ఏపీ(AP)లో అసెంబ్లీ, పార్ల‌మెంటు ఎన్నిక‌ల్లో బీజేపీ-టీడీపీ(BJP-TDP)తో జ‌త‌క‌ట్టిన జనసేన 21 అసెంబ్లీ, 2 పార్ల‌మెంటు స్థానాల్లో పోటీ చేస్తోంది. ఈ నేప‌థ్యంలో జనసేన అధినేత పవన్ కల్యాణ్‌(Pawan Kalyan)కు మద్దతుగా సినీ ఇండస్ట్రీలో పలువురు మద్దతు తెలుపుతున్నారు. తాజాగా టాలీవుడ్ హీరో నవదీప్(Hero Navdeep) పవన్ కల్యాణ్‌కు మద్దతు తెలుపుతున్నట్లు ప్రకటించాడు.
పిఠాపురంలోని శ్రీపాద వ‌ల్ల‌భ మ‌హాసంస్థానాన్ని నవదీప్ బుధ‌వారం సంద‌ర్శించాడు. ఈ హీరో తాజా చిత్రం ‘ల‌వ్ మౌళి’. ఈ సినిమా ట్రైల‌ర్ విడుద‌ల సంద‌ర్భంగా శ్రీపాద‌వ‌ల్ల‌భుడి ఆల‌యంలో మూవీ టీమ్ ప్ర‌త్యేక పూజ‌లు చేసింది. ఈ సంద‌ర్భంగా నవదీప్ మీడియాతో మాట్లాడుతూ.. నిజాయతీగా ఎవ‌రు పోటీ చేసినా ప్ర‌జ‌లు ఆద‌రిస్తార‌ని, ప‌వ‌న్‌కు త‌న మద్దతు ఉంటుంద‌న్నాడు.
ల‌వ్ మౌళి సినిమా ట్రైల‌ర్ విజ‌య‌వాడ, గుంటూరు, విశాఖ‌ప‌ట్నం, రాజ‌మ‌హేంద్ర‌వ‌రం, హైద‌రాబాద్‌, కాకినాడ థియేట‌ర్ల‌లో ప్ర‌ద‌ర్శించ‌నున్నట్లు తెలిపారు. ఓ భిన్న‌మైన ప్రేమక‌థ‌తో వ‌స్తున్న ఈ మూవీలో నవదీప్ స‌ర‌స‌న గిద్వానీ, భావ‌న్ హీరోయిన్లుగా న‌టించారు. ప్రేక్ష‌కుల రెస్పాన్స్ తెలుసుకునేందుకు ప‌ర్య‌టిస్తున్నామన్నారు. కొత్త కాన్సెప్ట్‌తో తెర‌కెక్కిన ఈ సినిమా త‌ప్ప‌కుండా ప్రేక్ష‌కుల‌ను అల‌రిస్తుంద‌న్నారు.
ఇదిలా ఉండగా జనసేన పార్టీ నుంచి బ‌రిలో ఉన్న అభ్య‌ర్థుల త‌ర‌ఫున ప్రచారం చేసేందుకు పవన్ ఇటీవ‌ల స్టార్‌ క్యాంపెయిన‌ర్ల‌ను ప్రకటించారు. ఈ జాబితాలో నాగబాబు, టీమిండియా మాజీ క్రికెటర్ అంబటి రాయుడు, డాన్స్ మాస్టర్ జానీ మాస్టర్, సినిమా హీరో సాగర్, పృథ్విరాజ్, జ‌బ‌ర్ద‌స్త్ క‌మెడియ‌న్లు హైపర్ ఆది, గెటప్ శ్రీను ఉన్నారు. తాజాగా నవదీప్ తానూ ప్రచారం చేయనున్నట్లు ప్రకటించారు.
