Telangana

తెలంగాణలో కొత్త ప్రభుత్వం (NEW Governament) కొలువు దీరనుంది. రాష్ట్రంలో కొత్త శాసనసభను ఏర్పాటు చేస్తూ గెజిట్ జారీ అయ్యింది. రాష్ట్ర ప్రధాన ఎన్నికల అధికారి వికాస్‌ రాజ్ (Vikas Raj), కేంద్ర ఎన్నికల సంఘం ప్రధాన కార్యదర్శి అవినాష్ కుమార్ నేతృత్వంలోని బృందం ఈ గెజిట్ ను గవర్నర్ తమిళి సై సౌందర రాజన్ కు అందజేశారు. మరోవైపు మంత్రి వర్గం సిఫారసుల మేరకు రెండో శాసన సభను రద్దు చేశారు.

ఇక శాసనసభ కార్యదర్శి నరసింహాచార్యులు కూడా రాజభవన్‌కు వెళ్లారు. ప్రస్తుత అసెంబ్లీ రద్దు తీర్మాన ప్రతిని గవర్నర్ కు ఆయన అందజేశారు. కొత్త మంత్రుల కోసం వాహనాలను అధికారులు రెడీ చేశారు. ఇది ఇలా వుంటే సీఎల్పీ నేత ఎంపికపై ఏఐసీసీ కసరత్తులు చేస్తోంది. ఏఐసీసీ నుంచి క్లారిటీ రాగానే సీఎం ప్రమాణ స్వీకార కార్యక్రమాన్ని నిర్వహించనున్నారు. రాజ్ భవన్‌లో ఈ రోజు సాయంత్రం సీఎం ప్రమాణ స్వీకారం చేయనున్నారు.

ఈసీ బృందం గవర్నర్ ను కలిసిన నేపథ్యంలో ఇటు కాంగ్రెస్ ప్రతినిధులు కూడా గవర్నర్ ను కలవనున్నారు. సీఎల్పీ నేతగా ఎన్నికయ్యే వ్యక్తి పేరును గవర్నర్ కు అందించనున్నారు. అనంతరం ప్రభుత్వ ఏర్పాటుకు ఆహ్వానించాల్సిందిగా గవర్నర్ ను కోరనున్నారు. సీఎల్పీ నేతగా ఎన్నికైన వ్యక్తిని డిజిగ్నేటెడ్ సీఎం హోదా కల్పించి ప్రమాణ స్వీకారానికి గవర్నర్ ఆహ్వానించనున్నారు.

నూతన సీఎం ప్రమాణ స్వీకారం సోమవారం జరుగుతుందని నిన్నటి నుంచి వార్తలు వస్తున్నాయి. ఈ నేపథ్యంలో అటు రాజ్ భవన్ వర్గాలు కూడా సీఎం ప్రమాణ స్వీకారానికి చకా చకా ఏర్పాట్లు చేస్తున్నాయి. రేవంత్ రెడ్డికి సీఎం పదవి ఇస్తారంటూ వార్తలు జోరందుకున్నాయి. ఆయనతో పాటు భట్టికి విక్రమార్క, సీతక్కకు డిప్యూటీ సీఎం ఇస్తారంటూ వార్తలు చెక్కర్లు కొడుతున్నాయి.

జూబ్లిహిల్స్ (Jubilee Hills) అసెంబ్లీ నియోజకవర్గ తుది ఫలితాలను ఈ రోజు ప్రకటించారు. జూబ్లి హిల్స్‌లో బీఆర్ఎస్ అభ్యర్థి మాగంటి గోపినాథ్ (Maganti Gopinath) గెలుపొందినట్టు ఎన్నికల సంఘం ప్రకటించింది. కాంగ్రెస్ అభ్యర్థి అజారుద్దీన్ ఫిర్యాదు నేపథ్యంలో లెక్కింపు ప్రక్రియను ఆపి వేశారు. తాజాగా ఈ రోజు ఓట్ల లెక్కింపు చేపట్టి విజేతను ఎన్నికల సంఘం ప్రకటించింది.

అంతకు ముందు జూబ్లిహిల్స్ ఓట్ల లెక్కింపు ఉత్కంఠ రేపింది. చివరకు మాగంటి గోపినాథ్ స్పష్టమైన మెజారిటీ సంపాదించారు. లెక్కింపు సమయంలో పలుమార్లు ఈవీఎంలలో సాంకేతిక సమస్యలు తలెత్తాయి. ఈ క్రమంలో ఈవీఎంలపై అజారుద్దీన్ అనుమానం వ్యక్తం చేశారు. ఈ మేరకు ఎన్నికల సంఘానికి అజారుద్దీన్ ఫిర్యాదు చేశారు. 11వ రౌండ్ లో 2ఈవీఎంలు, 12వ రౌండ్ లో మరో రెండు ఈవీఎంలు, 13 వ రౌండ్ లో 1 ఈవీఎంలో సాంకేతిక లోపం తలెత్తింది.

ఈ కారణంగా ఓట్ల లెక్కింపును అధికారులు తాత్కాలికంగా నిలిపి వేశారు. అనంతరం కాంగ్రెస్ అభ్యర్థి అజారుద్దీన్, సంబంధిత పార్టీ ప్రతినిధులకు ఎన్నికల నిబంధనలు వివరించి కౌంటింగ్ కొనసాగించారు. మొత్తం 26 రౌండ్లు పూర్తయిన తర్వాత నిలిచి పోయిన వీవీ ప్యాట్ల లెక్కింపును అధికారులు తిరిగి ప్రారంభించారు. మొత్తం 26 రౌండ్లు పూర్తయ్యే సమయానికి మాగంటి గోపినాథ్ 16,490 వేల మెజార్టీ ఉండగా, పోస్టల్ బ్యాలెట్ లో 153 ఓట్ల మెజార్టీ తగ్గింది.

చివరకు 16వేల 337 ఓట్ల ఆధిక్యంతో గెలిచారు. మొత్తం 16వేల 337 ఓట్ల మెజారిటీతో విజయం సాధించారని తెలిపింది. కాంగ్రెస్ అభ్యర్థి అజారుద్దీన్‌కు 63 వేల 8385 ఓట్లు రాగా, మాగంటి గోపీనాథ్‌కు 80వేల 328 ఓట్లు వచ్చాయి. బీజేపీ అభ్యర్థి లంకల దీపక్ రెడ్డికి 25వేల 756 ఓట్లు, ఎంఐంఎం అభ్యర్థి ఫలాజుద్దీన్ 7వేల 829 ఓట్లు సాధించారు.

తెలంగాణ (Telangana)లో కొత్త ప్రభుత్వం ఏర్పాటు కాబోతోంది. మరి కొన్ని గంటల్లో నూతన సీఎం (New CM), డిప్యూటీ సీఎం (Deputy CM)లు ప్రమాణ స్వీకారం చేయబోతున్నారు. ఈ క్రమంలో గత ప్రభుత్వంలో పని చేసిన రిటైర్డ్ అధికారులు రాజీనామా చేస్తున్నారు. మొన్నటి దాకా బీఆర్ఎస్ ప్రభుత్వానికి సాంస్కృతిక సలహాదారులుగా ఉన్న రిటైర్డ్ ఐఏఎస్ రమణాచారి, ట్రాన్స్ కో-జెన్ కో చైర్మన్ దేవులపల్లి ప్రభాకర్ రావు రాజీనామా చేశారు.

వారి రాజీనామా విషయాన్ని ఆయా కార్యాలయ వర్గాలు వెల్లడించాయి. సీఎస్‌కు వారు రాజీనామా లేఖలు పంపినట్టు తెలిపాయి. తాజాగా మరోవైపు ఇంటెలిజెన్స్ ఓఎస్డీ ప్రభాకర్ రావు కూడా రాజీనామా చేశారు. ఆయన తన రాజీనామా లేఖను ప్రభుత్వానికి పంపారు. ఆయన రాజీనామాకు గల కారణాలు తెలియాల్సి ఉంది. ఆయన్ని 31 అక్టోబర్ 2020లో తెలంగాణ ఇంటెలిజెన్స్ చీఫ్‌గా ప్రభుత్వం నియమించింది.

అంతకు ముందు పనిచేసిన నవీన్ చంద్ పదవీ విరమణ పొందటంతో ఆ పోస్టు ఖాళీ అయింది. ఈ నేపథ్యంలో ప్రభాకర్ రావును ఇంటెలిజెన్స్ చీఫ్ గా నియమించారు. ఇది ఇలా వుంటే మరి కొంత మంది అధికారులు కూడా రాజీనామా చేసే యోచనలో ఉన్నట్టు తెలుస్తోంది. గతంలో పలువురు రిటైర్డ్ అధికారులను కేసీఆర్ నియమించారంటూ రేవంత్ రెడ్డి పలు మార్లు విమర్శలు గుప్పించారు.

ఇప్పుడు బీఆర్ఎస్ ప్రభుత్వం లేకపోవడం, మరోవైపు తమపై విమర్శలు చేసిన రేవంత్ రెడ్డి సీఎంగా వస్తున్నారనే వార్తలు వస్తుండటంతో ఆయా అధికారులు ఈ నిర్ణయం తీసుకున్నారని వార్తలు వస్తున్నాయి. అందుకే వారంతా రాజీనామా చేస్తున్నారని అంతా చర్చించుకుంటున్నారు.