నగరంలో మరోసారి కారు రేసింగ్ పోటీలను చూడాలనుకొన్న ఫ్యాన్స్‌కు నిరాశ ఎదురైంది. హైదరాబాద్‌ (Hyderabad) వేదికగా ఫిబ్రవరి 10న జరగాల్సిన ప్రతిష్ఠాత్మక స్పోర్ట్స్‌ కార్ల ఈవెంట్‌ E-ప్రిక్స్ ఫార్ములా- E’ రేసింగ్ (Formula E Race) రద్దైంది. తెలంగాణ (Telangana)లో ఏర్పడిన కొత్త ప్రభుత్వం నుంచి ఎలాంటి స్పందన లేకపోవడంతో రద్దు చేస్తున్నట్లు ఫార్ములా -E నిర్వహకులు ప్రకటించారు.
మరోవైపు మున్సిపల్ శాఖ.. హోస్ట్ సిటీ ఒప్పందాన్ని ఉల్లంఘించిన‌ట్లు నిర్వాహ‌కులు తెలిపారు. గ‌త ఏడాది అక్టోబర్ 30వ తేదీ జ‌ర‌గిన ఒప్పందాన్ని మున్సిపల్ శాఖ ఉల్లంఘించిన‌ట్లు ఒక ప్ర‌క‌ట‌న‌లో పేర్కొన్నారు. ఈ విషయంలో మున్సిపల్ శాఖకు నోటీసులు జారీ చేసిన‌ట్లు వెల్లడించారు. కాగా హోస్ట్ సిటీ అగ్రిమెంట్ చ‌ట్టాల ప్ర‌కారం చ‌ర్య‌లు తీసుకోనున్న‌ట్లు ఎఫ్ఈవో తెలిపింది.
గ‌త బీఆర్ఎస్ (BRS) ప్రభుత్వ హయాంలో ఫార్ములా ఈ సంస్థ ఈ ప్రిక్స్, మున్సిపల్ అడ్మినిస్ట్రేషన్ అర్బన్ డెవలప్‌మెంట్ డిపార్ట్‌మెంట్లతో కలిసి 2023, అక్టోబర్ 30న రేసింగ్‌కు సంబంధించి ఒప్పందం చేసుకొన్నారు. కానీ ప్ర‌స్తుతం కాంగ్రెస్ స‌ర్కార్ ఆ ఒప్పందాన్ని బ్రేక్ చేసింది. ఇక సీజ‌న్ 10 రేస్‌లు జ‌ర‌గ‌నున్న న‌గ‌రాల్లో టోక్యో, షాంఘై, బెర్లిన్‌, మొనాకో, లండ‌న్ న‌గ‌రాలు ఉన్నాయి. జ‌న‌వ‌రి 13వ తేదీ నుంచి ఈ సీజ‌న్ ప్రారంభంకానున్న‌ది. ఈ క్రమంలో ఫార్ములా-E రేసింగ్ మెక్సికోకు షిఫ్ట్ అయ్యింది.
అయితే గ‌త ఏడాది జ‌రిగిన ప్రారంభోత్స‌వ రేస్ చాలా స‌క్సెస్ అయ్యింద‌ని, ఆ రేస్ వ‌ల్ల సుమారు 84 మిలియ‌న్ల డాల‌ర్ల ఆర్థిక ప్ర‌గ‌తి జ‌రిగింద‌ని ఫార్ములా ఈ సీఈవో జెఫ్ డోడ్స్ తెలిపారు. అయితే తాజాగా కొత్త స‌ర్కారు తీసుకొన్న నిర్ణ‌యం త‌మ‌ను నిరాశ‌ప‌రిచిన‌ట్లు ఫార్ములా E చీఫ్ చాంపియ‌న్‌షిప్ ఆఫీస‌ర్ ఆల్బ‌ర్టో లాంగో తెలిపారు. మరోవైపు ఈ-ప్రిక్స్ ఈవెంట్‌ రద్దుపై మాజీ మంత్రి కేటీఆర్ ట్విట్టర్ (X) వేదికగా స్పందించారు. ఇది కాంగ్రెస్ ప్రభుత్వం తీసుకొన్న దుర్మార్గమైన తిరోగమన నిర్ణయమని అన్నారు. ఇలాంటి ఈవెంట్లు మన నగరం, దేశం బ్రాండ్ ఇమేజ్‌ను పెంచుతాయని తెలిపారు.
