Politics

నేతలు చెప్పినట్టు తెలంగాణ (Telangana)లో నిజంగానే అభివృద్ది జరిగింది.. మద్యం రికార్డు స్థాయిలో అమ్ముడు పోవడంలో కనిపిస్తున్న అభివృద్ది చూసిన కొందరు ఈ మాటలంటున్నారు. ఏ ప్రభుత్వ హాయమంలో ఇంతలా లిక్కరు అమ్ముడు పోకపోవడం నిజంగా విడ్డూరమే అంటున్నారు. తెలంగాణను తాగుబోతుల తెలంగాణ మార్చిన క్రెడిట్ బీఆర్ఎస్ (BRS) ప్రభుత్వానికి చెల్లుతుందని కితాబ్ ఇస్తున్నారు..

ఇందుకు నిదర్శనంగా ప్రస్తుతం నో స్టాక్ బోర్డుతో కనిపిస్తున్న వైన్ షాపులు (Wine shops) చూపిస్తున్నారు.. నిగ్గదీసి అడుగు ఈ సిగ్గులేని జనాన్ని అగ్గితోటి కడుగు ఈ సమాజ జీవశ్చవాన్ని మారదు లోకం మారదు కాలం దేవుడు దిగిరానీ ఎవ్వరు ఏమైపోనీ అని సిరివెన్నెల రాసిన ఈ పదాలు అక్షరాల తెలంగాణకు వర్తిస్తాయని ఈ దృశ్యాలు చూస్తున్న కొందరు వెల్లడిస్తున్నారు.

మరికొన్ని గంటల్లో తెలంగాణ అసెంబ్లీ ఎన్నికల ప్రచారం ముగుస్తున్న క్రమంలో వైన్ షాపుల్లో నో స్టాక్ బోర్డులు దర్శనమివ్వడం.. డబ్బులతో ఓట్లను కొనుక్కోవాలనే నాయకులు రాజకీయాల్లో ఉండటం.. యువత ఆలోచించవలసిన సమయమని అంటున్నారు.. మరో వైపు పోల్ మేనేజ్ మెంట్ టీమ్స్.. లిక్కర్ షాపులతో డీల్స్ పెట్టుకున్నట్టు ప్రచారం.. చివరి రెండు రోజులు పోల్ బూత్ కమిటీ సభ్యులకు, ఓటర్ స్లిప్స్ రాసే కుర్రోళ్లు.. టెంట్స్ దగ్గరి పార్టీ కార్యకర్తలు, నేతలను మేనేజ్ చేయటానికి సర్వం సిద్ధం చేసుకున్నట్టు తెలుస్తుంది.

పోలింగ్ దగ్గర పడటంతో మందు దొరకదనే ముందు జాగ్రత్తతో ఆయా పార్టీల టీమ్స్ పెద్ద ఎత్తున లిక్కర్ నిల్వ చేసినట్టు వార్తలు వినిపిస్తున్నాయి. చివరి నిమిషంలో హైరానా.. హంగామా.. హడావిడి పడి పరువుతీసుకోవడం కంటే.. ముందుగానే కొని పెట్టేసుకుంటే బెటర్ అనే ఆలోచనతో.. వైన్ షాపులను ఖాళీ చేసినట్టు తెలుస్తుంది. రాష్ట్ర వ్యాప్తంగా ఇదే పరిస్థితి నెలకొన్నట్టు ప్రచారం జరుగుతుంది.

– తెలంగాణ ఎన్నికలకు ఏర్పాట్లు
– కట్టుదిట్టమైన భద్రత, నిఘా
– పోలీసులు, జిల్లాల అధికారులతో వికాస్ రాజ్ సమీక్ష
– ప్రలోభాల కట్టడి, చర్యలపై సూచనలు
– సమస్యాత్మక ప్రాంతాల్లో అదనపు ఫోర్స్
– 5 గంటలకు ప్రచారానికి తెర
– రాష్ట్రవ్యాప్తంగా అమల్లోకి 144 సెక్షన్​

తెలంగాణ (Telangana) ఎన్నికల ప్రక్రియ చివరి దశకు చేరుతోంది. ఎన్నికల సంఘం (Election Commission) పోలింగ్ ఏర్పాట్లలో తలమునకలైంది. గురువారం ఎటువంటి ఇబ్బందులు లేకుండా పకడ్బందీగా ఎన్నికలు పూర్తి చేయాలని చూస్తోంది. ఈ నేపథ్యంలో అన్ని శాఖల అధికారులతో సమావేశాలు, సమీక్షలు నిర్వహిస్తోంది. తాజాగా సీఈవో వికాస్‌ రాజ్‌ (Vikas Raj) సమీక్ష నిర్వహించారు. పోలీసులు, అన్ని జిల్లాల ఎన్నికల ఉన్నతాధికారులు ఇందులో పాల్గొన్నారు.

ఎన్నికల సందర్భంగా ప్రలోభాలు కామన్ గా జరుగుతుంటాయి. ఇప్పటివరకు రాష్ట్రవ్యాప్తంగా 7 వందల కోట్లకు పైగా నగదు పట్టుపడింది. ఉన్న ఈ కొద్ది సమయంలోనూ ప్రలోభాలు జోరుగా సాగే అవకాశం ఉండడంతో వాటి కట్టడికి ప్లాన్ చేస్తోంది ఈసీ. అలాగే, పోలింగ్‌ రోజున తీసుకోవాల్సిన చర్యలపైనా అధికారులతో చర్చలు జరిపింది. ఎన్నికల సందర్భంగా అవాంఛనీయ ఘటనలు జరగకుండా అధికారులు భారీ భద్రతా ఏర్పాట్లు చేశారు. తెలంగాణకు సెంట్రల్‌ ఫోర్స్‌ కూడా వచ్చేసింది. సమస్యాత్మక, మావోయిస్టు ప్రభావిత ప్రాంతాల్లో అదనపు ఫోర్స్‌ ను కేటాయించారు.

మంగళవారం సాయంత్రం 5 గంటలకి ప్రచారానికి తెర పడనుంది. పోలింగ్​ నేపథ్యంలో 48 గంటల ముందు నుంచే సైలెన్స్ పీరియడ్ మొదలు అవుతుంది. రాష్ట్రవ్యాప్తంగా 144 సెక్షన్​ అమల్లోకి వస్తుంది. సంబంధిత నియోజకవర్గానికి చెందని వారంతా ఆయా నియోజకవర్గాల్లో ఉండరాదని ఎలక్షన్​ కమిషన్​ ఇప్పటికే స్పష్టం చేసింది. అలాగే, టీవీ, సోషల్‌ మీడియాలో ప్రకటనలకు అనుమతి లేదు. పత్రికల్లో వేసే ప్రకటనలకు మోడల్‌ కోడ్‌ మీడియా కమిటీ ముందస్తు అనుమతి ఉండాలి.

రాష్ట్ర వ్యాప్తంగా మొత్తం 19,375 ప్రాంతాల్లో పోలింగ్ కేంద్రాలు ఏర్పాటు చేశారు. ఎన్నికల విధుల్లో లక్ష మంది పోలీస్ సిబ్బంది పాల్గొననున్నారు. 65 వేల మంది తెలంగాణ పోలీసులతో పాటు 18వేల మంది హోంగార్డులు ఉన్నారు. రాష్ట్ర పోలీసులతోపాటు కేంద్ర బలగాలు కూడా రంగంలోకి దిగాయి. ఈ ఎన్నికల విధుల్లో 375 కంపెనీల కేంద్ర బలగాలు పాల్గొంటున్నాయి. రాష్ట్రంలో 4,400 సమస్యాత్మక ప్రాంతాలను అధికారులు గుర్తించారు. సమస్యాత్మక ప్రాంతాలు, మావోయిస్టు ప్రభావిత ప్రాంతాల్లో అదనపు బలగాల ద్వారా పటిష్ట భద్రతను ఏర్పాటు చేశారు.

ఎన్నికల విధుల్లో అసోం రైఫిల్స్, బోర్డర్స్ సెక్యూరిటీ ఫోర్స్, సెంట్రల్ ఇండస్ట్రియల్ సెక్యూరిటీ ఫోర్స్, సెంట్రల్ రిజర్వ్ పోలీస్ ఫోర్స్, ఇండో టిబెటన్ బోర్డర్ పోలీస్, నేషనల్ సెక్యూరిటీ గార్డ్స్ పాల్గొంటున్నారు. హైదరాబాద్ లో అయితే ఎన్నికలకు అధికారులు భారీగా భద్రత చేపట్టారు. బందోబస్తులో భాగంగా 70 కంపెనీల కేంద్ర, రాష్ట్ర బలగాలను 3 కమిషనరేట్ల పరిధిలో 40 వేల మంది పహారా కాయనున్నారు. హైదరాబాద్ లో వెయ్యి వరకు సమస్యాత్మక కేంద్రాలను అధికారులు గుర్తించారు. వాటి దగ్గర ఉన్న విధుల్లో కేంద్ర బలగాలు పకడ్బందీ ఏర్పాట్లు చేశారు. పోలింగ్ కేంద్రాలకు కిలోమీటర్ పరిధిలో.. ర్యాలీలు, సమావేశాలను ఎన్నికల అధికారులు నిషేధాజ్ఞలు విధించారు.

తెలంగాణ ఎన్నికలు చివరి దశకు చేరుకున్నాయి. మంగళవారం ప్రచార పర్వానికి తెరపడుతుండగా.. 30న పోలింగ్ జరగనుంది. అయితే.. చివరి రోజు ప్రచారంలో భాగంగా కాంగ్రెస్ అగ్ర నేత రాహుల్ గాంధీ పలువురితో చిట్ చాట్ నిర్వహించారు. జూబ్లీహిల్స్ లో డ్రైవర్స్, డెలివరీ బాయ్స్, శానిటరీ వర్కర్లు, హెల్త్ వర్కర్లతో ముఖాముఖి అయ్యారు. ఈ సందర్భంగా కాంట్రాక్ట్ వర్కర్ల సమస్యలను అడిగి తెలుసుకున్నారు.

తాము పడుతున్న బాధలు, సమస్యలను రాహుల్‌ కు కార్మికులు వివరించారు. తరచూ ప్రమాదాలు జరుగుతున్నాయని పారిశుద్ధ్య కార్మికులు ఆవేదన వ్యక్తం చేశారు. జీహెచ్‌ఎంసీ కాంట్రాక్టు ఉద్యోగులను అధికారులు వేధిస్తున్నారని ఆరోపించారు. తమకు డబుల్ బెడ్రూం ఇళ్లు ఇస్తామని ఇవ్వలేదని.. కాంట్రాక్టర్లు 11 గంటలు పనిచేయిస్తున్నారని వాపోయారు. సదుపాయాలు అడిగితే ఉద్యోగం మానేయమంటున్నారని ఆవేదన చెందారు.

డెలివరీ బాయ్స్ తమ కష్టాలను రాహుల్ కు చెప్పారు. రోజుకు ఎంత డబ్బు వస్తుందని ఆయన ఆరా తీయగా.. తమకు టూ వీలర్స్ ఇప్పించాలని, పెట్రోల్ రేట్ తగ్గించాలని కోరారు. ఇతర వర్కర్లు కూడా తమ సమస్యలను రాహుల్ ముందు ఏకరుపెట్టారు. గంటల కొద్దీ పని చేసినా తగినంత వేతనం రావడం లేదని చెప్పుకొచ్చారు. తెలంగాణ సర్కార్ ఇచ్చిన హామీలు నెరవేర్చలేదని కాంట్రాక్ట్ వర్కర్లు వాపోయారు.

రాహుల్ గాంధీ మాట్లాడుతూ.. కాంగ్రెస్ గెలవగానే.. కార్మికులతో సీఎం సమావేశం అవుతారన్నారు. అందరి సమస్యల పరిష్కారానికి ప్రత్యేక చొరవ చూపుతానని వారికి హామీ ఇచ్చారు. తెలంగాణ ప్రజల ఆకాంక్షలకు అనుగుణంగా బీఆర్ఎస్ ప్రభుత్వం నడుచుకోలేదని.. కేవలం తన కుటుంబం కోసమే కేసీఆర్ పని చేశారని ఆరోపించారు. కాంగ్రెస్ హయాంలో అన్ని వర్గాల సంక్షేమం కోసం కృషి చేస్తామని తెలిపారు రాహుల్ గాంధీ.