Telangana

ఐఏఎస్ స్మితా సబర్వాల్ (Smita Sabharwal) ఓ డైనమిక్ ఆఫీసర్. గతంలో రాష్ట్రంలోని పలు జిల్లాలో కలెక్టర్‌గా పని చేసి తన దైన పని తీరుతో గొప్ప పేరు సంపాదించుకున్నారు. ఆమె పని తీరును మెచ్చి గతంలో బీఆర్ఎస్ ప్రభుత్వం (BRS Governament) సీఎంలో కీలక బాధ్యతలను అప్పగించింది.

తెలంగాణ నీటి పారుదల శాఖ కార్యదర్శిగా ఉంటూ కాళేశ్వరం, మిషన్ భగీరథ పనులను ఆమె పర్యవేక్షించారు. ఇటీవల జరిగిన అసెంబ్లీ ఎన్నికల్లో బీఆర్ఎస్ ఓటమి పాలైంది. కాంగ్రెస్ సర్కార్ వచ్చిన వెంటనే పెద్ద ఎత్తున ఐఏఎస్, ఐపీఎస్‌ల బదిలీలను చేపట్టింది. ఇందులో భాగంగా సీఎంవో కార్యదర్శిగా ఉన్న స్మిత సబర్వాల్‌ను ఫైనాన్స్ కమిషన్ సభ్య కార్యదర్శిగా బదిలీ చేశారు.

తాజాగా స్మితా సబర్వాల్ చేసిన ట్వీట్ పెద్ద ఎత్తున చర్చ జరుగుతోంది. మంటల్లో నడవాల్సి వచ్చిన సమయంలో ఎలా నడుస్తున్నామనేది చాలా ముఖ్యమైన విషయమన్నారు. అప్పుడు తలపైకి ఎత్తి ధైర్యంగా, అత్యంత బలంగా నడవాలని ట్వీట్ చేశారు. ఈ పోస్టును చూసిన ఆమె అభిమానులు ట్వీట్ పై పెద్ద ఎత్తున స్పందిస్తున్నారు.

అసలు ఏం జరిగింది మేడమ్ అంటూ పలువురు కామెంట్స్ పెడుతున్నారు. మీరు ఒక మంచి అధికారి… గొప్ప సమర్థత మీకు ఉంది… ఆ దేవుడి ఆశీస్సులు మీకు ఎప్పుడూ ఉంటాయి… మీరు వెనకడుగు వేయాల్సిన పని లేదు… ఎన్ని సమస్యలు ఎదురైనా ధైర్యంగా ముందుకు నవవండది అంటూ మద్దతు పలుకుతున్నారు.

రాష్ట్రంలో రియల్ ఎస్టేట్ (Real Estate) అభివృద్ధికి కాంగ్రెస్ (Congress) సర్కార్ ప్రాధాన్యతనిస్తోందని డిప్యూటీ సీఎం భట్టి విక్రమార్క (Batti Vikramarkha) అన్నారు. రాష్ట్ర ఖజానాకు పెద్ద ఎత్తున ఆదాయ మార్గాలు తెచ్చే వెల్త్ క్రియేటర్లను ఏ మాత్రమూ ఇబ్బంది పెట్టబోమని వెల్లడించారు. వారు ఎదుర్కొంటున్న సమస్యలను తీర్చేందుకు చర్యలు చేపడతామని హామీ ఇచ్చారు.

డా. బీఆర్ అంబేడ్కర్ సచివాలయంలో డిప్యూటీ సీఎం భట్టి విక్రమార్కను నేషనల్ రియల్ ఎస్టేట్ డెవలప్ మెంట్ కౌన్సిల్ తెలంగాణా విభాగం ప్రతినిధి బృందం కలిసింది. ఈ సందర్బంగా రాష్ట్రంలో రియల్ ఎస్టేట్‌ను మరింత అభివృద్ధి చేసేందుకు పలు సూచనలు ఆ బృందం సూచించింది. ఈ మేరకు ప్రతిపాదనలను డిప్యూటీ సీఎంకు డిప్యూటీ సీఎంకు అందచేసింది.

ఈ సందర్బంగా డిప్యూటీ సీఎం భట్టి విక్రమార్క మాట్లాడుతూ…. డబ్బులు కట్టి గత రెండు మూడేండ్లుగా పెండింగ్‌లో ఉన్న ఎల్.ఆర్.ఎస్. దరఖాస్తులను పరిష్కరించేందుకు ప్రభుత్వం తగు నిర్ణయం తీసుకుంటుందన్నారు. ధరణిపై తగిన సలహాలు, సూచనలను అందజేస్తే తాను పరిశీలించడంతో పాటు ధరణి పై ఏర్పాటు చేసిన కమిటీకి అందిస్తానన్నారు.

థేమ్స్ నది మాదిరిగా మూసీ నదీ పరివాహక ప్రాంతాన్ని అభివృద్ధి చేయాలని ప్రభుత్వం నిర్ణయించిందన్నారు. దీంతో పాటు రీజినల్ రింగ్ రోడ్ నిర్మాణంతో హైదరాబాద్ నగరం మరింత అభివృద్ధి చెందుతుందని చెప్పారు. మూసీ నది ప్రక్షాళనతో సుందరీకరణ జరిగి పర్యాటకం అభివృద్ధి చెందుతుందన్నారు.

రాష్ట్ర ఆర్థిక వ్యవస్థకు హైదరాబాద్ ప్రధాన శక్తిగా మారుతుందని పేర్కొన్నారు. హైదరాబాద్ నగరాన్ని కాలుష్య రహిత నగరంగా మార్చడానికి శివారు ప్రాంతాల్లో ఇండస్ట్రియల్, ఫార్మా క్లస్టర్లను ఏర్పాటు చేస్తామని హామీ ఇచ్చారు.

రాష్ట్రంలో రియల్ ఎస్టేట్ రంగ అభివృద్ధికి నేషనల్ రియల్ ఎస్టేట్ డెవలప్ మెంట్ కౌన్సిల్ తెలంగాణా విభాగం ప్రతినిధి బృందం పలు సూచనలను, సలహాలను అందించింది. భవన నిర్మాణ రంగ అభివృద్ధికి ‘రేరా’ఏర్పాటైందని , భవన నిర్మాణ అనుమతులకు ప్రస్తుతం 10 శాతం మార్టగేజ్ విధానం ఉందని, దాన్ని ఎత్తి వేయాలని కోరారు. రాష్ట్రంలో అధికంగా ఉన్న రిజిస్ట్రేషన్ చార్జీలను తగ్గించాలని, జీ.ఓ. 50 ను ఎత్తివేయాలని సూచించారు.

భవన నిర్మాణాలకు తీసుకుంటున్న తాత్కాలిక విధ్యుత్ కనెక్షన్లకు యూనిట్ కు రూ. 9 నుండి 14 రూపాయలకు పెంచారని గుర్తు చేశారు. దీన్ని తగ్గించే విధంగా చర్యలు చేపట్టాలని కోరారు. రాష్ట్రంలో గత ఆరు నెలలనుండి ఎన్విరాన్ మెంట్ కమిటీ లేదని, వెంటనే ఆ కమిటీని వేయాలని కోరారు. పెండింగ్‌లో ఉన్న లక్షలాది ఎల్.ఆర్.ఎస్ దరఖాస్తులను వెంటనే పరిష్కరించాలని, తద్వారా పెద్ద ఎత్తున నిర్మాణాలు ప్రారంభమై ప్రభుత్వానికి ఆదాయం వస్తుందన్నారు.

ధరణి (DHARANI) చట్టంలోనే చాలా లోపాలు ఉన్నాయని కిసాన్ సెల్ జాతీయ ఉపాధ్యక్షుడు, ధరణి కమిటీ సభ్యుడు కోదండ రెడ్డి (Kodanda Reddy) అన్నారు. ధరణిలో ఉన్నలోపాల వల్ల లక్షలాది మంది రైతులు ఇబ్బంది పడుతున్నారని పేర్కొన్నారు. 2014 వరకు రైతులకు భూముల హక్కుల విషయంలో ఎలాంటి సమస్యలు రాలేదని తెలిపారు. 2014 నుంచి ఇప్పటి వరకు రెవెన్యూ హక్కు హరించి పోయిందని వెల్లడించారు.

సీసీఎల్ఏలో ధరణిపై ప్రభుత్వం ఏర్పాటు చేసిన కమీటీ సమావేశం జరిగింది. ఈ సందర్భంగా పోర్టల్‌లో లోపాలు, చేయాల్సిన సవరణలపై కమిటీ చర్చించింది. సమావేశం అనంతరం కోదండ రెడ్డి మాట్లాడుతూ…. ధరణి పోర్టల్‌లో లోపాల వల్ల బీఆర్ఎస్ హయాంలో చాలా మంది పేద రైతులకు రైతుబంధు సాయం అందలేదన్నారు.

‘గత ప్రభుత్వం చేసిన చట్టాల్లో అనేక లోపాలున్నాయి. వాటిని సవరించాల్సి ఉంది. ధరణిలో ఉన్న లోపాల కారణంగా లక్షల మంది రైతులు ఇబ్బంది పడుతున్నారు. 2018లో ధరణి సర్క్యులర్, 2020లో చట్టాన్ని గత ప్రభుత్వం తీసుకు వచ్చింది. ఆ తర్వాత కేబినెట్ కమిటీని ఏర్పాటు చేసింది. ధరణితో సమస్య పరిష్కారం కాలేదు’అని చెప్పారు.

‘గతంలో భూమి హక్కుల విషయంలో చట్టాలు సమర్థవంతంగా ఉన్నాయి. 2018 వరకు హక్కు పుస్తకం ఉంది. భూమి హక్కును మళ్ళీ అందిస్తాం. పటిష్టమైన రెవెన్యూ చట్టాన్ని తీసుకురావాల్సిన అవసరం ఉంది. ఆరేండ్లుగా లక్షలాది మంది రైతులు హక్కు పుస్తకాలు లేక అనేక సమస్యలు ఎదుర్కొంటున్నారు. రెవెన్యూ వ్యవస్థలో చిన్న ఇబ్బందులు తప్ప గతంలో హక్కులకు ఎలాంటి ఇబ్బందులు లేవు’అని వివరించారు.

‘వేల ఎకరాలు ఉన్న వారికి కూడా రైతుబందు వచ్చింది కానీ చిన్న, సన్నకారు రైతులకు రైతు బంధు రాలేదు.. భవిష్యత్‌లో మళ్ళీ ఇబ్బందులు రాకుండా హక్కుదారు పేరు ఆన్లైన్ లో ఉండాల్సిందే. తొందరలోనే మధ్యంతర నివేదిక ఇస్తాం. కాంగ్రెస్ సర్కార్ ఈ విషయాన్ని సీరియస్ గా తీసుకుంది. భూ రికార్డులను సవరణ చేయాలని ప్రభుత్వం భావిస్తోంది’అని అన్నారు.

రంగారెడ్డి జిల్లాలో ప్రోటోకాల్ (Protocol Issue)రగడ జరిగింది. కేశంపేట మండలం కొత్తపేటలో గ్రామపంచాయతీ నూతన భవన ప్రారంభోత్సవాన్ని నిర్వహించారు. ఈ సందర్బంగా ప్రోటోకాల్ రగడ రాజుకుంది. ఘర్షణ పూరిత వాతావరణం నెలకొనడంతో పోలీసు(Police)లు రంగ ప్రవేశం చేశారు. కొత్తపేట సర్పంచ్ నవీన్, ఎంపీటీసీ మల్లేశ్‌ను పోలీసులు అరెస్టు చేశారు.

విషయం తెలుసుకున్న ఎంపీ శ్రీనివాస్ రెడ్డి, మాజీ ఎమ్మెల్యే అంజయ్య అక్కడకు చేరుకున్నారు. పెద్ద ఎత్తున బీఆర్ఎస్ కార్యకర్తలతో కలిసి పోలీసు స్టేషన్‌కు వెళ్లారు. ఈ సందర్బంగా పోలీసులతో ఎంపీ వాగ్వాదానికి దిగారు. దీంతో పోలీసులకు వ్యతిరేకంగా బీఆర్ఎస్ నేతలు పెద్ద ఎత్తున నినాదాలు చేశారు. సర్పంచ్, ఎంపీటీసీలను అరెస్టు ఎందుకు చేశారని పోలీసులను ఎంపీ ప్రశ్నించారు.

పంచాయతీ భవన్ వద్ద ఉద్రిక్త పరిస్థితులు నెలకొన్నాయని సీఐ లక్ష్మీ రెడ్డి తెలిపారు. దీంతో అధికారులు తమకు ఫిర్యాదు చేశారని సీఐ చెప్పారు. ఈ క్రమంలో ఎలాంటి అవాంఛనీయ ఘటనలు జరగకుండా ఉండేందుకు సర్పంచ్, ఎంపీటీసీని అదుపులోకి తీసుకున్నామని ఎంపీకి వివరించారు. దీనిపై ఎంపీ అసహనం వ్యక్తం చేశారు. ఈ విషయంపై కలెక్టర్‌తో మాట్లాడుతున్నట్టు ఎంపీ తెలిపారు.

మరోవైపు సర్పంచ్‌ను విడుదల చేయాలంటూ ఆందోళనకారులు నిరసనకు దిగారు. సర్పంచ్ ను విడుదల చేయాలంటూ నినాదాలు చేశారు. సర్పంచ్ ను అడ్డుకున్న వారిపై కేసులు పెట్టాలంటూ డిమాండ్ చేస్తున్నారు. దీంతో ఉద్రిక్త పరిస్థితులు నెలకొన్నాయి. ఈ క్రమంలో సైబరాబాద్ కమిషనర్ కు ఎంపీ ఫోన్ చేసి
మాట్లాడారు.

బీఆర్ఎస్ (BRS) పార్టీ అంటే అధికార పార్టీకి భయం పట్టుకుందని ఆలేరు మాజీ ఎమ్మెల్యే గొంగిడి సునితాలక్ష్మారెడ్డి (Sunita Lakshmareddy) అన్నారు. కాంగ్రెస్ (Congress) పాపాలకు ఒడిగడుతోందంటూ మండిపడ్డారు. యాదాద్రి భువనగిరి జిల్లా మల్లాపురంలో బీఆర్ఎస్ భవనం కూల్చివేతపై ఆమె తీవ్ర ఆగ్రహం వ్యక్తం చేశారు.

కాంగ్రెస్‌కు చెందిన ప్రజా ప్రతినిధుల మాటలు నమ్మి ఎలాంటి విచారణ జరపకుండానే అధికారులు బీఆర్‌ఎస్ భవనాన్ని కూల్చడం దారుణమని అన్నారు. సదరు భవనాన్ని అధికారులు తమ ఆధీనంలోకి తీసుకుని అధికార కార్య కలాపాలకు వినియోగించే అవకాశం ఉందన్నారు. అయినప్పటికీ బీఆర్ఎస్ భవనాన్ని విచక్షణారహితంగా కూల్చి వేయడం సరికాదన్నారు.

శాంతియుతంగా ఉన్న ఆలేరు నియోజకవర్గంలో కాంగ్రెస్ అరాచకాలు సృష్టిస్తోందని నిప్పులు చెరిగారు. బీఆర్‌ఎస్‌పై దాడులకు పాల్పడుతూ గ్రామాల్లో భయానక వాతావరణాన్ని సృష్టిస్తోందంటూ ధ్వజమెత్తారు. ప్రతి గ్రామంలో ప్రభుత్వ భూముల్లో నిర్మించిన శ్మశాన వాటిక, డంపింగ్ యార్డులను కూల్చేస్తారా అని నిలదీశారు.

యాదగిరిగుట్ట మండలం మల్లాపురంలో నిన్న అర్ధరాత్రి 2 గంటల సమయంలో బీఆర్ఎస్ పార్టీ కార్యాలయాన్ని అధికారులు కూల్చివేశారు. 100 మంది పోలీసుల బందోబస్తు మధ్య బీఆర్ఎస్ ఆఫీసును జేసీబీతో నేలమట్టం చేశారు. ఎలాంటి నోటీసులు ఇవ్వకుండా పార్టీ కార్యాలయంపై కాంగ్రెస్ పార్టీ దాడులకు దిగిందని పార్టీ శ్రేణులు చెబుతున్నాయి.

ఎమ్మెల్సీ (MLC)లుగా ఎన్ఎస్‌యూఐ (NSUI)రాష్ట్ర అధ్యక్షుడు బల్మూరి వెంకట్ (Balmuri Venkat), టీపీసీసీ (TPCC) వర్కింగ్ ప్రెసిడెంట్ మహేశ్ కుమార్ గౌడ్ (Mahesh Kumar Goud) ఏకగ్రీవంగా ఎన్నికయ్యారు. ఇతర పార్టీల నుంచి అభ్యర్థులు ఎవరూ బరిలో లేకపోవడంతో వారి ఎన్నిక ఏకగ్రీవం అయింది.

ఈ మేరకు వారిద్దరూ ఎమ్మెల్సీలుగా ఎన్నికైనట్టు అసెంబ్లీ సెక్రటరీ ప్రకటించారు. బల్మూరి వెంకట్, మహేశ్ కుమార్ గౌడ్‌లకు అసెంబ్లీ కార్యాలయం నుంచి రిటర్నింగ్ అధికారి ధ్రువీకరణ పత్రాన్ని అందజేయనున్నారు. దీంతో ఆ సర్టిఫికెట్‌ను తీసుకునేందుకు అసెంబ్లీకి అభిమానులు, కార్యకర్తలతో కలిసి ఆ ఇద్దరు నేతలు భారీ ర్యాలీగా బయలు దేరారు.

ఇటీవల జరిగిన అసెంబ్లీ ఎన్నికల్లో కడియం శ్రీ హరి, పాడి కౌశిక్ రెడ్డిలు ఎమ్మెల్యేలుగా విజయం సాధించారు. ఈ నేపథ్యంలో ఆ ఇద్దరూ తమ ఎమ్మెల్సీ పదవులకు రాజీనామా చేశారు. దీంతో ఎమ్మెల్యే కోటాలో రెండు ఎమ్మెల్సీ స్థానాలు ఖాళీ అయ్యాయి. దీంతో ఈ రెండు స్థానాలను భర్తీ చేసేందుకు కేంద్ర ఎన్నికల సంఘం ఇటీవల నోటిఫికేషన్ విడుదల చేసింది.

ఇందులో ఎమ్మెల్యేల సంఖ్యాత పరంగా చూస్తే కాంగ్రెస్ కు బలం ఎక్కువగా ఉంది. దీంతో ఈ రెండు స్థానాలు అధికార పార్టీకే దక్కే అవకాశం ఉండటంతో ఈ ఎన్నికలు బీఆర్ఎస్ దూరంగా ఉంది. నామినేషన్ల ఉప సంహరణకు ఈ రోజు చివరి రోజు కావడం ఇప్పటి వరకు ఇతరులెవరూ నామినేషన్ వేయకపోవడంతో ఆ ఇద్దరు నేతలను ఎమ్మెల్సీలుగా ఎన్నికైనట్టు ఎన్నికల సంఘం ప్రకటించింది.