సంక్రాంతి(Sankranti) పండుగకు అగ్రహీరోల సినిమాలు విడుదలకు సిద్ధమయ్యాయి. మహేశ్‌బాబు, నాగార్జున, వెంకటేశ్ తగ్గేదేలే అంటున్నారు. వీరి సినిమాలతో పాటు యువ హీరో తేజ సజ్జ(Teja Sajja) నటించిన ‘హనుమాన్’(Hanuman) సినిమా విడుదలవుతోంది.
అయితే, ఈ నాలుగు సినిమాలు విడుదల కానుండటంతో థియేటర్ల డిస్ట్రిబ్యూషన్‌లో ఇబ్బందులు తలెత్తుతున్నట్లు సమాచారం. ఈ క్రమంలో తెలంగాణ బీజేపీ ఎమ్మెల్యే రాజాసింగ్ సోషల్ మీడియా వేదికగా ఓ ట్వీట్ చేశారు. హనుమాన్ సినిమాకు మద్దతివ్వడం మన బాధ్యత అని పేర్కొన్నారు.
హనుమాన్ వంటి చిత్రాలు మన దేశానికి, హిందూ మతం గొప్పతనానికి గుర్తింపునిస్తాయని రాజాసింగ్ తెలిపారు. శ్రీరాముడి భక్తుడైన హనుమంతుడి ఆశీర్వాదం పొందిన ఓ అదృష్ట యువకుడి కథ ఆధారంగా సినిమాను రూపొందించడం అభినందనీయమన్నారు. ఇలాంటి గొప్ప ప్రయత్నానికి అందరూ అండగా నిలబడాలని కోరారు.
మరోవైపు, ఈ సినిమా ప్రీ రిలీజ్ ఫంక్షన్‌లో నిర్మాతలు సంచలన నిర్ణయం తీసుకున్నారు. ప్రతీ టికెట్‌పై రూ.5లను అయోధ్య రామ మందిరానికి విరాళంగా ఇవ్వనున్నట్లు ప్రకటించారు. దీంతో ఈ చిత్రబృందాన్ని మెగాస్టార్ చిరంజీవి అభినందించారు. జనవరి 12న ఈ చిత్రం ప్రపంచ వ్యాప్తంగా విడుదల కానుంది.
