Politics

సంగారెడ్డి (Sangareddy) నియోజకవర్గంలో పలు కార్యక్రమాల్లో పాల్గొన్నారు మంత్రి హరీష్ రావు (Harish Rao). ముందుగా, బీసీ బంధు ద్వారా లక్ష రూపాయల ఆర్థిక సాయం చెక్కుల పంపిణీ కార్యక్రమంలో పాల్గొన్నారు. 300 మంది లబ్ధిదారులకు లక్ష రూపాయల చెక్కులు పంపిణీ చేశారు. ఆ తర్వాత పంచాయతీ సెక్రటరీలను రెగ్యులరైజ్ చేస్తూ ఉద్యోగ నియామక పత్రాలను అందించారు.

సైదాపూర్, గంగాపూర్, మారేపల్లి గ్రామాలకు సంబంధించిన లబ్ధిదారులకు ఇళ్ల స్థలాల ప్రొసీడింగ్స్ అందించారు హరీష్ రావు. అన్ని వర్గాల సంక్షేమమే సీఎం కేసీఆర్ లక్ష్యమని తెలిపారు. అనంతరం అకాల వర్షాలతో వడగండ్ల వానతో పంట నష్టపోయిన రైతులకు (Farmers) పరిహారం అందించే కార్యక్రమంలో పాల్గొన్నారు హరీష్ రావు. 4,300 ఎకరాలలో పంట నష్టానికి 4 కోట్ల 5 లక్షల రూపాయలను 393 మంది రైతులకు వారి బ్యాంకు (Bank) ఖాతాల్లో జమ చేశారు. ఈ సందర్భంగా మాట్లాడిన హరీష్ రావు.. కాంగ్రెస్ పై విరుచుకుపడ్డారు.

గతంలో వున్న కాంగ్రెస్ (Congress) ప్రభుత్వం వర్షాలకు పంట దెబ్బతింటే ఎకరానికి 2 వేలు ఇచ్చేదని.. అదికూడా ఎప్పుడొస్తాయో తెలిసేది కాదని చెప్పారు. కానీ, తెలంగాణ రైతు ప్రభుత్వం ఎకరానికి 10 వేల చొప్పున వారి బ్యాంకు ఖాతాల్లో వేస్తోందని తెలిపారు. రూ.99 వేల పంట రుణాల మాఫీకి సంబంధించిన మొత్తాన్ని ప్రభుత్వం సోమవారం రైతులకు విడుదల చేయనుందని చెప్పారు. మరో పక్షం రోజుల్లో లక్ష ఆపై ఉన్న పంట రుణాలను కూడా మాఫీ చేస్తామని తెలిపారు.

‘‘రేవంత్ రెడ్డి 3 గంటలు రైతులకు చాలు అంటున్నాడు వారికి మీరే సమాధానం చెప్పాలి. కాంగ్రెస్ అంటే యూరియా బస్తాలకోసం చెప్పులు లైన్ లో పెట్టిన ప్రభుత్వం. కేసీఆర్ రుణమాఫీ చేయడేమో అని ధర్నా చేద్దాం అనుకున్న కాంగ్రెస్ వాళ్లకు రైతులు దొరకడం లేదు. ధరణితో రైతులకే పూర్తి సర్వాధికారాలు తమ భూములపై వచ్చాయి. ధరణిని రద్దు చేస్తామంటున్న కాంగ్రెస్ మళ్ళీ బ్రోకర్ల రాజ్యం తెచ్చేందుకు ప్రయత్నిస్తోంది. కాంగ్రెస్ అధికారంలో ఉన్న కర్ణాటకలో 24 గంటల విద్యుత్తు, రైతుబంధు, రైతు బీమా వంటి పథకాలు ఎందుకు అమలు చేయడం లేదు’’ అని ప్రశ్నించారు. 3 గంటల కరెంటు ఇస్తామనే కాంగ్రెస్ కావాలో, బాయిలకాడ మీటర్లు పెడతామన్న బీజేపీ కావాలో, 3 పంటల 24 గంటల ఉచిత కరెంటు ఇచ్చిన బీఆర్ఎస్ కావాలో నిర్ణయించుకోవాలని ప్రజలను కోరారు హరీష్ రావు.

ఉచిత కరెంట్ పై ప్రభుత్వం చెప్పేవి అబద్ధాలన్నారు కాంగ్రెస్ ఎంపీ కోమటిరెడ్డి వెంకట్ రెడ్డి (Komati Reddy Venkat Reddy). లాగ్ బుక్స్ తో ఈ విషయాన్ని బయటపెట్టానని తెలిపారు. భువనగిరి జిల్లా వలిగొండ మండల పరిధిలో మాజీ ఎంపీపీ నర్సయ్య అంతిమయాత్రలో ఆయన పాల్గొన్నారు. ఈ సందర్భగా మాట్లాడుతూ.. మరోసారి సబ్ స్టేషన్ దగ్గర ధర్నాకు దిగుతానని తెలిపారు.

కాంగ్రెస్ (Congress) ప్రభుత్వంలో 24 గంటల కరెంట్ ఇస్తామని స్పష్టం చేశారు వెంకట్ రెడ్డి. మొదటి సంతకం 2 లక్షల రుణమాఫీ పైనే చేస్తామని.. 4 వేల రూపాయల పెన్షన్ ఇస్తామని తెలిపారు. కేసీఆర్ (KCR) పాలనలో విచ్చలవిడిగా భూములు అమ్మేస్తున్నారని.. 50వేల కోట్లు మద్యం అమ్మకాలపైనే వస్తున్నాయని.. ఆ పైసలన్నీ ఎటుపోతున్నాయని ప్రశ్నించారు. ఈనెల 16, 17 తర్వాత బస్సుయాత్ర మొదలుపెడతామన్న ఆయన… తెలంగాణ అంతా పర్యటిస్తామని చెప్పారు.

భువనగిరి అంటే పోరాటాలకు మారుపేరు అని.. ఇక్కడి ప్రభుత్వ ఆస్పత్రిలో ఫ్యాన్లు, బాత్రూమ్స్ లేకపోతే 20 లక్షలు పెట్టి బాగు చేయించానని తెలిపారు. అలాగే, మైనార్టీల కోసం 20 లక్షలు పెట్టి దర్గా కట్టించానని వివరించారు. పేద విద్యార్థులు తన దగ్గరకు వస్తే పార్టీలకు అతీతంగానే సాయం చేస్తున్నానని చెప్పారు. కాంగ్రెస్ పార్టీ అధికారంలోకి రాబోతోందని.. ఏ సర్వే చూసినా జనం కాంగ్రెస్ నే గెలిపిస్తామని చెబుతున్నారని అన్నారు.

వడగళ్ల వానకు పంట నష్టం జరిగితే కేసీఆర్ ఒక్క రూపాయి ఇవ్వలేదని మండిపడ్డారు కోమటిరెడ్డి. గ్రూప్-2 పరీక్ష పోస్ట్ పోన్ చేయమని అభ్యర్థులు అడుగుతుంటే పట్టించుకోవడం లేదన్నారు. తమ ప్రభుత్వం వచ్చాక ఉద్యోగాలను పారదర్శకంగా ఇస్తామని తెలిపారు. 5 లక్షల మంది టీఆర్టీ కోసం ఎదురుచూస్తున్నారని… తమ ప్రభుత్వం వచ్చిన 2, 3 నెలల్లోనే నోటిఫికేషన్ ఇస్తామని హామీ ఇచ్చారు.

కాంగ్రెస్ ఎంపీ కోమటిరెడ్డి వెంకట్ రెడ్డి (Komatireddy Venkat Reddy) తన నియోజకవర్గ పనుల కోసం కేంద్రంతో ఎప్పటికప్పుడు సంప్రదింపులు జరుపుతుంటారు. తాజాగా మరోసారి కేంద్రానికి స్పెషల్ రిక్వెస్ట్ చేశారు. FPCLలలో మౌలిక సదుపాయాల కోసం కేంద్ర వ్యవసాయ శాఖ మంత్రి నరేంద్ర సింగ్ తోమర్ (Narendra Singh Tomar) కి లేఖ రాశారు. కోమటిరెడ్డి ప్రతీక్ ఫౌండేషన్ ద్వారా నల్గొండ (Nalgonda) లో స్థాపించిన FPCLల కోసం నిధులు సమకూర్చాలని కోరారు.

నల్గొండ, మునుగోడు, నార్కెట్ పల్లి మండలాల్లో దేశ్ పాండే ఫౌండేషన్ తో కలిసి కోమటిరెడ్డి ప్రతీక్ ఫౌండేషన్ FPCLలను ఏర్పాటు చేసింది. వీటిని ప్రారంభించినప్పటి నుంచి వేలాది మంది రైతులు లబ్ది పొందుతున్నారు. ఆయా ప్రాంతాలు వెనుబడినవి కావడంతో మౌలిక సదుపాయాల కోసం రైతులు కేంద్ర నిధులను కోరుతున్నారు. గోదాములు, కూరగాయల గ్రేడింగ్ షెడ్లు, సౌరశక్తితో పని చేసే కోల్ట్ స్టోరేజీ యూనిట్లు, ఇంటిగ్రేటెడ్ ప్యాకేజింగ్ షెడ్స్, ట్రాక్టర్లు, ఇలా ఇతర వ్యవసాయ నిర్మాణాల కోసం నాబార్డ్ నుంచి నిధులను FPCLలు కోరుతున్నాయి.

ఈ సదుపాయాలు కల్పిస్తే.. రైతులకు ఎంతో మేలు జరుగుతుంది.. వారి ఉత్పత్తులు మార్కెట్ చేసుకోవడానికి వీలు ఉంటుందని అంటున్నారు కోమటిరెడ్డి. కాబట్టి, దీన్ని పరిగణనలోకి తీసుకుని FPCLలకు అవసరమైన మౌలిక సదుపాయాలు కల్పించేందుకు అవసరమైన నిధులను విడుదల చేయాలని కేంద్రాన్ని కోరారు కాంగ్రెస్ ఎంపీ.