రాజస్థాన్‌(Rajasthan)లో మరో ఘోర ప్రమాదం చోటుచేసుకుంది. జలావర్-అక్లేరాలోని పచోలాలో వ్యాన్ అదుపుతప్పి ట్రాలీని ఢీకొట్టింది. ఈ ప్రమాదంలో తొమ్మిది మంది మృతిచెందారు. వివరాల్లోకి వెళ్తే.. రాజస్థాన్‌లోని దుంగార్ గావ్‌లోని బగ్రీ కమ్యూనిటీకి చెందిన 10 మంది యువకులు మధ్యప్రదేశ్‌(Madhya Pradesh) లోని కిల్చిపూర్‌లో ఓ వివాహ వేడుకకు హాజరయ్యారు.
తిరిగి అర్ధరాత్రి వ్యాన్‌లో వస్తుండగా రాజస్థాన్‌లోని ఝలావర్(Jhalawar)లోని అక్లెరాకు రాగానే ఎదురుగా వస్తున్న ట్రాలీ ఢీకొంది. ఈ ప్రమాదంలో వ్యాన్(Van)లో ఉన్న ముగ్గురు అక్కడికక్కడే మృతిచెందారు. మిగతా ఏడుగురికి తీవ్రగాయాలయ్యాయి. దీంతో స్థానికులు వెంటనే వారిని స్థానికంగా ఉన్న ఆస్పత్రిలో చేర్పించారు.
అయితే వారిలో ఆరుగురు చికిత్స పొందుతూ మృతిచెందారు. మరోవ్యక్తి పరిస్థితి విషమంగా ఉన్నట్లు వైద్యులు తెలిపారు. సమాచారం అందిన వెంటనే ఏఎస్పీ చిరంజిలాల్ మీనా కూడా సంఘటనా స్థలానికి చేరుకున్నారు. పోలీసులు ట్రాలీ డ్రైవర్‌ను అదుపులోకి తీసుకున్నారు. ఈ మేరకు విచారణ చేపట్టారు.
ఝలావర్‌లో అనుమతి లేని వాహనాలు తిరుగుతున్నా వాటిపై ఎలాంటి చర్యలు తీసుకోకపోవడమే ప్రమాదాలకు కారణంగా తెలుస్తోంది. రోడ్డు భద్రత పేరుతో రాష్ట్రంలో కేవలం ఆహార సరఫరా మాత్రమే జరుగుతోంది. ఇదే సమయంలో హెడ్ క్వార్టర్స్ అధికారులు కూడా కేవలం రెవెన్యూ టార్గెట్ వసూళ్లు చేయడంపై పెట్టిన శ్రద్ధ ప్రమాదాల నివారణపై పెట్టడంలేదనే ఆరోపణలు వినిపిస్తున్నాయి.
