Telangana

గజ్వేల్ (Gajwel) ప్రజలకు సీఎం కేసీఆర్ (CM KCR) కీలక హామీ ఇచ్చారు. తెలంగాణలో మరోసారి బీఆర్ఎస్ (BRS) సర్కార్ అధికారంలోకి వస్తే గజ్వేల్‌లో దళిత బంధును ఒక్క విడతలోనే అమలు చేస్తామని తెలిపారు. గజ్వేల్‌లో త్వరలోనే ఐటీ టవర్లు తీసుకు వస్తామని హామీల వర్షం కురింపించారు.

గజ్వేల్‌లో నిర్వహించిన బీఆర్ఎస్ ప్రజా ఆశీర్వాద సభలో సీఎం కేసీఆర్ పాల్గొన్నారు. ఈ సందర్బంగా కేసీఆర్ మాట్లాడుతూ… వచ్చే ఏడాది ఫిబ్రవరి నాటికి తనకు 70 ఏండ్లు వస్తాయని అన్నారు. తెలంగాణ తీసుకు వచ్చిన కీర్తి తనకు చాలన్నారు. సీఎంగా ఇప్పటికే పదేండ్లు పని చేశానని తెలిపారు.

అన్ని రంగాల్లో తెలంగాణను నెంబర్ వన్ చేయాలన్నదే తన లక్ష్యమన్నారు. ఈ సారి బీఆర్ఎస్ సర్కార్ వస్తే గజ్వేల్ నియోజక వర్గంలో అందరికీ దళిత బంధు ఇస్తామన్నారు. కాలుష్య రహిత పరిశ్రమలు తీసుకు వచ్చి మల్లన్న సాగర్ ముంపు బాధితులకు ఉద్యోగాలు కల్పిస్తామని హామీ ఇచ్చారు. గజ్వేల్ కు ఐటీ టవర్లు తీసుకు వస్తామన్నారు.

ట్రిపుల్ ఆర్ పూర్తయితే గజ్వేల్ దశ మారిపోతుందన్నారు. బీఆర్ఎస్ పాలనలో గజ్వేల్ ఒక గొప్ప రోల్ మోడల్ గా మారిందన్నారు. గజ్వేల్ అభివృద్ధిని చూసేందుకు వివిధ రాష్ట్రాల నుంచి ఇక్కడకు వస్తున్నారన్నారు. గజ్వేల్‌లో రెండు సార్లు తనను గెలిపించారని, మరోసారి ఆశీర్వదిస్తే కొండ పోచమ్మ, మల్లన్న సాగర్ అభివృద్ధి చేసుకుందామన్నారు.

తెలంగాణను అన్ని రకాలుగా గోస పెట్టింది కాంగ్రెస్సేనని సీఎం కేసీఆర్ అన్నారు. ఇందిరమ్మ రాజ్యం సరిగ్గా ఉంటే ఎన్టీఆర్​ ఎందుకు పార్టీ పెట్టారంటూ తీవ్ర స్థాయిలో ధ్వజమెత్తారు. పదేండ్ల బీఆర్ఎస్ పాలనను, యాభై ఏండ్ల కాంగ్రెస్ పాలనను బేరీజు వేసుకోవాలని ప్రజలకు సూచించారు.

వరంగల్, గజ్వేల్ నియోజక వర్గాల్లో నిర్వహించిన బహిరంగ సభల్లో సీఎం కేసీఆర్ పాల్గొన్నారు. ఈ సందర్భంగా ఆయన మాట్లాడుతూ….కొన్ని రోజుల్లోనే వరంగల్ టెక్స్ టైల్స్ ఇండస్ట్రీలో లక్ష మందికి ఉపాధి లభిస్తుందని ఆయన ఆశాభావం వ్యక్తం చేశారు. రెండేళ్లలో టెక్స్​టైల్​ పార్క్​లో మహిళలకు రెండు లక్షల ఉద్యోగాలు ఇస్తామని హామీ ఇచ్చారు.

రాష్ట్రంలోనే రెండో అతిపెద్ద నగరం వరంగల్ అని అన్నారు. మూడవ సారి బీఆర్​ఎస్​ అధికారంలోకి వస్తే మరింత అభివృద్ధి చేస్తామన్నారు. 24 అంతస్తుల కొత్త ఎంజీఎం భవనం హైదరాబాద్​లో కూడా లేదన్నారు. ఈ ఎన్నికలో గెలిస్తే ఆటో రిక్షాల కార్మికులకు.. ఫిట్​నెస్​ సర్టిఫికేట్​ పర్మిట్​ ట్యాక్స్​ను రద్దు చేస్తామన్నారు.

తెలంగాణ రాష్ట్రం సాధన కోసమే బీఆర్​ఎస్ పుట్టిందన్నారు. 50 ఏండ్ల పాటు దేశాన్ని పరిపాలించిన కాంగ్రెస్​ ఏం చేసిందని ప్రశ్నించారు. ఇందిరమ్మ పాలనలో అన్నం కోసం పేద బతుకులు ఎంతో అలమటించాయన్నారు. కానీ ఎన్టీఆర్​ రెండు రూపాయలకే కిలో బియ్యంతో వారి ఆకలి తీర్చారని వెల్లడించారు.

తెలంగాణ ఉద్యమం ప్రారంభం అయ్యాక ప్రత్యేక రాష్ట్ర సాధనలో తనకు బలాన్ని ఇచ్చిన గడ్డ సిద్దిపేట అయితే, ఆ తర్వాత తెలంగాణ వచ్చాక రాష్ట్రాన్ని తీర్చిదిద్దేందుకు తనను ఎమ్మెల్యేను చేసి, సీఎంగా చేసిన గడ్డ ఈ గజ్వేల్‌ గడ్డ అని చెప్పారు. గజ్వేల్‌ తన గౌరవాన్ని పెంచిందని, తనను ఈ స్థాయికి తెచ్చిందన్నారు.

గతంలో మంచి నీళ్ల కోసం చాలా ఇబ్బందుల పడ్డామన్నారు. కానీ ఇప్పుడు గజ్వేల్‌కు శాశ్వతంగా ఆ బాధ తీరిపోయిందన్నారు. సాగు నీటి కోసం ఎన్నో ఇబ్బందులు పడ్డామన్నారు. గజ్వేల్‌కు ప్రాజెక్టులు, కాలువలు రావడంతో ఆ బాధ కూడా తీరిపోయిందన్నారు. గజ్వేల్‌కు రైలు వస్తదని ఎన్నడూ అనుకోలేదన్నారు. కానీ ఇప్పుడు రైలు కూడా వచ్చేసిందన్నారు.

గజ్వేల్‌ మోడల్‌ అభివృద్ధిని చూసేందుకు ఇప్పుడు అంతా ఇక్కడకు వస్తున్నారని వెల్లడించారు. ఇంటిగ్రేటెడ్‌ మార్కెట్‌. అడవుల పునరుద్ధరణ, మన మల్లన్నసాగర్‌ ప్రాజెక్టు కావచ్చు.. ఇలా అనేక రకాల పనులను చూసేందుకు గజ్వేల్‌కు వస్తున్నారని అన్నారు . మిషన్‌ భగీరథ పథకాన్ని గురించి తెలుసుకోవడానికి కోమటిబండకు రాని రాష్ట్రమే లేదన్నారు. ఒక రోల్‌ మోడల్‌గా గజ్వేల్‌ ఎదిగిందన్నారు. అయితే ఇప్పటికే అయ్యింది చాలా గొప్ప అని మనం సంతోషపడితే సరిపోదన్నారు. ఇంకా చాలా అభివృద్ధి కావాల్సి ఉందన్నారు.

తెలంగాణ (Telangana)లో ఎన్నికల ప్రచారం (Election Campaign) ముగిసింది. ప్రచారానికి చివరి రోజు కావడంతో మంగళవారం పార్టీలన్నీ వీలైనన్నీ సభలు నిర్వహించాయి. చివరి రోజు కావడంతో ప్రచార వేగాన్ని పెంచాయి. ఎన్నికలకు మరి కొన్ని గంటలే మిగిలి వుండటంతో పార్టీలన్నీ ఓటర్లకు వీలైనంతగా చేరువయ్యేందుకు పార్టీలు ప్రయత్నించాయి.

ఎన్నికల ప్రచారం ముగియడంతో సాయంత్రం నుంచి మైకులన్నీ మూగపోయాయి. సుమారు రెండు నెలలుగా జోరుగా తిరిగిన ప్రచార రథాలు మూలకు పడ్డాయి. ఎన్నికలకు మరి కొన్ని గంటలే మిగిలి వుండటంతో అభ్యర్థుల్లో టెన్షన్ మొదలైంది. చివరి రోజు బీఆర్ఎస్, బీజేపీ, కాంగ్రెస్, వామపక్షాలు, ఇతర పార్టీలు దూకుడు పెంచాయి.

రాష్ట్ర స్థాయిలో విస్తృతంగా ప్రచారాన్ని చేపట్టాయి. ఆయా పార్టీలకు చెందిన జాతీయ నేతలు, అగ్రనేతలు ప్రచార సభలు, సమావేశాలు, ర్యాలీలు, రోడ్ షోలో పాల్గొన్నారు. తమ పార్టీని గెలిపిస్తే ప్రజలకు అందించనున్న సంక్షేమ పథకాల గురించి ఈ సందర్బంగా మరోసారి గుర్తు చేశారు. చివరి రోజు ప్రత్యర్థులపై పార్టీలు విమర్శల దాడిని పెంచాయి.

ప్రత్యర్థి పార్టీలపై వైఖరిని ఎండగడుతూ తమ పార్టీకి ఓటు వేయాలని అభ్యర్థించారు. పలు చోట్లు స్వతంత్ర అభ్యర్థులు సైతం జోరుగా ప్రచారం చేశారు. ఎన్నికలకు మరో 48 గంటలే మిగిలి వుండటంతో ఎన్నికల కోడ్ ప్రకారం ప్రచారానికి బ్రేక్ పడింది. రాష్ట్రంలో మొత్తం 119 అసెంబ్లీ స్థానాలకు గాను 13 నియోజక వర్గాల్లో సాయంత్రం 4 గంటలకే ప్రచారం ముగిసింది. చెన్నూరు, సిర్పూర్, మంచిర్యాల, బెల్లంపల్లి, ఆసిఫాబాద్, మంథని, భూపాలపల్లి, పినపాక, ములుగు, ఇల్లందు, కొత్తగూడెం, అశ్వారావుపేట, భద్రాచలం నియోజకవర్గాల్లో నాలుగు గంటలకే ప్రచారానికి తెరపడింది.

మిగిలిన 106 నియోజకవర్గాల్లో సాయంత్రం ఐదు గంటల వరకు ప్రచారం కొనసాగింది. ఎన్నికల కోడ్ అమలులోకి రావడంతో అభ్యర్థులు నేటి నుంచి ఎలాంటి సభలు, సమావేశాలు, ర్యాలీలు, రోడ్ షోలు నిర్వహించేందుకు అనుమతి లేదని అధికారులు తెలిపారు. రాష్ట్రవ్యాప్తంగా అన్ని నియోజక వర్గాల్లో 144 సెక్షన్ అమల్లోకి వచ్చినట్టు పోలీసు అధికారులు చెప్పారు.

ఎన్నిలకు మరికొన్ని గంటలే ఉండటంతో ప్రలోభాల పర్వం స్టార్ట్ అయ్యే అవకాశం ఉందని పార్టీలు చెబుతున్నాయి. ఈ క్రమంలో పోలీసులు నిఘాను మరింత పటిష్టం చేశారు. అన్ని చోట్ల పోలీసులు ముమ్మర తనిఖీలు చేస్తున్నారు. రాష్ట్ర సరిహద్దుల్లో ఏర్పాటు చేసిన చెక్ పోస్టుల వద్ద తనిఖీలను చేస్తున్నారు. అటు మద్యం దుకాణాలు, బార్లు, కల్లు దుకాణాలను సాయంత్రం 5 గంటల నుంచి మూసివేయించారు.

తెలంగాణ (Telangana)లో ఎన్నికల ప్రచారం నేటితో ముగియనుంది. ఈ క్రమంలో రాష్ట్ర ప్రజలకు కేంద్ర మంత్రి, బీజేపీ తెలంగాణ చీఫ్ జి. కిషన్ రెడ్డి (Kishan Reddy)బహిరంగ లేఖ రాశారు. ప్రత్యేక రాష్ట్రం కోసం దశాబ్దాల పాటు చేసిన పోరాటం ఆయన గుర్తు చేశారు. నీళ్లు-నిధులు-నియామకాలు కోసం ఆరాటం, లాఠీ దెబ్బలు, రబ్బరు బుల్లెట్ల గాయాలు ఇలా ఎన్నో బాధలు చూశామన్నారు.

1969 ఉద్యమం సమయంలో కాంగ్రెస్ సర్కార్ వల్ల పోలీసుల కాల్పుల్లో 369 మంది విద్యార్థులు అమరులయ్యారని చెప్పారు. అటు మలిదశ ఉద్యమంలో మన కళ్ల ఎదుటే 1200 ఆత్మ బలిదానాలు చేసుకున్నారన్నారు. నాలుగు కోట్ల తెలంగాణ గొంతుకలు కలిసి నినదిస్తే ప్రత్యేక రాష్ట్ర కల సాకారమైందన్నారు. ప్రత్యేక తెలంగాణ ఏ ఒక్క వ్యక్తి ద్వారానో, లేదా ఒక కుటుంబ త్యాగం వల్ల రాలేదన్నారు.

ఇంత సుదీర్ఘ పోరాటం తర్వాత సాధించుకున్న తెలంగాణ రాష్ట్రంలొ ఉద్యమ ఆకాంక్షల నెర వేరాయా అని ప్రశ్నించారు. నీళ్లు, నిధులు, నియామకాల లక్ష్యాలను చేరుకోవడంలో కేసీఆర్ సర్కార్ విఫలమైందన్నారు. పదేండ్ల కాలంలో కేసీఆర్ పాలనాపరమైన అసమర్థత మన కండ్లకు కొత్తొచ్చినట్టు కనిపిస్తోందన్నారు.

రాష్ట్రం వచ్చాక నీళ్ల పేరిట కేసీఆర్ ప్రభుత్వం బహిరంగ దోపిడీకి పాల్పడిందన్నారు. భారీ సాగునీటి ప్రాజెక్టుల పేరుతో అంచనాలను పెంచి.. అడ్డగోలు దోపిడీకి కేసీఆర్ బాటలు వేయడం నిజం కాదా? అని ప్రశ్నించారు. నిధుల విషయంలోనూ ఇదే తంతు జరిగిందన్నారు. ప్రత్యేక రాష్ట్రం ఏర్పడే సమయానికి మిగులు బడ్జెట్ ఉంటే ఆ తర్వాత పదేళ్లలో 7 లక్షల కోట్ల అప్పుగా మారిందన్నారు. ఈనాడు తెలంగాణలో ప్రతి వ్యక్తి పై దాదాపు లక్షా 25వేల అప్పు ఉందన్నారు.

నియామకాల విషయంలో ప్రభుత్వం అనుసరిస్తున్న విధానం ఆక్షేపనీయంగా ఉందన్నారు. నేడు ఉద్యోగాలు రాక యువత ఆత్మహత్యలకు పాల్పడుతున్న దుస్థితికి రావడానికి కేసీఆర్ అసమర్థ పాలనే కారణమన్నారు. టీఎస్పీఎస్సీ పరిస్థితి మూడు లీకేజీలు, ఆరు రద్దులుగా మారిందని చెప్పారు. రాష్ట్రంలోని 39 లక్షల మంది నిరుద్యోగుల్లో ఒక్కశాతానికైనా ఉద్యోగాలు అందాయా? అని ప్రశ్నించారు.

దళితులకు మూడెకరాలు, సీఎం పదవి అని చెప్పి కేసీఆర్ మోసం చేశారని అన్నారు. దళితులను అక్కున చేర్చుకున్న గొప్ప వ్యక్తి ప్రధాని మోడీ అని చెప్పారు. దశాబ్దాలుగా వర్గీకరణ కోసం వారు చేస్తున్న డిమాండ్లను గుర్తించి, ప్రధాని హోదాలో హాజరై వారికి భరోసా ఇచ్చారన్నారు. గత ఏడు దశాబ్దాలు రాజ్యధికారం కావాలన్న బీసీల ఆత్మగౌరవాన్ని కాపాడేందుకు తెలంగాణలో తొలి బీజేపీ సీఎం బీసీ వర్గాలకు చెందిన వారేనని హామి ఇచ్చారన్నారు.

అభివృద్ధిని, సంక్షేమాన్ని జోడెడ్ల బండిగా బీజేపీ ముందుకు తీసుకెళ్తోందన్నారు. తెలంగాణ ప్రజల ఆత్మగౌరవాన్ని మొదటి నుంచి అవహేళన చేస్తున్నది కాంగ్రెస్ అని మండిపడ్డారు. ప్రతి నిర్ణయంలోనూ కేవలం తన రాజకీయ లబ్ధి కాంగ్రెస్ చూసుకుంటుందన్నారు. ఉద్యమ సమయం నుంచి ఈ విషయం తెలంగాణ ప్రజలందరికీ తెలిసిందేనన్నారు.

వీటన్నింటిపై ప్రతి ఇంట్లో చర్చ జరగాలన్నారు. తెలంగాణ భవిష్యత్ కోసం జరుగుతున్న ఈ ఎన్నికల్లో బీజేపీకి సంపూర్ణంగా మద్దతు తెలపాలని ప్రజలను కోరారు. ప్రజల ఆశీర్వాదంతో బీసీ ముఖ్యమంత్రి నేతృత్వంలో రాష్ట్రాభివృద్ధికి బాటలు వేసుకుందామని తెలిపారు. అమరవీరులు కలలుగన్న ‘సామాజిక, ప్రజాస్వామ్య, ప్రగతిశీల తెలంగాణ స్వప్నాన్ని’ సాకారం చేసుకుందామన్నారు.