Andhra Pradesh

ప్రభుత్వ సలహాదారు, వైఎస్ఆర్ కాంగ్రెస్ పార్టీ ప్రధాన కార్యదర్శి సజ్జల రామకృష్ణారెడ్డి(Sajjala Ramakrishna Reddy) చంద్రబాబు(Chandrababu)కు హైకోర్టు మధ్యంతర బెయిల్ మంజూరు చేయడంపై హాట్ కామెంట్లు(Hot Comments) చేశారు. తాడేపల్లిలో మీడియాతో ఆయన మాట్లాడారు. చంద్రబాబుకు మధ్యంతర బెయిల్‌పై స్పందించాల్సిన అంశమే కాదన్నారు సజ్జల.

‘ఇది కేవలం ఆరోగ్య కారణాలపై ఇచ్చిన మధ్యంతర బెయిల్.. చెప్పుకోవటానికి కూడా న్యూసెన్స్‌గా ఉండే చర్మ వ్యాధులు చంద్రబాబుకు ఉన్నాయి.. ఇక, చంద్రబాబుకు ఉన్న చర్మ వ్యాధులను ప్రాణాంతకం అన్నట్లు చూపించే ప్రయత్నం చేశారు.. మధ్యంతర బెయిల్ వచ్చిందని సంబురాలు చేసుకునే వారికి సిగ్గుందా..? కేసు మెరిట్ చర్చ జరిగిందా..?’ అంటూ  సజ్జల తీవ్రస్థాయిలో ధ్వజమెత్తారు.

చంద్రబాబుకు కంటి శస్త్ర చికిత్స కు సంబంధించిన అంశానికి మాత్రమే కోర్టు మధ్యంతర బెయిల్ ఇచ్చిందని తెలిపారు సజ్జల రామకృష్ణారెడ్డి.. కానీ, ఎక్కడ గెలిచింది నిజం? స్కిల్ స్కాం జరుగలేదా? పెండ్యాల శ్రీనివాస్ పారిపోవటం వెనుక పాత్ర ఎవరిది? అంటూ ప్రశ్నల వర్షం కురిపించారు.

వైఎస్ఆర్ కాంగ్రెస్ పార్టీ వ్యవస్థలను మేనేజ్ చేస్తున్న విమర్శలకు కౌంటర్ ఇస్తూ.. వ్యవస్థలను మేనేజ్ చేస్తే ఇప్పుడు చంద్రబాబు బయటకు ఎలా వస్తాడు? అని నిలదీశారు. ఇప్పుడు మధ్యంతర బెయిల్ రావటమే మాకు వ్యవస్థలను మేనేజ్ చేసే అలవాటు లేదు అనటానికి ఉదాహరణగా చెప్పారు. కాగా, సాయంత్రం రాజమండ్రి సెంట్రల్ జైలు నుంచి చంద్రబాబు రిలీజ్ కానున్నారు.. అక్కడి నుంచి విజయవాడకు ఆయన రోడ్డు మార్గంలో వెళ్లనున్నారు. ఇప్పటికే చంద్రబాబు కాన్వాయ్ రాజమండ్రికి బయల్దేరి వెళ్లింది.

స్కిల్ డెవలప్మెంట్ కేసులో (Skill Development Case) టీడీపీ అధినేత చంద్రబాబుకు (Chandrababu) మధ్యంతర బెయిల్ మంజూరైంది. నాలుగు వారాల పాటు ఆయనకు హైకోర్టు మధ్యంతర బెయిల్ మంజూరు చేసింది. అనారోగ్య కారణాలరీత్యా చికిత్స నిమిత్తం మధ్యంతర బెయిల్ మంజూరు చేయాలని చంద్రబాబు నాయుడు దాఖలు చేసిన అనుబంధ పిటిషన్‌పై సోమవారం విచారణ జరిపిన హైకోర్టు.. తీర్పును రిజర్వు చేసింది. ఈ మేరకు నేడు న్యాయమూర్తి జస్టిస్ తల్లాప్రగడ మల్లికార్జునరావు తీర్పు వెల్లడించారు.

స్కిల్ డెవలప్‌మెంట్ కేసులో ఏసీబీ కోర్టు చంద్రబాబుకు బెయిల్ ఇచ్చేందుకు నిరాకరించడంతో ఆయన హైకోర్టును ఆశ్రయించారు. అనారోగ్య కారణాల రీత్యా చికిత్స నిమిత్తం మధ్యంతర బెయిల్ మంజూరు చేయాలని అనుబంధ పిటిషన్ వేశారు. అయితే చంద్రబాబు తరఫున సీనియర్ న్యాయవాది దమ్మాలపాటి శ్రీనివాస్ వాదనలు వినిపించారు. మరో సీనియర్ న్యాయవాది సిద్ధార్థ లూథ్రా వర్చువల్‌గా వాదనలు వినిపించారు. రాష్ట్ర ప్రభుత్వం తరఫున ఏఏజీ పొన్నవోలు సుధాకర్రెడ్డి వాదనలు వినిపించారు.

చంద్రబాబు ఆరోగ్యం దృష్ట్యా బెయిల్ ఇవ్వాలని.. కంటికి ఆపరేషన్ చేయాలని వైద్యులు సూచించారని చంద్రబాబు తరఫు న్యాయవాదులు కోర్టును కోరారు. ఇరువైపుల వాదనలు విన్న న్యాయస్థానం తాజాగా చంద్రబాబు నాయుడుకు మధ్యంతర బెయిల్ మంజూరు చేసింది. ఈ మేరకు నవంబర్ 10వ తేదీన రెగ్యులర్ బెయిల్‌పై హైకోర్టు విచారణ జరగనుంది. నవంబర్ 10వ తేదీన రెగ్యులర్ బెయిల్‌పై హైకోర్టు విచారణ జరగనుంది.

సెప్టెంబర్ 9న నంద్యాలలో చంద్రబాబును సీఐడీ అరెస్ట్ చేసిన సంగతి తెలిసిందే. అనంతరం ఆయనను విజయవాడలోని ఏసీబీ కోర్టులో హాజరుపరిచారు. న్యాయస్థానం ఆయనికు రిమాండ్ విధించడంతో చంద్రబాబును రాజమహేంద్రవరం జైలుకు తరలించారు. అప్పటి నుంచి 52 రోజులుగా జైల్లోనే ఉన్నారు చంద్రబాబు. తాజాగా చంద్రబాబుకు హైకోర్టు మధ్యంతర బెయిల్ మంజూరు చేయడంతో ఆయన సాయంత్రం విడుదలయ్యే అవకాశముంది.

చంద్రబాబుకు బెయిల్ మంజూరు కావడంతో టీడీపీ శ్రేణులతో పాటు ఆయన అభిమానులు హర్షం వ్యక్తం చేస్తున్నారు. ఇప్పటికే హైదరాబాద్ నుంచి రాజమహేంద్రవరానికి నారా లోకేశ్, బ్రాహ్మణి చేరుకున్నారు. ఏ తప్పూ చేయని చంద్రబాబును అన్యాయంగా 52రోజులు జైల్లో పెట్టారని టీడీపీ రాష్ట్ర అధ్యక్షుడు అచ్చెన్నాయుడు ఆవేదన వ్యక్తం చేశారు. బాబుకు బెయిల్ మంజూరు చేయడాన్ని స్వాగతిస్తూ భావోద్వేగానికి లోనయ్యారు. చంద్రబాబు జైలు నుంచి బయటకు వచ్చిన వెంటనే వైసీపీ సమాధి కావడం ఖాయమని తెలిపారు.

అయితే, చంద్రబాబుకు హైకోర్టు షరతులతో కూడిన బెయిల్‌ను మంజూరు చేసింది. అవేంటంటే.. రూ.లక్ష విలువైన బెయిల్ బాండ్ (పూచీకత్తు)తో పాటు రెండు ష్యూరిటీలు సమర్పించాలి. ప్రత్యక్షంగా కానీ, పరోక్షంగా కానీ కేసును ప్రభావితం చేసే చర్యలు చేపట్టరాదు. సాక్షులను, కేసుకు సంబంధించిన వ్యక్తులను ప్రభావితం చేయొద్దు. నచ్చిన ఆసుపత్రిలో సొంత ఖర్చులో చంద్రబాబు చికిత్స చేయించుకోవచ్చు. బెయిల్ ముగిసిన తర్వాత సరెండర్ సమయంలో ఆసుపత్రి, చికిత్స వివరాలను సీల్డ్ కవర్‌లో జైలు సూపరింటెండెంట్‌కు అందించాలి. నవంబర్ 28న సాయంత్రం 5గంటల లోపు సరెండర్ అవ్వాలి.

వైసీపీ(YCP)లోకి చేరబోతున్నట్లు వస్తోన్న వార్తలను సీబీఐ మాజీ జేడీ లక్ష్మీనారాయణ(JD laxminarayana) ఖండించారు. ఆ ఊహాగానాల్లో ఎలాంటి నిజం లేదని పేర్కొన్నారు. ఇటీవల శ్రీశైలం(Srishailam)లో వైసీపీ ఎమ్మెల్యే(YCP MLA) శిల్ప చక్రపాణి రెడ్డిని జేడీ లక్ష్మీనారాయణ కలిసిన విషయం తెలిసిందే. తాను చదువుకున్న పాఠశాల పూర్వ విద్యార్థుల సమావేశంలో పాల్గొనేందుకు లక్ష్మీనారాయణ శ్రీశైలం వెళ్లగా.. అక్కడే పర్యటిస్తున్న ఎమ్మెల్యే శిల్ప చక్రపాణి రెడ్డిని కలిశారు.

పూర్వ విద్యార్థుల సమావేశానికి రావాలంటూ ఎమ్మెల్యేను సీబీఐ మాజీ జేడీ ఆహ్వానించారు. అదే సమయంలో ‘జగనన్న ఆరోగ్య సురక్ష’ ప్రోగ్రాం జరుగుతుండగా అందులో పాల్గొన్న జేడీ.. సీఎం వైఎస్ జగన్ పరిపాలనపై ప్రశంసల వర్షం కురిపించారు. అయితే.. ఏపీ సీఎంను వివిధ కేసుల్లో అరెస్టు చేసిన సీబీఐ మాజీ జేడీ.. అదే జగన్ పరిపాలనను అభినందించడం పట్ల సర్వత్రా చర్చగా మారింది.

అక్కడ జేడీ ఏమన్నారంటే.. నాడు–నేడు కింద ప్రభుత్వ పాఠశాలలు చాలా అందంగా ముస్తాబయ్యాయని, అంగన్‌వాడీలలో పిల్లలకు పౌష్టికాహారం రాగిజావ ఇవ్వడంపై సీబీఐ మాజీ జేడీ లక్ష్మీనారాయణ ప్రశంసలు కురిపించారు. జగనన్న ఆరోగ్యసురక్ష మంచి ప్రోగ్రామ్ అని కొనియాడారు. ఎవరైతే విద్యా, వైద్య రంగాలలో మంచి పనులు చేస్తారో.. వారికి అంతే స్థాయిలో ఫలితం కూడా ఉంటుందన్నారు.

జగన్ ప్రభుత్వంపై జేడీ ప్రశంసలు కురిపించడంతో ఆయన వైసీపీలో చేరతారనే ఊహాగానాలు మొదలయ్యాయి. ఈ నేపథ్యంలో జేడీ లక్ష్మీనారాయణ క్లారిటీ ఇచ్చారు. ‘శ్రీశైలం ఎమ్మెల్యే శిల్పా చక్రపాణి గారిని మా పూర్వ విద్యార్థుల కార్యక్రమానికి ఆహ్వానించడానికి కలిశా. అక్కడే వైద్య పరీక్షలకు సంబంధించిన ప్రభుత్వ కార్యక్రమానికి ఆయన నన్ను ఆహ్వానించారు. ఆ సమావేశంలో నేను వైద్య శిబిరాలు, నాడు-నేడు కార్యక్రమాలను అభినందించాను. అంతమాత్రాన నేను అధికార పార్టీలో చేరుతున్నట్లు కాదు’ అని జేడీ ట్వీట్ చేశారు.