Politics

రాహుల్ గాంధీ(Rahul Gandhi) పొర్లు దండాలు పెట్టినా కాంగ్రెస్ పార్టీ(Congress Party) అధికారంలోకి రాదని మంత్రి శ్రీనివాస్‌ గౌడ్(Minister Srinivas Goud) అన్నారు. బుధవారం ఆయన మీడియాతో మాట్లాడుతూ.. రాహుల్‌ గాంధీపై తీవ్రస్థాయిలో ధ్వజమెత్తారు. రాహుల్ పది సార్లు తెలంగాణలో పర్యటించినా.. పొర్లు దండాలు పెట్టినా.. కాంగ్రెస్ అధికారంలోకి రాదని ఎద్దేవా చేశారు. కేసీఆర్‌ను ఎప్పుడూ కుటుంబ పాలన అంటూ విమర్శించే రాహుల్ గాంధీకి ఉన్న అర్హత ఎంటని శ్రీనివాస్‌గౌడ్ ప్రశ్నించారు.

మీరు లీడర్ వా.. రీడర్ వా..? అంటూ ఆగ్రహం వ్యక్తం చేశారు మంత్రి. అసలు రాహుల్‌కు తెలంగాణ చరిత్ర తెలుసా అంటూ ఉద్యమంలో మృతిచెందిన వారు కాంగ్రెస్ వల్ల కాదా? అని మండిపడ్డారు. పదకొండు సార్లు మీకు అధికారం ఇస్తే.. సాగునీరు.. తాగు నీరు ఇవ్వకుండా.. పోటిరెడ్డిపాడు బొక్క కొట్టి.. ఆర్‌డీఎస్‌ బద్దలు కొట్టి నీళ్ళు దోచుకుపోయారని ఆరోపించారు. పదేళ్లలో దేశంలోనే అత్యధిక జీడీపీ తెలంగాణదేనని తెలిపారు.

ఇప్పుడు బీఆర్ఎస్ మహారాష్ట్రలో విస్తరిస్తుంటే.. మీకు గుబులు పట్టుకుని.. మాపై మాట్లాడుతున్నారా? అంటూ శ్రీనివాస్‌గౌడ్ మండిపడ్డారు. మీ అవసరాలను బట్టి బీసీలు, మైనార్టీలను రెచ్చగొట్టి పబ్బం గడుపుకున్నారని ఆగ్రహం వ్యక్తం చేశారు. మూడు సార్లు ఎమ్మెల్యేగా అయిన ఎర్ర శేఖర్‌కు టిక్కెట్ జడ్చర్లలో ఇవ్వకుండా.. ఇతరులకు ఇవ్వడంతోనే బీసీలపై మీ కపట ప్రేమ జనం తెలుసుకున్నారని తెలిపారు.

మీరెన్ని రోడ్ షోలు చేసినా.. డ్రామాలు చేసినా జనం నమ్మరు.. కేసీఆర్‌ను కేటీఆర్‌లను తిట్టి పెద్ద నాయకులు అవుతారనుకుంటున్నారా? అంటూ మంత్రి ఫైర్ అయ్యారు. కాంగ్రెస్ ఎన్ని స్థానాల్లో డిపాజిట్ సాధిస్తుందో చూద్దాం అంటూ సవాల్ విసిరారు. కాంగ్రెస్‌లో డజను మంది సీఎంలు ఉంటారని, పగటి కలలుకంటున్న కాంగ్రెస్ నాయకులను ప్రజలు బొంద పెడతారని సంచలన వ్యాఖ్యలు చేశారు. మీ మోసాల నుంచి బయట పడి.. ఎంతోమంది నాయకులు బీఆర్ఎస్‌లోకి వస్తున్నారని అన్నారు. ఎవరెన్ని కుట్రలు చేసినా బీఆర్ఎస్ హ్యాట్రిక్ విజయాన్ని ఎవరూ ఆపలేరని మంత్రి శ్రీనివాస్‌గౌడ్ ధీమా వ్యక్తం చేశారు.

సూర్యాపేట జిల్లాలోని ఆత్మకూరు(ఎస్)(Atmakuru) మండలం పాతర్లపాడు(Patharlapadu) గ్రామంలో ఉద్రిక్త పరిస్థితులు నెలకొన్నాయి. ఆ గ్రామ సర్పంచ్ మా వాడు అంటే మా వాడు అంటూ బీఆర్ఎస్, బీఎస్పీ పార్టీల నాయకులు తీవ్ర వాగ్వాదానికి దిగారు. దీంతో గ్రామంలో రెండు వర్గాల మధ్య యుద్ధ వాతావరణం నెలకొంది.

ఇంతకీ ఏం జరిగిందంటే.. బీఆర్ఎస్ పార్టీకి చెందిన సర్పంచ్ బీఎస్పీ పార్టీలో చేరడంతో ఈ వివాదం చెలరేగింది. బీఆర్ఎస్ పార్టీకి చెందిన పాతర్లపాడు సర్పంచ్ కేశబోయిన మల్లయ్య తన అనుచరులతో ఇవాళ బీఎస్పీలో చేరారు. బీఎస్పీ సూర్యాపేట అభ్యర్థి వట్టే జానయ్య సమక్షంలో కొంతమంది యాదవ సంఘం నాయకులు, తన అనుచరులతో కలిసి సర్పంచ్ మల్లయ్య ఆ పార్టీలో చేరారు.

సర్పంచ్ బీఎస్పీలో చేరిన విషయాన్ని ఆత్మకూరు(ఎస్) ఎంపీపీ భర్త మార్ల చంద్రారెడ్డి, జడ్పీ వైస్ చైర్మన్ గోపగాని వెంకట నారాయణతో పాటు మరి కొంతమంది మంత్రి జగదీశ్ రెడ్డి వర్గీయులు పాతర్లపాడు గ్రామానికి చేరుకుని సర్పంచ్ మల్లయ్యను కిడ్నాప్ చేసే ప్రయత్నం చేశారు. దీంతో వట్టే జానయ్య, గోపగాని వెంకట నారాయణ మధ్య తీవ్ర వాగ్వాదం జరిగింది.

బీఆర్ఎస్ సర్పంచ్‌ను నువ్వు ఎట్లా బీఎస్పీలో చేర్చుకుంటావ్ అంటూ వట్టే జానయ్యతో గొడవకు దిగారు. ఈలోపు బీఎస్పీ కార్యకర్తలు అక్కడకు చేరుకుని సర్పంచ్ మల్లయ్యను బీఆర్ఎస్ పార్టీ నాయకుల కారు నుంచి దింపి తీసుకెళ్లారు. అదే సమయంలో బీఆర్ఎస్ పార్టీ కార్యకర్తలు కూడా రావడంతో గ్రామంలో ఉద్రిక్త పరిస్థితులు నెలకొన్నాయి. ఈ క్రమంలో సర్పంచ్ మల్లయ్య తాను బీఎస్పీలో చేరానని చెప్పడంతో బీఆర్ఎస్ నాయకులు అక్కడి నుంచి వెళ్లిపోయారు.

మాజీ ఎంపీ, బీజేపీ కీలక మహిళా నాయకురాలు విజయశాంతి(Vijayashanti) ఆసక్తికర ట్వీట్(Tweet) చేశారు. తన రాజకీయ జీవితంపై ఎమోషనల్‌గా స్పందించారు. తన 25 ఏళ్ల రాజకీయ ప్రయాణంలో ఎన్నడూ పదవులు ఆశించలేదని, ఇప్పటికీ ఊహించని విధంగా ఈ పరిస్థితి ఎదురవుతున్నదని అన్నారు. అప్పుడూ ఇప్పుడూ గొడవలే ఎదురవుతున్నాయని పేర్కొన్నారు.

’25 ఏళ్ల నా రాజకీయ ప్రయాణం అప్పుడూ.. ఇప్పుడు.. ఎందుకో నాకు సంఘర్షణ మాత్రమే ఇస్తూ వచ్చింది. ఇప్పటికీ నేను పదవుల గురించి ఆలోచించడం లేదు. ఏ పదవినీ ఏనాడూ కోరుకోకున్నా.. ఇప్పటికీ అనుకోకున్నా.. ప్రస్తుతం ఇది తెలంగాణ బిడ్డలకు చెప్పాల్సిన సత్యం. మన పోరాటం నాడు దశాబ్దాల ముందు తెలంగాణ ఉద్యమ బాట నడిచినప్పుడు, మొత్తం తెలంగాణ బిడ్డల సంక్షేమం తప్ప.. ఇవాళ్టి బీఆర్ఎస్‌కు వ్యతిరేకం అవుతాం అని కాదు..’ అంటూ రాసుకొచ్చారు.

అదేవిధంగా ‘నా పోరాటం నేడు కేసీఆర్ కుటుంబ దోపిడీ, కొందరు బీఆర్ఎస్ నేతల అరాచకత్వంపై తప్ప, నాతో కలిసి తెలంగాణ ఉద్యమంలో ప్రాణం అడ్డుపెట్టి పనిచేసిన బీఆర్ఎస్ కార్యకర్తలపై మాత్రం కాదు.. రాజకీయపరంగా విభేదించినప్పటికీ, అన్ని పార్టీల తెలంగాణ బిడ్డలు సంతోషంగా, సగౌరవంగా ఎన్నటికీ ఉండాలని మనస్ఫూర్తిగా కోరుకోవడం మీ రాములమ్మ ఉద్దేశం.. హర హర మహాదేవ్… జై తెలంగాణ..’ అంటూ విజయశాంతి ట్వీట్ చేశారు.

విజయశాంతి తెలంగాణ ఉద్యమ సమయంలో టీఆర్ఎస్‌తో కలిసి పనిచేశారు. తల్లి తెలంగాణ పేరుతో సొంత పార్టీ పెట్టి ఆ తర్వాత టీఆర్ఎస్‌లో విలీనం చేశారు. ఆ తర్వాత కేసీఆర్‌తో విభేదించి.. బయటకు వచ్చారు. అనంతరం బీజేపీలో చేరారు. ఆ పార్టీపై కూడా ఆమె అసంతృప్తిగా ఉన్నట్లు వార్తలు వస్తున్నాయి. గత నెలలో జరిగిన ప్రధాని పాలమూరు సభకు ఆమె గైర్హాజరయ్యారు. దీంతో ఈ వార్తలకు బలం చేకూరింది.

ఆ తర్వాత తాను బీజేపీలోనే ఉన్నానని, సీఎం కేసీఆర్‌పై కామారెడ్డిలో పోటీ చేస్తానని విజయశాంతి ప్రకటించారు. కానీ ఆమెకు బీజేపీ రెండో లిస్టులోనూ చోటివ్వలేదు. రేపు మూడో జాబితాను ప్రకటించేందుకు బీజేపీ సిద్ధమైనట్లు తెలుస్తోంది. ఇందులోనైనా ఆమె పేరు ప్రకటించకపోతే రాములమ్మ ఎలాంటి నిర్ణయం తీసుకుంటారనేది ఉత్కంఠగా మారింది.