Politics

తెలంగాణలో కాంగ్రెస్‌, బీఆర్ఎస్ ఎన్నికల ప్రచారాల్లో వేగంగా దూసుకుపోతున్నాయి. ఈ రెండు పార్టీలు కూడా నేతలను చేర్చుకోవడంలో ముందు వరుసలో ఉన్నాయి. ఇప్పటికే ఊహించని విధంగా ఇక్కడి నేతలు అక్కడికి.. ఆ పార్టీ నేతలు ఈ పార్టీలోకి జంప్ చేస్తున్నారు. తాజాగా బీఆర్ఎస్ గాలానికి మరో ఇద్దరు నేతలు చిక్కారు. వారే కాంగ్రెస్ కీలక నేత చెరుకు సుధాకర్ (Cheruku Sudhakar), తెలంగాణ (Telangana) టీఎన్జీవో రాష్ట్ర అధ్యక్షుడు (TNGO State President) మామిళ్ల రాజేందర్ ( Mamilla Rajender)..

ఈ ఇద్దరు నేతలు నేడు బీఆర్ఎస్ తీర్థం పుచ్చుకోబోతున్నారు.. ముఖ్యమంత్రి కేసీఆర్, మంత్రులు కేటీఆర్, హరీశ్‌రావు సమక్షంలో వీరిద్దరూ గులాబీ కండువా కప్పుకోనున్నారు. మరోవైపు పీసీసీ ఉపాధ్యక్షుడు, తెలంగాణ ఉద్యమకారుడు డాక్టర్ చెరుకు సుధాకర్.. కాంగ్రెస్‌లో బీసీలకు స్థానం లేదంటూ ఆ పార్టీకి రాజీనామా చేశారు. రేవంత్ రెడ్డి, కోమటిరెడ్డి వెంకట్ రెడ్డిల భూస్వామ్య ఆధిపత్య ధోరణి తీవ్రంగా బాధిస్తున్నాయంటూ చెరుకు సుధాకర్ విమర్శించారు.

గెలుపు గుర్రాల పేరుతో నందికంటి శ్రీధర్‌ను బలిపశువు చేశారని, బీసీలకు ఇంతకంటే అవమానం ఏముంటుందని చెరుకు సుధాకర్ ప్రశ్నించారు. తన సొంత నియోజకవర్గమైన నకిరేకల్‌లో కోమటిరెడ్డి వెంకట్‌రెడ్డి ఇష్టారీతిలో వ్యవహరిస్తున్నాడని చెరుకు సుధాకర్ ఆరోపించారు. తనకు సమాచారం ఇవ్వకుండా వేముల వీరేశాన్ని అభ్యర్థిగా ప్రకటించారని పేర్కొన్నారు. భట్టి విక్రమార్క సాక్షిగా నకిరేకల్‌ గడ్డపై తనను మాట్లాడనీయకుండా కోమటిరెడ్డి వెంకట్‌రెడ్డి మనుషులు అడ్డుకున్న విషయం అక్కడి ప్రజలు మర్చిపోలేదని చెరుకు సుధాకర్ తెలిపారు..

ఎన్నికలు వచ్చాయంటే వ్యాపారాలు చేసుకొనే వారికి పండగే.. వ్యాపారస్తుల అందరికి కాదండోయ్.. ఇక ఎన్నికల్లో జెండాలకు, కండువాలకు ఉన్న ప్రత్యేకత వేరు. ఎక్కడ చూడు పార్టీల జెండాలు దర్శనమిస్తాయి. నేతల మెడల్లో కండువాలు కనిపిస్తాయి. మరి ఇన్ని లక్షల జెండాలు, కండువాలు ఎవరు, ఎక్కడ తయారు చేస్తున్నారనే ఆసక్తి కలుగుతోంది కదా !.. కాగా వీటిని తయారు చేసేది తెలంగాణ (Telangana)లో ఉన్న రాజన్న సిరిసిల్ల (Rajanna Sircilla) జిల్లాలో..

చుట్టు పక్కల రాష్ట్రాల్లో.. ఏ పార్టీ జెండా (Parties Flags) ఎగరాలన్నా ఇక్కడ తయారు చేయాల్సిందే. ఇప్పుడు ఏకంగా ఐదు రాష్ట్రాల్లో ఎన్నికలు (Five States Elections)ఉండటంతో.. సరిహద్దులు దాటి ఆయా పార్టీలు.. జెండాల తయారీ కోసం సిరిసిల్లకు తరలివస్తున్నాయి. జెండాలు తక్కువ ధరలకే ఇక్కడ లభిస్తుండడంతో పార్టీల నుంచి ఆర్డర్లు ఊపందుకున్నాయి. కొన్ని రాష్ట్రాల్లో షెడ్యూల్ రాకపోయినా ముందస్తుగా ఆర్డర్లు వస్తుండటంతో తయారీదారులు.. తీరిక లేకుండా గడుపుతున్నారు.

మరోవైపు సిరిసిల్లలో జెండా తయారీదారులు 15 మంది వరకు ఉన్నారు. వీరికి రోజుకు 50,000 నుంచి 75,000 వరకు జెండాలు తయారు చేసే సామర్థ్యం ఉంది. ఒక్కొక్కరి వద్ద 100 నుంచి 200 మంది కార్మికులు పనిచేస్తుండగా.. పరోక్షంగా వేలమందికి ఉపాధి లభిస్తుంది. రాష్ట్రంలో ఒక్కో ప్రధాన పార్టీ నుంచి దాదాపు 15 లక్షల వరకు జెండాలు, కండువాలు రూపొందించేలా.. ఆర్డర్లు వచ్చాయని తయారీదారులు చెబుతున్నారు.

త్వరలో జరిగే లోక్‌సభ ఎన్నికల కోసం (Election) తృణమూల్‌ కాంగ్రెస్‌కు చెందిన 5 లక్షల జెండాలు ఉత్పత్తి చేయబోతున్నామని తయారీదారులు చెబుతున్నారు.. చాలా మంది ఆర్డర్లు ఇవ్వడానికి సిద్ధంగా ఉన్నా వీటిని తయారు చేసేందుకు కావాల్సిన సిబ్బంది అందుబాటులో లేరని వాపోతున్నారు. మరోవైపు బీడీల తయారీతో గతంలో రోజుకు రూ.100 నుంచి రూ.150కి మించి ఆదాయం లభించక పోవడం వల్ల చాలా ఇబ్బందులు ఎదుర్కొన్నాం అని ఇక్కడి కార్మికులు తెలుపుతున్నారు. జెండాల తయారీతో దొరికే ఉపాధి కొద్ది రోజులు మాత్రమే లభిస్తుందని ఆవేదన పడుతున్నారు. దేశంలో ఒకేసారి ఎన్నికలు జరిగే కంటే వేర్వేరుగా ఎన్నికలు జరిగితేనే పని దొరుకుతుందని అంటున్నారు కార్మికులు..

ఎన్నికలు వచ్చాయంటే చాలు ఓటర్లను ఆకర్షించడానికి నేతలు ఎన్నో పాట్లు పడతారు. ఒకవైపు పార్టీ ప్రచారం నిర్వహిస్తూనే ఓటర్లకు పనుల్లో సహాయం చేస్తుంటారు. ప్రస్తుతం తెలంగాణలో (Telangana) పర్యటిస్తున్న కాంగ్రెస్ (Congress)అగ్రనేత రాహుల్ గాంధీ (Rahul Gandhi)ప్రజల్లో ఒకరిగా కలిసిపోయి వారి కష్టాల్లో పాలుపంచుకోవడం తరచుగా సోషల్ మీడియాలో కనిపిస్తూనే ఉంది.

అయితే నేడు కరీంనగర్ V-పార్క్ (Karimnagar V-Park) నుంచి మొదలైన కాంగ్రెస్ విజయ భేరి యాత్రలో భాగంగా జగిత్యాలకు (Jagityala) వెళుతోన్న రాహుల్ మార్గం మధ్యలో ఉన్న నూకపల్లి NAC స్టాప్ వద్ద ఆగారు. స్కూటీపై వెళుతున్న ప్రయాణికులతో ముచ్చటించి, చిన్నారులకు చాక్లెట్స్ అందించారు. కాసేపు వారితో మాట్లాడిన రాహుల్ పక్కనే వున్న టిఫిన్ బండి వద్దకు వెళ్లి దోస పిండి తీసుకుని దోసె వేశారు. అనంతరం జగిత్యాలకు పయనం అయ్యారు.

మరోవైపు తెలంగాణ ప్రయోజనాల కోసం కాంగ్రెస్ పార్టీతో పొత్తు పెట్టుకోవాలని జనసమితి పార్టీ నిర్ణయించింది. ఈ నేపథ్యంలో తెలంగాణకు వచ్చిన రాహుల్ గాంధీని ప్రొఫెసర్ కోదండరామ్ కలిశారు. ప్రస్తుతం కరీంనగర్ లో పర్యటిస్తున్న రాహుల్ గాంధీతో కోదండరామ్ భేటీ అయ్యారు. అనంతరం జగిత్యాల కార్నర్ మీటింగ్ లో పాల్గొనేందుకు రాహుల్ గాంధీ బయలుదేరారు.

తెలంగాణ (Telangana)ఎన్నికల పర్యటనలో భాగంగా జగిత్యాల (Jagityala) జిల్లాలో శుక్రవారం రాహుల్ గాంధీ (Rahul Gandhi) రోడ్ షో నిర్వహించారు. ఈ సందర్భంగా రాహుల్ మాట్లాడుతూ.. ఇంత ఎండలో మీటింగ్‌కు వచ్చిన అందరికీ ధన్యవాదాలు చెబుతూనే.. ఈ ఎన్నిక నియంత్రత్వ దొరల పాలనకు, ప్రజలకు మధ్య జరుగుతుందని అన్నారు. ప్రజల పోరాటం వల్ల వచ్చిన తెలంగాణలో రాచరిక పాలన ఏర్పడిందని రాహుల్ గాంధీ విమర్శించారు..

రాష్ట్రంలో అన్ని రేట్లతో పాటు పలురకాల దందాలు, మాఫియా గ్యాంగ్ లు కూడా పెరిగాయని రాహుల్ ఆరోపించారు. రాష్ట్రం ఒక కుటుంబం చేతిలో బంధీ అయిపోయిందని అన్నారు. రాష్ట్రాన్ని దోచుకొని జేబులు నింపుకుంటున్నారుని కేసీఆర్ (KCR)ఫ్యామిలీపై రాహుల్ ఘాటు వ్యాఖ్యలు చేశారు. నిజాం చెక్కర ఫ్యాక్టరీ ప్రభుత్వం ముసివేసిందని.. కాంగ్రెస్ ప్రభుత్వం వచ్చిన వెంటనే ఆ ఫ్యాక్టరీని తెరిపిస్తామని రాహుల్ హామీ ఇచ్చారు.

పసుపు మద్దతు ధరను పెంచుతామని రాహుల్ భరోసా ఇచ్చారు. రాష్ట్రంలో కాంగ్రెస్ ప్రభుత్వం రాగానే ఓబీసీ గణన దేశవ్యాప్తంగా చేస్తామన్నారు. దేశంలో ఉన్న డబ్బు అదానీ చేతుల్లోకి పోయేలా మోడీ, కేసీఆర్ పనిచేస్తున్నారని రాహుల్ సంచలన వ్యాఖ్యలు చేశారు. ప్రభుత్వాన్ని ప్రశ్నిస్తే కేసులంటారు.. ఎదురు తిరిగితే జైలుకు పంపుతారు. ఇదా ప్రజలు కోరుకొన్న తెలంగాణ అంటూ ప్రశ్నించారు. కాంగ్రెస్‌ ప్రభుత్వం ప్రజల ప్రభుత్వం అంటూ ఢిల్లీలో బీజేపీని, ఇక్కడ బీఆర్‌ఎస్‌ను ఓడించాలని రాహుల్‌ పిలుపునిచ్చారు.

ఢిల్లీలో మీకోసం పోరాడడానికి నేను సైనికునిలా ఉన్నానని రాహుల్ గాంధీ అన్నారు. సమస్యలపై పోరాటం చేస్తే లోక్ సభ సభ్యత్వం రద్దు చేశారని.. ఉంటున్న ఇల్లు తీసుకున్నారని రాహుల్ గాంధీ మండిపడ్డారు. మీ ఇల్లు అవసరం లేదు తీసుకోండి.. దేశమంతా నా ఇల్లే అని చెప్పినట్టు ఈ సందర్భంగా గుర్తు చేశారు. మరోవైపు ఈ రోజుతో ఉమ్మడి కరీంనగర్ జిల్లాలో రాహుల్ విజయభేరీ యాత్ర ముగిసింది.

తెలంగాణ (Telangana) రాష్ట్ర నేతలంతా అసెంబ్లీ ఎన్నికల వేడిలో ఉన్నారు. ఒకవైపు బీఆర్‌ఎస్‌ (BRS) ప్రతిపక్షాలను విమర్శిస్తూ ప్రచారాలు నిర్వహిస్తుండగా.. మరోవైపు బీఆర్‌ఎస్‌ ముఖ్య నేతలు పార్టీలో అసంతృప్తిగా ఉన్న నేతలను బుజ్జగిస్తూ పార్టీకి నష్టం కలగకుండా చర్యలు తీసుకొంటున్నారు. అయినా ఎక్కడో ఒకచోటా విభేధాలు బయటపడుతున్నాయి. ఈ ఎన్నికల్లో హ్యాట్రిక్ కొట్టాలని చూస్తోన్న సీఎం కేసీఆర్(KCR)కి ఈ సమస్య తలనొప్పిగా మారిందని అనుకొంటున్నారు.

అయితే బీఆర్‌ఎస్‌ లో నెలకొన్న వర్గపోరు పరిష్కరించే బాధ్యతలని భుజాన ఎత్తుకొన్న చిన్నదొర కేటీఆర్ (KTR)వాటిని ఇప్పటి వరకు సమర్ధవంతంగా నిర్వహిస్తున్నారని ప్రచారం.. కాగా మరో నియోజక వర్గంలో అసమ్మతి గొంతు వినిపిస్తోంది. జోగులాంబ గద్వాల (Jogulamba Gadwal)జిల్లా అలంపూర్‌ బీఆర్‌ఎస్‌ ఎమ్మెల్యే అబ్రహాం (MLA Abraham), ఎమ్మెల్సీ చల్లా వెంకట్రామిరెడ్డి (MLC Challa Venkatamireddy)వర్గాల మధ్య వచ్చిన చీలిక కేడర్‌లో గందరగోళం సృష్టిస్తోంది. ఈ ఎన్నికల్లో టికెట్‌ మళ్లీ ఎమ్మెల్యే అబ్రహాంకి ఇవ్వడాన్ని పార్టీలో ఉన్న కొందరు బలంగా వ్యతిరేకిస్తున్నారని, ఆయన్ని మార్చాలని డిమాండ్‌ చేస్తున్నట్టు గుసగుసలు వినిపిస్తున్నాయి.

అబ్రహాంని మార్చాలంటూ ఏకంగా ఛలో హైదరాబాద్ కార్యక్రమం నిర్వహించారని, బీఆర్‌ఎస్‌ వర్కింగ్ ప్రెసిడెంట్ కేటీఆర్‌ని కలిసి ఏకవాక్య తీర్మానం సమర్పించి.. అబ్రహాం స్థానంలో మరో అభ్యర్థిని ప్రకటించాలని కోరినట్టు వార్తలు వస్తున్నాయి. మరోవైపు రెండువర్గాల నేతలు, అనుచరుల సమావేశాలు అలంపూర్ బీఆర్ఎస్‌లో పొలిటికల్ హీట్ పుట్టిస్తున్నాయి. ఇక బీఫాం చేతికొస్తుందనుకున్న టైంలో అసమ్మతి వర్గం అడ్డుపడటంతో అబ్రహాం గందరగోళంలో పడినట్టు అనుచరులు అనుకొంటున్నారు.

మరోవైపు వ్యతిరేకవర్గం ప్రచారాన్ని నమ్మొద్దంటున్న ఎమ్మెల్యే వర్గం.. అధినాయకత్వానికి అభ్యర్థి మార్పు ఆలోచనే వద్దని మొరపెట్టుకున్నట్టు సమాచారం. ఒకవేళ ఆయన టికెట్‌ మారిస్తే స్వతంత్ర అభ్యర్థిగానైనా నిలబెట్టి గెలిపించుకుంటామని ఎమ్మెల్యే అబ్రహాం అనుకూలవర్గ నేతలు స్పష్టం చేస్తున్నారనే మాటలు వినిపిస్తున్నాయి.

మరోవైపు ఉమ్మడి పాలమూరు జిల్లాలో మిగిలిన అభ్యర్థులందరికీ బీఫాంలు ఇచ్చిన అధినేత.. అలంపూర్‌ విషయంలో పునరాలోచనలో ఉన్నట్టు ప్రచారం జరుగుతోంది. అలంపూర్‌ అభ్యర్థిని మార్చే ఆలోచనతోనే అబ్రహాంకి బీఫాం ఇవ్వలేదంటోంది ఎమ్మెల్యే వ్యతిరేకవర్గం. దీంతో అలంపూర్‌లో బీఆర్‌ఎస్‌ అభ్యర్థిని మార్చే అవకాశం ఉందా? చివరికి బీ ఫాం ఎవరికిస్తారన్నది ప్రస్తుతం ఆసక్తికరంగా మారింది.