Andhra Pradesh

తిరుమలలో టీటీడీ చేపట్టిన అభివృద్ధి పనులకు తాము వ్యతిరేకం కాదని బీజేపీ రాష్ట్ర అధికార ప్రతినిధి భానుప్రకాష్ రెడ్డి (BJP Leader Bhanuprakash Reddy) తెలిపారు. టీటీడీ ఈవో ధర్మారెడ్డి (TTD EO Dharmareddy) ఇటీవల మీడియాతో మాట్లాడుతూ.. ‘ధైర్యం ఉంటే తిరుమలలోని పార్వేట మండపం వద్దకు వచ్చి నిర్మాణం బాగా లేదని చెప్పగలరా..?’ అంటూ విసిరిన సవాల్‌కు భానుప్రకాష్‌రెడ్డి స్పందించారు. శనివారం మీడియాతో మాట్లాడారు.

తేదీ.. సమయం చెబితే.. అర్కాలజీ అధికారులతో కలిసి పార్వేటి మండపం పరిశీలనకు వస్తానని భాను ప్రకాష్‌రెడ్డి అన్నారు. మరమ్మతుల పేరుతో ప్రాచీన కట్టడాలను టీటీడీ (TTD) కూల్చివేయొద్దని హితవుపలికారు. టీటీడీ చేస్తున్న అభివృద్ధి పనులకు తాము వ్యతిరేకం కాదన్నారు. పురాతన మండపాలను జీర్ణోద్దారణ చేసే సమయంలో టీటీడీ అర్కాలజీ అధికారులను సంప్రదించాలన్నారు. ఆర్కాలజీ అధికారుల సూచనలు మేరకు టీటీడీ జీర్ణోద్ధారణ పనులు చేయాలని భానుప్రకాష్ రెడ్డి డిమాండ్ చేశారు.

అసలేం జరిగిందంటే..  శిథిలావస్థకు చేరుకున్న పురాతన మండపంపై భాను ప్రకాష్‌రెడ్డి అనవసరంగా రాద్దాంతం చేస్తున్నారని టీటీడీ ఈవో ఇటీవల ఏర్పాటు చేసిన సమావేశంలో మండిపడ్డారు. శుక్రవారం ఉదయం తిరుమలలోని అన్నమయ్య భవన్‌లో ఏర్పాటు చేసిన డయల్ యువర్ కార్యక్రమంలో టీటీడీ ఈవో పాల్గొని భక్తుల ప్రశ్నలకు సమాధానలు ఇచ్చారు. తర్వాత మీడియాతో మాట్లాడుతూ.. భానుప్రకాష్ రెడ్డిపై సవాల్ విసిరారు.

భానుప్రకాష్‌రెడ్డి టీటీడీ పాలక మండలి సభ్యుడిగా ఉన్న సమయంలో శ్రీవారి ఆలయంలో అనేక మార్పులు చేశామని ఆయన గుర్తుచేశారు. ఆ సమయంలో అడ్డుచెప్పని భానుప్రకాష్‌రెడ్డి ఇప్పుడు ఎందుకు మండపాల జీర్ణోర్ధరణ పనులకు అడ్డుపడుతున్నారో అర్థం కావడం లేదని ధ్వజమెత్తారు. భానుప్రకాష్‌రెడ్డికి ధైర్యం ఉంటే  పర్వేటి మండపం వద్దకు వచ్చి మండపాన్ని పరిశీలించాలని సవాల్ విసిరారు. ఈ మేరకు భానుప్రకాష్ రెడ్డి స్పందించారు.

జగన్ పాలనలో కరువు కారణంగా ఊళ్లకు ఊళ్లు ఖాళీ అవుతున్నాయని తెలుగుదేశం పార్టీ జాతీయ ప్రధానకార్యదర్శి నారా లోకేష్ (TDP Leader Nara Lokesh) అన్నారు. శనివారం ఆయన మీడియాతో మాట్లాడుతూ.. రైతాంగాన్ని కరువుకు వదిలేసిన కర్కశ ప్రభుత్వం అంటూ వైసీపీ ప్రభుత్వంపై విరుచుకుపడ్డారు. కరువుపై చర్చించని క్యాబినెట్ మీటింగ్ (AP Cabinet Meeting)ఎందుకు? అని ప్రశ్నించారు.

కర్నూలు జిల్లాలో కరువు కారణంగా పనుల్లేక ఊళ్లకు ఊళ్లు ఖాళీ అవువుతున్నాయన్న వార్తలు ఆందోళనకు గురిచేస్తున్నాయన్నారు లోకేశ్. వందేళ్లలో ఈ ఏడాదే అతి తక్కువ వర్షపాతం నమోదైనట్లు గణాంకాలు స్పష్టం చేస్తున్నాయని తెలిపారు. సీఎం జగన్‌కు రాజకీయ ప్రత్యర్థులను తప్పుడు కేసుల్లో ఇరికించడంపై ఉన్న శ్రద్ధ కరువుతో అల్లాడుతున్న రైతాంగాన్ని ఆదుకోవడంపై లేదని మండిపడ్డారు.

అడ్డగోలు దోపిడీపై తప్ప కరువు నివారణ చర్యలు చేపట్టాలన్న సోయి లేదన్నారు. తీవ్ర కరువు పరిస్థితుల్లో రైతాంగం ఉంటే… వారి సమస్యలపై క్యాబినెట్ సమావేశంలో కనీసం చర్చించకపోవడం జగన్ ప్రభుత్వానికి అన్నదాతల సమస్యల పట్ల ఉన్న చిత్త‌శుద్ధికి నిద‌ర్శ‌నమన్నారు. వ‌ర్షాభావ ప‌రిస్థితుల‌పై ప్రభుత్వం కనీసం సమీక్ష చేయకపోవడం బాధ్యతారాహిత్యమని విమర్శించారు.

400 మండలాల్లో కరువు పరిస్థితులు ఉంటే కేవలం 100 మండలాల్లో కరువు అని ప్రభుత్వం ప్రకటించడం దారుణమని లోకేశ్ అన్నారు. క‌రువు కోర‌ల్లో చిక్కి రైతాంగం విల‌విల్లాడుతున్న ఈ కష్టకాలంలో నిబంధనలను సడలించి అయినా యుద్ధప్రాతిపదికన రైతులను ఆదుకోవాలని ప్రభుత్వాన్ని విజ్ఞప్తి చేశారు.

ఏపీ బీజేపీ చీఫ్ దగ్గుబాటి పురంధేశ్వరి(Daggupati Purandeswari)పై వైసీపీ కీలక నేత, ఎంపీ విజయసాయిరెడ్డి(Vijayasai Reddy) మరోసారి ప్రశ్నల వర్షం కురిపించారు. తెలంగాణలో కాంగ్రెస్ పార్టీ(Telangana Congress)కి టీడీపీ పరోక్షంగా మద్దతు ఇవ్వడంతో టీటీడీపీ(TTDP)కి చెందిన ఓ బీసీ నేత రాజీనామా చేశారని అన్నారు. కాంగ్రెస్‌కు మద్దతు పలుకుతోన్న టీడీపీకి మీరు సపోర్ట్ చేస్తున్నారంటే మిమ్మల్ని ఏమనాలని ‘x’(ట్విట్టర్) వేదికగా ప్రశ్నించారు.

‘అమ్మా పురంధేశ్వరి గారూ తెలంగాణలో కాంగ్రెస్‌ పార్టీకి టీడీపీ మద్దతు ఇవ్వడాన్ని భరించలేక అక్కడ బీసీ నాయకుడు పదవికి రాజీనామా చేశాడు. కాంగ్రెస్‌కు నేరుగా మద్దతు పలుకుతున్న టీడీపీకి మీరు ఏపీలో మద్దతు చెబుతున్నారంటే మీది కుటుంబ రాజకీయమా? కుల రాజకీయమా? కుటిల రాజకీయమా’ అని పేర్కొన్నారు. పురంధేశ్వరి పదవుల కోసం బీజేపీలో చేరి ఆ పార్టీని టీడీపీకి తాకట్టు పెట్టడానికి పనిచేస్తున్నారే కానీ ఆమెకు తన పార్టీపై ప్రేమ, అభిమానం లేవన్నారు.

మొదట టీడీపీ, తర్వాత ఎన్టీఆర్ టీడీపీ, తర్వాత బీజేపీ, మళ్లీ కాంగ్రెస్.. మళ్లీ బీజేపీ.. ఇలా వరుసగా నాలుగు సార్లు మారిన చరిత్ర ఆమెదని ఎద్దేవా చేశారు. ఎయిర్ ఇండియా ఇండిపెండెంట్ డైరెక్టర్‌గా ఉండి ఆ విమానయాన సంస్థ అమ్మకం విషయంలో మధ్యవర్తిత్వం చేసి ఆ సంస్థ నుంచి ముడుపులు తీసుకున్నది వాస్తవం కాదా? అని ప్రశ్నించారు. హైదరాబాద్‌ అత్యంత ఖరీదైన విల్లాను ఎలా నిర్మిస్తున్నారు? అని ఎంపీ విజయసాయిరెడ్డి ప్రశ్నించారు.

ఇదిలా ఉండగా.. ఎంపీ విజయసారెడ్డిపై ఏపీ బీజేపీ చీఫ్ పురంధేశ్వరి సీజేఐకి ఫిర్యాదు చేసిన విషయం తెలిసిందే. ఈడీ, ఐటీ, సీబీఐ కేసుల్లో విజయసాయిరెడ్డి పదేళ్లకు పైగా బెయిల్ ఉండి అధికార దుర్వినియోగానికి పాల్పడుతున్నారని ఆరోపించారు. విజయసాయి రెడ్డి బెయిల్ షరతులు ఉల్లంఘిస్తున్నారని ఫిర్యాదులో పేర్కొన్నారు. ఈమేరకు ఎంపీ విజయసాయి రెడ్డిపై విచారణ జరపాలని లేఖలో పురందేశ్వరి కోరారు.