Andhra Pradesh

ఎన్నికల మేనేస్టోను వైసీపీ విడుదల చేసింది. తాడేపల్లి(Tadepalli)లో శనివారం నిర్వహించిన మీడియా సమావేశంలో ఏపీ సీఎం జగన్(CM Jagan) మేనిఫెస్టోను విడుదల చేశారు. అనంతరం ఆయన మీడియాతో మాట్లాడుతూ.. గత ఎన్నికల మేనిఫెస్టో(Manifesto)లో ఇచ్చిన హామీలు, అమలు చేసిన విధానాన్ని వివరించారు. ప్రతిపక్ష టీడీపీపై విమర్శలు గుప్పించారు. చంద్రబాబు ఇచ్చిన హామీలు, అమలు చేసిన వాటిని బేరీజు వేసుకోవాలని సూచించారు.

ముఖ్యమైన హామీలు అంటూ చంద్రబాబు పెద్ద మాయ చేశారంటూ విమర్శించారు. రైతుల రుణమాఫీపై మొదటి సంతకం చేస్తానని, పొదుపు సంఘాల రుణాలు రద్దు చేస్తా అని ఒక్క రూపాయి అయినా మాఫీ చేయలేదని దుయ్యబట్టారు. 2014లో అర్హులైన వారికి మూడు సెంట్ల స్థలం ఇస్తామని ఇచ్చారా? అని ప్రశ్నించారు. అదేవిధంగా చంద్రబాబు ఇచ్చిన హామీల్లో ఏ ఒక్కటీ నెరవేర్చలేదంటూ ఒక్కొక్కటిగా సీఎం జగన్ వివరించారు. మాట ఇచ్చి అమలు చేయకపోతే విశ్వసనీయత కోల్పోయినట్లేనని విమర్శించారు.

తాము విద్య, వైద్యం వ్యవసాయ రంగాల్లో కీలక మార్పులు తెచ్చామని తెలిపారు. 58 నెలల్లో రాష్ట్రంలో అనేక మార్పులు చేర్పులు తెచ్చామని వెల్లడించారు. గ్రామాల్లో అవినీతిలేని వివక్ష లేని వలంటీర్ వ్యవస్థను తెచ్చామని చెప్పుకొచ్చారు. చంద్రబాబు కారణంగా పొదుపు సంఘాల అక్క చెల్లెమ్మలు రోడ్డున పడ్డారని విమర్శించారు. నిరుద్యోగ యువతను మోసం చేశారని ధ్వజమెత్తారు. చంద్రబాబు అమలుకు సాధ్యం కానీ హామీలు ఇస్తున్నాడని, సూపర్ సిక్స్.. సూపర్ టెన్ అంటున్నాడని అన్నారు. అవన్నీ అమలు చేయాలంటే రూ.1,21,619కోట్లు ఖర్చు అవుతుందని తెలిపారు.

ఇక, 9 ముఖ్యమైన హామీలతో వైసీపీ మేనిఫెస్టో 2024ను విడుదల చేశారు.. విద్య, వైద్యం, వ్యవసాయం, ఉన్నత విద్య, అభివృద్ధి, పేదలకు ఇళ్లు, నాడు- నేడు, మహిళా సాధికారిత, సామాజిక భద్రతతో వైసీపీ మేనిఫెస్టోను రూపొందించారు. వైఎస్సార్ చేయూత రూ.75 వేల నుంచి రూ. లక్షా 50 వేలకు పెంచనున్నట్లు సీఎం జగన్ వెల్లడించారు. వైఎస్సార్ కాపు నేస్తం నాలుగు దఫాల్లో రూ. 60 వేల నుంచి లక్షా 20 వేల వరకు పెంచనున్నారు.

రైతులకు పంట రుణాలు కొనసాగుతాయని, వైఎస్ఆర్ భీమా క్రింద ఆత్మహత్యలు చేసుకున్న రైతు కుటుంబాలకు అండగా ఉంటామని చెప్పారు. మత్స్య కార భరోసా, వాహన మిత్ర కొనసాగుతాయని, స్వయం ఉపాధి పథకాన్ని కొనసాగిస్తూ వాహన మిత్ర, సొంత టిప్పరు, సొంత లారీ నడిపే వాళ్ళకి కూడా విస్తరిస్తామని చెప్పారు. ఎవరైనా ప్రమాదాల్లో చనిపోతే 10 లక్షల బీమా కలిగిస్తామని భరోసా కల్పించారు. లాయర్లకు లా నేస్తం కొనసాగింపు, చేనేత నేస్తం కొనసాగిస్తామని తెలిపారు.

వైఎస్సార్ ఈబీసీ నేస్తం నాలుగు దఫాల్లో రూ.45 వేల నుంచి రూ.లక్షా 5 వేల వరకు పెంపు, అమ్మ ఒడి రూ.15 వేల నుంచి రూ.17 వేలకు పెంపు, వైఎస్సార్ సున్నావడ్డీ కింద రూ.3 లక్షలు వరకు రుణాలు ఇవ్వనున్నట్టు ప్రకటించారు. అదేవిధంగా రెండు విడతల్లో పెన్షన్ రూ.3,500కు పెంచబోతున్నట్లు తెలిపారు. వైఎస్ఆర్ కల్యాణమస్తు, షాదీ తోఫా కొనసాగిస్తామని పేర్కొన్నారు. పేదలకు ఇళ్ల పట్టాలు కొనసాగింపు, పట్టణ గృహ నిర్మాణ పథకం క్రింద ప్రతీ ఏటా వెయ్యి కోట్లు కేటాయింపు, రైతు భరోసా 13500 నుంచి 16వేలకు పెంచి మూడు దఫాల్లో అందజేస్తామని తెలిపారు.

సీఎం జగన్(CM Jagan) సొంత చెల్లెలు షర్మిల(Sharmila)పై అసభ్యకరంగా మాట్లాడారని టీడీపీ నేత, ఆ పార్టీ పులివెందుల అభ్యర్థి బీటెక్ రవి(BTech Ravi) ఆరోపించారు. కడప(Kadapa)లో నిర్వహించిన మీడియా సమావేశంలో టీడీపీ నేత శ్రీనివాస్ రెడ్డితో కలిసి ఆయన మాట్లాడారు. జగన్ సొంత చెల్లెలు షర్మిల వస్త్రధారణపై జగన్ చాలా అసభ్యకరంగా మాట్లాడారని.. దీన్నిబట్టి ఆయన ఏస్థాయికి ఆయన దిగజారిపోయారో ఆలోచించాలని ప్రజలను కోరారు.

నుదిటికి ప్లాస్టర్‌తో వచ్చి పులివెందులలోనూ సానుభూతి సంపాదించాలనుకుంటున్నారా? అని మండిపడ్డారు. ఇక్కడి ప్రజలు అంత అమాయకులని భావిస్తున్నారా? అని నిలదీశారు. సీఎం సతీమణి భారతి పసుపు వస్త్రాలు ధరించిన సందర్భాలు ఎన్నో ఉన్నాయని, ఇంట్లో ఉన్న ఆ రంగు చీరలను బయట పడేస్తారా? అంటూ బీటెక్ రవి సంచలన వ్యాఖ్యలు చేశారు. సొంత చిన్నాన్న రెండో పెళ్లి గురించి పులివెందులలోనే మాట్లాడం సిగ్గుచేటని విమర్శించారు.

2017 ఎమ్మెల్సీ ఎన్నికల సమయంలోనే జగన్‌కు ఈ విషయం తెలుసని స్పష్టం చేశారు. అయినా అప్పుడు వివేకా వ్యక్తిత్వం గుర్తురాలేదా అని ప్రశ్నించారు. ప్రతిపక్షంలో ఉన్నా తామెన్నడూ వ్యక్తిగత జీవితంపై మాట్లాడలేదన్నారు. వివేకా హత్య కేసులో సీబీఐ నిందితుడిగా చేర్చిన అవినాష్‌కు సీఎం జగన్ ఏవిధంగా సర్టిఫికెట్ ఇస్తారని ఆయన ప్రశ్నించారు. విధిలేని పరిస్థితుల్లోనే చిన్నపిల్లాడు, అమాయకుడని అవినాష్‌ను వెనకేసుకొస్తున్నారని ఆరోపించారు.  జగన్ నామినేషన్‌కు డబ్బు, మద్యం ఇచ్చి జనసమీకరణ చేశారని అన్నారు.

ఎక్కడికి వెళ్లినా పేదలకు, పెత్తందార్లకు మధ్య పోరాటం జరుగుతోందని ఊదరగొడుతున్నారని, రాష్ట్రంలో పెత్తందార్లకు అసలైన ప్రతినిధి సీఎం జగనేనని ధ్వజమెత్తారు. ఎన్నికల అఫిడవిట్‌లో సుమారు రూ.750కోట్ల ఆస్తులు ఉన్నట్లు జగన్‌ పేర్కొన్నారని, ఆయనపై పోటీ చేస్తున్న తన ఆస్తి దాదాపు రూ.80లక్షలు మాత్రమేనని బీటెక్ రవి తెలిపారు. దీన్ని బట్టి పేదవాడు ఎవరో? పెత్తందారు ఎవరో పులివెందుల ప్రజలు ఆలోచించుకోవాలని సూచించారు. సీఎం అహంకారానికి, సొంత నియోజకవర్గం పట్ల చూపిన నిర్లక్ష్య వైఖరికి ప్రజలు తప్పకుండా బుద్ధి చెప్తారన్నారు.

పార్లమెంట్ ఎన్నికలకు సమయం దగ్గర పడుతుండటంతో ఏపీలో రాజకీయ నాయకులు ప్రచార జోరును పెంచారు. ఈసారి ఎలాగైనా అధికారంలోకి రావడానికి అటు అధికార పార్టీ, ఇటు ప్రతిపక్ష పార్టీలు ఉవ్విళ్లూరుతున్నాయి. అయితే, 2024 ఎన్నికల్లో టీడీపీ(TDP), బీజేపీ(BJP), జనసేన(JANASENA) కూటమిగా ఏర్పడి పోటీ చేస్తుండగా..అధికార వైసీపీ పార్టీ మాత్రం సింగిల్‌గా బరిలోకి దిగుతోంది.

ఈ క్రమంలోనే కూటమిలో భాగమైన బీజేపీ తరఫున ప్రచారం చేసేందుకు కేంద్రమంత్రి పీయూష్ గోయల్ (Central minister piyush goyal) గురువారం ఏపీలో పర్యటించారు.ఈ సందర్భంగా ఆయన మీడియాతో మాట్లాడుతూ.. తెలుగునెలకు రావడం గర్వంగా ఉందని చెప్పారు. గత ఐదేళ్ళుగా ఏపీ చాలా వెనుకబడిందని, రైతులను ఏపీ సర్కార్ పూర్తిగా పట్టించుకోవడం మానేసిందన్నారు. గత ఐదేళ్లుగా ఏపీలో అభివృద్ధి నిలిచిపోయిందని, ఇసుక మాఫియా, లాండ్ మాఫియా, లిక్కర్ మాఫియాలకు కేంద్రంగా మారిందని విమర్శించారు.

కేంద్ర ప్రభుత్వం ఇచ్చిన గృహాలు ప్రజలకు చేరలేదని, పోలవరం ప్రాజెక్టు కోసం కేంద్రం రూ. వేల కోట్లు ఇచ్చిందని తెలిపారు. విశాఖ రైల్వే జోన్ ఇచ్చినప్పటికీ భూమిని ఏపీ ప్రభుత్వం కేటాయించలేదన్నారు. మోడీ నాయకత్వంలో భారతదేశం జీడీపీలో 5వ స్ధానానికి ఎగబాకిందన్నారు. 2014, 2019లలో ఇచ్చిన ఏ హామీలను మోదీ మర్చిపోలేదని, రామమందిర నిర్మాణం భారతీయులందరికీ గర్వకారణం అని చెప్పారు.

2047 నాటికి వందేళ్ల స్వాతంత్య్రాన్ని మనం పండుగలా చేసుకోవాలి, ప్రతి ఇంటికీ నీటి సదుపాయం ఉండేలా కేంద్రం పని చేస్తుందన్నారు.
ప్రతీ భారతీయుడి భవితవ్యం కోసం కేంద్రం పని చేస్తోందని వివరించారు. భారతదేశ పారిశ్రామిక అభివృద్ధికి కేంద్రం అత్యున్నత విధానాలు తీసుకొచ్చిందన్నారు. ఈఎన్నికల్లో కూటమి అభ్యర్థులు గెలిచి చంద్రబాబు సీఎం అవుతారని, ఏపీ నుంచి 25 ఎంపీలు తమ కూటమికి వస్తాయన్నారు. ప్రజల మంచి కోసమే మోడీ,చంద్రబాబు, పవన్ కళ్యాణ్‌లు కలిశారని చెప్పుకొచ్చారు.

పార్లమెంట్ ఎన్నికల వేళ ఏపీ రాజకీయాలు(Ap politics) కీలక మలుపులు తిరుగుతున్నాయి. మొన్నటివరకు టీడీపీ(TDP), అధికార వైసీపీ(YCP) మధ్య మాటల యుద్ధం తీవ్రతరం కాగా, తాజాగా కాంగ్రెస్ పార్టీ పీసీసీ చీఫ్ వైఎస్ షర్మిల(YS Sharmila) తన సోదరుడు, సీఎం జగన్(Cm jagan) మీద విమర్శనాస్త్రాలను సంధిస్తోంది. ఒక్క చాన్స్ పేరుతో ఏపీ ప్రజలను జగన్ మోసం చేశారని ఆమె ఎద్దేవాచేశారు.

ఏపీలో పార్లమెంట్ ఎన్నికలతో పాటు అసెంబ్లీకి కూడా ఎన్నికలు జరగనున్న విషయం తెలిసిందే. మే 13న నాలుగో దశలో 175 అసెంబ్లీ, 25 పార్లమెంట్ స్థానాలకు ఒకేసారి ఎన్నికలు జరగనున్నాయి. ఈ క్రమంలోనే ప్రజల ఆశీర్వాదం కోసం రాష్ట్రంలోని ప్రధాన పార్టీలు పోటీ పడి మరీ ప్రచారం చేస్తున్నాయి.

ఈ క్రమంలోనే కాంగ్రెస్ నాయకురాలు వైఎస్ షర్మిల వైసీపీ పార్టీపై తీవ్ర ఆరోపణలు చేశారు. ఒక్క చాన్స్ అంటూ సీఎం జగన్ ఏపీ ప్రజలను మోసం చేశాడన్నారు. కాంగ్రెస్ పార్టీ తరఫున ఆమె విజయవాడ ఎన్నికల ప్రచారంలో పాల్గొని మాట్లాడారు.

గత ప్రభుత్వాలు ఏపీని రాజధాని లేని రాష్ట్రంగా తయారు చేశాయని విమర్శించారు.ఏపీలో రాజధాని ఎక్కడో చెప్పుకోలేని స్థితిలో ప్రజలు ఉన్నారని, రాజధాని లేని రాష్ట్రం ఎక్కడైనా ఉంటుందా? అని ప్రశ్నించారు. ఒక్క చాన్స్ ఇస్తే అమెరికాలోని వాషింగ్టన్ డీసీని మించిన రాజధానిని చేస్తానని చెప్పిన జగన్.. గెలిచాక అసలు రాజధానే లేకుండా చేశారని ఫైర్ అయ్యారు. ఏపీ అభివృద్ధి చెందాలంటే కాంగ్రెస్ పార్టీకి ఓటేసి గెలిపించాలన్నారు.

తన ఇద్దరు చెల్లెల్లో కుట్ర రాజకీయాలు చేస్తున్నారని సీఎం వైఎస్ జగన్మోహన్ రెడ్డి(CM Jagan)  సంచలన ఆరోపణలు చేశారు. ఆయన గురువారం పులివెందుల(Puivendula) లో నామినేషన్ వేశారు. అంతకుముందు ఏర్పాటు చేసిన బహిరంగ సభలో ఆయన మాట్లాడారు. ఏపీ రాజకీయాల్లో చర్చనీయాంశమైన వైఎస్ వివేకానంద రెడ్డి హత్య(YS Viveka Murder) కేసుకు సంబంధించి స్పందించారు.

తన చిన్నాన్నను ఎవరు చంపారో, ఎవరు చంపించారో ఆయనకు, ఆదేవుడికే తెలియాలన్నారు. తన ఇద్దరు చెల్లెళ్లను ఎవరు పంపించి కుట్రలు చేస్తున్నారో ప్రజలందరికీ తెలుసన్నారు. చిన్నాన్నను అతిదారుణంగా చంపి బహిరంగంగా తిరుగుతున్న హంతకుడికి మద్దతు ఇస్తున్నది ఎవరని ప్రశ్నించారు. నాన్నను అన్యాయంగా ఎమ్మెల్సీ ఎన్నికల్లో ఓడించిన వారితోనే సంఖ్యాబలం లేకపోయినా అధికార బలంతో ఓడించిన వారితోనే చట్టాపట్టాలేసుకొని తిరుగుతున్నారని విమర్శించారు.

చిన్నాన్నకు రెండో భార్య ఉన్నమాట, ఆయన రెండో భార్యకు కొడుకు ఉన్నది వాస్తవం కాదా? అని జగన్ అన్నారు. నోటాకు వచ్చినన్ని ఓట్లు కూడా రాని పార్టీ, రాష్ట్రాన్ని విడగొట్టిన పార్టీ కాంగ్రెస్ అంటూ దుయ్యబట్టారు. ఏపీ ప్రజలకు అన్యాయం చేసిన ఆ పార్టీలో చేరిన తన తండ్రి పేరును ఛార్జి షీట్‌లో పెట్టిన వారికి ఓటు వేయడం ఎవరికి లాభమని నిలదీశారు. ఓట్లు చీల్చి కూటమిని గెలిపించాలని చూస్తున్నారని మండిపడ్డారు.

ఇలాంటి వారు వైఎస్సార్ వారసులా లేక చంద్రబాబు వారసులా ప్రజలే సమాధానం చెప్పాలని కోరారు. అవినాష్ తప్పు చేయలేదనే టికెట్ ఇచ్చానని సీఎం జగన్ స్పష్టం చేశారు. ఆయన జీవితం నాశనం చేయాలని కుట్ర చేస్తున్నారంటూ మండిపడ్డారు. ఏ ప్రభుత్వ పథకం మంజూరులోనూ లంచం లేకుండా రూ.2.70కోట్లు మంజూరు చేస్తున్నామన్నారు. కడప, వైఎస్సార్, పులివెందుల ఒక బ్రాండ్ అని అభివర్ణించారు.

వైఎస్సార్ మరణం తర్వాత పదేళ్లు పులివెందులను పట్టించుకున్న వారు లేదన్నారు. ఐదేళ్లలో తానిక్కడ అభివృద్ధి చేసి చూపించానన్నారు. ఇక్కడ కొట్టాలనుకునే వారికి ఓటు ద్వారా గుణపాఠం చెప్పాలని సీఎం జగన్ పిలుపునిచ్చారు. పులివెందుల ప్రజల చిరకాల కోరిక, నాన్న కలలు గన్న మెడికల్ కాలేజ్ నిర్మించామని చెప్పారు. ఈ గడ్డపై చరిత్రలో కనీవినీ ఎరుగని రీతిలో భారీ మెజారిటీ ఇచ్చిన ప్రజలు మరోసారి తిరగరాయాలని జగన్ పిలుపునిచ్చారు.

సార్వత్రిక ఎన్నికల నేపథ్యంలో ఏపీ(AP)లో నేతలు ప్రచార పర్వంలో బీజీగా మారారు. అధికార వైసీపీ, టీడీపీ-జనసేన-బీజేపీ కూటమితో పాటు కాంగ్రెస్ పోటాపోటీగా ప్రచారం చేస్తున్నారు. వైసీపీలో టికెట్ దక్కని పలువురు ఎమ్మెల్యేలు ఇతర పార్టీలోకి వెళ్లగా ఆ పార్టీలో టెన్షన్ మొదలైంది. టీడీపీ కూటమిలో చంద్రబాబు, పవన్ కల్యాణ్ ఎన్నికల ప్రచారంలో కలియతిరుగుతూ ప్రజలతో మమేకమవుతున్నారు.

మరోవైపు వైఎస్ వారసురాలిగా ఎన్నికల బరిలోకి దిగిన వైఎస్ షర్మిల కాంగ్రెస్ పగ్గాలు చేపట్టి ప్రచారంలో దూసుకుపోతున్నారు. దీంతో ఆంధ్రప్రదేశ్ రాజకీయాలు ఆసక్తిని రేకెత్తిస్తున్నాయి. ఎన్నికల సమయం దగ్గర పడుతుండటంతో గెలుపు ఎవరిదనే ఉత్కంఠ నెలకొంది. ఈ నేపథ్యంలో సీఎం జగన్‌కు ఆయన సతీమణి వైఎస్ భారతి(YS Bharathi) ఎన్నికల ప్రచారం చేయడానికి సద్ధమయ్యారు.

సీఎం వైఎస్ జగన్ ప్రాతినిథ్యం వహిస్తున్న పులివెందుల అసెంబ్లీ స్థానం బాధ్యతలను వైఎస్ భారతికి అప్పగించారు. గురువారం నుంచి వారం రోజుల పాటు ఆమె పులివెందులలో ఎన్నికల ప్రచారం చేయనున్నారు. సీఎం జగన్ ఇప్పటికే అన్ని నియోజకవర్గాలను కవర్ చేసుకుంటూ వెళ్తున్నారు. 2014, 2019 ఎన్నికల్లోనూ పులివెందులలో ఎన్నికల ప్రచార బాధ్యతలను భారతి చేపట్టారు.

పులివెందులతోపాటు కడప పార్లమెంట్ పరిధిలోనూ పలు నియోజకవర్గాలలో వైఎస్ భారతి ఎన్నికల ప్రచారం చేయనున్నట్లు పార్టీ వర్గాలు చెబుతున్నాయి. ఈ మేరకు సీఎం జగన్ తో కలిసి గురువారం పులివెందులకు చేరుకున్నారు. సీఎస్ఐ చర్చ్ గ్రౌండ్‌లో ఏర్పాటు చేసిన బహిరంగ సభ ముగిసిన తర్వాత ఉదయం  పులివెందుల అభ్యర్థిగా జగన్ నామినేషన్ దాఖలు చేశారు.