినరీ, సిటీ మెట్రో ఎక్స్‌ప్రెస్ బస్సుల్లోనే ప్రయాణాన్ని ఉచితంగా కల్పిస్తున్నారు. గరుడ ప్లస్, రాజధాని, సూపర్ లగ్జరీ, డీలక్స్, మెట్రో లగ్జరీ, ఏసీ మెట్రో డీలక్స్‌ బస్సుల్లో వెళ్తే ఛార్జీలు చెల్లించాల్సి ఉంటుంది.

మహిళలతో పాటు బాలికలు, విద్యార్థినులు, ట్రాన్స్‌జెండర్‌లకు ఆర్టీసీ బస్సుల్లో ఉచితంగా ప్రయాణించే అవకాశం కల్పించారు. ఇవాళ(శనివారం) మధ్యాహ్నం 2గంటల నుంచి ఉచిత బస్సు ప్రయాణం అందుబాటులోకి వచ్చింది. ధ్రువీకరణ కోసం ఏదైనా గుర్తింపు కార్డులను కండక్టర్లకు చూపించాల్సి ఉంటుంది. ఆ వెంటనే వారికి కండక్టర్ జీరో టికెట్ ఇస్తారు. అంతర్రాష్ట్ర సర్వీసులకు తెలంగాణ పరిధిలో మాత్రమే ఉచిత ప్రయాణం వర్తిస్తుందని ఆర్టీసీ అధికారులు తెలిపారు.

అదేవిధంగా ఎన్నికల్లో కాంగ్రెస్ ఆరు గ్యారంటీల్లో ఒకటైన ఆరోగ్యశ్రీ పథకాన్ని సీఎం రేవంత్‌రెడ్డి అసెంబ్లీ ఆవరణలో ప్రారంభించారు. ఆరోగ్యశ్రీ కింద వైద్య ఖర్చును రూ.10లక్షలకు పెంచుతూ ప్రభుత్వం నిర్ణయం తీసుకుంది. ఈ పథకం ఇవాళ్టి నుంచే అమలులోకి వస్తుందని అధికారులు వెల్లడించారు.

తెలంగాణలో 1310 ఆసుపత్రుల్లో (293 ప్రైవేట్, 198 ప్రభుత్వ, 809 పీహెచ్‌సీ) ఆరోగ్య శ్రీ సేవలు అందుబాటులోకి రానున్నాయి. ఇందులో 1,376 శస్త్ర చికిత్సలు, 289 వైద్య సేవలు చేయనున్నారు. రాష్ట్రంలో 77 లక్షల 19వేల మంది ఆరోగ్యశ్రీ కార్డులున్నాయి.

తెలంగాణ (Telangana) మాజీ సీఎం కేసీఆర్‌ (KCR) క్రింద పడిపోవడం వల్ల కాలుకి తీవ్ర గాయమైన విషయం తెలిసిందే. ఈ క్రమంలో కేసీఆర్‌ ఎడమ కాలికి యశోద ఆసుపత్రి (Yashoda Hospital) వైద్యులు నిన్న హిప్‌ రిప్లేస్‌మెంట్‌ (Hip replacement) సర్జరీ చేశారు. దీంతో, ఆయనకు దాదాపు ఎనిమిది వారాల విశ్రాంతి అవసరమని వైద్యులు తెలిపారు. అయితే ఆపరేషన్‌ అనంతరం కేసీఆర్‌ ఆసుపత్రిలోనే విశ్రాంతి తీసుకుంటున్నారు.

కాలి తుంటికి ఆపరేషన్‌ తర్వాత.. నడవడానికి కేసీఆర్‌ తీవ్ర ఇబ్బంది పడుతున్నారు. వైద్యులు కేసీఆర్‌ దగ్గరే ఉండి.. వాకర్‌ సాయంతో ఆయనను నడిపించే ప్రయత్నం చేస్తున్నారు. ఇద్దరు డాక్టర్లు కేసీఆర్ ను పట్టుకోగా, వాకర్ సాయంతో కేసీఆర్ మెల్లగా నడిచారు. కాగా, దీనికి సంబంధించిన వీడియో సోషల్‌ మీడియాలో వైరల్‌గా మారింది.

మరోవైపు ఈ వీడియోపై నటుడు ప్రకాశ్‌రాజ్‌ స్పందించారు. కేసీఆర్‌ను మైక్‌ రాక్‌స్టార్‌ అంటూ కామెంట్స్‌ చేస్తూ వీడియోను ట్విట్టర్‌లో షేర్‌ చేశారు. ఇక ఆపరేషన్‌ అనంతరం కేసీఆర్‌ ఆరోగ్యం నిలకడగా ఉన్నట్టు వైద్యులు తెలిపారు.

ఎర్రవెల్లిలోని తన ఫామ్ హౌస్ లో డిసెంబర్ 7న.. కేసీఆర్ కాలు జారి పడ్డారు. ఎడమ కాలి తుంటి విరగడంతో సోమాజిగూడలోని యశోద ఆస్పత్రికి తరలించారు. డిసెంబర్ 8న రాత్రి డాక్టర్లు కేసీఆర్ కు హిప్ రిప్లేస్ మెంట్ సర్జరీ చేశారు. అనంతరం ఆపరేషన్ సక్సెస్ అయిందని ప్రకటించారు.

తెలంగాణ అసెంబ్లీ (Telangana Assembly)లో కొత్తగా ఎన్నికైన ఎమ్మెల్యేలతో ప్రొటెం స్పీకర్ (Protem Speaker)అక్బరుద్ధీన్ ఒవైసీ ప్రమాణస్వీకారం చేయించారు. మొదటగా సీఎం రేవంత్ రెడ్డి (Revanth Reddy) తరువాత డిప్యూటీ సీఎం భట్టి విక్రమార్క ప్రమాణస్వీకారం చేశారు. అనంతరం.. ఎమ్మెల్యేలు ప్రమాణ స్వీకారం చేశారు. ప్రమాణస్వీకార కార్యక్రమం తరువాత స్పీకర్ గా గడ్డం ప్రసాద్ కుమార్ నామినేషన్ వేయనున్నారు.

మరోవైపు ఈ రోజు జరగనున్న అసెంబ్లీ సమావేశాలను బీజేపీ ఎమ్మెల్యేలు బాయ్‌కాట్‌ చేశారు. రెగ్యులర్ స్పీకర్ ఎన్నిక తరువాతే భాజపా ఎమ్మెల్యేలు ప్రమాణం చేస్తారని వెల్లడించారు. కాంగ్రెస్ ప్రభుత్వం, ఎంఐఎం ఎమ్మెల్యే అక్బరుద్దీన్ (Akbaruddin)ను ప్రొటెం స్పీకర్ గా నియమించడం పట్ల తెలంగాణ బీజేపీ నేతలు ఆగ్రహం వ్యక్తం చేశారు. దీంతో అసెంబ్లీలో జరిగే ప్రమాణస్వీకారాన్ని బహిష్కరిస్తున్నామని రాష్ట్ర అధ్యక్షుడు కిషన్ రెడ్డి ప్రకటించారు.

తెలంగాణ అసెంబ్లీలో జరుగుతున్న ప్రమాణ స్వీకారం సభకు 109 మంది ఎమ్మెల్యేలు హాజరయ్యారు. కాగా తొలిసారి అసెంబ్లీలో అన్ని పార్టీల తరఫున 51 మంది ఎమ్మెల్యేలు అడుగుపెట్టారు.. మరోవైపు కాంగ్రెస్ ప్రభుత్వంలో మంత్రులుగా ప్రమాణస్వీకారం చేసినవారికి శాఖల కేటాయింపు జరిగింది. కాంగ్రెస్ అధిష్టానం మంత్రుల శాఖలకు ఆమోదముద్ర వేసింది. ఇదే అంశంపై నిన్న సీఎం రేవంత్ రెడ్డి ఢిల్లీ వెళ్లారు. అధిష్టానంతో చర్చలు జరిపిన అనంతరం శాఖల కేటాయింపు జరిగింది.

తెలంగాణలో (telangana) నేటి నుంచి అసెంబ్లీ సమావేశాలు (Assembly Meetings) మొదలవుతున్న విషయం తెలిసిందే.. ఇదే సమయంలో గెలిచిన ఎమ్మెల్యేల ప్రమాణ స్వీకారం కూడా జరగనుంది. ఈ ప్రమాణ స్వీకారాన్ని ప్రొటెమ్‌ స్పీకర్‌ సమక్షంలో నిర్వహిస్తారు. ఈ నేపథ్యంలో ప్రొటెం స్పీకర్ గా అక్బరుద్దీన్ ఒవైసీని ఎంపిక చేయడంపై బీజేపీ అభ్యంతరం వ్యక్తం చేసింది. ఇప్పటికే గోషామహల్ ఎమ్మెల్యే రాజాసింగ్.. ఓవైసీ ప్రొటెం స్పీకర్ గా ఉంటే ప్రమాణ స్వీకారం చేయబోమని ప్రకటించారు.

ఈ క్రమంలో అసెంబ్లీ సమావేశాలు బహిష్కరిస్తున్నట్లు బీజేపీ తెలంగాణ ఎమ్మెల్యేలు ప్రకటించారు. ఈమేరకు పార్టీ రాష్ట్ర అధ్యక్షుడు కిషన్ రెడ్డి (Kishan Reddy)తో కీలక భేటీ తర్వాత తమ నిర్ణయం వెల్లడించారు. అయితే ప్రొటెం స్పీకర్ (Protem Speaker)గా ఎంఐఎం ఎమ్మెల్యే అక్బరుద్దీన్ (Akbaruddin)ను.. సీఎం రేవంత్ రెడ్డి ఎంపిక చేయడం, ఒవైసీ ప్రమాణం కూడా చేయడంతో బీజేపీ ఎమ్మెల్యేలు ఈ నిర్ణయం తీసుకున్నట్లు సమాచారం.

అంతకుముందు పార్టీ ఎమ్మెల్యేలు ఎనిమిది మంది శనివారం ఉదయం కిషన్ రెడ్డిని కలిశారు. వీరంతా చార్మినార్ భాగ్యలక్ష్మి ఆలయానికి వెళ్లి ప్రత్యేక పూజలు నిర్వహించారు. అనంతరం పార్టీ ఆఫీసులో సమావేశమై.. అసెంబ్లీ సమావేశాలు, ప్రమాణ స్వీకారం, ప్రొటెం స్పీకర్ గా ఒవైసీ ఎంపిక అంశం పై చర్చించుకున్నట్టు తెలుస్తోంది. మరోవైపు గవర్నర్ తమిళి సై సమక్షంలో రాజ్‌భవన్‌లో.. ప్రొటెం స్పీకర్‌గా ఎమ్ఐఎమ్ ఎమ్మెల్యే అక్బరుద్దీన్ ఒవైసీ ప్రమాణ స్వీకారం జరిగింది.

కాగా ఈ అంశంపై బీజేపీ రాష్ట్ర అధ్యక్షుడు కిషన్ రెడ్డి కీలక వ్యాఖ్యలు చేశారు.. పార్టీ సంప్రదాయాలను కాంగ్రెస్ తుంగలో తొక్కిందని మండిపడ్డారు. ప్రొటెమ్ స్పీకర్‌గా సీనియర్ వ్యక్తులను నియమించడం ఆనవాయితీగా వస్తోందని… కానీ, ఎమ్ఐఎమ్‌తో కుట్ర పన్ని కాంగ్రెస్ సంప్రదాయాలను పాటించడలేదని అసహనం వ్యక్తం చేశారు. ఇందుకు నిరసనగా బీజేపీ ఎమ్మెల్యేలంతా అసెంబ్లీ సమావేశాలను బహిష్కరిస్తున్నట్టు వెల్లడించారు..