Politics

తెలంగాణ అసెంబ్లీ ఎన్నికలు దగ్గర పడుతున్న కొద్దీ నేతలు ప్రచారాలను ముమ్మరం చేశారు. ప్రచార సభల్లో హామీలను గుప్పిస్తున్నారు. ఈ నేపథ్యంలో టీకాంగ్రెస్(T Congress) మరో సంచలన హామీ ప్రకటించింది. ధరణిలో ఉన్న లోపాలను సవరించి కొత్త రెవెన్యూ చట్టం తీసుకురావాలని కాంగ్రెస్ పార్టీ ఆలోచన చేస్తుందని మంథని ఎమ్మెల్యే శ్రీధర్ బాబు అన్నారు.

పెద్దపల్లిలో బుధవారం ఏర్పాటు చేసిన విలేకరుల సమావేశంలో శ్రీధర్‌బాబు మాట్లాడుతూ.. బీఆర్ఎస్ పార్టీ ఎన్నికల ప్రచారంలో భాగంగా నిర్వహిస్తున్న సభల్లో ముఖ్యమంత్రి కేసీఆర్ ప్రజల ఆలోచన విధానం మార్చే విధంగా కాంగ్రెస్ పార్టీపై విషప్రచారం చేస్తున్నారని మండిపడ్డారు. కాంగ్రెస్ పార్టీ అధికారంలోకి వస్తే భూములు పోతాయని తప్పుడు ప్రచారం చేస్తున్నారని ఎవ్వరి భూమి ఎక్కడికి పోదని ధరణిలో లోపాలను సవరిస్తామని శ్రీధర్ బాబు హామీ ఇచ్చారు.

పదేళ్లపాటు అధికారంలో ఉన్న కేసీఆర్ చెప్పుకోవడానికి పథకాలు ఏమీ లేక కాంగ్రెస్ పార్టీపై విష ప్రచారం చేస్తున్నారని ఆరోపించారు. బీఆర్ఎస్ అవినీతి పాలనకు మేడిగడ్డ బ్యారేజీ పిల్లర్లు కుంగడమే ఇందుకు నిదర్శనమని అన్నారు. లక్ష కోట్లతో కట్టిన కాళేశ్వరం ప్రాజెక్టుపై బీఆర్ఎస్ అధినేత నోరువిప్పకపోవడం విడ్డూరమని శ్రీధర్‌బాబు విమర్శించారు.

కాంగ్రెస్ ప్రభుత్వ హయాంలో కరెంటుకి ఇబ్బంది రాకుండా స్టేట్ గ్రిడ్ సెంట్రల్ గ్రిడ్‌ను అనుసంధానం చేసే ప్రక్రియ ప్రారంభించిందని గుర్తుచేశారు. రైతులకు ఉచితంగా విద్యుత్తును అందించాలని కాంగ్రెస్ ప్రభుత్వం ఏడు గంటల ఉచిత విద్యుత్ అందించిందని గుర్తు చేశారు. రైతులకు పారిశ్రామికవేత్తలకు కరెంటు సమస్యలు రాకూడదని భావించి జైపూర్ విద్యుత్ ప్లాంట్‌, భూపాలపల్లి థర్మల్ పవర్ స్టేషన్‌ విభజన చట్టంలో క్రిటికల్ సూపర్ థర్మల్ పవర్ స్టేషన్ కాంగ్రెస్ ప్రభుత్వం మంజూరు చేసినట్లు గుర్తుచేశారు.

తెలంగాణ అసెంబ్లీ ఎన్నికల(Telangana Assembly Elections) వేళ అధికార పార్టీ బీఆర్ఎస్‌(BRS)కు రాజీనామాలు కలవరపెడుతున్నాయి. పార్టీలో ప్రాధాన్యత ఇవ్వడం లేదని కొందరు, ప్రభుత్వ విధానాలు నచ్చక మరికొందరు ఆ పార్టీని వీడుతున్నారు. తాజాగా రాష్ట్ర కార్మిక శాఖ మంత్రి మల్లారెడ్డి(Minister MallaReddy) ఇలాకాలో కీలక నేతలు రాజీనామా చేయడం చర్చనీయాంశమైంది.

మేడ్చల్ జిల్లాలో 11 మంది మాజీ ప్రజా ప్రతినిధులు, ఉద్యమకారులు బీఆర్ఎస్‌కు రాజీనామా చేశారు. మంత్రి మల్లారెడ్డి ఏకపక్ష నిర్ణయాలతో తాము పార్టీని వీడుతున్నట్లు పేర్కొన్నారు. మంత్రి సొంత ఇంటి వాళ్లు ప్రతి మండలంలో రాజకీయాలు చేస్తున్నారని ఆరోపించారు. దాని వల్ల కార్యకర్తలకు విలువ లేకుండా పోయిందని ఆవేదన వ్యక్తం చేశారు. పార్టీ కోసం కష్టపడిన తమను గుర్తించడంలేదని వాపోయారు.

మేడ్చల్ జిల్లా శామీర్ పేట ముడుచింతలపల్లి మండల మాజీ ప్రజా ప్రతినిధులు, ఉద్యమకారులు నేమురి విష్ణువర్ధన్ రెడ్డి, కంఠం కృష్ణారెడ్డి ఆధ్వర్యంలో రాజీనామాలు చేశారు. ఈ మేరకు బీఆర్ఎస్ మేడ్చల్ జిల్లా అధ్యక్షుడు శంబీపూర్ రాజుకు లేఖ రాశారు.

అదేవిధంగా ఉమ్మడి శామీర్ పేట మాజీ మండలం అధ్యక్షుడు నేమురి విష్ణువర్ధన్ గౌడ్, అలియాబాద్ మాజీ సర్పంచ్, శామీర్‌పేట మండలం రైతు బంధు అధ్యక్షుడు కంఠం కృష్ణారెడ్డి, ముడుచింతలపల్లి మండలం రైతుబంధు అధ్యక్షురాలు, లక్ష్మపూర్ మాజీ సర్పచ్ శ్యామల, ఎక్స్ ఎంపీటీసీ మంజుల మాధవరెడ్డి, మాజీ ఎంపీటీసీ లక్ష్మణ్ నాయక్, మాజీ వార్డు సభ్యులు సురేందర్, పీఏసీ డైరెక్టర్ ముగ్దం ప్రతాప్ రెడ్డి, కంఠం నరేందర్ రెడ్డి, విష్ణు, చంద్రకళ బీఆర్ఎస్ పార్టీకి రాజీనామా చేశారు.

ఈ సందర్భంగా వారు మాట్లాడుతూ రియల్ ఎస్టేట్ వ్యాపారులకు, భూ కబ్జాదారులకు ప్రాధాన్యత ఇస్తున్నారని మండిపడ్డారు.మంత్రి మల్లారెడ్డి ఒంటెద్దు పోకడకు మరికొంతమంది సర్పంచులు, మాజీ సర్పంచులు, వార్డు మెంబర్లు, ఎంపీటీసీలు, మాజీ ఎంపీటీసీలు పెద్ద ఎత్తున రాజీనామాలు చేయడానికి సిద్ధంగా ఉన్నారని తెలిపారు. మంత్రి మల్లారెడ్డి పార్టీ కార్యకర్తలను ఉద్యమకారులను ఏమాత్రం పట్టించుకోవడంలేదని ఆరోపించారు.

తెలంగాణ అసెంబ్లీ ఎన్నికల(Telangana Assembly Elections) హీట్ పెరిగింది. ఇప్పటికే బీజేపీ, బీఆర్ఎస్, కాంగ్రెస్‌ పార్టీల్లో జంపింగ్ జిలానీలు ఎక్కువయ్యారు. ఆయా పార్టీలు ఎలాగైనా గెలవాలని, వచ్చే నెలలో ఎలాగైనా అధికారాన్ని చేజెక్కించుకోవాలని చూస్తున్నాయి. ఈ నేపథ్యంలో రాష్ట్ర రాజకీయాల్లో కీలక పరిణామం చోటుచేసుకుంది. యూట్యూబ్‌ వేదిక ఓ ఛానల్‌ను నడిపిస్తూ సీఎం కేసీఆర్ ప్రభుత్వంపై నిప్పులు చెరిగే తీన్మార్‌ మల్లన్న(Teenmaar mallanna) అలియాస్ చింతపండు నవీన్ కాంగ్రెస్ పార్టీలో చేరారు.

మల్లన్న కాంగ్రెస్ పార్టీలో చేరినట్లు టీ కాంగ్రెస్ ట్విట్టర్ (x) ఖాతా ద్వారా ప్రకటించింది. ఇదివరకే పలువురు రాజకీయ ప్రముఖులు కాంగ్రెస్ పార్టీలో చేరిన విషయం తెలిసిందే. ఐసీసీసీ తెలంగాణ ఇన్‌ఛార్జ్ మాణిక్‌రావు ఠాక్రే, టీపీసీసీ వర్కింగ్ ప్రెసిడెంట్ బొమ్మ మహేశ్ కుమార్‌ల ఆధ్వర్యంలో మల్లన్న కాంగ్రెస్ కండువా కప్పుకోవడం ప్రాధాన్యత సంతరించుకుంది. తీన్మార్ మల్లన్న ఇదివరకే బీజేపీలో చేరి రాజీనామా చేసిన విషయం తెలిసిందే.

అయితే.. తీన్మార్ మల్లన్న కాంగ్రెస్‌లో ఎమ్మెల్యే టికెట్ ఇస్తారా? లేదంటే మరో పదవిని కట్టబెడతారా? అనేది సందిగ్దంగా మారింది. కాంగ్రెస్ పార్టీ సిరిసిల్ల లేదా కామారెడ్డి నుంచి టికెట్ ఇస్తే.. కేసీఆర్ లేదా కేటీఆర్‌పై పోటీ చేసే అవకాశాలు ఉన్నాయి. లేదా.. ప్రచారాలకు మాత్రమే వినియోగించుకుని పార్టీ గెలిచాక పదవిని ముట్టజెప్తే దీనికి మల్లన్న ఒప్పుకుంటాడా లేదా? అనేది తెలియాల్సివుంది.

సోషల్ మీడియాలో మంచి ఫాలోయింగ్ ఉన్న మల్లన్న ఎన్నికల సమయంలో కాంగ్రెస్ పార్టీలో చేరడం హస్తానికి ఫ్లస్ అయిందని రాజకీయ విశ్లేషకులు అంటున్నారు. ఇతర పార్టీల ప్రముఖ నాయకులు కాంగ్రెస్ చేరుతుండగా అధికార పార్టీకి ప్రస్తుతం కంటిమీద కునుకులేకుండా పోతోంది. ఏది ఏమైనా బీఆర్ఎస్ మాత్రం హ్యాట్రిక్ విజయం సాధించాలనే పట్టుదలతో ఉంది. బీజేపీ సైతం బీసీ నినాదంతో దూసుకుపోతోంది. మరి అధికారం ఎవరి సొంతం కానుందనేది తెలంగాణ రాజకీయాల్లో ఆసక్తికరంగా మారింది.