Telangana

– మోడీ అంటే నాకెంతో ఇష్టం
– దేశానికి ఇలాంటి బలమైన నాయకులు కావాలి
– నీళ్లు, నిధులు, నియామకాల నినాదాలతో..
– ప్రత్యేక రాష్ట్రం ఏర్పడింది
– కానీ, అవి నినాదాలకే పరిమితమయ్యాయి
– బీసీ సీఎం ప్రకటన చేసిన బీజేపీకి..
– మా పూర్తి సహకారం ఉంటుంది
– బీసీ ఆత్మగౌరవ సభలో పవన్ కళ్యాణ్

భారత్ పై దాడి చేస్తే తిరిగి దాడి చేయగలమని ప్రధాని మోడీ (PM Modi) నిరూపించారని జనసేన అధ్యక్షుడు పవన్ కళ్యాణ్ (Pawan Kalyan) అన్నారు. దేశానికి బలమైన నాయకుడు కావాలని తనలాగే అంతా అనుకున్నారని.. అందుకే మోడీ ప్రధాని అయ్యారని వెల్లడించారు. బీజేపీ (BJP) బీసీ ఆత్మగౌరవ సభలో పవన్ పాల్గొన్నారు. ఈ సందర్భంగా మాట్లాడుతూ.. మోడీ అంటే తనకు చాలా ఇష్టమని వెల్లడించారు. ఆయన్ను పెద్దన్నగా భావిస్తానన్నారు.

నీళ్లు, నిధులు, నియామకాలు నినాదాలతో తెలంగాణ పోరాటం జరిగిందని.. కానీ, అవన్నీ ఇప్పుడు నినాదాలకే పరిమితం అయ్యాయని వ్యాఖ్యానించారు. వాటిలో కనీసం ఒక్కటి కూడా అమలు కాలేదన్నారు. బీజేపీ వాళ్లను సీఎం చేస్తాం.. వీళ్లను ముఖ్యమంత్రి చేస్తామంటూ నోటితో ఇష్టానుసారం మాట్లాడలేదంటూ సీఎం కేసీఆర్‌ కు పరోక్షంగా పవన్ చురకలు అంటించారు.

బీసీ సీఎంను ప్రకటించిన బీజేపీకి జనసేన నుంచి పూర్తి సహకారం ఉంటుందని చెప్పారు. తెలంగాణలో కలిసి పోటీ చేసే అవకాశం ఇచ్చిన బీజేపీ నేతలకు కృతజ్ఞతలు తెలిపారు. ‘ఔర్ ఏక్ బార్-మోడీ సర్కార్’ అని నినదించారు. దీనికోసం తాము మనస్ఫూర్తిగా, శాయశక్తులా కష్టపడుతామని హామీ ఇచ్చారు. ఎన్నికల సమయంలో మాత్రమే రాజకీయాలు చేయాలన్న పవన్.. ఐదేళ్ల పాటు ఎన్నికలే ధ్యేయంగా పని చేయవద్దని నాయకులకు సూచనలు చేశారు.

ఒకవేళ ఎన్నికలే ధ్యేయంగా ప్రధాని మోడీ పనిచేసి ఉంటే.. 370 ఆర్టికల్ రద్దు చేసే వారే కాదన్నారు. మహిళా రిజర్వేషన్ బిల్లు, ట్రిపుల్ తలాక్, అయోధ్య రామ మందిరం నిర్మించే వారా? అని వ్యాఖ్యానించారు.

– ఆలంపూర్ గడ్డ.. కాంగ్రెస్ అడ్డా
– జోగులాంబ ఆలయానికి కేసీఆర్ ఇస్తానన్న..
– వంద కోట్లు ఏమయ్యాయి?
– బీఆర్‌ఎస్‌ ను బొంద పెట్టాలనే కసి..
– ప్రజల కళ్లల్లో కనిపిస్తోంది
– 3 గంటల కరెంటే ఇస్తానని నేను అనలేదు
– నిరూపిస్తే నామినేషన్ వెనక్కి తీసుకుంటా
– ఆలంపూర్ లో రేవంత్ రెడ్డి సవాల్

ఉచిత కరెంట్ విషయంలో తనపై తప్పుడు ప్రచారం చేస్తున్నారని మండిపడ్డారు టీపీసీసీ చీఫ్ రేవంత్ రెడ్డి (Revanth Reddy). మూడు గంటల కరెంట్ చాలని తాను ఎక్కడా అనలేదని.. నిరూపిస్తే తన నామినేషన్ విత్ డ్రా చేసుకుంటానని సవాల్ విసిరారు. జోగులాంబ గద్వాల (Gadwal) జిల్లా ఆలంపూర్ కాంగ్రెస్ ప్రజాగర్జన సభలో పాల్గొన్న రేవంత్.. ఆలంపూర్ గడ్డ కాంగ్రెస్ అడ్డా అని తెలిపారు. కేసీఆర్ జోగులాంబ ఆలయానికి ఇస్తానన్న వంద కోట్లు ఏమయ్యాయని ప్రశ్నించారు. కేసీఆర్‌, కేటీఆర్‌, హరీశ్‌ రావు కాంగ్రెస్​ ను ఓడించేందుకు కుట్ర చేస్తున్నారని ధ్వజమెత్తారు.

ఉచిత కరెంట్ అంశంలో బీఆర్ఎస్ ది డ్రామా అని విమర్శలు చేశారు రేవంత్. రాష్ట్రంలో ఏ సబ్ ​స్టేషన్​ కైనా వస్తాం.. 24 గంటల కరెంట్​ వస్తున్నట్లు చూపించాలని ప్రశ్నించారు. పార్టీలు, గ్రూపులకు అతీతంగా 24 గంటల ఉచిత విద్యుత్‌ ఇచ్చే బాధ్యత కాంగ్రెస్‌ పార్టీదేనని పేర్కొన్నారు. ఉచిత విద్యుత్ ఇచ్చిందే కాంగ్రెస్ పార్టీ అని గుర్తు చేశారు. కాంగ్రెస్ గెలిస్తే ఆర్డీఏ సమస్యను పరిష్కరిస్తామన్నారు. ఆలంపూర్ కోసం సంపత్ పోరాటం చేశారని.. ఇక్కడ ఏం అభివృద్ధి జరిగిందో బీఆర్ఎస్ నేతలను ప్రశ్నించాలని చెప్పారు.

రైతులు, మహిళలు, నిరుద్యోగులు అన్ని వర్గాల్లో ఒక కొత్త ఉత్సాహం కనిపిస్తోందని, బీఆర్‌ఎస్‌ ను బొంద పెట్టాలనే కసి ప్రజల కళ్లల్లో కనిపిస్తోందని రేవంత్ రెడ్డి తెలిపారు. నల్లమల బిడ్డగా చెబుతున్నా బోయలను ఎస్టీ జాబితాలో చేర్చే బాధ్యత తనదని అన్నారు. ‘‘ఇది మన పాలమూరు బిడ్డల జీవన్మరణ సమస్య.. ఆత్మగౌరవ సమస్య. ధరణి లేకపోయినా వైఎస్ హయాంలో రైతులకు ఆర్థిక సాయం అందలేదా? ధరణి స్థానంలో మెరుగైన సాంకేతికతతో కొత్త యాప్ తీసుకొస్తాం… రైతుల భూములు కాపాడుతాం. అధికారంలోకి రాగానే ఆరు గ్యారంటీలను అమలు చేసి తీరుతాం” అని అన్నారు రేవంత్. బీఆర్​ఎస్​ నాయకులకు ధరణి ఏటీఎంలా మారిందని ఆరోపించారు.

చల్లా వెంకట్రామి రెడ్డి కల్వకుంట్ల ఫ్యామిలీ దగ్గర బానిసలా మారిపోయారని విమర్శించారు రేవంత్. దొరగారి దొడ్లో జీతగాడిలా బతుకుతున్నారని ధ్వజమెత్తారు. దొరల తెలంగాణకు ప్రజల తెలంగాణకు మధ్యే పోటీ జరుగుతోందని తెలిపారు. మహబూబ్ నగర్ లో 14 సీట్లు కాంగ్రెస్ గెలిచి రాష్ట్రంలో అధికారంలోకి వస్తుందని ధీమా వ్యక్తం చేశారు. కేసీఆర్ ఎన్ని డబుల్ డబుల్ బెడ్రూం ఇళ్లు ఇచ్చారో చెప్పాలన్నారు.

– దేశంలో 24 గంట‌ల‌ కరెంట్ ఇస్తున్నది మనమే
– మోడీ రాష్ట్రంలో కూడా ఇవ్వ‌డం లేదు
– రైతుల‌కు బాగుప‌డాలని..
– ప‌ది రూపాయిలు పోయినా ఫర్లేదని ఇస్తున్నాం
– హస్తం చేతకాని పాలనలో సింగరేణి నష్టపోయింది
– తెలంగాణ వచ్చాక లాభాల్లోకి తీసుకొచ్చాం
– మోడీకి ప్రైవేటీకరణ పిచ్చి పట్టుకుంది
– మాయమాటల కాంగ్రెస్, బీజేపీని తిప్పి కొట్టాలి
– రాష్ట్ర ప్రజలకు సీఎం కేసీఆర్ పిలుపు

హస్తం పార్టీ ఏనాడూ అంబేద్కర్ ఆశయాలను అమలు చేయలేదన్నారు సీఎం కేసీఆర్ (KCR). మంచిర్యాల జిల్లా చెన్నూరులో నిర్వహించిన ప్రజా ఆశీర్వాద సభలో పాల్గొని ప్రసంగించారు. కాంగ్రెస్‌ (Congress) కు దళితులపై ఉన్నది పెదవులపై ప్రేమేగానీ, నిజమైనది కాదన్నారు. బీఆర్​ఎస్ (BRS)​ పార్టీ మాత్రమే అంబేద్కర్‌ ఆశయాలను కొనసాగిస్తోందని తెలిపారు. సీఎం, మంత్రులు కొలువు దీరే కార్యాలయానికి అంబేద్కర్‌ పేరు పెట్టామని గుర్తు చేశారు. ప్రపంచంలోనే ఎత్తైన విగ్రహం హైదరాబాద్‌ లో ఏర్పాటు చేశామని చెప్పారు.

బీఆర్ఎస్ పుట్టిందే తెలంగాణ సాధన కోసం.. ప్రజలే బీఆర్ఎస్ బాస్‌ లని కీలక వ్యాఖ్యలు చేశారు కేటీఆర్. ప్రజల ఆకాంక్షలు, ఆశలు తెలిసిన పార్టీ బీఆర్ఎస్ అని.. సింగరేణి అచ్చంగా తెలంగాణ కంపెనీ.. కానీ కాంగ్రెస్ కేంద్ర ప్రభుత్వానికి కట్టబెట్టిందని మండిపడ్డారు. హస్తం చేతకాని పాలనలో సింగరేణి నష్టపోయిందని.. తెలంగాణ వచ్చాక లాభాల్లోకి వచ్చిందన్నారు. కాంగ్రెస్ పాలనకు, బీఆర్ఎస్ పాలనకు బేరీజు వేసుకోని ఓటు వేయాలని విజ్ఞప్తి చేశారు. ఎన్నికలు రాగానే ఆగమాగం కావొద్దని.. మీ దగ్గర ఉండే ఓటు వజ్రాయుధం అని ప్రజలకు తెలిపారు. అన్ని పార్టీల అభ్యర్థుల గురించి ఆలోచించి ఆ తర్వాత ఓటు వేయాలని సూచించారు.

ప్రధాని మోడీకి ప్రైవేటీకరణ పిచ్చి పట్టుకుందని ఆరోపించారు సీఎం. అందుకే, అన్ని వ్యవస్థలను ప్రైవేటుపరం చేస్తున్నారని విమర్శలు గుప్పించారు. ధరణి పోర్టల్‌ పై కాంగ్రెస్‌ కు కన్ను కుట్టిందని, తీసేస్తామంటున్నారని మండిపడ్డారు. రైతుబంధు ఇవ్వొద్దంటున్నారని ధ్వజమెత్తారు. 5 ఏళ్ల భవిష్యత్‌ ను నిర్ణయించే ఎన్నికల విషయంలో ఓటర్లు జాగ్రత్తగా ఉండాలని.. మరోసారి బీఆర్ఎస్ పార్టీనే ఆశీర్వదించాలని కోరారు. మాయమాటలు చెబుతున్న కాంగ్రెస్, బీజేపీని తిప్పి కొట్టాలని పిలుపునిచ్చారు.

సూట్‌ కేసులతో వచ్చే దోపిడీ దారులు కావాలా? నిఖార్సైన నాయకులు కావాల్నా? అనేది నిర్ణయించాల్సింది ప్రజలేనని అన్నారు కేసీఆర్‌. ‘‘రైతుల‌ను కాంగ్రెస్ ఏనాడూ ప‌ట్టించుకోలేదు. క‌రెంట్ స‌క్రమంగా ఇవ్వ‌లేదు. పాములు కుట్టి అనేక మంది చ‌నిపోయారు. దేశంలో 24 గంట‌ల‌ కరెంట్ ఇస్తున్న గ‌వ‌ర్న‌మెంట్ మ‌న‌దే. మోడీ రాష్ట్రంలో కూడా ఇవ్వ‌డం లేదు. రైతుల‌కు క‌చ్చితంగా బాగుప‌డాలి అని ప‌ది రూపాయిలు పోయినా స‌రే అని చెప్పి 24 గంట‌ల క‌రెంట్ ఇస్తున్నాం. ఇప్పుడు ఈ దొంగ‌లు వ‌చ్చి తీసేస్తాం అంటున్నారు. ఓట్లు కాదు డిపాజిట్లు కూడా రావొద్దు కాంగ్రెసోళ్ల‌కు. రైతులు ఆలోచించి, ఓటేయ‌క‌పోతే నేను కూడా ఏం చేయ‌లేను’’ అని వ్యాఖ్యానించారు కేసీఆర్.

– గజ్వేల్ లో బీజేపీ గెలుపు ఖాయం
– నియంతృత్వ పాలనకు చరమగీతం పాడదాం
– కుటుంబ పాలన పోవాలంటే బీజేపీతోనే సాధ్యం
– రాష్ట్రం కల్వకుంట్ల కుటుంబం చేతిలో..
– బందీ అయిందన్న కిషన్ రెడ్డి
– గజ్వేల్ లో ఈటల రాజేందర్ నామినేషన్

గజ్వేల్ (Gajwel) బరిలో నిలిచి సీఎం కేసీఆర్ (CM KCR) ను ఢీ కొట్టిన బీజేపీ (BJP) ఎమ్మెల్యే ఈటల రాజేందర్ (Eatala Rajender) నామినేషన్ వేశారు. పార్టీ అధ్యక్షుడు కిషన్ రెడ్డి (Kishan Reddy) సమక్షంలో.. ఆర్డీవో కార్యాలయంలో నామినేషన్ దాఖలు చేశారు. ఈ సందర్భంగా కిషన్ రెడ్డి మాట్లాడుతూ.. రాష్ట్రంలో నియంతృత్వ పాలనకు చరమగీతం పాడాల్సిన అవసరం ఉందని పేర్కొన్నారు. కుటుంబ పాలన పోవాలంటే బీజేపీతోనే సాధ్యమని చెప్పారు. ఈటల గజ్వేల్ ​కు వస్తే కేసీఆర్ కామారెడ్డి పారిపోయారని.. అక్కడ కూడా బీఆర్ఎస్​ (BRS) కు మనుగడ లేదన్నారు.

రాష్ట్రంలో నరేంద్ర మోడీ (PM Modi) పాలన వస్తుందని.. బడుగు బలహీన వర్గాల పాలన రాబోతోందని ఆశాభావం వ్యక్తం చేశారు కిషన్ రెడ్డి. ఎన్నో త్యాగాలు, ఆత్మ బలిదానాలు చేసి తెచ్చుకున్న తెలంగాణ.. ఈరోజు ఓ కుటుంబం పాలైందని ఆరోపించారు. ఆ కుటుంబం వేల కోట్ల ప్రజల డబ్బును దోచుకొని మళ్లీ ఏలాలనుకుంటోందని.. భూములు, బిల్డింగులు కొనాలనుకుంటోందని విమర్శించారు. తెలంగాణ అవినీతిమయం అయిందని ఆరోపించారు. బీఆర్​ఎస్​ తో బీజేపీ ఇప్పటి వరకు పొత్తు పెట్టుకోలేదని.. భవిష్యత్​ లో పెట్టుకోబోదని స్పష్టం చేశారు. కానీ, కాంగ్రెస్​ పార్టీ అనేక ఎన్నికల్లో పొత్తు పెట్టుకుందని గుర్తు చేశారు.

స్వరాష్ట్రంలో ప్రజలను కేసీఆర్ బానిసలుగా మార్చారని మండిపడ్డారు కిషన్ రెడ్డి. బీఆర్​ఎస్ ​కు ఓటేస్తే కేసీఆర్‌ కుటుంబానికి వేసినట్లేనన్న ఆయన.. భారతీయ జనతా పార్టీకి వేస్తే భవిష్యత్‌ తరాల అభివృద్ధికి వేసినట్లవుతుందని పేర్కొన్నారు. డబ్బుతో గజ్వేల్‌ ప్రజల ఓట్లను కొనుగోలు చేయాలని కేసీఆర్‌ చూస్తున్నారని ఆరోపించారు. ఆయన ఇచ్చిన హామీలను నెరవేర్చలేదని.. డబుల్‌ బెడ్రూం ఇళ్లు ఇవ్వకపోగా, ఉన్న వాటినీ ధ్వంసం చేశారని ధ్వజమెత్తారు. బీజేపీ ప్రభుత్వం అధికారంలోకి రాగానే బీసీ వ్యక్తిని సీఎం చేస్తామని పునరుద్ఘాటించారు.

ఇక, ఈటల రాజేందర్ మాట్లాడుతూ… తాను పరాయి వాడిని కాదని.. ఈ నియోజకవర్గ బిడ్డనేనని తెలిపారు. 15 ఏళ్లు ఇక్కడే ఉన్నానని గుర్తు చేశారు. గజ్వేల్ ప్రజలకు ఏ అవసరమైనా వస్తే కేసీఆర్ ఎప్పుడైనా కలిశారా? అని ప్రశ్నించారు. ఫాంహౌస్‌ లో ముఖ్యమంత్రి ఉంటే చుట్టూపక్కల గ్రామాలు తీవ్ర ఇబ్బందికి గురయ్యాయన్నారు. సీఎం ఫాంహౌస్‌ కి వస్తున్నారంటే రోడ్డు పక్కన కంకులు, జామకాయలు అమ్ముకునే వారికి కూడా ఇబ్బందేనని పేర్కొన్నారు. కేసీఆర్ పాలనలో ఇంట్లో ఇద్దరు వృద్ధులు ఉంటే ఒకరికే పెన్షన్ వస్తుందని.. అదే బీజేపీ అధికారంలో ఉంటే ఇద్దరికీ వస్తుందని వెల్లడించారు ఈటల రాజేందర్.