Politics

రాములమ్మ అని అభిమానులు ముద్దుగా పిలుచుకునే.. విజయశాంతి (Vijayashanthi) ఒకప్పుడు స్టార్ క్యాంపెయినర్. అంతటి ఫాలోయింగ్ ఉన్న రాములమ్మకి కమలం ఊహించని షాకిచ్చింది. ఈ ఘటన వ్యూహాత్మకంగా జరిగిందా.. ప్లాన్‌తో చేశారో తెలియదు గానీ.. బీజేపీ స్టార్ క్యాంపెయినర్ల జాబితాలో విజయశాంతికి చోటు దక్కలేదు. పైగా ఏ నియోజకవర్గం అభ్యర్థిగా కూడా ప్రకటించలేదు.

ప్రస్తుతం ఈ అంశం రాజకీయాల్లో చర్చనీయాంశంగా మారింది. ఇకపోతే కాంగ్రెస్‌ (Congress)లో ఒకప్పుడు స్టార్ క్యాంపెయినర్ (Star campaigner)హోదాలో ఓ వెలుగు వెలిగిన విజయశాంతి.. కాషాయ కండువా కప్పుకుంది. కొన్నాళ్ళు పార్టీలో చురుకుగా వ్యవహరించినా.. గత కొంత కాలంగా పార్టీ వ్యవహారాలు పట్టనట్టుగా ఉంటున్నారు రాములమ్మ.. తాజాగా జరిగిన పరిణామాలతో కమలం విజయశాంతిని పక్కనపెట్టేసిందనే ప్రచారం జరుగుతుంది.

దీనికి కారణం ఈ మధ్య కొందరు సీనియర్లు పార్టీ వీడటం కారణంగా తెలుస్తోంది. బీజేపీ(BJP)లో గ్రాండ్ గా చేరిన కోమటిరెడ్డి రాజగోపాల్‌రెడ్డి, వివేక్ వెంకటస్వామి ఊహించని విధంగా ఇటీవల హస్తం గూటి పై వాలారు. అప్పటి నుంచి విజయశాంతి కూడా పార్టీ మారుతారనే ప్రచారం పార్టీ వర్గాలలో జోరుగా సాగుతుంది. ఈ కారణం వల్లనే బీజేపీ స్టార్ క్యాంపెయినర్ లిస్టులో రాములమ్మకు చోటు దక్కనట్లుగా సమాచారం.

మరోవైపు తెలంగాణ అసెంబ్లీ ఎన్నికల్లో బీజేపీ తరపున 40 మంది ప్రచారం చేయనున్నారు. వారిలో ప్రధాని నరేంద్ర మోదీ.. జేపీ నడ్డా.. రాజ్‌నాథ్‌ సింగ్‌..
అమిత్‌షా.. నితిన్‌ గడ్కరీ.. కర్ణాటక మాజీ సీఎం యడియూరప్ప.. కె.లక్ష్మణ్‌..యూపీ సీఎం యోగీ ఆదిత్య నాథ్.. పీయూష్ గోయల్‌.. నిర్మలా సీతారామన్‌.. స్మృతి ఇరానీ.. పురుషోత్తం రూపాలా.. అర్జున్‌ ముండా.. భూపేంద్రయాదవ్‌.. కిషన్‌రెడ్డి.. సాధ్వి నిరంజన్‌ జ్యోతి.. ఎల్‌.మురుగన్‌..

ప్రకాశ్‌ జవదేకర్‌.. తరుణ్‌ ఛుగ్‌.. సునీల్ బన్సల్‌.. బండి సంజయ్‌.. అరవింద్‌ మేనన్‌.. డీకే అరుణ.. పి.మురళీధర్‌రావు.. దగ్గుబాటి పురందేశ్వరి.. రవికిషన్‌.. పొంగులేటి సుధాకర్‌రెడ్డి.. జితేందర్‌రెడ్డి.. గరికపాటి మోహన్‌రావు.. ఈటల రాజేందర్‌.. ధర్మపురి అర్వింద్‌.. సోయం బాపూరావు.. రాజాసింగ్‌.. కొండా విశ్వేశ్వర్‌రెడ్డి.. బూర నర్సయ్యగౌడ్‌.. గుజ్జుల ప్రేమేందర్‌రెడ్డి.. దుగ్యాల ప్రదీప్‌కుమార్‌.. బంగారు శ్రుతి.. కాసం వెంకటేశ్వర్లు యాదవ్‌.. టి.కృష్ణ ప్రసాద్ తదితరులు ఉన్నారు.

– ఇతర పార్టీలను, నేతలను..
– ప్రమోట్ చేయడమేంటి?
– సొంత పార్టీ గురించి చెప్పుకునేది తక్కువ
– అవతలి వాళ్ల గురించి మాట్లాడడం ఎక్కువ
– ఇదేం ప్రచారం..? ఇది దేనికి సంకేతం..?
– బీజేపీ పెద్దలను నిలదీస్తున్న కార్యకర్తలు

విషయం వీక్ గా ఉన్నప్పుడు పబ్లిసిటీ పీక్ లో ఉండాలి. ఎన్నికలప్పుడు అయితే.. ఇది ఓ రేంజ్ లో కొనసాగాలి. కానీ, రాష్ట్రంలో బీజేపీ (BJP) పెద్దల తీరు చూసి ఏం చేయాలో తెలియని అయోమయంలో కిందిస్థాయి కార్యకర్తలు ఉన్నట్టుగా చెబుతున్నారు రాజకీయ పండితులు. ఈ మధ్య కాలంలో కొందరు నేతలు మాట్లాడుతున్న మాటలు చూసి.. ముక్కున వేలేసుకుంటున్నారని వివరిస్తున్నారు.

మీట్ ది ప్రెస్ కార్యక్రమంలో బీజేపీ రాష్ట్ర అధ్యక్షుడు కిషన్ రెడ్డి (Kishan Reddy) అనేక అంశాలపై మాట్లాడారు. విజయం మాదే, గెలిచేది కాషాయ పార్టీనే అని చెప్పుకుంటే సరిపోయేది. కానీ, బీఆర్ఎస్ కాకుండా కాంగ్రెస్ గెలిస్తే పెనం మీద నుంచి పొయ్యిలో పడ్డట్టే అని మాట్లాడారు. ఈ వ్యాఖ్యలు సొంత పార్టీ క్యాడర్ ను అయోమయంలో పడేశాయని అంటున్నారు విశ్లేషకులు. పార్టీ అధ్యక్షుడు అయి ఉండి ఇలా మాట్లాడడం ఏంటని తెగ చర్చించుకుంటున్నట్టు చెబుతున్నారు. కిషన్ రెడ్డి వ్యాఖ్యలు చూస్తుంటే.. కాంగ్రెస్‌ కు మాత్రం వేయొద్దు.. తమకు వేయకపోయినా ఫర్లేదు.. బీఆర్ఎస్ గెలిచినా ఓకే అన్నట్టుగా ఉందని సొంత పార్టీ వాళ్లే అనుకుంటున్నారని వివరిస్తున్నారు.

ఇటు, బీసీ సీఎం అని హైకమాండ్ ప్రకటించింది.. అందుకే తాను పోటీ చేయడం లేదని కిషన్ రెడ్డి చేసిన వ్యాఖ్యలపైనా భిన్నాభిప్రాయాలు వ్యక్తం అవుతున్నాయని అంటున్నారు విశ్లేషకులు. అసలు, బీసీ సీఎం (BC CM) నినాదానికి.. కిషన్ రెడ్డి పోటీ చేయడానికి సంబంధం ఉందా? అనే ప్రశ్న ఎక్కువగా వినిపిస్తోందని చెబుతున్నారు. ఇవి పార్టీ అధ్యక్షుడు మాట్లాడాల్సిన మాటలేనా?.. ఒకవేళ హైకమాండ్ ఆదేశమే అయినా.. దీన్ని బయటకు చెప్పాల్సిన అవసరం ఏముందని కార్యకర్తలు మాట్లాడుకుంటున్నట్టుగా వివరిస్తున్నారు విశ్లేషకులు. అసలు, బీసీ సీఎం ప్రకటన లేకపోతే.. తానే సీఎం అభ్యర్థి అని పరోక్షంగా చెప్పుకున్నట్టుగా ఉందని అనుకుంటున్నారని చెబుతున్నారు.

ఓవైపు కిషన్ రెడ్డి వ్యాఖ్యలతో గందరగోళం నెలకొనగా.. ఇంకోవైపు ఎంపీ అరవింద్ (MP Aravind) చేసిన వ్యాఖ్యలు అగ్గికి ఆజ్యం పోసినట్టుగా ఉన్నాయని అంటున్నారు విశ్లేషకులు. ఇప్పటికే బీజేపీ, బీఆర్ఎస్ ఒక్కటేనని కాంగ్రెస్ ప్రచారం చేస్తోంది. ఢిల్లీ లిక్కర్ కేసు, బీఆర్ఎస్ అవినీతిపై మెతక వైఖరి వ్యవహరిస్తోందని ఆరోపణలు గుప్పిస్తోంది. ఇలాంటి సమయంలో రేవంత్ రెడ్డి కంటే కేసీఆరే మంచోడు అంటూ ఎంపీ ధర్మపురి అరవింద్ మాట్లాడారు. కీలకమైన ఈ ఎన్నికల వేళ ప్రజల్లో కేసీఆర్ పై వ్యతిరేకత బాగా పెరిగిందని చెబుతూనే.. ఇంకోవైపు మంచోడు అని సర్టిఫికెట్ ఇవ్వడం దేనికి సంకేతం అని ప్రశ్నిస్తున్నారని అంటున్నారు. మొత్తంగా పార్టీ పెద్దలు చేస్తున్న వ్యాఖ్యలు తీవ్ర నష్టాన్ని తెచ్చి పెడుతున్నాయని కార్యకర్తలు అనుకుంటున్నట్టు చెబుతున్నారు విశ్లేషకులు.

తెలంగాణా (Telangana)లో ఎన్నికల నామినేషన్ల పర్వం మొదలైంది. ఇప్పటికే పలువురు ప్రధాన పార్టీ అభ్యర్థులు నామినేషన్ కూడా వేశారు. మరోవైపు కాంగ్రెస్.. రాష్ట్రంలో ఊహించని స్థాయిలో ప్రచారంలో దూసుకు పోతుంది. బీఆర్ఎస్ (BRS) వైఫల్యాలు అజెండాగా.. కాళేశ్వరం (Kaleswaram) అవినీతి అస్త్రంగా ఓటర్ల మైండ్ లోకి సూటిగా దూసుకుపోతుందని హస్తం కార్యకర్తలు సంబరపడుతున్నారు.

ఇదే సమయంలో కాంగ్రెస్ (Congress) బీఆర్ఎస్ అవినీతి పై విన్నూత్నంగా ప్రచారం మొదలు పెట్టిన విషయం తెలిసిందే.. పింక్ కలర్ (Pink Colour) కారుపై బీఆర్ఎస్ అవినీతి చిట్టాను అతికించి ప్రచారం కోసం కాంగ్రెస్ ఉపయోగిస్తుంది.ఈ క్రమంలో తెలంగాణ కాంగ్రెస్ ప్రధాన కార్యాలయం అయిన గాంధీభవన్ వద్ద ఉన్న పింక్ కలర్ కారుని నాంపల్లి పోలీసులు స్వాధీనం చేసుకున్నారు.

కేసీఆర్ పై అభ్యంతకర వ్యాఖ్యలు రాసి ఉన్నాయి కాబట్టి కారును స్వాధీనం చేసుకున్నట్టు అధికారులు వెల్లడించారు. కాగా ఈ ఘటనపై అధికారిక సోషల్ మీడియా X లో స్పందించిన తెలంగాణ కాంగ్రెస్.. పోలీసుల తీరును ఖండించింది. స్వేచ్ఛగా ప్రచారం చేసుకునే హక్కు.. అవినీతి ప్రభుత్వాన్ని ప్రశ్నించే అధికారం లేదా అంటూ కాంగ్రెస్ ప్రశ్నించింది.

ఎక్కడ కాంగ్రెస్ గెలుస్తుందో.. బీఆర్ఎస్ అవినీతి బట్టబయలు అవుతుందో అనే భయంతో తమ ప్రచారానికి అడ్డుతగులుతున్నారని కాంగ్రెస్ నేతలు మండిపడుతున్నారు. కాంగ్రెస్ చేస్తున్న ప్రచారం ఆపాలని చూస్తే.. ప్రజలే తగిన బుద్ధి చెబుతారని నేతలు అంటున్నారు.. మరోవైపు కాంగ్రెస్ ఎన్నికల ప్రచారంలో భాగంగా పలు స్కాముల్లో BRSకి సంబంధం ఉందని వివరిస్తూ పింక్ కారును ప్రదర్శింది.. రాష్ట్రంలో మద్యం అమ్మకాల ద్వారా బీఆర్‌ఎస్ డబ్బు సంపాదిస్తున్నదని అర్థం వచ్చేలా.. కేసీఆర్ (KCR) పాలనను 90 ఎంఎల్ ప్రభుత్వంగా ఆరోపిస్తూ ఉన్న పోస్టర్ ను కాంగ్రెస్ నేతలు ఆ కారుపై ముద్రించారు..

– కమీషన్ల కోసమే కాళేశ్వరం కట్టారు
– మళ్లీ బీఆర్ఎస్ గెలిస్తే..
– ఎన్ని ఘోరాలు చూడాలో
– బీజేపీ, బీఆర్​ఎస్​ ఒకటే
– రహస్య ఒప్పందం ఉంది
– గెలిచిన బీజేపీ ఎమ్మెల్యేలు బీఆర్ఎస్ కి..
– గులాబీ ఎంపీలు కాషాయ పార్టీకి..
– మద్దతుగా ఉండాలన్నదే ఒప్పందం
– రాష్ట్రానికి వస్తున్న మోడీ..
– సీబీఐ విచారణ చేయిస్తారా?
– రేవంత్ రెడ్డి దొంగ అని నేను అనలేదు..
– సుప్రీంకోర్టే చెప్పింది
– షర్మిల కీలక వ్యాఖ్యలు

కమీషన్ల కోసమే సీఎం కేసీఆర్ (CM KCR) కాళేశ్వరం (Kaleswaram) ప్రాజెక్టు నిర్మించారని వైటీపీ అధ్యక్షురాలు షర్మిల (Sharmila) వివరించారు. హైదరాబాద్ (Hyderabad) లో మీడియాతో మాట్లాడిన ఆమె.. రూ.లక్ష కోట్ల స్కాం జరిగిందని తాము గతంలోనే చెప్పామన్నారు. దేశంలోనే ఇది అతి పెద్ద కుంభకోణమని తెలిపారు. మేడిగడ్డ, అన్నారం కూలిపోయే దుస్థితికి వచ్చాయని.. ఈసారి బీఆర్ఎస్ (BRS) గెలిస్తే రాబోయే రోజుల్లో ఇంకెన్ని ఘోరాలు చూడాల్సి వస్తుందోనని ఆందోళన వ్యక్తం చేశారు. కుక్క తోక తగిలితే కూలిపోయే పరిస్థితిలో ప్రస్తుతం కాళేశ్వరం ప్రాజెక్టు ఉందన్నారు.

అన్నారం పంపు హౌస్, మేడిగడ్డ పరిస్థితిపై నేషనల్ డ్యాం సేఫ్టీ అథారిటీ వాళ్ళు నిగ్గు తేల్చారని చెప్పారు షర్మిల. 20 అంశాలపై వివరణ అడిగితే 11 అంశాలపై క్లారిటీ ఇచ్చారని పేర్కొన్నారు. బ్యారేజ్ నిర్మాణమే వేస్ట్ అని నేషనల్ డ్యాం సేఫ్టీ అథారిటీ రిపోర్ట్ ఇచ్చిందని వెల్లడించారు. మేడిగడ్డకు వచ్చిన ఇబ్బంది రాబోయే రోజుల్లో అన్నారం, సుందిళ్లకు ప్రమాదం రానుందని హెచ్చరించిందని తెలిపారు. కేవలం కమిషన్ల కోసమే ప్రాజెక్టుల వ్యయాన్ని భారీగా పెంచారని షర్మిల ఆరోపించారు.

ఇదే ప్రాజెక్టు‌ను రాజశేఖర్ రెడ్డి రూ.38 వేల కోట్లతో నిర్మాణం చేయాలని భావిస్తే.. దానిని కేసీఆర్ లక్ష కోట్లకు పెంచి 18 లక్షల ఎకరాలకు నీరు ఇస్తామన్నారని తెలిపారు. కేసీఆర్.. వైఎస్ కంటే కేవలం రెండున్నర ఎకరాలకు మాత్రమే పెంచారన్నారు. అసెంబ్లీ వేదికగా సాగునీటిపై అనేక అబద్ధాలు ఆడారని మండిపడ్డారు. మొదట్నుంచి కాళేశ్వరం అవినీతి గురించి మాట్లాడిన ఒకే ఒక్క పార్టీ వై​​టీపీ అని గుర్తు చేశారు. బీజేపీ, బీఆర్​ఎస్​ ఒకటేనని.. ఆ రెండు పార్టీలు రహస్య ఒప్పందం చేసుకున్నాయని ఆరోపించారు. గెలిచిన బీజేపీ ఎమ్మెల్యేలు బీఆర్ఎస్ కి.. గులాబీ ఎంపీలు కాషాయ పార్టీకి మద్దతుగా ఉండాలన్నదే వీరి ఒప్పందమన్నారు.

కేంద్రమంత్రులే కాళేశ్వరం ప్రాజెక్టుపై అవినీతి, ఆరోపణలు చేస్తున్నప్పుడు ఎందుకు చర్యలు తీసుకోవడం లేదని ప్రశ్నించారు షర్మిల. తెలంగాణ ప్రజలపై బీజేపీకి ఏమాత్రం చిత్తశుద్ధి లేదన్నారు. బీఆర్ఎస్ కు ఎంఐఎం పార్టీ నేరుగా మద్దతు ఇస్తుంటే… బీజేపీ రహస్యంగా సపోర్ట్ చేస్తోందని విమర్శించారు. అందుకే, ప్రధాని మోడీ.. కేసీఆర్ ను కంటికి రెప్పలా కాపాడుకుంటూ వస్తున్నారని చెప్పారు. తెలంగాణకు ప్రధాని వస్తున్న సందర్భంగా.. కాళేశ్వరం ప్రాజెక్టుపై, సీఎం కేసీఆర్ పై, మేఘా కృష్ణారెడ్డిపై సీబీఐతో విచారణ జరిపించాలని డిమాండ్ చేశారు.

ఓటుకు నోటు కేసులో రేవంత్ రెడ్డి దొంగ అని సుప్రీంకోర్టే చెప్పిందన్నారు షర్మిల. కేసు డిస్మిస్ కోసం కోర్టుకెళ్తే రేవంత్ దోషి అని న్యాయస్థానం చెప్పిందని గుర్తు చేశారు. రేవంత్ రెడ్డి కాదు.. రేటెంత రెడ్డి అని అంటున్నారన్నారని.. ఆ పేరు తాను పెట్టింది కాదని అన్నారు. అన్ని పార్టీల్లో దొంగలు ఉంటారని.. అలాంటి వారు ఎప్పుడూ సీఎంలు కాలేరని సంచలన వ్యాఖ్యలు చేశారు. ప్రజల కోసమే వచ్చే ఎన్నికల్లో పోటీ చేయడం లేదన్న ఆమె.. ఎవరో వచ్చి తమకు కిరీటాలు పెట్టాలని కోరుకోవట్లేదని కీలక వ్యాఖ్యలు చేశారు.

మరోవైపు, వైఎస్ కుటుంబాన్ని వేధించిన కాంగ్రెస్‌ కు షర్మిల మద్దతు ప్రకటించారని ఏపీ ప్రభుత్వ సలహాదారు సజ్జల రామకృష్ణారెడ్డి చేసిన విమర్శలకు షర్మిల కౌంటర్ ఇచ్చారు. తాను పార్టీ పెట్టినప్పుడు తమకు సంబంధం లేదని సజ్జల రామకృష్ణారెడ్డి ప్రకటించారని.. మరి ఇప్పుడు ఎందుకు స్పందించారని ప్రశ్నించారు. ఏపీ పరిస్థితి ఎలా ఉందో కేసీఆరే సభల్లో చెబుతున్నారని… ముందు అక్కడి నేతలు దీనికి సమాధానం చెప్పాలన్నారు. ఏపీ దుస్థితిపై అక్కడి నేతలు ఆలోచిస్తే మంచిదని పరోక్షంగా జగన్ రెడ్డికి కూడా షర్మిల సలహా ఇచ్చారు.