ఆదిత్య ఎల్-1 (Aditya-L1) తో పీఎస్ఎల్వీ సీ57 రాకెట్ నిప్పులు చిమ్ముతూ నింగికి దూసుకెళ్లింది. సూర్యుడి రహస్యాలను ఛేదించే ఉద్దేశంతో భారతీయ అంతరిక్ష పరిశోధనా సంస్థ (ఇస్రో) చేపట్టిన ఆదిత్య ఎల్-1 మిషన్ ప్రయోగానికి శాస్త్రవేత్తలు శుక్రవారం కౌంట్ డౌన్ ప్రారంభించిన విషయం తెలిసిందే.
శనివారం ఉదయం సరిగ్గా 11.50 గంటలకు ఆంధ్రప్రదేశ్‌లోని శ్రీహరి కోట సతీశ్ ధావన్‌ స్పేస్‌ సెంటర్ నుంచి ఆదిత్య ఎల్-1ను ప్రయోగించారు. ఆదిత్య ఎల్-1ను లెగ్రాంజ్ పాయింట్ 1 కక్ష్యలోకి ప్రవేశపెడతారు. అందుకు దాదాపు 125 రోజులు పడుతుంది. భూమి నుంచి 15 లక్షల కిలోమీటర్ల దూరంలో లెగ్రాంజ్ పాయింట్ ఉంటుంది.
అయితే ఎల్1 పాయింట్కు చేరుకోవడం అంత సులభం కాదు. ఈ టాస్క్ను పూర్తి చేసేందుకు లిక్విడ్ అపోజీ మోటార్ (ఎల్ఏఎం)ను రూపొందించింది ఇస్రోకు చెందిన లిక్విడ్ ప్రొపల్షన్ సిస్టెమ్ సెంటర్ విభాగం. ఈ మిషన్ ప్రధాన లక్ష్యాలను ఇస్రో ప్రకటించింది. కొరొనల్ హీటింగ్, సౌర మంటలు, కొరొనల్ మాస్ ఇజెక్షన్స్, సౌర గాలులు, భూమికి సమీపంలోని అంతరిక్ష వాతావరణ వంటి వాటిపై పూర్తిస్థాయిలో పరిశోధనలు జరుపుతుంది ఆదిత్య ఎల్-1.
ఈ ఆదిత్య ఎల్1లో 7 పేలోడ్స్ ఉంటాయి. వీటిల్లో విజిబుల్ ఎమిషన్ లైన్ కొరొనాగ్రఫీ ఒకటి. నిర్దేశిత కక్ష్యలోకి చేరుకున్న అనంతరం.. ఇది భూమికి, రోజుకు 1440 ఇమేజ్లను పంపిస్తుంది. మొత్తం 7 పేలోడ్స్లో నాలుగింటింటి సూర్యుడి ఖాంతిని అబ్సర్వ్ చేసేందుకు వినియోగిస్తోంది ఇస్రో. మరో మూడింటినీ ప్లాస్మా, మాగ్నెటిక్ ఫీల్డ్స్ వంటి వాటిపై పరిశోధనల కోసం వాడుతోంది.
ఆదిత్య ఎల్1 జీవితకాలం ఐదేళ్లని తెలుస్తోంది. అప్పటివరకు భూమికి ఫొటోలు పంపుతూ ఉంటుంది. అయితే.. ఇంధనం ఖర్చు చేసే ఆధారంగా ఇది 5ఏళ్ల కన్నా ఎక్కువ కాలం కూడా పనిచేసే అవకాశం ఉంటుంది.
